Ilanngussaq 4.

Torersaarnissamut maleruagassat

 

Ilaqutariinnut arlalinnut inissiani sanilinut najugaqaqatinullu mianerinninnissaq pingaaruteqarpoq. Najugaqartut akunnerminni ajunngitsumik pissuseqarfigisarnerat najugaqarfimmi pitsaasumi toqqissisimanissamut atugarissaarnissamullu annertuumik sunniuteqaqataasarpoq.

Inissiap illuullu pitsaasumik paarineqarnerat ajoqusikkat amerlassusaannik killilersueqataasinnaavoq. Attartortup ajoqusikkat, attartortup nammineerluni inuilluunniit allat attartortup inissiamut isernissamut akuerisaasa paarsinerlunnerisigut sumiginnaanerisigulluunniit pilersut tamaasa attartortup taarsertussaavai. Attartortup qularnaveeqqusiinermut kontoani uninngasuutigineqartut attartortup ajoqusigaanut attartortitsisup iluarsaassinermut atorsinnaavai. Aamma qularnaveeqqusiinermut konto ineqarnermut kiassarnermullu akiligassanut akilinngitsuukkanut matusissutigineqarsinnaavoq.

Attartortitsisup attartorneq atorunnaarsissinnaavaa, attartortup inissiaq paarinerluppagu, aserorteriffigippagu imaluunniit attartortoq ineqarnermut kiassarnermullu akilinngitsuukkaminik akiligassaqalerpat.

Eqqagassat

Illuummi eqqagassanut nakkartitsisarfeqarpat, igitassat nakkartitsisarfikkut iginneqannginnerminni pappiaqqamut poortorluarneqarsimassapput imaluunniit puussiamut ikineqarsimassallutik. Illuutini eqqagassanut nakkartitsisarfeqanngitsuni igitsivissatut inissitaasimasunut igitassat iginneqartassapput. Igitassat majuartarfeqarfinnut imaluunniit eqqaaveqarfiit naqqinut iliinnarneqassanngillat.

Torsuusarsuaasat majuartarfiillu ataatsimoorussat

Attartortoq inissiap najugarisap silataani torsuusarsuaasap majuartarfiillu salliarnartaasaata eqqiluisaartinneqarnerani peqataassaaq. Sikkilit, meeraaqqanut aneerussissut, qamutit pequtillu suulluunniit majuartarfinni, majuartarfiit sangoriaanni torsuusarsuaasaniluunniit inissisimatinneqaqqusaanngillat.

Antennit

Attartortitsisoq allakkatigut akuersiteqqaarnagu silami antenninik ikkussuisoqaqqusaanngilaq. Akuersissuteqarnissami attartortup qularnaveeqqusiissutissamik akiliinissaa piumasarineqarsinnaavoq. Antenni ikkunneqarnermini kingusinnerusukkulluunniit illuummut ajoqusiisimappat ajoqusikkap iluarsineranut aningaasat atorneqarsinnaapput.

Uffarfiit, kuutsitsiviit, perusuersartarfiit, erngup qorlorfii il.il.

Annoraaminernik, qiviuusanik assigisaannilluunniit perusuersartarfinnut imermik errortortakkanut igitseqqusaanngilaq. Attartortitsisoq piaartumik erngup qorlorfii, perusuersartarfiit imiisivii quisarfiilu ussiitsut, imaluunniit erngup aqqutaani ussiitsut allat pillugit nalunaarfigineqassaaq.

Mingutsitsineq

Ataatsimoorussamik atorneqartut, soorlu majuartarfeqarfiit, kaajaluisat imaluunniit pinnguartarfiit mingutsinneqaqqusaanngillat. Illup iigai qisuttaaluunniit titartuiffigeqqusaanngillat, kigartorneqaqqusaanatik qalipanneqaqqusaanatilluunniit. Attartortitsisoq pisariaqarfiisigut attartortup akisussaasup akiligassaanik eqqiaasinnaavoq pitsanngorsaasinnaallunilu.

