Aalisarneq pillugu Inatsisartut inatsisaanni nr. 18, 31. oktober 1996-imeersumi §§ 5, 8, aamma 10, § 10a-mi imm. 1, § 13, imm. 2, §§ 23, 25, aamma 26, § 33-mi, imm. 2 aamma § 34, imm. 3, kingullermillu Inatsisartut inatsisaatigut nr. 28, 28. november 2016-imeersukkut allanngortinneqartoq naapertorlugit aalajangersarneqarpoq:

Atuuffia

  § 1.  Nalunaarut una Kalaallit Nunaata aalisarnikkut oqartussaaffigisaani kapisilinniarnermut (Salmo salar) atuuppoq:
1)  Nunap Isuata kitaani NAFO-p sumiiffilersuiffiani 1. Tunngaviusumik killigititamit 40 sømilit avataanni kapisilinniarneq inerteqqutaavoq.
2)  Kalaallit Nunaata Tunumi aalisarfiini. Taamaattorli paragraffit tulliuttut kisimik atuutissapput, tassalu: § 6, § 7, § 8, § 9, § 10, § 11, § 12, § 13, § 14, § 15 aamma § 16.  Tunngaviusumik killigititamit 12 sømilit avataani kapisilinniarneq inerteqqutaavoq.
3)  Kapisillit kuuani eqqaanilu tatsinilu tassunga atasuni kapisilinniarnermi.

Nassuiaatit

  § 2.  Nalunaarummi matumani Inuussutissarsiutigalugu aalisarneq paasineqassaaq pisat tamaasa ilaannaasaluunniit tuniniarnissaat siunertaralugu aalisarnertut.
  Imm. 2.  Inuussutissarsiummut atatinnagu kapisilinniarneq nalunaarummi matumani paasineqassaaq nammineq atugassanik kapisilinniarnertut.
  Imm. 3.  Kapisilinnik pisineq nalunaarummi matumani paasineqassaaq inunnit kapisilinniarnissamut akuersissummik allagartaqartunit toqqaannartumik pisineq tigusinerlu.
  Imm. 4.  Pisaqannginneq nalunaarummi matumani paasineqassaaq qassutit oqimmersalluunniit atorlugit kapisilinniarneq, tassani kapisilinnik pisaqartoqarani.

Inuussutissarsiutigalugu kapisilinniarnermut piumasaqaatit

  § 3.  Inuussutissarsiutigalugu kapisilinniarnissamut akuersissummik allagartallit kisimik nalunaarutip atuuffigisaani pisarineqarsimasunik kapisilinnik tuniniaasinnaatitaapput.

  § 4.  Inuussutissarsiutigalugu kapisilinniarsinnaanermut allagartat akuersissutit qinnuteqareernermi Aalisarnermut Piniarnermullu Naalakkersuisoqarfimmit tunniunneqartut piumasaqaataapput.
  Imm. 2.  Aalisarsinnaanermut akuersissut qinnuteqartunut piumasaqaatinik makkuninnga naammassinnittunut taamaallaat tunniussisoqarsinnaavoq:
1)  Qinnuteqartoq inuiaqatigiinnut kalaallinut aalajangersimasumik attuumassuteqartuussaaq, aalisarneq pillugu Inatsisartut inatsisaanni § 3-mi, imm. 4 naapertorlugu. 
2)  Qinnuteqartup inuussutissarsiutigalugu aalisarsinnaanermut piumasaqaatit Inatsisartut aalisarneq pillugu inatsisaat § 6, imm. 3, naapertorlugu naammassisimassavai.
3)  Qinnuteqartup qassutit kapisilinniutit aamma angallat kapisilinniut 12,8 meterit (42 fod) tikillugu tamakkerlugu takissusilik nammineq pigisaqarnissaa.
4)  Qinnuteqarnermut atatillugu qinnuteqartumit pigineqartut qassutit kapisilinniutit qassiunerinik qanorlu ittuunerinik imaluunniit ilisarnaataannik qinnuteqartoq ilisimatitsissaaq.
5)  Qinnuteqartunut aalisarnerup siuliani akuersissummik peqarsimasunut aalisarnerup siuliani nalunaaruteqartussaatitaaneq pillugu § 9 aamma § 16 naapertorlugu naammassinnissimassapput.

