Kalaallit Nunaanni sulisussat atorfinitsinneqartarnerat pillugu Landstingip inatsisaa nr. 1, 12. marts 1980-imeersoq.
§ 1. Landstingip inatsisaani ilaatinneqarput ilinniagaqarfiusartut imaluunniit atorfeqarfiusartut imaattut:
1) Sulisartut suliamik ilinniagaqarsimanngitsut, taakkununnga ilaatillugit sulisartut suliassamut aalajangersimasumut immikkut pikkorissarsimasut, suliassaqarfiit tamarmik iluanni.
2) Atorfiit niuernermi allaffimmilu ilinniagaqarsimanermik pisariaqartitsisut.
3) Immakkut angallassinermik suliassaqarfiup iluani atorfiit.
4) Assassorlutik sulisartut svendebrevinik imaluunniit ilinniagaqarsimanermut allagartanik uppernarsaatinik pigisallit inuutissarsiutitigut tunngaviusumik ilinniagaqarsimaneq naammassineqarsimasoq (EFG) pillugu.
5) Perorsaanermik suliaqartut (socialpædagoger).
Imm. 2. Inuutissarsiornermut Pisortap aalajangersinnaavaa ilinniagaqarfiusartut imaluunniit atorfeqarfiusartut imm. 1-imi taaneqartunit allaasut inatsimmi ilaatinneqassasut. Taamaattoq inatsisip atorneqarfissaa annertusineqarsinnaanngilaq sulisorisanut rigsombudsmandimi, politimesterimi, Kalaallit Nunaata landsretiani imaluunniit illersornissamut tunngasuni atorfeqartunut.§ 2. Sulisussat Kalaallit Nunaanni najugaqartuunngitsut ilinniagaqarfiusartut imaluunniit atorfeqarfiusartut § 1-imi taaneqartut iluanni atorfinitsinnissaat imaluunniit atorneqarnissaat taamaallaat pisinnaavoq kommunep suliffissarsiuussisarnermut udvalgia akuersiseqqaarlugu, taamaattoq takuuk § 8.
§ 3. Kalaallit Nunaanni sulisussat Landstingip inatsisaani maani ima paasineqassapput tassaasut inuit
1) Landstingip inatsisaata atortuulernerani Kalaallit Nunaanni aalajangersimasumik najugaqartut, Kalaallit Nunaanni najugaat ataannarallartillugu.
2) Kalaallit Nunaanni inunngorsimasut aammalu inunngornerminnilli Kalaallit Nunaanni aalajangersimasumik najugaqarsimasut ukiuni 5-ini,
3) angajoqqaat, minnerpaamik aappaata nr. 1-imi imaluunniit 2-mi pissutissanik eqqortitsisup qitornaat, imaluunniit
4) inuk nr. 1-imi, 2-mi imaluunniit 3-mi pissutissanik eqqortitsisimasoq aapparalugu aappariittut inuusut qitornaat.
Imm. 2. Inuutissarsiornermut Pisortap aalajangersinnaavaa inuk allatut ittumik immikkut Kalaallit Nunaannut atassuteqartoq Kalaallit Nunaanni sulisussatut isumaqarfigineqassasoq.§ 4. Akuerineqarnissamik qinnuteqaat § 2 malillugu tunniunneqassaaq kommunep suliffissarsiuussisarnermut udvalgianut. Qinnuteqaat nassuiaatinik imaqassaaq makku pillugit: Suliassap suussusia sivisussusissaalu, pikkorissuseqarnissamut immikkut piumasarisat, nerisaqarnissamut ineqarnissamullu periarfissat aamma akissaatitigut atugassarisat.
Imm. 2. Akuersissut tunniunneqartutut isumaqarfigineqassaaq qinnuteqaatip tunniunneqarnerata kingornatigut ullut 14-it iluanni sulisitsisoq nalunaarummik allamik tigusaqarsimanngippat.
