Ilanngussaq 2

Aserfallatsaaliuinissamut innersuussutit

1. Tamanut tunngasut:

Aserfallatsaaliuinissamut ilitsersuummi inissiap pequtillu inissiamut atasut il.il. aserfallatsaaliorneqarnissaat atorneqarnissaallu tamakkiisumik nassuiarneqarput.

Inissianut ataasiakkaanut atortut, ikkussukkat il.il. assigiinngitsut inissinneqarsimapput, aserfallatsaaliuinissamullu ilitsersuummi matumani najugaqartoq inissiami pigisanut assigiinngitsunut qanoq iliuuseqarsinnaasoq qanorlu iliuuseqartoqartariaqarnersoq naatsumik oqaluttuarineqarpoq.

Aserfallatsaaliugassanut tamanut tunngatillugu oqaatigineqassaaq, suliassat sanasut suliaattut eqqortumik suliarineqartussaammata. Ilinnut ikiortissatut aammalu angusassap pitsaanerpaanissaa anguniarlugu inassutigissavarput: Nammineerlutit inissiami aserfallatsaaliugassanik suliaqartillutit imaluunniit suliaqarnissat kissaatigigukku iliuusissat innersuunneqartut malissagakkit. Nalornisoornermi siulersuisut aperineqassapput. Misileraaqinak, akisunerulersinnaavoq.

1.2. Qalipagassat:

Qalipaalinnginnermi qalipagassap manngersuunissaa, minguitsuunissaa, qalipaataata nuuttartuunnginnissaa panernissaalu qulakkeerneqassaaq. Piareersarluarnissaq, taamaalillunilu suliap kusanartumik naammassineqarnissaanut tunngavissaqarlualernissaq imminut akilersinnaavoq.

Qalipaalinnginnermi qalipagassat eqqiaanermi arrorsaatit, qalipagassanut naleqqussakkat atorlugit asanneqarnissaat, kiisalu imiinnarmik kingunerneqarnissaat pingaaruteqarpoq.

Qalipariikkat qalipaatimikkut qillernermikkullu assigiissapput. Putut quppallu milinneqarsimassapput. Qalipatat teqeqqullu attorlugit manissuussapput. Qalipaatit atorneqartut tamarmik akuerisaassapput.

2. Qilaat qalipariikkat

Qilaat qalipanneqarsinnaapput/qaqorsarneqarsinnaapput, kisiannili ajoqusiisinnaaneq tamatumani eqqumaffigeqqussavarput.

Akuttunngitsumik qilaat qalipanneqarsimasut/qaqorsarneqarsimasut katagalalersut naammattoortarpagut, suliassallu nammineerluni suliarinerani ajornartorsiutaasup minnerulernissaa ilimagineqarsinnaanngilaq.

Nammineerluni aallartissagaanni makku eqqumaffigineqartariaqarput:

2.1. Qilaat qalipaataat nuuttartut

Aallartikkuit qalipaat nippusimanngitsoq piiaruk, siornatigullu qalipaat qanoq ittoq atorneqarsimanersoq nalugaanni qalipagassap ilamininngua misilillugu asanneqaqqaassaaq.

Qalipaat imermik peerneqarsinnaappat, qilaap qalipaat liimmitalik atorlugu qalipanneqarsimanera nalorninarunnaassaaq.

Tamatuma kingorna qalipaat liimmitalik svampi assigisaaluunniit atorlugu asallugu piiarneqassaaq. Imermik akoqanngitsumik kingunerlugu asalluarneqassaaq.

Qilaaq gipsiuppat erngup atorneqarnissaa mianersuunneqassaaq, gipsip qalliutaa kartoniusoq aserorneqarsinnaammat.

Qilaaq tamakkerlugu salilluarneqareeruni qalipaammik siuliummik qalipanneqassaaq, tamatumalu kingorna manissarneqassalluni, naggataagullu qilaamut qalipaatissaq alkyd imermik akulik imaluunniit qalipaat plastikkitalik atorlugu qalipanneqassalluni.

2.2. Qilaat qalipaataat nuunneq ajortut

Aallarniutigalugu qalipaat nippussimanngitsoq piiarneqassaaq putuusinnaasullu milittorneqassallutik. Tamatuma kingorna qilaaq asanneqassaaq.

Simernerit qalipaat siuliut atorlugu siulinneqassapput, tamatumalu kingorna qilaamut qalipaatissaq alkyd imermik akulik imaluunniit qalipaat plastikkitalik atorlugu qalipanneqassalluni.

2.3. Qilaat qisuit

Ulluinnarni eqqiaasarnermi pujoralaajaatit imaluunniit støvsugeri atorneqarsinnaapput.

