Kalaallit Nunaanni illut pillugit oqartussaaneq pillugu Namminersornerullutik Oqartussat nalunaarutaat nr. 6, 8. maj 1981-imeersoq.

Nunamik atuineq, nuna tamakkerlugu pilersaarusiorneq aamma illoqarfimmik pilersaarusiorneq illuliortiternerlu pillugit landstingip peqqussutaa nr.1 2.februar 1981-imeersumi § 52 malillugu aalajangersarneqarput:

 

§ 1. Namminersornerullutik Oqartussat illut pillugit oqartussaapput.

§ 2. Najukkami illut pillugit oqartussaaneq GTO-mit Namminersornerullutik Oqartussat sinnerlugit isumagineqassaaq, najukkami GTO-p byggetjeneste-a aqqutigalugu.

§ 3. Illut pillugit oqartussaaneq ingerlanneqassaaq "Kalaallit Nunaanni illuliat sanaartukkallu pilersaarusiornerat pillugu ilitsersuummi" GTO-mit suliarineqarlunilu 1. juni 1971-imiit nassiussorneqartumi aalajangersakkat, kiisalu "Kalaallit Nunaanni illuliornissamut illullu atorneqalernissaannut akuersissummik illut pillugit oqartussanit qinnuteqartarnermut maleruagassat ilitsersuullu" GTO-mit suliarineqartut februar 1978-imi immikkut akuersissutit assuarlersinnaanerlu pillugit nalunaarut manna malillugu allannguutit ilanngullugit.

§ 4. GTO-p Nuummi siunnersuinermut immikkoortortaqarfia Namminersornerullutik Oqartussat sinnerlugit immikkut akuersissuteqartartuuvoq, tassungalu qinnuteqaatit najukkami illut pillugit oqartussat oqaaseqaataannik ilallugit nassiunneqassapput.
Imm. 2. Najukkami illut pillugit oqartussaq pisussaavoq, illuliap immikkut akuersissuteqarfigisariaqartup saniliisa eqqorneqartut paasiniaaffiginissaannut. Ikuallattoornissamut qaamanermullu ungasissusissat Kalaallit Nunaanni illut ungasissusissaat pillugu nalunaarummi 29. oktober 1962-imeersumi aalajangersarneqartut pillugit aatsaat immikkut akuersissuteqartoqarsinnaavoq, najukkami illut pillugit oqartussamit illup immikkut akuersissummik piniunneqartup saniliinik ilisimatitsineranit aammalu sap. ak. marluk qaangiutinnginneranni illut pillugit oqartussanut oqaaseqaateqarsinnaanermik ilisimatitsineqareernerata kingornatigut sap. ak. marluk qaangiutereerpata. Sap. ak. marlunnik killiliineq najukkami illut pillugit oqartussap saniliisunut pineqartunut nalunaarutaata apuunneraniit naatsorsuunneqarpoq.
Imm. 3. "Kalaallit Nunaanni kiassaatini pujoorfimmut atassusikkani petroleup uuliallu atorneqarnerat pillugu Landsrådip ileqqoreqqusaa 25. november 196o-imeersumi" aammalu "Kalaallit Nunaanni petroleumit atuineq pillugu Landsrådip ileqqoreqqusaa 26. maj 1954-imeersoq Landsrådip ileqqoreqqusaatigut 9. juli 1958-imeersukkut allanngortinneqartumi" aalajangersakkaniit immikkut akuersissut ileqqoreqqusat taakku immikkut akuersissutinut naammagittaalliutinullu aalajangersagartaat malillugit suliarineqassaaq.

§ 5. GTO-p siunnersuinermut immikkoortortaqarfiata § 4, stk. 1 malillugu aalajangigai pillugit naammagittaalliutit Namminersornerullutik Oqartussanut assuarlertarfiusunut ingerlatinneqassapput.
Imm. 2. Naammagittaalliornissamut piffissaq ullormit aalajangiinerup nalunaarutigineqarfianiit sap. ak. sisamaapput.

§ 6. Najukkami illut pillugit oqartussap aalajangiineranut naammagittaalliutit Nuna tamakkerlugu pilersaarusiornermut udvalgimut assuarlertarfiusumut ingerlatinneqassapput.
Imm. 2. Naammagittaalliornissamut piffissaq ullormit aalajangiinerup nalunaarutigineqarfianiit sap. ak. sisamaapput.

§ 7. Unioqqutitsinerit Nunamik atuineq, nuna tamakkerlugu pilersaarusiorneq aamma illoqarfimmik pilersaarusiorneq illuliortiternerlu pillugit landstingip peqqusutaani § 31 malillugu pillarneqaataassapput.

§ 8. Nalunaarut erniinnaq atortuulerpoq.

Namminersornerullutik Oqartussat, ulloq 8. maj 1981

Jonthan Motzfeldt

/

Gunnar Martens