Kinguppaat akitsuusiissutaasa tiguniarneqartarnerat pillugu Namminersornerullutik Oqartussat nalunaarutaat nr. 15, 3. december 1983-imeersoq.
Inuutissarsiutigalugu aalisarneq, piniarneq aallaaniarnerlu pillugit Inatsisartut inatsisaanni nr. 4-mi 13. oktober 1980-imeersuni §§ 3, 5 aamma 11, imm. 2 naapertorlugit, kingusinnerpaamillu allanngortinneqartumi Inatsisartut inatsisaatigut nr. 12-ikkut 1. novenber 1982-imeersukkut, kinguppattat kalaallit tunisassiorfiini suliarineqartussatut nunnigunneqanngitsut akitsuusiissutaasa tiguniarneqartarnerat akiligassaajunnaarsinneqartarnerallu pillugit aalajangersakkat imatut aalajangersarneqarput.
§ 1. Nalunaarummi pineqarpoq angallatit 80 BRT taakkulu qaangerlugit angissusillit, kinguppattaminnik uutitigaanngitsunik kalaallit tunisassiorfiini suliareqqitassanngorlugit tamakkiisumik nunnigussisartuunngitsut aamma nalunaarut nr. 12, 3. november 1983-imeersoq tunngavigalugu 1984-imi kingupanniarsinnaanermut akuersissummik tunineqarsimasut atorlugit kinguppaaniarnermi piginneqatigiiffinnit inunnillu ataasiakkaanit akitsuusiissutit tiguniarneqartarnerat.
§ 2. 1984-imi aningaasatigut inatsimmi 1984-imut akitsuusiissut kg-mut kr. 0,80-imut aalajangerneqarpoq kinguppattanut Kalaallit Nunaanni tunisassiorfinni suliareqqitassanngorlugit tunineqartuunngitsunut.
§ 3. Akitsuusiissut qaammatit pingasut qaangiunnerisigut akiliuteqartitsigallarnikkut tiguniarneqartassaaq, tassani tunngavigineqarlutik pisat nunami suliareqqitassanngorlugit nunnigussassaanngitsut.
Imm. 2. Kvartalimut siullersmut akitsuusiissutip 50%-ia 15. maj 1984 akilerneqassaaq.
Imm. 3. Kvartalit aappaannut akitsuusiissutip 80%-ia 15, august 1984 akilerneqassaaq.
Imm. 4. Kvartalit pingajuannut akitsuusiissutip 80%-ia 15. november 1984 akilerneqassaaq.
Imm. 5. Kvartalit sisamaannut ukiumut akiliinermut atatillugu akiligassaq 15. februar 1985 akilerneqassaaq.
Imm. 6. Akiligassap akilerneqartussanngornerata kingorna ullut 30-t qaangiutsinnagit akiligassaq akilerneqarpat akiliineq akiliiffissamik eqquinertut naatsorsuutigineqassaaq.§ 4. Paasissutissat kingusinnerusukkut saqqummiunneqartut takutippassuk, tassunga ilanngullugu tunisaqarnermi naatsorsuuteqarnermilu paasissutissat, § 3, imm. 5 tunngavigalugu akitsuusiissutinik naatsorsuinermi 1984-imi pisat annertussusiinik paasissutissat eqqunngitsut naatsorsorluagaanngitsulluunniit tunngavigineqarsimasut, akuersissummik piginnittoq 1985-ip naanissaa tikillugu inaarutaasumik akiliuteqartinneqarsinnaavoq.
§ 5. Akuersissummik piginnittoq kinguppanniareernerit tamaasa pisussaatitaavoq Inuutissarsiornermi Pisortaqarfimmut pisaminut paasissutissanik nassiussaqassalluni. Paasissutissani takuneqarsinnaassapput pisat tamakkerlugit qanoq annertutiginerat taavalu taakkunanit kinguppaat qanoq annertutigisut uunneqanngitsut Kalaallit Nunaanni tunisassiorfinnut nunnigunneqarsimanersut.
Imm. 2. Akuersissummik piginnittoq nalunaaruteqanngitsoorpat amigartumilluunniit nalunaaruteqarpat akitsuusiissutissaq akiliutigineqarallartorlu pisassatut akuersissutit pisarissamaakkalluunniit tunngavigalugit naatsorsorneqarsinnaapput.§ 6. Ajutoornermi, sivisuumik amutsivimmiinnermi imaluunniit assigisaanik immikkut nammineq pisussutiginngisamik pisoqarsimatillugu Inuutissarsiornermi Naalakkersuisup akuersissutigisinnaavaa tamakkiisumik ilaannakortumilluunniit akitsuusiissummik akiliinngitsoorsinnaanissaq.
Imm. 2. Aalisarnermi aningaasarsiassatigut akitsuusiissuteqarfissatigut piffissami akitsuusiissuteqarfissami periarfissat ajortunngoriangaarsimatillugit Inuutissarsiornermi Naalakkersuisoq aamma taamatut akuersissuteqarsinnaavoq tamakkiisumik ilaannakortumilluunniit akitsuusiissummik akiliinngitsoornissamik.
Imm. 3. Imm. 1 aamma 2 tunngavigalugit qinnuteqaatit akuersissuteqarfigineqarsinnaanerat tunngavissaqanngippat immikkut ittutigut Inuutissarsiornermi Naalakkersuisoq akitsuusiissutip akilerneqarnissaanik kinguartitsisinnaavoq.§ 7. Akuersissut Inuutissarsiornermi Pisortaqarfimmit arsaarinnissutigineqarsinnaavoq akitsuusiissutip akilerneqartussanngorsimasup akilerneqarnissaata tungaanut.
§ 8. Nalunaarutip unioqqutinneqarnera mianersoqqusinermik akiliisitaanermilluunniit kinguneqarsinnaavoq. Suliassarlu ingerlanneqassaaq Inatsisartut inatsisaanni nr. 4-mi 13. oktober 1980-imeersumi inuutissarsiutigalugu aalisarneq, piniarneq aallaaniarnermullu tunngasumi maleruagassat tunngavigalugit.
§ 9. Nalunaarut 1. januar 1984 atortuulissaaq.
Nuuk ulloq, 3. december 1983
Lars Emil Johansen/
Emil Abelsen