Ilinniagaqartunut bankimit sparekassemillu taarsigassarsiat pillugit Namminersornerullutik Oqartussat qularnaveeqqusiisarnerat pillugu Namminersornerullutik Oqartussat Nalunaarutaat nr. 4, 13. november 1980-imeersoq.
Inuutissarsiutitaarniarluni ilinniartitaanermut tapiissuteqartarnermut inuussutissarsiutinullu siunnersuinermut landstingip peqqussutaa nr. 4, 24 oktober 1980-imeersoq paragraf 13 naapertorlugu matumuuna makku aalajangerneqarput:
Kapitali 1.
Aalajangersakkat nalinginnaasut.§ 1. Ilinniagaqartut § 2-mi pissutissarititanik eqqortitsisut ilinniarnertik pillugu Kalaallit Nunaanni Danmarkimilu bankini sparekassenilu taarsigassarsiaat pillugit Inuutissarsiornermut Pisortaq Kalaallit Nunaata landskassea sinnerlugu qularnaveeqqusiissuteqarsinnaavoq.
§ 2. Ilinniarnermut taarsigassarsiat pillugit qularnaveeqqusiineqarsinnaavoq ilinniagaqartunut:
1) Landstingip peqqussutaani paragraf 10-mi pissutissarititanik eqqortitsisunut,
2) ilinniarnermut ikiorsiissuteqarfiusussatut Inuutissarsiornermut Pisortamit akuerineqarsimasumik ingerlatsisumut,
3) ilinniarnermik aallarnikkamik illersorneqarsinnaasumik iliorluni malinnaasumut.§ 3. Ukiumi ikiorsiissuteqarfimmi (1. augustimit ukiumi tullermi 31. julimut) taarsigassarsianut annerpaamik qularnaveeqqusiineqarsinnaavoq aningaasat Inuutissarsiornermut Pisortap aalajangigaasa iluanni.
Stk. 2. llinniarnermi ukiumit ataatsimit sivikinnerusumik ikiorsiivigineqartussani qularnaveeqqusiissutit ilinniarnerup sivisussuseqarneranut naleqquttumik millisinneqassapput. Tamanna aamma atussaaq piffissaq ikiorsiissuteqarfissaq allat pissutigalugit, soorlu assersuutigalugu piffissap ikiorsiissuteqarfiup ingerlanerani ilinniarnerup naamassineqarnera ukiumit ataatsimit sivikinneruppat.
Stk. 3. Taarsigassarsiat saniatigut qularnaveeqqusiissutit aamma tunngapput ernianut aningaasartuutinullu il.il. taarsigassarsinermut tunngasut nassatarisaannut.§ 4. Qularnaveeqqusiinissamik neriorsuummi taaneqassaaq taarsigassarsiat angissusiat, angissutsillu taassuma iluani qularnveeqqusiineqassaaq.
Stk. 2. Neriorsuut ilinniagaqartumut tunniunneqassaaq taassumalu bank imaluunniit sparekasse isumaqatigiissuteqarfigisinnaavaa naalagaaffiup qularnaveeqqusigaanik taarsigassarsiaqarsinnaaneq pillugu.
Stk. 3. Taarsigassarsiat pillugit suliarineqassaaq akiligassaqalernermut allagartaq, allaffissiami Inuutissarsiornermut Pisortap akuerisaani.
Stk. 4. Aningaasanik tunniussineqartassaaq imatut, piffissami taarsigassarsiviusumi taarsigassarsiat agguataarneqassallutik qaammammut aningaasanik amerlaqatigiinnik. Inuutissarsiornermut Pisortap aalajangersinnaavaa taarsigassarsiat Kalaallit Nunaata landskasseanut akilerneqassasut.§ 5. Taarsigassarsiat pillugit akiligassaqalernermut allagartap assinga aningaaseriviup nassiutissavaa oqartussaatitanut qularnaveeqqusiisimasunut.
Stk. 2. Taarsigassarsianut konto-t qularnaveeqqusikkat tamaasa pillugit ernialiussat ilanngullugit ukiumoortumik naatsorsukkat aningaaseriviup oqartussaatitanut qularnaveeqqusiisimasunut decemberip naalernerani tunniuttassavai.§ 6. Qularnaveeqqusiissutit atorunnaassapput ilinniartup ilinniarnerminik naammassinninnerata imaluunniit kipititsinerata kingornatigut kingusinnerpaamik ukiut 15 qaangiuppata. Pissutsit pisariaqartippassuk qularnaveeqqusiissutit ukiut 15 qaangerlugit sivitsorneqarsinnaapput.
§ 7. Taarsigassarsianut qularnaveeqqusiissutit annerpaaffissat paragraf 3-mi aalajangerneqarsimasut saniatigut aamma killilerneqassapput imatut, ilinniagaqartumut ukiumi ikiorsiissuteqarfimmi ilinniarnermut ikiorsiissutinik tigusaqarsimasunut annerpaamik qularnaveeqqusiineqarsinnaalluni taarsigassarsianut, ilinniarnermut ikiorsiissutit annerpaat aammalu ilinniagaqartumut aningaasat akuersissutaasimasut akornanni assigiinngissutaasumut.
§ 8. Pissutsit pisariaqartippassuk Inuutissarsiornermut Pisortaq taarsigassarsianut qularnaveeqqusiisinnaavoq nunani avannarlerni allani ilinniarnerup ingerlanneqarnissaanut. Nunat avannarliit avataani nunami allami ilinniarnerup ingerlanneqarnissaa kissaatigineqarpat, taarsigassarsianut qularnaveeqqusiineqarsinnaavoq pissutsit immikkut ittut tamanna pisariaqartippassuk.
Stk. 2. Qularnaveeqqusiinermik iluarsartuussinerup siulersugaanera isumagineqassaaq Kalaallit Nunaanni ilinniartitsinermut qullersaqarfimmit.
Kapitali 2.
Naammagittaalliorsinnaaneq atortuulersitsinerlu.§ 9. Ilinniartitsinermut qullersaqarfiup aalajangiineri pillugit naammagittaalliuutit Nalunaarut manna naapertorlugu suliassanngortinneqarsinnaapput Inuutissarsiornermut Pisortamut, taassumalu aalajangiinera inissutaassaaq.
§ 10. Nalunaarut manna atortuulerpoq 1. januar 1981-imit.
Inuutissarsiornermut Pisortaqarfik Nuuk, ulloq 13. november 1980.
Lars Emil Johansen/
John Andersen