Atuarfik pillugu Inatsisartut inatsisaanni nr. 15, 3. december 2012-imeersumi § 15, imm. 3 naapertorlugu aalajangersarneqarput:

Kapitali 1
Atorneqarfissaa siunertaalu

 § 1.  Atuartunut, piginnaasamikkut ajornartorsiutaat ima ippata imaluunniit ima annertussuseqarpata immikkut tapersersorneqarnissaminnut pisariaqartitaat nalinginnaasumik atuartitsinikkut pissarsiaritinneqarsinnaanatik, immikkut atuartitsisoqassaaq aamma allamik immikkut ittumik perorsaanikkut ikiorsiisoqassalluni.
  Imm. 2.  Atuartut atuarfinni imm. 1 naapertorlugu naammattumik annertussusilimmik ikiorserneqarsinnaanngitsut, Atuarfik pillugu Inatsisartut inatsisaanni § 25-mi atuartut angerlarsimaffiini, kollegiani imaluunniit atuartunut nerisaqarfigiitigalugu inissiani immikkut aaqqissuussani ineqarnissamut neqeroorfigineqartassapput.

  § 2.  Immikkut atuartitsisarnikkut aamma allamik immikkut ittumik perorsaanikkut ikiorsiisarnikkut siunertaavoq,
1)  meeqqat atuarfiata siunertaa tunngaviilu naapertorlugit atuartup ineriartornerata ilikkariartorneratalu siuarsarneqarnissaa,
2)  atuartup nalinginnaasumik atuartitsinermut peqataasinnaaneranut periarfissai sapinngisamik pitsaanerpaat, atuartup pisariaqartitaanut iluaqutaasut pilersissallugit, aamma
3)  atuartup atuarfimmiit inuiaqatigiinnut, ilinniakkamut inuussutissarsiornermullu sammisamulluunniit allamut ikaarsaarnissaa tapersersussallugu.

Kapitali 2
Annertussusaa imarisaalu

  § 3.  Immikkut atuartitsisarnermut aamma allamik immikkut ittumik perorsaanikkut ikiorsiisarnermut ilaapput:
1)  Meeqqat atuarfianni atuartitsissutinik atuartitsissutinillu qanitariissunik, atuartup ilikkagaqarsinnaanermigut periarfissai piginnaasaalu immikkut isiginiarlugit aaqqissuussanik, atuartitsineq, tak. § 4, imm. 2.
2)  Piginnaasaqariaatsinik suleriaatsinillu atuartitsineq sungiusaanerlu, atuartup tarnikkut, timikkut, inooqataanikkut, attaveqatigiinnikkut, eqqarsarnikkut, misigissutsikkut  maluginiutitigullu piginnaasaqarnissamut periarfissaanik ineriartortitsinerup siuarsarnissaa siunertaralugu.
3)  Atuartunut angajoqqaanullu, ilinniartitsisunut allanullu, sulinerat atuartup ineriartorneranut annertuumik pingaarutilinnut, immikkut ittumik perorsaanermut siunnersuineq.
4)  Atuartitsinermut atortussat immikkut ittut teknikkikkullu iluaqusersuutit atuartup atuartitaaneranut atatillugu pisariaqartinneqartut.
5)  Atuarnermut atatillugu suliassatigut, inuttut naammassisassatigullu ajornartorsiutit qaangernissaannut tapersersuutaasinnaasumik atuartumut inuttut ikiorsiineq.
6)  Inuiaqatigiinnut, ilinniakkamut, inuussutissarsiummut sammisamulluunniit allamut ikaarsaariarnermi atuartup namminersorsinnaaneranut imminullu ikiorsersinnaaneranut inuttut siunnersorneqarneq.

