Aalisarnermik piniarnermillu ingerlatsisinnaanissamut piumasarineqartunik naammassinnissimanermut uppernarsaatit suliarineqarnerat pillugu Namminersornerullutik Oqartussat nalunaarutaat nr. 1, 19. januar 1981-imeersoq.

Inuutissarsiutigalugu aalisarneq, piniarneq aallaaniarnerlu pillugit Landstingip inatsisaani nr. 4-imi, 13. oktober 1980-imeersumi § 2, stk. 3 aamma § 7, stk. 2 naapertorlugu aalajangersarneqarpoq:

 

§ 1. Aalisarnermik piniarnermillu ingerlatsisinnaanissamut piumasarineqartunik naammassinnissimanermut uppernarsaatit kommunalbestyrelsenit inuutissarsiutigalugu aalisarneq, piniarneq aallaaniarnerlu pillugu Landstingip inatsisaa naapertorlugu suliarineqartut imaqassapput uppernarsaataasunik piginnittup Landstingip inatsisaani § 2-mi inuutissarsiutigalugu aalisarnermik, piniarnermik aallaaniarnermillu Kalaallit Nunaata aalisarnikkut imartaani nunataanilu ingerlatsinissaminut patsisissaasut naammassisimagai taamatullu nalunaarsimassalluni inuutissarsiut inuutissarsiutigivillugu imaluunniit saniatigooralugu sukisaarsaatigaluguluunniit ingerlanneqarnersoq.

§ 2. Uppernarsaat takussutissiisoq piginnittoq inuutissarsiummik inuutissarsiutigivillugu ingerlatsisuusoq qinnuteqartoqarneratigut ukununnga tunniunneqassaaq:
1) Inunnut inuutissarsiutigalugu aalisarneq, piniarneq aallaaniarnerlu pillugit Landstingip inatsisaani § 2, imm. 1-imi taaneqartutut uppernarsaasinnaasunut inuuniarnerminnut pisariaqartitatik inuutissarsiummik piniartutut aalisartutulluunniit atuiuarnermikkut pisarlugit.
2) Selskabinut inuutissarsiutigalugu aalisarneq, piniarneq aallaaniarnerlu pillugit Landstingip inatsisaani § 2, imm. 1-imi taaneqartutut uppernarsaasinnaasunut minnerpaamik piginneqataassutit 2/3-ii inunnit uppernarsaammik, takussutissiisumik piginittoq inuutissarsiummik inuutissarsiutigivillugu ingerlatsisuusoq, peqartunit pigineqartut.
Imm. 2. Qinnuteqarneq malillugu uppernarsaatitut allagartaq nalunaarlugu inuutissarsiut saniatigooralugu ingerlanneqartoq ukununnga tunniunneqartassaaq:
1) Inunnut inuutissarsiutigalugu aalisarneq, piniarneq aallaaniarnerlu pillugit Landstingip inatsisaani § 2-mi, imm. 1-imi taaneqartutut uppernarsaasinnaasunut aalisartutut imaluunniit piniartutut inuutissarsiutip pimoorullugu iluaqutigineratigut inuutissarsiummit allamit aningaasarsiornerminnut pisarialimmik tapertaqarnerminnik.
2) Selskabinut inuutissarsiutigalugu aalisarneq, piniarneq aallaaniarnerlu pillugit Landstingip inatsisaani § 2-mi, imm. 1-imi taaneqartutut uppernarsaasinnaasunut selskabip aningaasaataasa minnerpaamik 2/3-ii pigineqartut inunnit uppernarsaatitut allagartalinnit nalunaarlugu inuutissarsiut saniatigooralugu inuutissarsiutigigitsik.
Imm. 3. Qinnuteqarneq malillugu uppernarsaatitut allagartaq nalunaarlugu inuutissarsiut sukisaarsaatitut ingerlanneqartoq tunniunneqartassaaq inunnut selskabinullu inuutissarsiutigalugu aalisarneq, piniarneq aallaaniarnerlu pillugit Landstingip inatsisaani taaneqartutut uppernarsaasinnaanngitsunut aalisarneq inuutissarsiutivittut saniatiguutulluunniit inuutissarsiutigalugu uppernarsaatitut allagartaqarnissamut piumasanik naammassinnissimanerminnik.

§ 3. Aalisarnermut piniarnermullu allagartat uppernarsaatit nalunaarutip uuma atuutilinnginnerani tunniunneqarsimasut atuinnarallassapput 1. juni 1981 tikillugu.

§ 4. Nalunaarut una atulissaaq saqqummiunneqarnermigut. Tarrtatumunnga peqatigitillugu aalisarnermut piniarnermullu allagartat tunniunneqartarnerinik Namminersornerullutik Oqartussat nalunaarutaat nr. 3 2. november 1980 ulluligaq atorunnaassaaq.

Namminersornerullutik Oqartussat, Nuuk ulloq 19. januar 1981.

Lars Emil Johansen

/

Emil Abelsen