Højskolit pillugit landstingip peqqussutaa nr. 1, 16. oktober 1980-imeersoq.
Kapitel I.
Siunertaat suliaallu.§ 1. Højskolit ilinniartunut inersimasunut nalinginnaasumik ilisimasaqalernissamut ilinniartitsinissamik innersuussisuussapput tamatumalu iluani ilinniagassanik (fag) ataasiakkaanik imaluunniit ataatsimoorullugit ingerlatassanik innersuussuteqarsinnaallutik. Imm. 2. Højskolit immikkut ittuni piginnaatitsiffiulersitsisinnaasunik atuartitsinissamik, maleruagassiat Kulturimik Atuartitsinermillu Aqutsisunit aalajangersarneqartut naapertorlugit, innersuussuteqarsinnaapput.
Kapitel II.
Akuerineqarneq aamma nakkutilliineq.§ 2. Højskolit peqqussut manna naapertorlugu tapiiffigineqarsinnaassagunik Kulturimik Atuartitsinermillu Aqutsisunit akuerineqarsimasuussapput.
Imm. 2. Højskolini akuerineqareersimasuni inissaqarnerulerniarluni alliliinissat aamma Kulturimik Atuartitsinermillu Aqutsisunit akuerineqaqqaarnissaat piumasarineqarpoq.§ 3. Højskolinik akuersinissat naammassisassat kinguliini allassimasut tunngavigalugit pisassapput:
1) Atuarfik namminersortuussaaq (privat), suliffiulluni imminut ingerlatittoq, maleruaqqusai Kulturimut Atuartitsinermullu landsstyrip ilaasortaanit akuerineqarsimasuussallutik.
2) Siulittaasua (forstander) Kulturimut Atuartitsinermullu landsstyrip ilaasortaanit akuerineqarsimasuussalluni.
3) Atuarfik ininik naleqquttunik atortussanillu pisariaqartunik pigisaqassaaq.
4) Atuarfiup kursusernissanut pilersaarusiaa Kulturimut Atuartitsinermullu landsstyrip ilaasortaanit akuerineqarsimasuussaaq.
Imm. 2. Kursusi akuerineqartutut isigineqassaaq kursusernissamut pilersaarusiamut akuerineqarsimasumut ilaaguni imaluunniit Kulturimut Atuartitsinermullu landsstyrip ilaasortaanit immikkut akuerineqarsimaguni.§ 4. Kulturimik Atuartitsinermillu Aqutsisut kursusi akuerineqareersimagaluartoq utertissinnaavaat, atuarfiup §3 malillugu naammassisimasassat eqqortikkunnaarsimappagit. Taamatut aamma aqutsisut akuersissutaareersumik utertitsisinnaapput atuarfimmi atuartitsineq imaluunniit pissutsit allat §l-imi aalajangersakkanut erseqqissumik akerliulersimappata.
Imm. 2. Akuersissutaareersunik imm. 1, 2. pkt. naapertorlugu utertitsinissat aatsaat pisinnaapput højskolimi pineqartumi siulersuisut oqaloqatigereernerisigut.§ 5. Kulturimut Atuartitsinermullu direktøri Kulturimut Atuartitsinermullu landsstyrip ilaasortaa sinnerlugu højskolini nakkutilliisuussaaq.
Kapitel III.
Tapiissutit.§ 6. Kalaallit Nunaanni Namminersornerullutik Oqartussat højskolinut akuerisaasunut tapiissuteqassapput naammassisassat kinguliini allassimasut tunngavigalugit:
1) Atuarfik ukiumi naatsorsuiffiusumi akuerisaasumik kursusertitsisimassaaq sivikinnerpaamik sapaatit akunnerini 20-ni sivisussusilinnik imaluunniit akuerisaasunik marloriarluni kursusertitsisimassalluni tamarmik sivikinnerpaamik sapaatit akunnerinik 12-inik sivisussusilinnik.
2) Atuarfik ukiuni naatsorsuiffinni suliffigisimasamini kingullerni pingasuni agguaqatigiissillugu ikinnerpaamik ukiumoortunik ilinniartuuteqarsimassaaq 18-inik. Atuarfik ukiumi naatsorsuiffimmi sapaatit akunnerinit 36-nit ikinnerusuni akuerisaasumik atuartitsisimaguni ukiumut ilinniartussat amerlassusissaattut piumasarisat ukiumi pineqartumi ikilisissavai, sapaatit akunnerisa atuartitsiffigineqarsimasut amerlassusiisa 36-llu akornanni aaqqiinikkut.
3) Atuarfiup siulittaasua ilinniartitsisullu aningaasarsiaqartinneqassapput Kulturimut Atuartitsinermullu landsstyrip ilaasortaata maleruagassiatut aalajangersagai naapertorlugit. Atorfinitsitaanermi naammassisassatut piumasarisat allat allaganngorlugit isumaqatigiissutigineqarsimassapput.
4) Atuarfiup siulittaasuata ilinniartitsisullu Kulturimut Atuartitsinermullu landsstyrip ilaasortaanut qularnaallisissavaat naapertuuttumik soraarnersiutissaqartitaanertik.
