Ilanngussaq 6. Pereersunik misissuinissamut ilitsersuut

Kukkunersiuisup pereersunik misissuinermut atatillugu misissussavaa:

Ukiumoortumik nalunaarut kinguliani malitassatut tunngaviusut malillugit suliarineqarsimanersoq:

1) Ukiumoortumik nalunaarut ersarissumik paasiuminartumillu suliarineqassaaq (ersarissuseq).

2) Pissusiviusut eqqarsaatigineqassapput, annikitsut imaqarpianngitsut pinnatik (imarisaq tangilik).

3) Pissutsit attuumassutillit tamarmik ukiumoortumik nalunaarummut ilaassapput, taakku isumaqanngitsutut inissisimanngippata (pingaaruteqassuseq). Kisiannili isumaqanngitsutut isikkullit arlallit katinneqarnerminni isumaqalersinnaappata, taakku ilaatinneqassapput.

4) Suliap ingerlanneqarnera ingerlaannartussatut ilimagineqarpat (going concern) ilaatinneqassaaq, ingerlaqqittussaanngippat imaluunniit ingerlaqqittussatut ilimagineqanngippat ilaatinneqassanani. Suliaq ingerlanneqassappat suussusilersukkat inissititerinerlu, kiisalu naatsorsukkat uuttortakkallu ingerlatsinermut tassunga naleqqussarneqassapput.

5) Nalitigut allannguutit suulluunniit takussutissiorneqassapput, tamatuma nammineq aningaasaatinut angusaasullu naatsorsornerinut sunniuteqartussaanera apeqqutaatinnagu (kinaassusersiunngissuseq).

6) Nuussinerit, pisut nalitigullu allannguutit pinerini ilanngullugit naatsorsuusiorneqartassapput, tamatumani akilerneqarnerannut piffissaq apeqqutaatinnagu (piffissalersuineq).

7) Naatsorsuutinut ilanngussilluni naatsorsueriaatsit uuttuisarnermillu tunngaviusut pisut suussusiinut assigiimmik atorneqartassapput (imaqassuseq).

8) Nuussinerit, pisut nalitigullu allannguutit tamarmik naatsorsuutinut ilanngunneqartassapput aammalu immikkoortillugit uuttorneqartassallutik, taamatullu pisut ataasiakkaat imminnut akerleriittunngorlugit naatsorsorneqarnissaat pinaveersaarneqassalluni (nalillit ilanngaasigaanngitsut).

9) Ukiup naatsorsuiffiusup aallartinnerani naatsorsuutit oqimaaqatigiisinneqarnerat ukiup naatsorsuiffiusup qaangiuttup naanerani naatsorsuutit oqimaaqatigiisinnerisa assigissavaat (atajuartitsinissaq nalinginnaasoq).

10) Ukioq naatsorsuiffiusoq, naatsorsuutit inissititernerat suussusilersornerallu, patajaallisaanermi periuseq, naatsorsuutinut ilanngussilluni naatsorsueriaaseq aamma uuttuinermi tunngaviusut, kiisalu naatsorsuutinut ataatsimut periuseq atorneqartoq ukiumiit ukiumut allanngortinneqartassanngilaq (atajuartitsinissarpiaq).

11) Nr. 6-imiit 10-mut aalajangersakkat immikkut ittunik pisoqartillugu sanioqqunneqarsinnaapput. Taamatut sanioqqutsinerit ukiut tamaasa nalunaarsuutinut immersuiffissap nalaanut allanneqartassapput, tassani tunngavigisat aalajangersimasut allanneqartassallutik, aammalu tamanna suliffeqarfiup pigisaanut akiligassaanullu, aningaasaqarnikkut inissisimaneranut kiisalu naatsorsuutit inernerinut qanoq aningaasatigut sunniuteqarpiarnersoq ilisimatitsissutigineqartassaluni.

12) Allaffissornermut akiliut tamatumunnga maleruagassiarineqartut naapertorlugit aalajangersarneqarsimassaaq.