Qilaat asanneqassappata, qilaat eqqiaanermi arrorsaatit atorlugit asalluarneqassapput.

Qilaat qisuit siulersuisut akuersiteqqaarnagit qalipanneqaqqusaanngillat.

3. Iikkat

3.1. Tapetilersuineq

Niuertarfinni tapetit assigiinngitsorpassuit, assigiinngitsunik akillit nassaassaapput, tassanilu tapeti qanoq ittoq atorneqassanersut inassuteqassanngilagut, taamaallaalli tapetinik niuerutillip oqaloqatigineqarnissaa innersuussutigissallugu. Iigaq tapetip ikkuffissaa qanoq ittuussanersoq, tapetimut nipinneqqut qanoq ittoq atorneqassanersoq il.il. pillugu paasissutissiisoqassaaq.

3.2. Piareersaaneq

Sunaluunniit suliarineqartussaatilluni piareersaqqaarneqartarpoq. Pikkorlioraanni imaluunniit piareersaanissaq qaangiinnaraanni, qaqutiguinnaq suliap inernissaa kissaatigisatut pitsaatigisarpoq. Allaammi immaqa tamanna nutaamik tapetilersuinermik kinguneqarsinnaavoq, tamannalu aningaasat piffissallu atorneqarsimasut tamaangaannarnerannik kinguneqarsinnaavoq.

3.3. Passussinissamut innersuussutit

Iikkat tapetilersoriikkat tapetii nippusimanngitsortaqarnersut misissorneqassapput, kikissat nalinginnaasut qinnillillu il.il. piiarneqassapput. Putut milittorneqassapput aammalu tapetip qaleriiffigisinnaasai qapiarlugit sioralillugillu piiarneqassapput.

Iikkanik tapetilersuinermi tapetit narlorissumik – eqiternertaqanngitsumik ersittunillu katinnertaqanngitsumik – ikkussuunneqassapput (attuutsillugit)

Rutex (sannakuaqqanik tapetiliat) tapetillu sannallit/skummimik sanaat allat atorlugit tapetilersuinermi tapetit narlorissumik – eqiternertaqanngitsumik ersittunillu katinnertaqanngitsumik – ikkussuunneqassapput. Aamma tapetip tunorliup katiffii ersissanngillat.

Rutex tapetillu sannallit/skummimik sanaat allat imaluunniit hessian atorlugu tapetiliat qalleqqusaanngillat.

Iikkat Rutex aamma tapetit sannallit/skummimik sanaat atorlugit tapetilersukkat taamaallaat qalipanneqarsinnaapput. Tamannattaaq iikkanut qalipariikkanut tapetilersorneqanngitsunut atuuppoq.

Iikkat qilaallu hessian atorlugu qallikkat inissiamit nuunnermi akuerineqarsinnaassanngillat, inissiallu misissorneqarnerani piiarneqarsimanngikkunik, ilinnut akiligassanngorlugit piiarneqassallutik.

Tamannattaaq panelinut qalliutinut iikkanullu allanngorartumik qalipanneqarsimasunut atuuppoq.

Matut sikaaviillu matui tapetilersoqqusaanngillat.

3.4. Iikkanut qalipaatit plastikkinik akullit

Iikkat sannakuaqqanik tapetiliat, tapetit sannallit assigisaalluunniit atorlugit tapetilersukkat qalipanneqarsinnaapput. Tamannattaaq iikkanut qalipariikkanut tapetilersorneqanngitsunut atuuppoq.

Iikkat manissumik assigiiaartumillu qalipanneqassapput. Fodpanelit, ikkuffiit naqqillu, innaallagissamut ikkuffiit il.il. qalipattoorneqarsimassanngillat.

Taamaattumik assersuilluarnissaq tamatigut isumagisaruk. Fodpanelit, ikkuffiit, innaallagissamik ikkuffiit naqqillu il.il. qalipattoorneqarsimassappata, inissiamiit nuuttup akiligaanik iluarsaaqqittoqassaaq.

Ikkat gipsonitinik qallikkat – imermik aalartitsilluni piiaanerup mianersuunneqarnissaa eqqumaffigineqassaaq, qalliutaa kartoniusoq aserorneqarsinnaammat.

3.5. Passussinissamut innersuussutit

Eqqiaaneq – gipsimik piiaaneq – qalipaatit plastikkimik akullit atorlugit qalipaaneq (qillissuseq 5).

3.6. Inini masattuleriffinni iikkat alliit/qulliit

Betoni/manissaaneq.

Eqqiaaneq – gipsimik piiaaneq (putunik milittuutit cementimik akullit qajuusaasat) qalipaatit akrylimik akullit atorlugit qalipaaneq (qillissuseq 50).