  § 4.  Immikkut atuartitsisarnerup aaqqissuunneqarnera allatullu immikkut ittumik perorsaanikkut ikiorsiineq, taamatuttaaq ilinniartitseriaatsinik, suleriaatsinik periuutsinillu atuartup pisariaqartitaanik toqqaaneq, pisinnaasaanik ilikkarniarnikkullu piginnaasaqarfigeriigaanik aallaaveqassapput, tak. imm. 2., aaqqissuussinerlu atuartumut pitsaanerpaaqqullugu tamanna pissaaq atuartoq sapinngisaq tamaat annerpaamik peqataatillugu atuartullu kissaatai eqqarsaatigalugit.
  Imm. 2.  Atuartup ilikkarniarneranut piumassaqaatit ilaatigut tassaapput suliassatigut, naammassisassatigut inuttullu nukittuffiit. Piginnaasaqarfii nalilerneqassapput, Atuarfik pillugu Inatsisartut inatsisaanni § 38, imm. 1, nr. 4 naapertorlugu perorsaanermut aamma tarnip pissusaanut tunngasunik siunnersuinermik ingerlatsiffiusumit (Siunnersuisarfik). Tamanna perorsaanikkut aamma tarnip pissusaanut tunngasunik nalilersuinikkut pissaaq, ajornanngippat meeqqanut tarnip nakorsaanik peqqinnissaqarfimmiluunniit sulisunik allanik suleqateqarnikkut.

  § 5.  Immikkut atuartitsineq ilinniartitsisunit immikkut atuartitsinermut ilinniarsimasunit allatulluunniit piginnaasanik pisarialinnik peqartunit ingerlanneqartassaaq.
  Imm. 2.  Perorsaasut allallu naleqquttumik ilinniagaqarsimasut atuartut angerlarsimaffiini, ilinniartut najugaqarfiini atuarfinnilu nerisaqarfiutigisuni immikkullu perorsaanikkut suliaqarfiusuni perorsaanikkut suliniuteqarsinnaapput.

  § 6.  Immikkut atuartitsineq aamma allamik immikkut ittumik perorsaanikkut ikiorsiisarneq ima iliorluni pisassaaq:
1)  Inimi atuarfiusumi taassumaluunniit avataani kisimiilluni tapersersorneqarnikkut.
2)  Inimi atuarfiusumi taassumaluunniit avataani eqimattami tapersersorneqarnikkut.
3)  Akunnerni piffissanilu ataasiakkaani kisimiilluni atuartinneqarnikkut.
4)  Piffissani sivikitsukkaani atuartitsissutini tamarmiusuni kisimiilluni atuartinneqarnikkut.
5)  Akunnerni piffissanilu ataasiakkaani eqimattami atuartinneqarnikkut.
6)  Piffissami sivikitsumi atuartitsissutini tamarmiusuni eqimattami atuartinneqarnikkut.
7)  Atuarneq tamaat atuarnerulluunniit annersaani atuaqatigiinni atuartunut immikkut atuartinneqarnissamut allatulluunniit immikkut ittumik perorsaanikkut ikiorserneqarnissamut pisariaqartitsisunut pilersinneqarsimasumi atuartinneqarnikkut (specialklassi).
8)  Atuarfinni immikkut ittuni atuarfiilluunniit immikkoortortaani immikkut pilersitani atuartinneqarnikkut.
9)  Ulluunerani aamma ulloq unnuarlu neqeroorutini, Naalakkersuisut pilersitaanni akuerisaanniluunniit atuartinneqarnikkut.
  Imm. 2.  Immikkut atuartitsineq aamma  allamik immikkut ittumik perorsaanikkut ikiorsiisarneq atuartitsissutini ataasiakkaani, atuarnerup ilaani imaluunniit atuarnermi tamarmiusumi pisinnaavoq. Immikkut atuartitsineq aamma allamik immikkut ittumik perorsaanikkut ikiorsiisarneq meeqqat atuarfiani atuartitsissutaasuni tamani atuartitsissutinilu qanitariissuni tamarmiusuni atorneqarsinnaavoq.
  Imm. 3.  Immikkorluinnaq peqqutissaqanngippat atuartoq sivikitsuinnarmik kisimiisillugu atuartinneqartariaqarpoq taamaallaallu piginnaasamigut ajornartorsiutai ima ippata atuaqatigiinnut specialklassimulluunniit akulerutsinneqarsinnaanani, imaluunniit pissutsit immikkorluinnaq ittut peqqutaappata.
  Imm. 4.  Ilinniartitaanermut ,Kultureqarnermut, , Ilisimatusarnermut Ilageeqarnermullu Naalakkersuisoqarfik immikkut atuartitsinermik aamma allamik immikkut ittumik perorsaanikkut ikiorsiissutinik imm. 1-imi pineqartunit allaanerusunik akuersissuteqarsinnaavoq.

