Namminersornerullutik Oqartussat saarullinniarnermut akuersissutit pillugit nalunaarutaat nr. 1, 2. november 1980-imeersoq.
Kalaallit Nunaanni inuutissarsiutigalugu aalisarneq, piniarneq aallaaniarnerlu pillugit inatsit nr. 4, 13. oktober 1980-imeersoq naapertorlugu aalajangersarneqarpoq:
§ 1. Nalunaarummi pineqarput inuit selskabillu kalaallit aalisarsinnaatitaanermut uppernarsaataannik peqartut Kalaallit Nunaata imartaani inuutissarsiutigalugu saarullinniartut.
§ 2. Angallatit 80 BRT qaangerlugu usisinnaasut saarullinniarsinnaapput Inuutissarsiornermut Pisortamit akuersissummik aatsaat peqqaarlutik. Akuersissut 1981-imi atortussatut tunniunneqassaaq angallatinut 198u-imi saarullinniarsinnaanermut akuersissummik peqareersut salliutillugit. Angallatinut 1980-imi saarullinniarsinnaanermut akuersissummik tunniussineq pisassat amerlassusissaannik, angallatit usisinnaassusiannik aalisarnermillu inuutissarsiuteqarnerup pissusissamisoortumik ineriartornissaanut tunngasut eqqarsaatigalugit pisassaaq.
Imm. 2. Saarullinniarnermut akuersissummik qinnuteqaat Inuutissarsiornermut Pisortameeriissaaq 10. december 1980. Inuutissarsiornermut Pisortaq pisinnaatitaavoq immikkut ittunik pissutissaqartillugu akuersissummik qinnuteqaatinut piffissaq killiliussaq ataasiakkaatigut saneqqussinnaallugu.
Imm. 3. Akuersissummut atasumik pisassaatitaasut il. il. akuerineqartunut agguaanneqarsinnaapput, takuuk Landstingip inuutissarsiutigalugu aalisarneq, piniarneq aallaaniarnerlu pillugit inatsisaani nr.4 13. oktober 1980-imeersumi § 5.
Imm. 4. Akuersissummik tunineqarnissamut patsisissaatinneqarpoq pisat tamakkerlutik Kalaallit Nunaanni tunisassiorfinnut suliareqqitassanngorlugit nunnigunneqarnissaat.
Imm. 5. Akuersissummiktunineqarnissamut patsisissaatinneqarpoq angallatip inuttaasa minnerpaamik 60%-ii tassaassasut inuit Kalaallit Nunaanni najugaqavissut ukiunilu kingullerni marlunni ingerlaannartumik najugaqarsimasut kalaallinullu inuiaqatigiinnut attuumassuteqartut. Piumasarisap naammassineqarsimaneranut uppernarsaat Inuutissarsiornermut Pisortameeriissaaq siullermeerluni aalisarialerneq sioqqullugu.
Imm. 6. Angallatinut 1980-imi saarullinniarnermut akuersissummik pigisaqanngitsunut akuersissummik tunineqarnissamut patsisissaatinneqarpoq inuit piginnittut minnerpaamik 2/3-ii aalisarneq pingaarnertut inuutissarsiutigalugu allagartamik peqartut, takuuk Landstingip inuutissarsiutigalugu aalisarneq, piniarneq aallaaniarnerlu pillugit inatsisaa, § 2, imm. 3. Tamatuminnga uppernarsaasinnaaneq Inuutissarsiornermut Pisortameeriissaaq kingusinnerpaamik 1. juni 1981. Akuersissut arsaarinnissutigineqassaaq piumasarisat naammassineqanngippata.
Imm. 7. Akuersissut tunngavigalugu saarullinniarneq taamaatinneqarallartussanngortinneqarsinnaavoq imaluunniit piffissamut killilikkamut.
Imm. 8. Saarulliit pisassaatitaasut tamarmik pisarineqarpata saarullinniarneq unitsinneqassaaq. Tamanna pillugu nalunaarut Kalaallit Nunaanni Rigsombudsmandimit radiokkut aviisitigullu nalunaarutigineqarsinnaavoq.§ 3. Akuersissut angallatip aalajangersimasup piginnittaata aalajangersimasup pissaatut allanneqassaaq.
Imm. 2. Akuersissut piginnaatitaaffiillu taassuma imarisai allamut tunniunneqarsinnaanngillat.
Imm. 3. Piginnittoq toqussagaluarpat imaluunniit angallat akuerineqarsimasoq umiuilluni umiussagaluarpat akuersissut eqqarsaatigineqaqqissaaq paasiniarlugu aallaqqaammut patsisissaatitaasimasut allatigut akuersissutip tunniunneqarneranut atasut suli naammassineqarsimanersut. Patsisissaatitat naammassineqarsimanngippata akuersissutaasimasoq atorunnaassaaq.
Imm. 4. Akuersissut 1981-mut atortuussaaq.
Imm. 5. Akuersissut angallammiitinneqassaaq.§ 4. Inuutissarsiornermut Pisortap pissutissaqavitsillugu, assersuutigalugu akuersissummik pigisaqartoq sivisuumik ajutoorsimatillugu, akuersissummik tunniussaqartarnermut piumasarisat sanioqqussinnaavai.
§ 5. Nalunaarummi §§ 2 aamma 3 imaluunniit § 2 najoqqutaralugu akuersissutit tunniunneqarsimasut unioqqutinneqarneri mianersoqqussummik, akiliisitaanermik akuersissummilluunniit arsaagaanermik kinguneqarsinnaapput. Suliassat taamaattut suliarineqassapput Landstingip inuutissarsiutigalugu aalisarneq, piniarneq aallaaniarnerlu pillugit inatsisaani nr. 4, 13. oktober 1980-imeersumi aalajangersakkat malillugit.
§ 6. Nalunaarut maannamiit atulissaaq.
Imm. 2. Kalaallit Nunaata imartaani saarullinniarneq pillugu akuersissummut nalunaarut nr. 463 9. november 1979-imeersoq atorunnaarsinneqassaaq 1. januar 1981.
Nuuk, ulloq 2. november 1980
Lars Emil Johansen/
Emil Abelsen