Inuussutissarsiutigalugu kapisilinniarnermi piniutit

  § 5.  Uku taamaallaat atorlugit inuussutissarsiutigalugu kapisilinniartoqarsinnaavoq:
1)  qarsorsat, imaluunniit
2)  qassutit 20-t tikillugit tasillugit minnerpaamik 140 mm-inik nigartallit atorlugit aamma taakkunanit amerlanerpaamik qassutit 5-t imminnut qilersimasinnaapput.
  Imm. 2.  Qassutit nigartaat uuttorneqassapput uuttuutit ½ kilomik oqimaalutserlugu nigartamut ikkunneratigut nakkartinneratigullu. Qimiaa puttalatitsisoq atuarlugu nigartat 20-t qimiaanut ungaseqatigiit uuttorneqassapput. Nigartat tamarmik imm. 1-imi, nr. 2-mi piumasaqaat eqqortissavaat.
  Imm. 3.  Atortut atorneqartut tamarmik piginnittup aqqanik imaluunniit taassuma angallataata aqqanik normuanillu nalunaaqutsersugaassapput. Nalunaaqutsiussat imermit arrortinneqarsinnaassanngillat.
  Imm. 4.  Qassutit kapisilinniutit silap pissusaata taamaattoqartissinnaappagu ullut tamaasa qassusiarfigineqartassapput, taamaalilluni aalisakkat atorneqarsinnaanerat ajornerulersinneqassanani. 
  Imm. 5.  Qassutit imatut inissinneqassapput kangerliumanernik, ikerasannik kuunnillu assiisinnagit imatullu isumannaatsumik sumiiffimmi sumiissusersiornissaq angallammillu ingerlaarnissarlu ajoqusissanagu.
  Imm. 6.  Qassutit kapisilinniutit minnerpaamik 30 meterimik imminnut ungasitsigissapput.
  Imm. 7.  Qassutit kuup tininnerpaaffiani kuup paavanit minnerpaamik 500 meterimik ungasitsigisumut inissinneqassapput.

Inuussutissarsiutigalugu kapisilinniarnerup aaqqissuussaanera

  § 6.  Inuussutissarsiutigalugu kapisilinniarneq pisassiissutit aallaavigalugit nunami tunitsivinnut tunisassanik imaluunniit najukkani kalaalimineerniarfinnut najukkamilu suliffeqarfinnut tuniniarneqartussanik aalisarnertut ingerlanneqarsinnaavoq.

  § 7.  Naalakkersuisut Kalaallit Nunaanni inuussutissarsiutigalugu kapisilinniarnermi kapisilinnik uku mianeralugit pisassiissutit ukiut tamaasa aalajangertassavaat:
1)  nunat tamat akornanni isumaqatigiissutit, kapisileqassuseq pigiinnarniarlugu amerliartoqqinnissaannullu siunertaralugu isumaqatigiissutaasut,
2)  biologit siunnersuinerat,
3)  atuisut ilisimasaat,
4)  Aalisarneq pillugu Siunnersuisoqatigiinni ilaasortanut kommuninillu tusarniaaneq.
  Imm. 2.  Naalakkersuisut KNAPK-lu isumasioqatigereerlugu inuussutissarsiutigalugu kapisilinniarnissamut ulloq aallartiffissaq aalajangertassavaat. Ulloq aallartiffissaq, pisassiissutinik aalajangiineq tamassumunngalu piumasaqaatit pillugit nalunaarut www.naalakkersuisut.gl tusagassiutitigullu avammut nalunaarutigineqartassaaq.
  Imm. 3.  Aalisarneq ulloq imm. 2-mi taaneqartoq sioqqullugu aallartissanngilaq.
  Imm. 4.  Inuussutissarsiutigalugu kapisilinniarnermit pisat Kalaallit Nunaata avataani taamaallaat pisiariortorneqarsinnaapput tuniniarneqarsinnaallutillu Naalakkersuisut akuersissuteqarnerisigut.