Kapitali 3
Ingerlatseriaaseq ingerlaneralu

 § 7.  Atuaqatigiit ilinniartitsisuata, atuartulluunniit ilinniartitsisuisa allat imaluunniit atuarfimmi sulisut meeqqamut attuumassuteqartut allat iliuuseqarnerisigut perorsaanikkut tarnikkullu atukkat atuarfiup pisortaannut perorsaanikkut tarnillu pissusaanik naliligassatut innersuussutigissavai, imaappat:
1)  atuartup atuartulluunniit arlallit immikkut atuartitaanissamut pisariaqartitaat aamma immikkut ittumik tapersersorneqarnissamut pisariaqartitaat nalinginnaasumik atuartitsinerup iluanni atuartitseriaatsinik atuartunut tulluussaanikkut, eqimattakkaartitsinikkut eqaatsumilluunniit pilersaarusiornikkut ingerlanneqarsinnaanngippata, imaluunniit
2)  atuartup atuartulluunniit arlallit ataatsimut isigalugu inissisimanerat annertuumik ernumanartoqartinneqarpat.
  Imm. 2.  Innersuussusiortoqartinnagu atuartup atugarisai atuartulluunniit pineqartut atugarisaat pillugit, atuartunut pineqartunut, pineqartut angajoqqaavinut, atuartullu pineqartut ilinniartitsisuinut pissutsit oqaloqatiginnissutigineqareersimassapput.
  Imm. 3.  Innersuussineq paasissutissanik makkuninnga minnerpaamik imaqassaaq:
1)  pissutsit ajornartorsiutaasut ikiorserniarlugit atuartorlu pineqartoq imaluunniit pineqartut ineriartornerat ilikkariartornerallu siuarsarniarlugu sunik aallartitsisoqareersimanersoq,
2)  atuartup atugarisaasa oqaloqatigiissutigisarsimanerinik inerniliineq, tak. imm. 2, aamma
3)  apeqqutit tigussaasut perorsaanikkut tarnillu pissusaanut tunngassuteqartut, pissutsinik innersuussinermi tunngaviusunik aallaaveqartut .

  § 8.  Atuartup atuartullu angajoqqaavisa nammineerlutik atuaqatigiit ilinniartitsisuat qinnuigisinnaavaat, atuartup atugaanut perorsaanermut tarnillu pissusaanut tunngasunut atatillugu, perorsaanikkut tarnikkullu atuartup pisariaqartitaasa nalilersorneqarnissaat siunertaralugu.
  Imm. 2.  Qinnuiginninneq tunngavigalugu atuaqatigiit ilinniartitsisuat tamanna pillugu inassuteqaateqassaaq, § 7, imm. 2 aamma 3 takuuk.

  § 9.  Atuarfiup pisortaa atuaqatigiit ilinniartitsisuata inassuteqaataa, angajoqqaat atuartulluunniit qinnuiginninneraneersinnaasoq tunngavigalugu perorsaanermut tarnillu pissusaanut tunngasumik Siunnersuisarfimmi naliliisoqarnissaanik innersuussissaaq. Kiisalu atuarfiup pisortaa perorsaanermut tarnillu pissusaanut tunngasunik pissutsit paasissutissat atuartup atuarfimmi allatsinnerata nalaani pigineqartut tunngavigalugit nalilersuisoqarnissaanut innersuussisinnaavoq.