Uumasuuteqarneq

Attartortitsisoq allakkatigut akuersiteqqaarnagu qimmeqartoqaqqusaananilu qitsuuteqartoqaqqusaanngilaq. Allamik peqqutissaqavitsinnagu ilaqutariinnut arlalinnut inissiani, tassalu illuni uiguleriinni inissiarsuarnilu qimmiuteqartoqaqqusaananilu qitsuuteqartoqaqqusaanngilaq. Qimmeqarnissamut qitsuuteqarnissamulluunniit immikkut ittumik qularnaveeqqusiisoqarnissaa attartortitsisup piumasarisinnaavaa.

Sannatit, nipilersorneq il.il.

Sakkut nipiliortut, soorlu qillerutit, eqqaamiut eqqarsaatigalugit taamaallaat nal. 8-ip aamma nal. 19-ip akornanni atorneqaqqusaapput. Majuartarfinni, torsuusaasarsuarni imaluunniit naqqut iluini nipiliorluni pinnguartoqaqqusaanngilaq. Radio, fjernsyni, båndoptageri, oqaluttartoq imaluunniit CD-mik nipilersuut eqqaamiunut akornutaasumik atorneqaqqusaanngillat. Nalliuttorsiornerit nipiliorfiusut eqqaamiut tamatumunnga akuersiteqqaarsimatinnagit ingerlanneqaqqusaanngillat. Nipilersortartut sungiusartarneri imaluunniit nipilersornermik ilinniartitsisarnerit attartortitsisumut isumaqatigiissutigineqaqqaarsimassapput.

Tamalaannik toqqorsiviit - piliviit

Tamalaannik toqqorsivinni - pilivinni ininiluunniit assigisaani ikuallajasunik, soorlu benzinamik, petroleumik, terpentinimik lakkimillu uninngatitsisoqaqqusaanngilaq. Attartortup init taamaattut parnaarsimasarnissaat isumagisassaraa – atorneqanngikkaluarpataluunniit.

Kiassaatit imermik imallit

Kiassaatit imermik imallit ussiillisimappata imaluunniit kiassaateqarfimmit aqqutaata arlaat ussiitsoqalersimappat, tamanna pillugu attartortitsisoq piaartumik nalunaarfigineqassaaq.

Allagartalersuineq

Allagartalersuinerit, tassani matumi allagartalersuutit kisiisa pinnagit, attartortitsisumit allaganngorlugu akuerineqarsimassapput.

Errorsineq

Atuisut allat assigalugit attartortoq errorsisarfinnik atuisinnaatitaavoq. Errorsisarfimmik atuineq najoqqutassiat nivinngarneqarsimasut malillugit aammalu inuup nammineq akisussaaffigisaanik ingerlanneqartassaaq. Errorsisarfiup atortui pissusissamisuunngippata, errorsisarfinnik nakkutilliisut attartortitsorluunniit nalunaarfigineqassapput. Aneersuartarfinni errortanik panersiinerit sanilinut akornutaassanngillat.

Inigisami allanngortiterinerit

Attartortoq talulersueqqusaananilu talunik piiaaqqusaanngilaq. Aamma attartortitsisoq allaganngorlugu akuersissuteqarsimatinnagu inissiami allanik allanngortiterinissaq inerteqqutaavoq. Allanngortiterinissaq akuerineqarsimappat, allanngortiterinermut aningaasartuutit tamaasa attartortup akilissavai. Attartornerup atorunnaarnerani allanngortitikkat pissuserisimasamittut ilisinneqaqqinnissaat piumasarineqarsinnaavoq. Pissusitoqaanut utertitsineq attartortumit suliarineqassaaq imaluunniit taassuma akiligassaanik suliaritinneqassalluni. Allanngortiterinerit attartortitsisoq allaganngorlugu akuersiteqqaarnagu suliarineqarsimasut paasineqarnerminni ingerlaannaq attartortup akiligassaanik pissusitoqqamittut ileqqittussanngortitaasinnaapput.

Torersaarnissamut maleruagassat maleruarneqassapput

Torersaarnissamut maleruagassat imaluunniit attartornermut peqqussutip tamatumunnga aalajangersagartai naapertorlugit torersaarnissamut maleruagassatut akuersissutigineqarsimasut attartortup maleruanngippagit, tassa torersaarnissamut maleruagassat annertuumik unioqqutinneqarsimappata, attartortitsisup attartorneq unitsissinnaavaa.

Torersaarnissamut maleruagassat allanuinnaq atuuttussiaanngillat.