Namminersornerullutik Oqartussat kinguppanniarnermut akuersissutit pillugit nalunaarutaat nr. 2, 2. november 1980-imeersoq.
Inuutissarsiutigalugu aalisarneq, piniarneq aallaaniarnerlu pillugit Landstingip inatsisaa nr. 4, 13. oktober 1980-imeersoq naapertorlugu.
§ 1. Nalunaarummi pineqarput inuit selskabillu kalaallit aalisarsinnaatitaanermut uppernarsaataannik peqartut Kalaallit Nunaata imartaani inuutissarsiutigalugu kinguppanniartut.
§ 2. Angallatit 80 BRT qaangerlugu usisinnaasut kinguppanniarsinnaapput Inuutissarsiornermut pisortamit akuersissummik aatsaat peqqaarlutik. Akuersissut 1981-imi atortussatut tunniunneqassaaq angallatit 1980-imi kinguppanniarsinnaanermut akuersissummik peqareersut salliutillugit. Angallatinut 1980-imi kinguppanniarsinnaanermut akuersissummik tunniussineq pisassat amerlassusissaannik, angallatit usisinnaassusiannik aalisarnermillu inuutissarsiuteqarnerup pissusissamisoortumik ineriartornissaanut tunngasut eqqarsaatigalugit pisassaaq.
Imm. 2. Kinguppanniarnermut akuersissummik qinnuteqaat Inuutissarsiornermut Pisortameeriissaaq 10. december 1980. Inuutissarsiornermut Pisortaq pisinnaatitaavoq immikkut ittunik pissutissaqartillugu akuersissummik qinnuteqaatinut piffissaq killiliussaq ataasiakkaatigut saneqqussinnaallugu.
Imm. 3. Akuersissummut atasumik pisassaatitaasut il.il. akuerineqartunut agguaanneqarsinnaapput, takuuk Landstingip inuutissarsiutigalugu aalisarneq, piniarneq aallaaniarnerlu pillugit inatsisaa § 5.
Imm. 4. Akuersissummik tunineqarnissamut patsisisaatinneqarpoq aalisariarneq siulleq pitinnagu Kalaallit Nunaanni tunisassiorfinnik isumaqatiginnittoqarsimanissaa kinguppattat uunneqanngitsut tunisassiassatut nunnigunneqartarnissaat pillugu. Isumaqatigiissutip imarissavaa kinguppattat minnerpaamik 15%-ii nunnigunneqassasut. Isumaoatigiissutip assilineqarnera kingusinnerpaamik Inuutissarsiornermut isortameeriissaaq 15.april 1980.
Imm. 5. Kinguppaat 2 gram akimorlugu oqimaassusillit avammut iginneqaqqusaanngillat.
Imm. 6. Akuersissummik tunineqarnissamut patsisissaatinneqarpoq angallatip inuttaasa minnerpaamik 60%-ii tassaassasut inuit Kalaallit Nunaanni najugaqavissut ukiunili kingullerni marlunni ingerlaannartumik najugaqarsimasut kalaallinullu inuiaqatigiinnut attuumassuteqartut. Piumasarisap naammassineqarsimaneranut uppernarsaat Inuutissarsiornermut Pisortameeriissaaq siullermeerluni aalisarialerneq sioqqullugu.
Imm. 7. Angallatinut 1980-imi kinguppanniarnermut akuersissummik pigisaqanngitsunut akuersissummik tunineqarnissamut patsisissaatinneqarpoq inuit piginnittut minnerpaamik 2/3-ii aalisarneq pingaarnertut inuutissarsiutigalugu allagartamik peqartut, takuuk Landstingip inuutissarsiutigalugu aalisarneq, piniarneq aallaaniarnerlu pillugit inatsisaa, § 2, imm. 3. Tamatuminnga uppernarsaasinnaaneq Inuutissarsiornermut Pisortameeriissaaq kingusinnerpaamik 1. juni 1981. Akuersissut arsaarinnissutigineqassaaq piumasarisat naammassineqanngippata.§ 3. Akuersissut tunngavigalugu kinguppanniarneq taamaatinneqarallartussanngortinneqarsinnaavoq imaluunniit piffissamut killilikkamut.
Imm. 2. Kinguppaat pisassaatitaasut tamarmik pisarineqarpata kinguppanniarneq unitsinneqassaaq. Tamanna pillugu nalunaarut Kalaallit Nunaanni Rigsombudsmandimit radiokkut aviisitigullu nalunaarutigineqarsinnaavoq.§ 4. Akuersissut angallatip aalajangersimasup piginnittaata aalajangersimasup pissaatut allanneqassaaq.
Imm. 2. Akuersissut piginnaatitaaffiillu taassuma imarisai allamut tunniunneqarsinnaanngillat.
Imm. 3. Piginnittoq toqussagaluarpat imaluunniit angallat akuerineqarsimasoq umiuilluni umiussagaluarpat akuersissut eqqarsaatigineqaqqissaaq paasiniarlugu aallaqqaammut patsisissaatitaasimasut allatigut akuersissutip tunniunneqarneranut atasut suli naammassineqarsimanersut. Patsisissaatitat naammassineqarsimanngippata akuersissutaasimasoq atorunnaassaaq.
Imm. 4. Akuersissut 1981-mut atortuussaaq.
Imm. 5. Akuersissut angallammiitinneqassaaq.§ 5. Inuutissarsiornermut Pisortap pissutissaqavitsillugu, assersuutigalugu akuersissummik pigisaqartoq sivisuumik ajutoorsimatillugu, akuersissummik tunniussaqartarnermi piumasarisat sanioqqussinnaavai.
§ 6. Nalunaarummi §§ 2, 3, 4 imm. 2 aamma § 5 imaluunniit § 2 najoqqutaralugu akuersissutit tunniunneqarsimasut unioqqutinneqarneri mianersoqqussummik, akiliisitaanermik akuersissummilluunniit arsaagaanermik kinguneqarsinnaapput. Suliassat taamaattut suliarineqassapput Landstingip inuutissarsiutigalugu aalisarneq, piniarneq aallaaniarnerlu pillugit inatsisaani nr. 4 13. oktober 1980-imeersumi aalajangersakkat malillugit.
§ 7. Nalunaarut maannamiit atulissaaq.
Imm. 2. Kalaallit Nunaata imartaani kinguppanniarneq pillugu akuersissummut nalunaarut nr. 464 9. november 1979-imeersoq atorunnaarsinneqassaaq 1. januar 1981.
Nuuk, ulloq 2. november 1980
Lars Emil Johansen/
Emil Abelsen