Kalaallit Nunaanni ilinniarnermut inuutissarsiutinillu ilitsersuineq pillugu Namminersornerullutik Oqartussat nalunaarutaat nr. 5, 3. september 1982-imeersoq
Kalaallit Nunaanni inuutissarsiutitaarniarluni ilinniartitaanermut, ilinniarnermut tapiisarnermut inuutissarsiutinillu ilitsersuinermut Inatsisartut peqqussutaat nr. 4 24. oktober 1980-imeersoq naapertorlugu Kalaallit Nunaanni ilinniarnermut inuutissarsiutinillu ilitsersuineq pillugu maleruagassat imaattut aalajangersarneqarput.
Kapitali I.
Siunertaq.§ 1. Ilinniarnermut inuutissarsiutinillu ilitsersuineq ataasiakkaat ilinniakkamik imaluunniit inuutissarsiummik qinersinissamik piareersarneranni qinersinerannilu inuiaqatigiillu sulisussanik ilinniarsimasunik atorfissaqartitaannut suleqataassaaq.
Imm. 2. Ilitsersuineq pissaaq ataasiakkaat soqutigisaat piginnaasaallu sianigalugit, taakkununnga siunissamilu fagit imaluunniit fagikkuutaat iluanni inuiaqatigiit pisariaqartitaannut naapertuuttuni, taamaalilluni ataasiakkaat naammaginartumik ilinniagaqarsinnaaqqullugit sulinikkullu inuiaqatigiit kalaallit akornanni inississinnaaqqullugit.
Imm. 3. Ilinniarnermut inuutissarsiutinillu ilitsersuineq inuiaqatigiinni kalaallini innuttaasunut tamanut ammavoq kommunellu suliffissarsiuussisarnermut allaffii, kommunet/nunap immikkoortuisa inuutissarsiutinut siunnersortaat, meeqqat atuarfiat aamma inuutissarsiutinut ilinniarfiit aqqutigalugit pisassalluni.§ 2. Ilinniarnermut inuutissarsiutinillu ilitsersuinermi pineqartoq tassaavoq ataatsimoortunik ilitsersuineq ilinniagassamik imaluunniit inuutissarsiummik qinersinissamut piareersarnermi ikiuunnissamik siunertaqartoq, ataasiakkaanullu kissaateqartunut ikiuuffiusoq.
Imm. 2. Ilitsersuinermik pisariaqartitsisut eqqarsaatigalugit ilitsersuinermik ingerlatat ataqatigiissinniartariaqarput tassaalersillugit ilitsersuinissamik neqeroorutit ataqatigiissut pisariaqartitat tamakkerlutik naammaginartumik attorneqarnerannik isumannaallisitsisut.
Imm. 3. Ilitsersuinissamik neqeroorutit ataqatigiissinneqarnerat kommuneni nunallu immikkoortuini pissaaq taakkunani inuutissarsiornikkut periarfissat piusut eqqarsaatigineqartullu sianigalugit.
Kapitali II.
Aaqqissugaanera.§ 3. Kommunemi suliffissaqartitsiniarnermut udvalgip suliffissaqartitsiniarnermi/inuutissarsiutinut siunnersorti piginnaatissinnaavaa ilinniarnermut inuutissarsiutinillu ilitsersuinermut udvalgimik pilersitsinissamut suliffissaqartitsiniarnermut udvalgip ataani sulisussamik, ilitsersuinissamik neqeroorutit pilersinneqarnissaannut ataqatigiissinneqarnissaannullu tunngasunik suliaqartussamik ilitsersuinermullu tunngasut pillugit siunnersuuteqartarsinnaasumik.
Imm. 2. Ilitsersuinermut udvalgi ukuninnga ilaasortaqassaaq: najukkami suliffissaqartitsiniarnermut allaffiup pisortaa, inuutissarsiutinut siunnersorti, kommunep atuarfeqarftani ilinniarnermut inuutissarsiutinullu tunngasunik paasisitsiniaanermi ilinniartitsisut, sungiffimmi inspektøri, inersimasunik atuartitsinermi pisortaq, inuutissarsiornermut ilinniarfimmi imaluunniit ilinniarfinni kommunemiittuni ilinniarnermi ilitsersortit. Suliffissaqartitsiniarnermut allaffik udvalgip allaffeqarfiatut sulissaaq.
Imm. 3. Udvalgi pisariaqarsorinninneq tunngavigalugu immikkut paasisimasalinnik aggeqqusisinnaavoq.
Imm. 4. Udvalgip suleriaasissani nammineq aalajangissavaa.
Imm. 5. Udvalgi peqataasuni soraartoqartarnera ivertittoqartarneralu malillugit nammineq ilaasortalersortuuvoq.
Kapitali III.
