Kommuni uninngavigisaq aamma kommuni najugarivitaq il. il. pillugit Inatsisartut peqqussutaat nr. 13, 1. november 1982-imeersoq.
Kapitali 1.
Aalajangersakkat nalinginnaasut.§ 1. Peqqussummi matumani malittarisassatigut aalajangersarneqarpoq isumaginninnermi aalajangersakkat Kalaallit Nunaanni kommuninik pisussaatitsigaangata kommuni sorleq pisussaatinneqartutut naatsorsuunneqartassanersoq.
§ 2. Kommunitut uninngavigisatut isigineqassaaq kommuni inuup uninngavigisaa, qanorlumnniit sivikitsigisumik uninngavigineraa apeqqutaatinnagu.
Imm. 2. Kommunitut najugarivitatut isigineqassaaq kommuni inuup aalajangersimasumik najugaqarfigisaa, takuulli § 3.
Imm. 3. Kommunitut akiliisussavittut isigineqassaaq kommuni aningaasartuutissanngortitaasimasunik akiliisussaviusoq.
Imm. 4. Kommunitut iliuuseqartussatut isigineqassaaq kommuni Inatsisartut isumaginninnermut peqqussutaasa arlaat tassungaluunniit sanilliunneqarsimasinnaasut allat tunngavigalugit iliuuseqalertornissamut pisussaatitaasoq.§ 3. Meeqqap najugarivitamisut kommuneraa imminut angajoqqaatut oqartussaaffiginnittup najugarivitatut kommunia.
Imm. 2. Inuit 18-inik ikioqalereersimasut ilinniagaqarnertik pissutigalugu kommunimut allamut nuussimagunik ilinniarnertillu ukioq ataaseq sinnernagu sivisussuseqassapput kommuni najugarivitartik pigiinnassavaat. Ilinniarnerat ukioq ataaseq sinnerlugu sivisussuseqassappat kommuni ilinniagaqarnerminni najugaat aallaqqaataaniilli kommunitut najugarivitaattut isigineqassaaq.
Kapitali 2.
Pisortanit ikiorsiissutit§ 4. Pisortanit ikiorsiissutit pillugit peqqussummi aalajangersakkat maiillugit ikiorsiissutit kommunimit najagarivitamit akiliisussaviuutigisumit tunniunneqartassapput, taamaattorli takukkit immikkoortoq 2 aamma § 5.
Imm. 2. Inuk pisortanit inissitaasimappat kommuni inissinneqannginnermini najugarivitaa akiliisussavittut isigineqassaaq. Inissiineq naareersoq inuk pineqartoq kommunimi nuutsinneqarfigisimasamiiginnarpat kommuni najugarivitaa ukiuni marlunni akiliisussavittut isigineqassaaq.§ 5. Nukinginnartumik ikiorsiissutit kommunimit uninngavigisamit akiliisussaviuutigisumit tunniunneqartassapput, taamaattorli takuuk immikkoortoq 2.
Imm. 2. Kommuni uninngavigisaq pisortanit ikiorsiissutit pillugit peqqussummi aalajangersakkat malillugit nukinginnartoqartillugu utertitassanngorlugit ikiorsiissuteqarnissamut pisinnaatitaasimappat kommuni najugarivitaq akiliisussatut isigineqassaaq.
Kapitali 3.
Meeqqanut inuusuttunullu ikiorsiissutit.§ 6. Meeqqamut isumagineqartumut angajoqqaatut oqartussaassuseqartoq Kalaallit Nunaanni najugaqarpat najugaqarallarpalluunniit taassuma kommuni najugarivitaa akiliisussavittut isigineqassaaq.
Imm. 2. Angajoqqaatut oqartussaassuseqartoq Kalaallit Nunaanni najugaqanngippat Kalaallit Nunaanniluunniit aallaqqagallarpat kommuni meeqqap uninngavigisaa akiliisussavittut isigineqassaaq. Angajoqqaat Kalaallit Nunaannit aallarnissaat sioqqullugu meeraq pisortanit angerlarsimaffiup avataanut inissinneqarsimappat kommuni angajoqqaavisa kingullermik najugarivitaat akiliisussavittut isigineqassaaq. Angajoqqaat Kalaallit Nunaannit aallarnerata kingorna meeraq angerlarsimaffiup avataanut inissinneqarsimappat meeqqap inissinneqarnermi nalaani kommuni uninngavigisaa akiliisussavittut isigineqassaaq.
Imm. 3. Meeqqap angajoqqaavi kommunimi ataatsimi najugaqanngippata, tamarmilli meeqqamut angajoqqaatut oqartussaassuseqarlutik, kommuni meeqqap angajoqqaami arlaat najorlugu uninngavigisaa akiliisussavittut isigineqassaaq. Meeqqap angajoqqaami arlaannaalluunniit najunngippagu ataataasup kommuni najugarivitaa akiliisussavittut isigineqassaaq. Meeraq pisortanit angerlarsimaffiup avataanut inissinneqarsimappat kommuni inissiisoq angajoqqaat arlaat tassani najugaqaannarpat akiliisussavittut isigineqassaaq. Angajoqqaat tamarmik konmunimi inissiisumi najugaqarunnaarsimappata kommuni ataataasup najugarivitaa akiliisussavittut isigineqassaaq.§ 7. Kommuni meeqqap uninngavigisaa meeqqanik inuusuttunillu ikiorsiisarneq pillugu Inatsisartut peqqussu-
taat naapertorlugu iliuuseqartussatut isigineqassaaq.
Kapitali 4.
Utoqqalinersiutillit, inuutissarsiorsinnaajunnaarnersiutisiallit il.il.§ 8. Utoqqalinersiutit, inuutissarsiorsinnaajunnaarnersiutit, meeqqat tapisiaat, meeqqanut akilersuutit kiisalu atuartunut angerlarsimaffimminni najugaqqrtunut atuarnermut tapiissutit taakkunannga pisartaqarsinnaatitaasup kommunimit najugarivitaanit akilersinneqartassapput, taannalu aningaasartuutit pineqartut ilaannik kommunit aningaasartuutigisassaanik akiliisussavittut isigineqassaaq.
§ 9. Inuk kommunip najugarivitami avataani peqqinnissamik isumaginnittoqarfiup paaqqinninnermut immikkoortortaasa arlaannut utoqarnilluunniit paaqqinnittarfimmut inissinneqarpat kommuni najugarivitaa akiliisussavittut isigineqassaaq.
Kapitali 5.
Naggasiutaasumik aalajangersakkat§ 10. Inunnik timimikkut eqqarsartaatsimikkullu annertuumik innarluutilinnik ikiuineq pillugu Inatsisartut peqqussutaat naapertorlugu kommunit Isumaginninnermi Pisortaqarfimmut ikiuuttussaatitaanerat malillugu ikiuinissaq kommunimit najugarivitamit isumagineqartussaavoq, kisiannili immikkut ittunik pissutissaqartillugu aammattaaq kommunimut uninngavigisamut tamanna isumagisassanngortinneqarsinnaavoq.
§ 11. Isumaginninnermi Naalakkersuisoq kommunit akunnerminni imminnut pisussaaffii pillugit malittarisassanik ilassutaasunik aalajangersaasinnaavoq, aammalu kommunit akunnerminni pisussaaffitik pillugit isumaqatigiinngissuteqartillugit inaarutaasumik aalajangiisassalluni.
§ 12. Peqqussut manna atulerpoq 1. januar 1984.
Kalaallit Nunaanni Namminersornerullutik Oqartussat, 1. november 1982,
Jonathan Motzfeldt/
Moses Olsen