  § 10.  Perorsaanermut tarnillu pissusaanut tunngasunut nalilersuinissamut innersuussineq atuaqatigiit ilinniartitsisuata innersuussinerata saniatigut peqqinnissaqarfimmiit oqaaseqaammik ilaqartassaaq, atuartup imaluunniit atuartut pineqartut peqqissutsimikkut inissisimanerat ineriartornerallu pillugit, tamatumunnga ataavartumik nappaatit, tappissusiat tusaasinnaassusiallu ilanngullugit.
  Imm. 2.  Angajoqqaallu tamatumunnga akuersisimappata isumaginnittoqarfimmiit oqaaseqaammik ilanngussisoqarsinnaavoq.

  § 11.  Siunnersuisarfiup atuarfiup pisortaata inassuteqaataa tunngavigalugu perorsaanikkut tarnillu pissusaanut tunngasutigut pissutsit innersuunneqartut nalilersortittassavai, Siunnersuisarfiup naliliinermini atuartumut atuartunulluunniit pineqartunut pitsaanerusoq aallaavigisassavaa. 
  Imm. 2.  Siunnersuisarfik atuarfiup pisortaanut allaganngorlugu oqaaseqaateqassaaq, perorsaanikkut tarnillu pissusaanut tunngasutigut nalilersuineq tunngavigalugu. Ilutigitillugu taassuma assilinera angajoqqaanut atuartumullu nassiunneqassaaq.
  Imm. 3.  Siunnersuisarfik naliliippat pissutsit innersuunneqartut atuartumut ataatsimut arlalinnulluunniit immikkut ittumik atuartitsinikkut immikkulluunniit perorsaanikkut ikiorsiinikkut pissusissamisoornerpaamik ikiorserneqarsinnaasut, oqaaseqaat immikkut atuartitsisoqarnissaata ilusissaanik annertussusissaanillu siunnersuummik imaqassaaq, pingaarnertut siunertaralugu nalunaassallugu atuartitsineq tamarmi atuartitsinerulluunniit annersaa immikkut atuartitsinerunersoq imaluunniit immikkut ittumik perorsaanikkut ikiorsiinerunersoq.
  Imm. 4.  Siunnersuisarfiup nalilerpagu pissutsit innersuunneqartut immikkut atuartitsinikkut immikkulluunniit perorsaanikkut ikiorsiinikkut pissusissamisoornerpaamik ikiorserneqarsinnaanngitsut, oqaaseqaat pissutsit qanoq pitsaanerpaamik ikiorserneqarsinnaanerinik siunnersuinermik ilaqartinneqassaaq. 

  § 12.  Siunnersuisarfiup allaganngorlugu oqaaseqaataa tunuliaqutaralugu atuarfiup pisortaa aalajangiissaaq perorsaanikkut suliniutissanik aallartitsisoqassanersoq, aammalu taakkua qanoq iluseqartinneqassanersut, perorsaanikkut tarnillu pissusaanut tunngasutigut naliliisimanermik tunngaveqartunik, tamatumunnga ilanngullugu immikkut atuartitsinermik aamma allanik immikkut perorsaanikkut ikiorsiissutaasussanik aallartitsisoqassanersoq.
  Imm. 2.  Immikkut atuartitsinermik aallartitsinermi, aamma allanik immikkut perorsaanikkut ikiorsiissutinik aallartitsinermi, atuaqatigiit ilinniartitsisuata aamma ilinniartitsisut tamatumunnga attuumassuteqartut atuartup angajoqqaavinik atuartumillu isumasioqateqareernikkut, atuartunut ataasiakkaanut atuartitsinissamut pilersaarummik suliaqassapput.
  Imm. 3.  Atuartumut naatsorsuussamik atuartitsinissamut pilersaarusiaq minnerpaamik makkuninnga imaqassaaq:
1)  Atuartup tunngavigisai pisariaqartitaalu, atuartup nukittuffii pingaartillugit.
2)  Paasissutissat paasisallu pissutsinut tunngavigisanut atugaasunullu tunngasut, atuartup ineriartoqqinnissamut periarfissaanut pingaaruteqartut.
3)  Siunertat, anguniakkat anguniakkallu immikkoortitaarneri immikkut atuartitsinermi atugassarititaasut allamillu immikkut ittumik perorsaanikkut ikiorsiineq, kiisalu imarisai, sivisussusii, atuartitsinermi periaasissat iluserititassat atortussallu.
4)  Immikkut atuartitsinerup allamillu immikkut ittumik perorsaanikkut ikiorsiissutit qanoq nalilersorneqartarnissaat uppernarsaasersortarnissaallu.