Imm. 3. Inuutissarsiornermut Pisortaq malittarisassanik aalajangiissaaq qinnuteqaatit imm. 1-imi taaneqartut suliarineqarneranni periaasissaq pillugu.§ 5. Suliffissarsiuussisarnermut udvalgip aalajangiinera sulisitsisumit kommunalbestyrelsemut suliassanngortinneqarsinnaavoq aalajangiinerup tiguneqarnerata kingornatigut ullut 14-it iluanni. Akuersissut tunniunneqartutut isumaqarfigineqassaaq, suliassaq kommunalbestyrelsemut suliassiissutigineqarneraniit qaammat ataaseq qaangiutsinnagu sulisitsisoq allamik tigusaqarsimanngippat.
Imm. 2. Kommunalbestyrelsep aalajangiinera nuna tamakkerlugu suliffissaqartitsiniarnermi ataatsimiititanut suliassanngortinneqarsinnaavoq.§ 6. Sulisitsisut Kalaallit Nunaanni najugaqartuunngitsunik sulisitsinissamut akuerineqarsimasut ullut 8 qaangiutsinnagit inuit taama ittut sulilernerat imaluunniit suliunnaarnerat kommunep allaffianut suliffissarsiuussisarfimmut nalunaarutigissavaat, imaluunniit allaffik taama ittoq nassaassaanngippat kommunep suliffissarsiuussisarnermut udvalgianut.
Imm. 2. Nalunaaruteqarneq pisassaaq allaffissiani immikkut ittuni Inuutissarsiornermut Pisortamit suliarineqarsimasuni. Allaffissiat akeqanngitsumik tunniunneqartassapput allaffinni suliffissarsiuussisarfinni imaluunniit kommunet allaffiini.§ 7. §§ 2 aamma 6 unioqqutinneqarneri pillugit akiliisitsineqarsinnaavoq.
Imm. 2. Aktieselskabit, andelsselskabit, anpartselskabit taamaangajattulluunniit unioqqutitsineri pillugit piginneqatigiiffik ataatsimut isigalugu akiliisitaasussatut akisussaassusilerneqarsinnaavoq.§ 8. Landstingip inatsisaa atortuunngilaq sumiiffinnut, Kalaallit Nunaata illersorneqarnissaa pillugu isumaqatigiissut 27. april 1951-imeersoq naapertorlugu illersornissamut tunngasunut. Sumiiffiit allat erseqqinnerusumik taaneqarsimasut Inuutissarsiornerntut Pisortap Landstingip inatsisaanut ilaatinngitsoorsinnaavai.
Imm. 2. Kalaallit Nunaanni pissamaatinik uumassuseqanngitsunik misissueqqaarnerup, misissueqqiinerup iluaqutiginninniarnerullu isumagineqarnissaannut immikkut piginnaatitaaneq naapertorlugu imaluunniit inatsit naapertorlugu akuersissutikkut sullivimmi privatiusumi imaluunniit pisortatigut suliffeqarfimmi atorfiit inuttalerneqarnissaat pisassaaq aalajangersakkat piginnaatitaanermi imaluunniit akuersissummi aalajangersakkat malillugit, takuuk Kalaallit Nunaanni namminersornerulernissaq pillugu inatsimmi nr. 577, 29. november 1978-imeersumi § 8.
Imm. 3. Inuutissarsiornermut Pisortap aalajangersinnaavaa atorfiit immikkut ittunik pissusillit § 1 imm. 1-imi taaneqarsimasut Landstingip inatsisaanut ilaatinneqassanngitsut.§ 9. Landsstyrep aalajangissavaa inatsit qaqugu atortuulersinneqassanersoq.
Imm. 2. Landstingip inatsisaa atorneqassanngilaq sulinissamik isumaqatigiissutinut inatsisip atortuulernera sioqqulluguisumaqatigiissutaasimasunut, imaluunniit suliap aalajangersimasup ingerlanneqarnissaa pillugu inatsisip atortuulernera sioqqullugu sulisitsisoq isumaqatigiissuteqareersimappat. Taamaasilluni Kalaallit Nunaata Landstingianit akuersissutigineqarpoq ulloq 12. marts 1980.§ 10. Inatsit atortuulerpoq 1. januar 1981.
Nuuk, 12. marts 1980
Jonathan Motzfeldt/
Lars Emil Johansen