Meeqqat atuarfianni klassini qullerni atuartut atuarnermut tapiiffigineqartarnerat pillugu Inatsisartut peqqussutaat nr. 5, 28. oktober 1982-imeersoq.
§ 1. Peqqussut manna naapertorlugu meeqqat atuarfianni ukiut qulingiluaanni kingusinnerusunilu atuartunut atuarnermut tapiissuteqartoqartassaaq.
§ 2. Ukiut tamaasa qaammatisiutit malillugit ukiup naannginnerani Inatsisartut ukiumi atuarfiusumi tullissami atuarnermut tapiissutisissagaanni pilersuisuusut isertitaasa killigisassaat kiisalu tapiissutit annertussusissaat aalajangersartassavaat.
Imm. 2. Atuarnermut tapiissutit annertussusii il. il. ukiut tamaasa Inatsisartunit tamanut nalunaarutigineqartassapput.§ 3. Tapiissuteqarnissami makku piumasarineqarput:
1) Atuartoq imaluunniit taassuma pilersuisorpiaa qallunaani inuttaaqataasutut piginnaatitaaffeqassasoq. Kisiannili piumasarineqartoq tamanna Danmarkip naalagaaffinnik allanik isumaqatigiissutaanut isumaqatigiissutigiumaagaanulluunniit naapertuutinngikkuni malinneqassanngilaq,
2) atuartoq tamakkiisumik pisortanit pilersorneqassanngitsoq,
3) atuartoq atuarnerminut malinnaassasoq aamma
4) atuartoq tapiiffigineqarnissamik pisariaqartitsisutut isigineqarsinnaassasoq, takuuk § 2, immikkoortoq 1.§ 4. Tapiissutit atuartup pisassarai. Tapiissutit qinnuteqaatitaqanngitsumik atuartup pilersuisorpiaanut tunniunneqartassapput.
Imm. 2. Tapiissutit ukiumi atuarfiusumi qaammatini qulini qaammatit tamaasa utimoortumik tunniunneqartassapput. Qaammatini atuartup atuarnerminut malinnaanngiffiini tapiissutit tunniunneqartassanngillat.
Imm. 3. Kultureqarnermi atuartitsinermilu Pisortaqarfiup Isumaginninnermi Pisortaqarfik isumaqatiginiareerlugu atuartoq qanoq ilisukkut atuarnerminut malinnaasutut isigineqartassanersoq pillugu malittarisassat erseqqinnerusut aalajangersartassavai.§ 5. Tapiissuteqartarnermik aaqqissuussineq kommunalbestyrelsinik aqunneqassaaq.
Imm. 2. Kommunalbestyrelsip aalajangiineri nalunaarutigineriniit sapaatip akunneri sisamat qaangiutsinnagit Kultureqarnermi atuartitsinermilu Pisortaqarfimmut suliassanngortinneqarsinnaapput.§ 6. Peqqussut manna naapertorlugu tapiissutisisartoq pisussaavoq pissutsit tapiissutisisarnerup taamaatinneqarnissaanik kinguneqartussat pillugit kommunalbestyrelsimut nalunaaruteqassalluni.
Imm. 2. Immikkoortoq 1 naapertorlugu nalunaaruteqarnissamut pisussaanermik sumiginnaasoqarsimappat imaluunniit tapiissutisisinnaanani ilisimaariraluarlugu tapiissutisisoqarsimappat aningaasat tapiissutisisussaanani pisimasat utertinneqassapput.§ 7. Tapiissutit kommunimit pilersuisoorpiartup najugarivitaanit tunniunneqartassapput.
Imm. 2. Peqqussut manna naapertorlugu aningaasartuutit kommuninit akilerneqartassapput.§ 8. Peqqussut manna atulerpoq 1. august 1983, piffissarlu taanna killigalugu atuartut kalaallit atuarfianni ukiut arfineq pingajuanni kingusinnerusunilu atuartussatut tiguneqarsimasut ilinniarnermut tapiiffigineqartarnissaat pillugu landsrådip ileqqoreqqusaa 4. april 1978-imeersoq atorunnaarpoq.
Kalaallit Nunaanni Namminersornerullutik Oqartussat, ulloq 28. oktober 1982.
Jonathan Motzfeldt/
Moses Olsen