  § 8.  Pisassiissutit tamakkerlugit pisarineqarnissaat qanillippat, Aalisarnermut Piniarnermullu Naalakkersuisoqarfiup nalunaarutigissavaa, qaqugu inuussutissarsiutigalugu kapisilinniarneq kiisalu taamatut aalisarnermit pisanik pisineq aamma tunisineq unissanersoq. Nuna tamakkerlugu tusagassiutit aqqutigalugit nalunaarutigineqassaaq. Aalisarnermi atortut aalisarnerup unitsinneqarnissaa sioqqullugu qaqinneqassapput.

Inuussutissarsiutigalugu kapisilinniarnermit pisanik nalunaaruteqarneq

  § 9.  Kapisillit pisarineqartut tamarmik Kalaallit Nunaanni Aalisarnermik Akuersissutinik Nakkutilliisoqarfimmut (KANUAANA) erngertumik nalunaarutigineqartassapput.
  Imm. 2.  Inuussutissarsiutigalu aalisarnissamut akuersissutillit kalaalimineerniarfinni toqqaannaq tunisisartut kapisilinnik tulaassinerit tamaasa nalunaaruteqartassapput. Nalunaaruteqarnermi kapisillit pisat tulaanneqartut tamarmik ilaatinneqassapput. Nalunaaruteqarneq ilanngussaq 1 naapertorlugu paasissutissanik tamanik imaqassaaq aamma tamanna Sullissivik.gl aqqutigalugu imaluunniit KANUAANA, Postboks 501, 3900 Nuuk, Telefax 34 63 60 imaluunniit e-mailikkut gflk@nanoq.gl-mut nalunaaruteqarnikkut.

Inuussutissarsiutiginagu kapisilinniarnermut piumasaqaatit

  § 10.  Inuussutissarsiutiginagu kapisilinniarnissamut akuersissut qinnuteqareernikkut Naalakkersuisunit tunniunneqartassaaq.
  Imm. 2.  Imm. 1 malillugu qinnuteqartunut piumasaqaatinik makkuninnga naammassinnittunut taamaallaat akuersissutinik tunniussisoqarsinnaavoq:
1)  Aalisarneq pillugu Inatsisartut Inatsisaanni § 8-mi, imm. 1-imi piumasaqaatinik naammassinnissimasut.
2)  Qinnuteqartunut aalisarnerup siuliani akuersissummik peqarsimasunut aalisarnerup siuliani nalunaaruteqartussaatitaaneq § 15 aamma § 16 naapertorlugit naammassinnissimasunut.

Inuussutissarsiutiginagu kapisilinniarnermi piniutit

  § 11.  Uku taamaallaat atorlugit inuussutissarsiutiginagu kapisilinniartoqarsinnaavoq:
1)  qarsorsat, imaluunniit
2)  qassutit (ataatsit) 2000-nik qilernillit, taakkua tasillugit nigartaat minnerpaamik 140 mm-iusut.
  Imm. 2.  Qassutit nigartaat uuttorneqassapput uuttuutit ½ kilomik oqimaalutserlugu nigartamut ikkunneratigut nakkartinneratigullu. Qimiaa puttalatitsisoq atuarlugu nigartat 20-t qimiaanut ungaseqatigiit uuttorneqassapput. Nigartat tamarmik imm. 1-imi, nr. 2-mi piumasaqaat eqqortissavaat.
  Imm. 3.  Qassutit piginnittup atii tamaasa ilanngullugit nalunaaqutsigaassapput. Nalunaaqutsiussat imermit arrortinneqarsinnaassanngillat.
  Imm. 4.  Qassutit kapisilinniutit silap pissusaata taamaattoqartissinnaappagu ullut tamaasa qassusiarfigineqartassapput, taamaalilluni aalisakkat atorneqarsinnaanerat ajornerulersinneqassanani sumiiffimmilu mingutsitsisoqassanani.
  Imm. 5.  Qassutit imatut inissinneqassapput kangerliumanerit ikit kuullu asserneqassanatik, imatullu qassutit sumiiffimmi sumiissusissiornermut/angallammik ingerlanermut ajoqutaassanatik.
  Imm. 6.  Kapisilinniarnermi qassutit imminnut minnerpaamik 30 meterimik ungasissuseqassapput.
  Imm. 7.  Qassutit tininnerpaaffiani kuup paavanit minnerpaamik 500 meterimik ungasitsigisumut inissinneqassapput.

