Kalaallit Nunaata Toqqorsivia (Grønlands Arkiv) suliffiillu pisortaqarfiit toqqorsiveqarnerannut tunngasut pillugit inatsisartut inatsisisaat nr. 14 ulluligaq 1. november 1982.
Kapitali 1.
Siunertat§ 1. Kalaallit Nunaata Toqqorsiviata katersorlugilluaaqqissuullugillu toqqortarissavai aammalu allaatigisassallugit Kalaallit Nunaata inui inooqatigiillu pillugit paasissutissat pisortat suliffeqarfiisa inuinnaallu toqqorsiviiniittut.
Imm. 2. Kalaallit Nunaata Toqqorsiviata paasissutissat katersugaatiminiittut ilisimatuutut misissuisunut aammalu kikkunnulluunniit soqutiginnittunut atugassiissutigissavai aammalu Danmarkimi nunanilu allani toqqorsivinniit paasissutissanik tamakkua assinginik piniartassalluni.
Imm. 3. Kalaallit Nunaata Toqqorsivia Kalaallit Nunaanni kulturimut tunngasumik suliffeqarfiit allat suleqatigalugit ilisimatusarnermut tunngasumik suliaqartassaaq katersugaatiminullu tunngassutilinnik nassuiaasiortassalluni.
Imm. 4. Kalaallit Nunaata Toqqorsiviata Danmarkimi nunanilu allani suliffeqarfiit immisut ittut suleqatigissavai.
Kapitali 2.
Aaqqissuunneqarnera§ 2. Namminersornerullutik Oqartussat Kalaallit Nunaata Toqqorsivia pilersissavaat ingerlanneranullu akisussaassallutik.
Imm. 2. Toqqorsiviup sulinissaanut maleruaqqusanik erseqqinnerusunik kulturimut atuartitsinermullu tunngasunut naalakkersuisoq aalajangersaassaaq.§ 3. Namminersornerullutik Oqartussat toqqorsivimmik ulluinnarni ingerlatsisussamik nunamut tamarmut atortussamik atorfinitsitsissapput.
Kapitali 3.
Pisortat suliffeqarfiisa toqqorsiveqarnerannut tunngasut§ 4. Pisortat suliffeqarfiinik inatsisartut inatsisaanni matumani pineqartut tassaapput Namminersornerullutik Oqartussat suliffeqarfii, Kalaallit Nunaanni kommunet aammalu suliffeqarfiit imminnut pigisut inuinnaallu suliffeqarfiutaat tamakkiisumik imaluunniit annertuumik pisortat akiligaannik ingerlanneqartut imaluunniit pisortat sinnerlugit sulianik ingerlatsisut.
§ 5. Pisortat suliffeqarfiisa toqqortaat allagaatit tassaapput allaganngorlugit suliat aammalu paasissutissat allat suliffeqarfiup sulisuisalu suliaminnut atatillugit pilersissimallugilluunniit pissarsiarisimasaat.
Imm. 2. Suliffeqarfiit isumagissavaat allagaatimik toqqortat isumannaatsumik aammalu kultureqarnermut atuartitsinermullu tunngasumik naalakkersuisuutitap maleruaqqusaliai malillugit toqqortarineqarnissaaty tak. § 2, Imm. 2. Kommunenut tunngasunik maleruagassiorneq pisassaaq Kalaallit Nunaanni Kommunet kattuffiata isumaqatiginiareerneratigut.§ 6. Kalaallit Nunaata Toqqorsivia toqqortanut tunngasutigut, tassunga ilanngullugit aamma qarasaasiat atorlugit paasissutissianut, sulianik pilersitsinermut, journaliseeriinermut il.il. tunngatillugu apeqqutinut pisortat suliffeqarfiinut siunnersuisuussaaq.
Imm. 2. Pisortat suliffeqarfiisa Kalaallit Nunaata Toqqorsivia journaliliarissamaakkaminnik, toqqorsiveqarnerminnut pilersaarutiminnik inillu toqqorsiviliariniakkatik pillugit ilisimatittassavaat. Kalaallit Nunaata Toqqorsivia tamakku pillugit maleruagassiussaaq.§ 7. Allagaatinik toqqortanik taamaallaat atorunnaarsitsisoqartassaaq Kalaallit Nunaata Toqqorsiviata akuersisinneqareerneratigut imaluunniit immikkut ittumik inatsisiliat naapertorlugit maleruaqqusaliat malillugit.
Imm. 2. Allagaatit toqqortat suliffeqarfiup suliassaasa suliarineqarnissaannut pingaarutaarussimasut atorunnaarsitassatullu aalajangiiffigineqarsimasut aserorterneqartassapput susassaqanngitsunit pissarsiarineqarsinnaajunaarlugit.§ 8. Suliffeqarfiit allagaatitik toqqortat taamaallaat Kalaallit Nunaata Toqqorsivianut tunniussinnaavaat. Tunniussisoqartassaaq kulturimut atuartitsinermullu naalakkersuisup piffissaliussai malillugit, tak. § 2, Imm. 2. Tunniussinissamulli pisussaanermi ilaatinneqarsinnaanngillat allagaatit toqqortat suliffiup sulinerani atorneqartuartut.
Imm. 2. Suliffeqarfiit atorunnaartut allagaataat toqqortat piaarnerpaamik tunniunneqartassapput suliffeqarfinnit suliassanik tigusisunit atorneqassanngikkunik.
