Aalisarnermik piniarnermillu ingerlatsisinnaanissamut piumasarineqartunik naammassinnissimanermut uppernarsaatit suliarineqarnerat pillugu Namminersornerullutik Oqartussat nalunaarutaat nr. 3, 2. november 1980-imeersoq.

Inuutissarsiutigalugu aalisarneq, piniarneq aallaaniarnerlu pillugit Landstingip inatsisaani nr. 4-imi, 13. oktober 1980-imeersumi § 2, stk. 3 aamma § 7, stk. 2 naapertorlugu aalajangersarneqarpoq:

 

§ 1. Aalisarnermik piniarnermillu ingerlatsisinnaanissamut piumasarineqartunik naammassinnissimanermut uppernarsaatit kommunalbestyrelsinit inuutissarsiutigalugu aalisarneq,  piniarneq aallaaniarnerlu pillugu Landstingip inatsisaa naapertorlugu suliarineqartut imaqassapput uppernarsaataasunik piginnittup Landstingip inatsisaani § 2-mi inuutissarsiutigalugu aalisarnermik, piniarnermik aallaaniarnermillu Kalaallit Nunaata aalisarnikkut imartaani nunataanilu ingerlatsinissaminut patsisissaasut naammassisimagai taamatullu nalunaarsimassalluni inuutissarsiut inuutissarsiutigivillugu imaluunniit saniatigooralugu ingerlanneqarnersoq.

§ 2. Uppernarsaat takussutissiisoq piginnittoq inuutissarsiummik inuutissarsiutigivillugu ingerlatsisuusoq qinnuteqartoqarneratigut ukununnga tunniunneqassaaq:
1) Inunnut inuutissarsiutigalugu aalisarneq, piniarneq aallaaniarnerlu pillugit Landstingip inatsisaani § 2, stk. 1-imi taaneqartutut uppernarsaasinnaasunut inuuniarnerminnut pisariaqartitatik inuutissarsiummik piniartutut aalisartutulluunniit atuiuarnermikkut pisarlugit.
2) Selskabinut inuutissarsiutigalugu aalisarneq, piniarneq  aallaaniarnerlu pillugit Landstingip inatsisaani § 2, stk. 1-imi taaneqartutut uppernarsaasinnaasunut minnerpaamik piginneqataassutit 2/3-ii inunnit uppernarsaammik, takussutissiisumik piginittoq inuutissarsiummik inuutissarsiutigivillugu ingerlatsisuusoq, peqartunit pigineqartut.
Stk. 2. Inuit selskabilluunniit stk. 1 malillugu inuutissarsiutigivillugu ingerlatsisutut isigineqarnissamut patsisissaasunik naammassinnissimanngitsut qinnuteqarnermikkut taarsiullugu uppernarsaasiiffigineqarsinnaapput inuutissarsiut saniatigooralugu ingerlatarigaat.

§ 3. Aalisarnermik piniarnermillu ingerlatsisinnaanissamut piumasarineqartunik naammassinnissimanermut uppernarsaatit nalunaarutip matuma atuutilinnginnerani tunniunneqarsimasut atorsinnaapput 1. april 1981 tikillugu.

§ 4. Nalunaarut ernerluni atuutilerpoq.

Nuuk, ulloq 2. november 1980

Lars Emil Johansen

/

Emil Abelsen