  § 13.  Atuartoq, atuarfiup ingerlaannartumik iliuuseqarfigisariaqagaanik immikkut ajornartorsiornartumik inissisimappat,  immikkut atuartitsineq aamma allamik immikkut perorsaanikkut ikiorsiineq atuartup atugai pillugit atuartumik, angajoqqaavinik atuartullu ilinniartitsisuinik oqaloqateqarnerup kingornatigut qaqutigooraluartumik atuarfiup pisortaanit erniinnartumik aallartinneqarsinnaapput.
  Imm. 2.  Angajoqqaat imm. 1. naapertorlugu atuartumut atugassarititaasunik oqaloqatiginnissuteqarumanngippata, immikkut atuartitsineq imaluunniit allamik immikkut perorsaanikkut ikiorsiineq atuartumik ilinniartitsisuinillu oqaloqateqareernerup kingorna atuarfiup pisortaanit erniinnaartumik aallartinneqarsinnaapput.
  Imm. 3.  Imm. 1. aamma 2. naapertorlugit erniinnaartumik immikkut atuartitsinermik immikkulluunniit perorsaanikkut ikiorsiinermik aallartitsineq ullunit atuarfiusunit 15-init katillugu sivisunerusussatut nalilerneqarpat, angajoqqaat allakkatigut nalunaarfigineqassapput piaarnerpaamillu § 7, imm. 3 naapertorlugu innersuussusiortoqassaaq.

  § 14.  Immikkut atuartitsineq aamma allamik immikkut perorsaanikkut ikiorsiineq aallartinneqarsimasoq, atuartullu tamatumani pissarsiarisai ingerlaavartumik nalilersorneqartassapput, atuartup siumut sammisumik pisariaqartitaasa nalilersorneqarnissaannik siunertaqartumik, tak. imm. 2-3.
  Imm. 2.  Atuartup atuaqatigiinnut ilinniartitsisuata ilinniartitsisullu allat attuumassuteqartut akuttunerpaamik qaammatit allortarlugit perorsaanikkut pilersaarusiornermut ataatsimeeqatigiittassapput, tassanilu ataasiakkaanut atuartitsinermut pilersaarutit aaqqissuunneqartassapput nalilersorneqartarlutillu.
  Imm. 3.  Atuarfiup pisortaa, atuartup atuaqatigiinnut ilinniartitsisua ilinniartitsisullu attuumassuseqartut allat ukiup atuarfiusup qiteqqunnerani sullissinermut ataatsimiinneq ingerlattassavaat, tassanilu atuartumik atuartitsinerup ingerlanera nalilersorneqartassalluni.

  § 15.  Ingerlaavartumik nalilersuisarneq ingerlanneqartassaaq sapinngisamik atuartup atuartullu angajoqqaavisa sukumiisumik peqataatinnerisigut.
  Imm. 2.  Siunnersuisarfik pisariaqartitsineq naapertorlugu isumasiorneqartarsinnaavoq.
  Imm. 3.  Nalilersuinermut atatillugu peqqinnissaqarfimmiit, atuartup peqqissutsimigut ineriartorneranut tunngasutigut ilassutitut oqaaseqaatinik pissarsiniartoqarsinnaavoq. Angajoqqaat tamatumunnga akuersisimappata isumaginnittoqarfimmiit aamma oqaaseqaateqartitsisoqarsinnaavoq.
  Imm. 4.  Atuarfiup pissusissamisoortutut isigippagu Siunnersuisarfiup, peqqinnissaqarfiup inunnik isumaginnittoqarfiup oqartussallu susassaqartut attuumassutillit allat sinniisui aamma nalilersuinermut akulerunneqarsinnaapput.