Imm. 3. Allagaatit toqqortat tunniunneqartut poortorneqarsimallutillu, nalunaaqutserneqarsimallutillu nalunaarsorneqassapput kulturimut atuartitsinermullu naalakkersuisup maleruaqqusaliai malillugit, tak. § 2, Imm. 2. Suliffeqarfiup tunniussisup allagaatit toqqortat tunniunneqartut assartornerannut aningaasartuutit akilissavai.
Imm. 4. Suliffeqarfiit allagaatit toqqortat tunniunneqarsimasut suliaminnut atatillugu attartorsinnaavaat.§ 9. Pisortat suliffeqarfiisa allagaataat toqqortat pisiarineqarsinnaanatillu, tunineqarsinnaanatillu tunissutigineqarsinnaanngillat. Piginerarneqarsinnaanngillat.
Imm. 2. Pisortat suliffeqarfiisa allagaataat toqqortat inuinnarnit pissarsiarineqarsimasut akissarsissutiginagit Kalaallit Nunaata Toqqorsivianut tunniunneqassapput.
Kapitali 4,
Inuinnaat toqqorsivii§ 10. Kalaallit Nunaata Toqqorsiviata katersorlugillu, igoorarlugillu isumannaallisassavai inuinnaat allagaataat toqqortat ilisimatusarnermut kulturimullu pingaaruteqartunik paasissutissartallit inunnit ataasiakkaaneersut, inuinnaat suliffeqarfiutaanneersut aammalu Kalaallit Nunaanni inuutissarsiutitigut suliffeqarfinneersut.
§ 11. Allagaatit toqqortat inuinnarnit pigineqartut Kalaallit Nunaata Toqqorsivianit oqaluttuarisaanermut tunngassutilittut nalunaarsorneqarsinnaapput ilisimatuutut misissuineq imaluunniit kulturimut tunngasut pissutigalugit kalaallit soqutigisaannut tunngassuteqaraangamik. Taamatut nalunaarsuinikkut allanngortinneqassanngilaq inuinnaat piginnittussaanerat, piginnittulli Toqqorsivik pinngitsoorani nalunaarfigisussaavaa pigineqarnerannut tunngasutigut aammalu toqqortarinerannut tunngasutigut allanngortitsiniaruni.
Imm. 2. Allagaatit toqqortat nalunaarsorneqarsimasut tuniniarneqarpata Kalaallit Nunaata Toqqorsivia allanit siulliulluni pisisinnaatitaavoq.
Imm. 3. Allagaatit toqqortat nalunaarsorneqarsimasut tuniniarneqarpata imaluunniit Kalaallit Nunaanniit anninniarneqarpata Kalaallit Nunaata Toqqorsivia pisinnaatitaavoq anninneqartinnagit assilillugit nuutinnissaannut.
Imm. 4. Immikkortumi 1-imi nalunaaruteqarnissamut pisussaatitaaneq sumiginnarneqarpat imaluunniit allagaatit toqqortat nalunaarsorneqarsimasut aallarunneqarnissaat, aserorterneqarnissaat ajoquserneqarnissaalluunniit aarlerinaateqarpat Kalaallit Nunaata Toqqorsiviata pisassaatut arsaarinnissutigeqquneqarsinnaapput.
Kapitali 5,
Allagaatit toqqortat atorneqarnerat§ 12. Allagaatit toqqortat Kalaallit Nunaata Toqqorsivianiittut ilisimatusartunut aammalu kikkunnulluunniit soqutiginnittunut atorneqarsinnaatinneqassapput maleruaqqusat kulturimut atuartitsinermullu naalakkersuisup aalajangersagai naapertorlugit, tak. § 2, Imm. 2.
Imm. 2. Atorneqarsinnaatitsinermik maleruaqqusatigut anguniarneqassapput pisortat inuinnaallu pisinnaatitaasut soqutigisaasa narrunarsagaannginnissaat, tassunga ilanngullugu inuit ataasiakkaat narrunarsarneqartussaannginnerat.
Imm. 3. Suliffeqarfiit inuillu allagaatinik toqqortanik tunniussinerminni piumasaqaatigisinnaavaat atorneqarsinnaanissaat pillugu immikkut ittunik maleruaqqusaliortoqarnissaa.
Imm. 4. Qarasaasiat atorlugit nalunaarsuusiat inunnut tunngasunik paasissutissartallit toqqorsivimmut nuunneqarneranni isumannaallisaatit kikkunnilluunniillu takuneqarsinnaanissaat pillugu aalajangersakkat immikkut ittut malinneqassapput, tak. nalunaarsukkat pillugit aalajangersakkat sukkulluunniit atuuttut.§ 13. Kalaallit Nunaata Toqqorsiviata Allagaatinik toqqortanik atuisut tamakkua qanoq atorneqarnissaannik ilitsersortassavai.
Imm. 2. Erseqqinnerusumik isumaqatigiissuteqarnikkut allagaatit toqqortat Kalaallit Nunaanni sumiluunniit atuakkanik atorniartarfinni assigisaannilu atugassatut atukkiunneqarsinnaassapput.
Kapitali 6,
Aalajangersakkat allat.§ 14. Naalakkersuisut naalagaaffimmi oqartussat isumaqatigiissuteqarfigisinnaavaat Kalaallit Nunaanni suliffeqarfinni suliassaataannik taamaattunik suliaqarnissaq pillugu.
§ 15. Inatsisartut inatsisaat una atulerpoq 1. november 1982.
Jonathan Motzfeldt/
Thue Christiansen