Suliassat.§ 4. Udvalgip ataatsimoortunik ataasiakkaanillu ilitsersuineq ataqatigiississavaa aammalu kommunemi/nunap immikkoortuani ilinniarnermut inuutissarsiutinullu paasisitsiniaanerit annertunerusut ataqatigiissittassallugit, najukkami inuutissarsiornermut tunngasut pillugit paasissutissiortassalluni kiisalu inuusuttut meeqqat atuarfiannit qimaguttussanngortut atuarfik qimatsinnagu peqqissaartumik sukumiisumillu tamakkerlutik ilitsersorneqarsimanissaat qulakkiissallugu.
§ 5. Udvalgip inuutissarsiutinik misiliinerit, pulaarnerit aammalu meeqqat atuarfiata sunngiffimmi atuartitsinera, inersimasunik sunngiffimmi atuartitsineq, najukkami inuutissarsiutinut ilinniarfiit atuarfiillu allat pillugit paasissutissiinerit piareersartassavai, ilinniartut/sullissat pillugit paasissutissanik tunioraqatigiinneq kiisalu inuiaqatigiinni avatangiisigisani ilinniarfissat ingerlatallu pillugit ilisimateqatigiinneq piareersartassallugit.
§ 6. Udvalgi ikinnerpaamik ukiumut 4-riarluni ataatsimiittassaaq. Ukiumi atuartitsiviusumi ataatsimiinnermi siullermi, uukiumi atuartitsiviusumi qanoq iliuusissat piareersarneqartassapput.
§ 7. Pisariaqarpat udvalgi suliffeqarfinnit allanit - nakorsaqarfimmit, angajoqqaanit, sulisitsisunit - ilinniartut/sullissat ataasiakkaat sulissunnerannut pingaarutilinnik paasissutissaateqarsinnaasunit paasissutissanik pissarsiniarsinnaavoq.
Imm. 2. Udvalgip, udvalgillu ilaasortaasa ataasiakkaat kiisalu ilinniartup/sullissap akornanni tatigeqatigiinnissaq pissutigalugu paasissutissanik taamaattunik pissarsiniarneq pineqartoq imaluunniit pineqartup angajoqqaavi/angajoqqaarsiai paaseqatigilluarlugit pisassaaq.§ 8. Udvalgip minnerunngitsumik inuusuttut kommunep/nunap immikkoortuata nunaqarfiini najugaqartut isumaginiassavai. Taakku illoqarfiit inuusuttortaasut ilitsersorneqarnissamut periarfissaqartinneqarnissaat qulakkeerneqasaaq.
§ 9. Ilinniartut kommunemi najugaqartut aammalu inuutissarsiutinut tunngasunik ilinniartitsinerni Inuutissarsiornermi Naalakkersuisoqarfimmit, ilinniartitaanermut inspektøreqarfimmit aqunneqartuni peqataasussat piffissaatillugu eqqortumillu peqataaniarlutik nalunaarnissaannut udvalgi akisussaavoq.
§ 10. Udvalgi sulinini pillugu ukiumut ataasiarluni kommunep suliffissaqartitsiniarnermut udvalgianut nalunaaruteqartassaaq. Nalunaarut taanna suliffissaqartitsiniarnermut udvalgip kommunalbestyrelsemut aamma nuna tamakkerlugu suliffissaqartitsiniarnermut ataatsimiititaliamut nalunaarutaanut ilanngunneqassaaq.
Imm. 2. Suliffissaqartitsiniarnermut udvalgi ilitsersuinermut udvalgimik atimini sulisussamik pilersitsinngippat suliassatkap.III-mi taaneqartut suliffissaqartitsiniarnermut udvalgimit namminermit isumagineqassapput.
Kapitali IV.
Aningaasalersorneqarnera.§ 11. Ilitsersuinermut udvalgimi ilaasortat kursuseqartinneqarnerannut atasumik aningaasartuutit - akissarsiat peqataasut ataasiakkaat suliffeqarfiit akilerneqartussat saniatigut - Namminersornerullutik Oqartussanit kursusini peqataasunut kommunet aningaasalersueqataanissaannik aalajangersagaliorsinnaasunit akilerneqassapput.
§ 12. Udvalgip ataatsimiittarnerinut allaffeqarfeqarnermullu aningaasartuutit suliffissaqartitsiniarnermut allaffiup ingerlanneqarneratigoortumik akilerneqassapput.
§ 13. Kommunemi/nunap immikkoortuani ilinniarnermut inuutissarsiutinullu tunngasunik paasisitsiniaaffiusumik aaqqissuussinernut annertunerusunut aningaasartuutit taassuma, Inuutissarsiornermi Naalakkersuisoqarfiup ilinniartitaanermullu inspektøreqarfiup isumaqatigiinniareernerisigut Namminersornerullutik Oqartussanit akilerneqassapput.
Kapitali V.
Atortuulersitsineq.§ 14. Nalunaarut una atortuulerpoq 1. november 1982.
Namminersornerullutik Oqartussat, ulloq 3. september 1982.
Lars Emil Johansen/
Emil Abelsen