  § 16.  Immikkut atuartitsinerup aamma allamik immikkut ittumik perorsaanikkut ikiorsiisarnerup suussusissaa annertussusissaalu Siunnersuisarfiup minnerpaamik ukiumut ataasiarluni nalilertassavaa. Tamanna ingerlaavartumik nalilersuisarnikkut pisassaaq, tak. §§-it 14 aamma 15. Atuarfiup pisortaata qulakkiissavaa atortussat atuartup killiffianik atuartitsinermullu pilersaarutinut nassuiaasut Siunnersuisarfiup pissarsiarissagai.

  § 17.  Atuarfiup pisortaata kommunalbestyrelsip immikkut atuartitsisarnermut killiliussaasa iluanni aalajangertassavaa ingerlaqqinnissaq, allannguuteqartitsinissaq imaluunniit immikkut atuartitsinerup aamma immikkut ittumik perorsaanikkut ikiorsiisarnerup aallartinneqarsimasup unitsinneqarnissaa. Tamanna pisassaaq immikkut atuartitsisarneq aamma immikkut ittumik perorsaanikkut ikiorsiisarneq pillugit Siunnersuisarfimmit nalilersuisimaneq tunngavigalugu.

Kapitali 4
Atuartunut ataasiakkaanut immikkut aaqqissuussinerit

  § 18.  Atuarfiup pisortaata atuaqatigiit ilinniartitsisuannit inassuteqaat angajoqqaanit akuersaarneqarneratigut atuartumillu tamanna pillugu oqaloqatiginninnerup kingorna, atuartup immikkut atuartitaanera imaluunniit immikkut ittumik perorsaanikkut atuartumut ikiorsiissutit allannguuteqartissinnaavai, atuartitsinermut allamut imaluunniit ikiorsiissutinut allanut, piffissami immikkut sivisussusilikkami. Allannguineq atuartitsissutinut ataasiakkaanut, arlaqartunut atuartitsissutinulluunniit qanitariissunut tunngasuusinnaavoq, piffissani aalajangersimasuni siunertalimmik allannguiffiusussatut isigineqartuni atuuttoq. Allannguineq ukiumut atuarfiusumut tamarmiusumut atuutissappat, atuarfiup pisortaata allannguinissamut pilersaarut allannguineq pitinnagu Siunnersuisarfimmut oqaaseqaateqarfigeqqullugu saqqummiutissavaa.

  § 19.  Atuartoq immikkut atuartitaanermik imaluunniit allamik immikkut ittumik perorsaanikkut ikiorsiissutaasumik aaqqissuussiffigineqarsimappat, atuartitsissutinut ataasiakkaanut, arlaqartunut atuartitsissutinulluunniit qanitariissunut tunngatillugu, atuarfiup pisortaa uppernarsaasiinermut  aamma atuartup angusaanut karakteriliinermut taarsiullugu allakkatigut oqaaseqaammik suliaqarsinnaavoq. Oqaaseqaat immikkut atuartitsinermi anguniagaasunik atuartup qanoq angusaqarsimaneranik tunngaveqassaaq, takukkit § 12, imm. 2 aamma 3.
  Imm. 2.  Uppernarsaasiineq aamma atuartup angusaanut karakteriliineq allakkatigut oqaaseqaammik taarserneqarpata, imm. 1 naapertorlugu, taanna atuartup inaarutaasumik soraarummeernermut uppernarsaataani ilanngunneqassaaq.