Inuussutissarsiutiginagu kapisilinniarnerup aaqqissuussaanera

  § 12.  Inuussutissarsiutiginagu kapisilinniarneq pisassiissuteqarnikkut ingerlanneqarsinnaavoq.

  § 13.  Inuussutissarsiutiginagu kapisilinniarnermut, Naalakkersuisut ukiut tamaasa nunat tamalaat akornanni isumaqatigiissutit naapertorlugit kalaallit kapisilittassaannik aalajangersaassapput.
  Imm. 2.  Inuussutissarsiutiginagu kapisilinniarneq inuussutissarsiutigalugu kapisilinniarnerup aallarteqatigissavaa, § 7, imm. 2 naapertorlugu.
  Imm. 3.  Aalisarneq imm ulloq imm. 2-mi taaneqartoq sioqqullugu aallartissanngilaq.

  § 14.  Kapisilittassiissutit aalajangikkat tamakkerlugit pisarineqarnissaat qanillippat, Naalakkersuisut nalunaarutigissavaat, qaqugu inuussutissarsiutiginagu kapisilinniarneq unitsinneqassanersoq. Nuna tamakkerlugu tusagassiutit aqqutigalugit nalunaarutigineqassaaq. Aalisarnermi atortut aalisarnerup unitsinneqarnissaa sioqqullugu qaqinneqassapput.

Inuussutissarsiutiginagu kapisilinniarnermit pisanik nalunaaruteqarneq

  § 15.  Inuussutissarsiutiginagu kapisilinniarnermi kapisillit pisarineqartut tamarmik KANUAANA-mut nalunaarutigineqassapput.
  Imm. 2.  Pisat pillugit nalunaarutiginninneq nalunaarummi ilanngussaq 1 imaluunniit Sullissivik.gl aqqutigalugu pisassaaq. Kapisilinnik qassutinik napittaajaanerup oqummersalluunniit atorlugit aalisarnerup kingornatigut, § 11, imm. 4 naapertorlugu nalunaarutiginninneq apuutereernermi erngertumik uunga nassiunneqartassaaq:  KANUAANA, Postboks 501, 3900 Nuuk, Telefax 34 63 60 imaluunniit e-mailikkut gflk@nanoq.gl.

Inuussutissarsiutigalugu inuussutissarsiutiginagulu kapisilinniarnermi pisaqanngitsoornernik 0-imik nalunaaruteqarneq

  § 16.  Inuussutissarsiutigalugu inuussutissarsiutiginagulu kapisilinniarnissamut akuersissutaatillit tamarmik kapisilinniarsimanngitsut tamanna pillugu ilanngussaq 1 atorlugu nalunaarutigissavaat.
  Imm. 2.  Inuussutissarsiutigalugu inuussutissarsiutiginagulu kapisilinniarnissamut akuersissutaatillit tamarmik kapisilinniarsimasut tamanna pillugu ilanngussaq 1 atorlugu nalunaarutigissavaat.
  Imm. 3.  Akuersissutinik atorneqanngitsunik aamma pisaqanngitsoornernik nalunaaruteqarneq nalunaarummut ilanngussaq 1 aqqutigalugu pissaaq. Nalunaaruteqarneq kingusinnerpaamik kapisilinniarnerup matuneraniit ullut 14-init kingorna KANUAANA-mut, Postboks 501, 3900 Nuuk, Telefax 34 63 60 atorlugu imaluunniit e-mail gflk@nanoq.gl atorlugu nassiunneqassaaq.