Imm. 2. Ukiumoortumik ilinniartut amerlassuseraat ukiumi naatsorsuiffimmi kursusini akuerineqartuni sapaatit akunnerini ataasiakkaani peqataasut amerlassusiisa 36-mik agguarlugit inerneri. Ilinniartut ukiussaminnik naammatsitsisimallutik §9, imm. 1 naapertorlugu tapiissutinik pisinnaasut kisimik naatsorsuutigineqassapput. Kulturimut Atuartitsinermullu landsstyrimi ilaasortaq ilinniartut qallunaatut innuttaassuseqanngitsut imaluunniit kursusini akuerisaasuni ilaannakortumik peqataasut naatsorsuutigineqarnissaat pillugu malittarisassanik aalajangersaassaaq.
Imm. 3. Kulturimut Atuartitsinermullu landsstyrimi ilaasortap immikkut ittuni imm. 1, nr. 1 aamma 2-mi aalajangersakkat saneqqussinnaavai.§ 7. Ukiup atuartitsiviusup tamakkiisuunissaanut atuartitsinerup akuerineqarsimasup sapaatit akunnerinik ikinnerpaamik 36-nik sivisussuseqarnissaa piumasarineqarpoq.
Imm. 2. Atuarfik atorneqarsinnaanera tamakkerlugu atuartitsinermut akuerineqartumut sapaatit akunnerinut 36-sut annertussusilimmik atorneqanngippat Kulturimut Atuartitsinermullu landsstyrimi ilaasortap erseqqinnerusumik aalajangiineratigut aningaasartuutit tapiissuteqarnermi tunngaviusunut ilaatinneqartut naapertuuttumik appartinneqarsinnaapput.§ 8. Tapiissutit naatsorsorneqassapput ukiumoortumik ilinniartut amerlassusii tunngavigalugit aalajangerneqassallutillu Kalaallit Nunaanni Landstingip ukiumoortumik aningaasatigut inatsisaani.
Imm. 2. Kulturimik Atuartitsinermillu Aqutsisut naatsorsuinermi tunngavissanut maleruagassanik erseqqinnerusunik aalajangersaassapput.
Kapitel IV.
Ilinniartunut tapiissutit.§ 9. Ilinniartut akiliutissaannut millisitsissutissanik kommune ilinniartup najugaqarfigisaa ilinniartumut kursusip aallartinnerani 17 ½-inik ukioqalereersimasumut tapiissuteqassaaq.
Imm. 2. Højskolit akuerineqartut siulersuisuinit ukiut tamaasa siunnersuuteqarnikkut Kulturimut Atuartitsinermullu landsstyrimut ilaasortap tapiissutissat naatsorsorneqarnissaannut tunngavissatut ilinniartup sapaatip akunneranut akiliutissaa aalajangertassavaa.
Imm. 3. Kalaallit Nunaanni kommuneqarfiit kattuffiata siunnersuuteqarneratigut landsstyrimi ilaasortap aaalajangissavaa ilinniartup akiliutissaata akuerineqartup ilaa qanoq angitigisoq ilinniartumit namminermit akilerneqartassasoq qanorlu atsigisoq kommunemit najugaqarfigisaanit akilerneqartassasoq. Kommunep najugaqarfigisaata tapiissutissai aalajangerneqassapput ilinniartup aningaasatigut atugai najoqqutaralugit annerpaamillu atuartup akiliutissaatut akuerineqartup 80%-ianik angissuseqassallutik.§ 10. Pisortaqarfiit taamaallaat tapiissuteqartassapput ilinniartut kursusimut akuerineqartumut sivikinnerpaamik sapaatip akunneranik ataatsimik sivisussuseqartumut ipeqataappata.
§ 11. Kulturimut Atuartitsinermullu landsstyrimi ilaasortaq ilinniartunut tapiissuteqarnissamik qinnuteqarnermi taakkulu tunniunneqartarnissaannut periusissat pillugit maleruagassanik aalajangersaassaaq.
Kapitel V.
Ilinniaqqinnissamut tapiissutit.§ 12. Kalaallit Nunaanni Namminersornerullutik Oqartussat tapiissuteqarsinnaapput atuarfinni pisortat ilinniartitsisullu ilinniaqqillutik kursusernissaannut.
§ 13. Kalaallit Nunaanni Namminersornerullutik Oqartussat tapiissuteqarsinnaapput pisortat ilinniartitsisullu ilinniaqqinnermik nalaani tamakkiisumik imaluunniit ilaannakortumik sulinngiffeqarnerminni aningaasarsiassaannut.
Kapitel VI.
Misiligaalluni sulineq.§ 14. Kulturimik Atuartitsinermillu Aqutsisut peqqussutip aalajangersagartaanik saneqqutsisinnaapput peqqussutip iluani misiligaalluni sulinerup siuarsarnissaata pisariaqartitsineratut annertutigisumik.
Imm. 2. Kulturimut Atuartitsinermullu landsstyrimi ilaasortap aalajangiinera malillugu Kalaallit Nunaanni Namminersornerullutik Oqartussat peqqussutip iluani misiligaalluni atuartitsinernut tapiissuteqarsinnaapput.
Kapitel VII.
Atortuulersitsineq pillugu ikaarsaariarnermilu aalajangersakkat.§ 15. Peqqussut manna atulissaaq 1. januar 1981.
Imm. 2. Kulturimik Atuartitsinermillu Aqutsisut peqqussummi taaneqartut naammassineqarnissaannut maleruagassanik erseqqinnerusunik, tamakkununnga ilanngullugit immaqa ikaarsaariarnermi aalajangersakkanik, aalajangersaasinnaapput.
Ulloq 16. oktober 1980.
Jonathan Motzfeldt/
Thue Christiansen