Inuutissarsiutigalugu aalisarneq, piniarneq aallaaniarnerlu pillugit Inatsisartut inatsisaata nr. 4, 13. oktober 1980-imeersup Inatsisartut inatsisaatigut nr. 5-ikkut 22. oktober 1981-imeersukkut allanngortinneqartup allanngortinneqarnera pillugu Inatsisartut inatsisaat nr. 12, 1. november 1982-imeersoq.

 

§ 1.

Inuutissarsiutigalugu aalisarneq, piniarneq, aallaaniarnerlu pillugit inatsimmi nr. 4-mi 13. oktober 1980-imeersumi Inatsisartut inatsisaatigut nr. 5-ikkut 22. oktober 1981-imeersukkut allanngortinneqarturai imaattunik allannguuteqartitsineqassaaq:

1. § 3, imm. 4 atorunnaarsinneqarpoq, taarsiullugulu ilanngunneqarluni:
"Imm. 4. Akuersissummittaaq tunisinissamut tunngavigineqassaaq Inatsisartut aalajangigaannik pisanut kalaallit tunisassiorfiinut tulaanneqartussaanngitsunut landskassemut akileraartarnissaq. Akileraarut aningaasanut inatsisip ukiumoortumik akuersissutigineqartarneranut atatillugu aalajangerneqassaaq. Kilisaatit pisortat pigisaat akileraaruteqartitaanngillat."

2. § 3, imm. 6 atorunnaarsinneqarpoq, taarsiullugulu ilanngunneqarluni:
"Imm. 6. Inuutissarsiornermi Naalakkersuisoq akileraarutip imm. 4-mi pineqartup tiguniartarnera pillugu erseqqinnerusunik aalajangersagaliussaaq, aalajangersagaliorlunilu akileraarutip tamakkiisumik ilaannakortumilluunniit atorunnaarsinneqarsinnaaneranut, piffissami akileraarfissami aalisarneq akileraarusigaq ajortunngoriangaatsiarsimappat."

3. § 3, imm. 7-itut ilanngunneqassaaq:
"Imm. 7. Inuutissarsiornermi Pisortaqarfiup akuersissut arsaarinnissutigisinnaavaa akileraarutip akiligassanngorsimasup akilerneqarnissaata tungaanut."

 

§ 2.

Inatsit tamanut saqqummiunneqarnermini atortuulissaaq.
Imm. 2. Inatsisartut inatsisaanni nr. 5, 22. oktober 1981-imeersumi taavalu Namminersornerullutik Oqartussat nalunaarutaanni nr. 19 25. november 1981-imeersumi maleruagassat atortuuginnassapput akuersissutinut 1982-imi tunniunneqarsimasunut.

Nuuk, ulloq 1. november 1982.

Jonathan Motzfeldt

/

Lars Emil Johansen