Kapisillit kuuani kapisilinniarneq

  § 17.  Kapisillit Kuuanniit kapisilinniarnermut pisassiissutit aamma ulloq aallartiffissaq pisassiissutillu ukiut tamaasa Naalakkersuisunit aalajangersarneqartarpoq. 
  Imm. 2.  Kapisillit Kuuanni taamaallaat nammineq atugassanik aalisartoqartassaaq. Aalisarnermi tassani piumasaqaataavoq akuersissut qinnuteqareernermi Aalisarnermut Piniarnermullu Naalakkersuisoqarfimmit tunniunneqartassasoq. 
  Imm. 3.  Imm. 2 malillugu aalisarsinnaanermut akuersissut qinnuteqartunut piumasaqaatinik makkuninnga naammassinnittunut tunniunneqarsinnaavoq:
1)  Aalisarneq pillugu Inatsisartut Inatsisaanni § 8, imm. 1-imi piumasaqaatit.
2)  Qinnuteqartunut aalisarnerup siuliani akuersissummik peqarsimasunut aalisarnerup siuliani nalunaaruteqartussaatitaaneq §§ 15 aamma 16 naapertorlugu naammassinnissimasunut.
  Imm. 4.  Kapisillit Kuuata paavani 1000 meter-imit qaninnerusumut qassuserneq inerteqqutaavoq.
  Imm. 5.  Kapisillit Kuuaniit 50 meterimik qaninnerusumi aalisarnermi atortut suulluunniit atorlugit aalisarneq inerteqqutaavoq
  Imm. 6.  Kuummi tatsinilu tassunga atasuni taamaallaat qissattaat ataasiinnarmik qarsorsalik atorlugu aalisartoqarsinnaavoq. 
  Imm. 7.  Naalakkersuisut aalisarnerup qaqugu unitsinnissaa pillugu nuna tamakkerlugu tusagassiuutitigut nalunaaruteqartassapput. Aalisarneq tamarmi tamatuma kingorna aalisakkat avalatseqqinneqartut pillugit nalunaaruteqartussaatitsilluni pisaqarnertut avalatseqqiinertullu aalisartoqarsinnaaneranik aalajangiisinnaapput.
  Imm. 8.  Imm. 1 naapertorlugu aalisarnissap aallartiffissaa sioqqullugu aalisarneq inerteqqutaavoq. Imm. 7 naapertorlugu piffissap aalisarnerup unitsinneqarnerata kingorna aalisarneq inerteqqutaavoq.

Pineqaatissiissuteqartarneq

  § 18.  § 1, nr. 1-2-mik, §§ 3-4-mik, § 5, § 7, imm. 3-mik, § 8-mik, § 9-mik, § 10, imm. 1-imik, § 11, imm. 1-imik, aamma imm. 3-mik, 4-mik, 5-imik, 6-mik aanna 7-imik, § 13, imm. 3,-mik §§ 14-16-imik aamma § 17, imm. 2-mik, aamma imm. 4-mik, 5-imik, 6-imik, 7-imik, 8-mik unioqqutitsineq Pinerluttulerinermik inatsimmi malittarisassat malillugit pineqaatitsisoqarsinnaavoq. 
  Imm. 2.  Ingerlatseqatigiiffiit il.il. (Inatsisilerinermi immikkoortut inuttut isigineqarsinnaasut) Pinerluttulerinermi inatsimmi kapitel 5 naapertorlugu akisussaatinneqarsinnaapput. 
  Imm. 3.  Pinerluttulerinermi inatsimmi arsaarinnittarneq pillugu malittarisassat taamatuttaaq atorneqarsinnaapput. 
  Imm. 4.  Akiliisitsissutit Nunatta Karsianut pisassanngortinneqassapput.

Atortuulersitsineq

  § 19.  Nalunaarut ulloq 1. august 2022 atuutilissaaq.
  Imm. 2.  Peqatigitillugu Namminersorlutik Oqartussat kapisilinniarneq pillugu nalunaarutaat nr. 33, 30. juli 2021-meersoq atorunnaarsinneqassaaq.

Namminersorlutik Oqartussat, ulloq 25. juuli 2021

Karl Tobiassen
Aalisarnermut Pininarnermullu Naalakkersuisoq

/ Jørgen Isak Olsen