Inini masattuleriffinni iikkanik qalipaalinnginnermi, iikkat eddikesyre (imermut 8-10 literimut eddikesyre 32% 2 dl) atorlugu eqqiaaqqissaartoqassaaq imermillu akoqanngitsumik kingunerisoqassalluni.

4. Natit

4.1 Natit qisuit alloriusallu

Natit qisuit alloriusallu lakkikkat akulikitsumik aserfallatsaalineqartassapput, taamaalillutik tamatigut aserfallatsaaliukkatut lakkilu naqqup qisuttaa tikillugu nungullarsimanngitsutut isikkoqartinneqassallutik. Nateq lakkerneqannginnermini asallugit orsuiarneqassaaq minguiarneqassallunilu, asaanerlu imeq nalinginnaasumik qaqorsaatilik atorlugu pissaaq (sulfo atorneqassanngilaq).

Tamatuma kingorna imeq kissartoq eddike-mik akulik (qattamut imermut eddikesyre 32% 2 dl) nateq asanneqassaaq. Imeq akoqanngitsoq atorlugu arlaleriarluni kingunerneqassaaq, tamatumalu kingorna nateq panerluarpat aatsaat lakkerisoqassaaq.

Aamma lakkerinissaq sioqqullugu nateq qillerniiarneqassaaq – tamanna pinngippat lakki nipputivissinnaanngimmat.

Naqqup lakkerneqannginnerani naqqup nungullarsimanertai ajortianersaalu lakkeqqaarneqarsinnaapput. Nateq støvsugerneqassaaq, lakkilu imerpallersaasernagu issusuumik tarnunneqassaaq. Naqqup qaata qillinnginnissaa kissaatigineqarpat, plastiklakki qillinngitsoq nammineerluni panertartoq atorlugu qallerneqarsinnaavoq.

Nateq bone-rummik qallerneqarsimappat, taanna asaanerinnakkut peerneqarsinnaanngilaq, taamaallaalli naqqup sioralinneqarneratigut peerneqarsinnaalluni. Natermik sioraliineq/qapiaaneq tamakkuninnga sulialinnit isumagineqassaaq.

Ludbehandling atorlugu nateq suliarineqaqqusaanngilaq. (Natilli ludbehandleriikkat matumani pineqanngillat).

4.2. Natit simissiamik sanaat

Ulluinnarni eqqiaanermi imeq atornaveersaaruk. Nateq simissiamik sanaaq eqqiarneqarnissaminik immikkut pisariaqartitsiviuppat, imeq eqqiaanermi arrorsaammik syntetiskiusumik akuneqassaaq. Arrorsaatit sakkortuut, soorlu acetone imerpallersaallu, atoqqusaanngillat.

Ulluinnarni eqqiaanermi støvsugeri atorneqassaaq, sukumiinerusumillu eqqiaasoqassappat annoraamineq isugutasoq siggorluarsimasoq atorlugu nateq tagiarneqassaaq.

Natit simissiamik sanaat lakkerneqassappata – atuinissamut ilitsersuut maliguk. Lakkerisoqannginnerani tamatigut misileeqqaartoqartassaaq.

4.3. Natit vinylimik sanaat

Natit vinylimik sanaat imeq qaqorsaaserlugu imaluunniit eqqiaanermi arrorsaatinik syntetiskiusunik akullugu asanneqassapput. Bonerinissaq inassutigineqanngilaq, taamatut pisoqassappat natit vinylimik sanaat quasattorujussuanngussammata.

4.4. Natit Terrazzo-t aamma stiftmosaik-it

Natit Terrazzo-t aamma stiftmosaik-it akuttunngitsumik imeq qaqorsaatilik (qaqorsaatit aggukkat imaluunniit qaqorsaat nerumittoq) atorlugu asanneqartassapput, kingunerneqanngikkaluarlutik qaavi assigiiaartumik qillingajallutik kusatsittarmata.

Eqqiaanermi arrorsaatit syntetiskiusut naternut terrazzo-nut aamma stiftmosaik-inut atoqqusaanngillat.

Erngup kalkiata nateq qaserujutsilertarmagu, taamaannera vandvoks saviminissamik akulik imaluunniit stenpolitur, vandvoks-imut sanilliulluni quaassinnaanermut isumannaallisaanermik annikinnerulersitsineq ajortoq atorlugu suliarisinnaavat.

Nateq qasernersaqalerpat, qasernersaa saltsyre atorlugu piiarneqassanngilaq, kisiannili qajuusaasat eqqiaanermut atortut, kalkimik arrortitsisinnaasut atorlugit kumiinikkut imaluunniit annoraamineq eddike-talik atorlugu tagiaanikkut piiaasoqarsinnaalluni.