Namminersornerullutik Oqartussat nalunaarutaat nr. 6, 4. december 1980-imeersoq avannarpasissutsit 68°00' aamma 69°15'N. akornanni kiisalu kippasissutsip 56°-it kangiani kinguppanniarsinnaaneq pillugu.

Kalaallit Nunaanni inuutissarsiutigalugu aalisarneq, piniarneq aallaaniarnerlu pillugit inatsit nr. 4 13. oktober 1980-imeersumi imm. 5 aamma 6 naapertorlugit aalajangersarneqarpoq:

 

§ 1. Avannarpasissutsit 68°00' aamma 69°15' akornanni kiisalu kippasissutsip 56°-it kangiani angallatit 80 BRT-it sinnerlugit angissusillit aatsaat kinguppanniarsinnaanermut akuerineqarsinnaapput sumiiffimmi pineqartumi pisatik tamakkerlugit Kalaallit Nunaanni tunisassiorfinnut suliareqqitassanngorlugit nunniguttassagunikkit.

§ 2. Avannarpasissutsit 68°00' aamma 69°15' akornanni kiisalu kippasissutsip 56°00'-ip kangiani pisassat tamakkiisumik 1981-imi 3.000 tons-iupput matumani igiinnakkat ilanngullugit.
Imm. 2. Sumiiffimmi pineqartumi pisassarititaasut tamarmik pisarineqarpata aalisarneq unitsinneqassaaq. Tamanna pillugu nalunaarut Kalaallit Nunaanni Rigsombudsmandimit radiokkut aviisitigullu nalunaarutigineqarsinnaavoq.

§ 3. Nalunaarummi matumani aalajangersakkanik unioqqutitsinerit mianersoqqussummik, akiliisitaanermik akuersissummilluunniit arsaagaanermik kinguneqarsinnaapput. Suliassat taamaattut suliarineqassapput landstingip inuutissarsiutigalugu aalisarneq, piniarneq aallaaniarnerlu pillugit inatsisaani nr. 4 13. oktober 1980-imeersumi aalajangersakkat malillugit.

§ 4. Nalunaarut atulissaaq 1. januar 1981

Nuuk, ulloq 4. december 1980.

Lars Emil Johansen

/

Emil Abelsen