  § 20.  Atuarfiup pisortaata, tak. imm. 2 aamma 3 immikkut atuartitsinermut imaluunniit allatut immikkut ittumik ikiorsiissutaasutut aallartinneqarsimasunut naapertuunnerpaatut isigineqarpat, Meeqqat Atuarfiat pillugu Inatsisartut inatsisaanni aalajangersakkat aamma aalajangersakkat taanna tunngavigalugu suliarineqarsimasut naapertorlugit, piffissamut atuarfiusussamut, ukiup atuarfiusup sivisussusissaanut, atuartitaanerup pilersaarusiorneqarneranut aaqqissuussaaneranullu aamma alloriarfinni ataasiakkaani atuartitsinermut aalajangersakkat saneqqussinnaavai.
  Imm. 2.  Saneqqutsineq meeqqap soqutigisaanut iluaqutaanerpaassaaq imatullu aaqqissuunneqassanngilaq tamanna atuartup ingerlaqqilluni ilinniagaqarsinnaaneranut  kinguneqarnerluutaasinnaalluni.
  Imm. 3.  Atuarfiup pisortaata saneqqutsinissamik aalajangernissamut isummernissaa pitinnagu, atuarfiup pisortaata atuartoq, angajoqqaat aammalu suleqatit attuumassutillit allat tamanna pillugu oqaaseqaateqarnissamik piumaffigissavai.
  Imm. 4.  Saneqqutsineq nalilersorneqarlunilu uppernarsaasersorneqassaaq, tak. §§ 14-16.

Kapitali 5
Atuarfimmut allamut nuunneq

  § 21.  Atuartoq immikkut atuartinneqartoq imaluunniit immikkut ittumik perorsaanikkut ikiorsiissutaasunik aaqqissuussiffigineqarsimasoq atuarfimmut allamut nuuppat, atuarfik taanna piaartumik atuartoq pillugu paasissutissanik atuartumut tunngassuteqartunik tamanik nassiussaqassaaq, tamatumunnga ilanngullugu atuartumut iliuusissatut pilersaarusiaq, atuartumut tunngasumik mappi, atuartitsinermut pilersaarutit aamma nalilersuisarsimanerit. Atuarfiup qimalikkap atuarfillu tikitassap atuartoq atuarfimmut allamut nuutsinnagu, atuartup angajoqqaavi atuartorlu isumasiorlugit atuartup atuarnerminik ingerlaqqinnissaa piareersassavaat qulakkiissallugulu atuarfimmi tikitamini atualernerminiit immikkut atuartitsineq imaluunniit immikkut ittumik perorsaanikkut ikiorsiineq pisariaqartitani nangillugu pissarsiarisassagaa.

Kapitali 6
Atuartuunerup naanera

  § 22.  Atuartuuneq naappat atuarfiup inassuteqaataasimasut kommunimilu perorsaanikkut tarnillu pissusaanut tunngasuni innersuussinerit kiisalu ukiuni tallimani atuartitaanermut pilersaarutit toqqortarissavai, tamatumalu kingorna Siunnersuisarfimmut utertillugit.
  Imm. 2.  Atuartoq atuartitaanerup naanerani suli immikkut ittumik ikiorserneqartarnissamik pisariaqartitsippat, atuarfiup pisortaata akisussaaffigaa atuartup angjoqqaavisalu tamanna pillugu periarfissanik paasissutissinneqarnissaat. Atuarnerup ingerlaqqiffigisinnaasaanik, siunnersorneqarnissamut pisinnaatitaaffiinik inuussutissarsiornikkullu periarfissaanik.

Kapitali 7
Maalaaruteqarneq

  § 23.  Nalunaarut una malillugu atuarfinni ataasiakkaani aalajangiunneqarsimasut aalajangiinerup nalunaarutigineraniit sapaatit akunneri sisamat qaangiutsinnagit kommunalbestyrelsimut maalaarutigineqarsinnaapput. 

Kapitali 8
Atortuulerfia

  § 24.  Nalunaarut atuutilissaaq 1. aggusti 2018.
  Imm. 2.  Ilutigitillugu meeqqat atuarfianni immikkut atuartitsisarneq aamma allamik immikkut ittumik perorsaanikkut ikiorsiisarneq pillugit Namminersornerullutik Oqartussat nalunaarutaat nr. 22, 23. juuli 1998-imeersoq atorunnaarsinneqassaaq.

Namminersorlutik Oqartussat, ulloq 8. december 2017

Doris J. Jensen

/

Lone Nukaaraq Møller