Aalisarneq pillugu Inatsisartut inatsisaanni nr. 18, 31. oktober 1996-imeersumi § 5, imm. 1, § 10, § 10 a, § 10 b, § 11, § 13, imm. 2, § 23, imm. 1, § 33, imm. 2 aamma § 34, imm. 3 malillugit, kingullermillu aalisarneq pillugu Inatsisartut inatsisaatigut nr. 28, 28. november 2016-imeersukkut allanngortinneqartukkut aalajangersarneqarpoq:

Atuuffia

  § 1.  Imartani Kalaallit Nunaata aalisarnikkut oqartussaaffigisaani saattuarniarnermut (Chionoecetes opilio) nalunaarut atuuppoq.

Akuersissutit, aqutsiveqarfiit pisassiissutillu

  § 2.  Inuussutissarsiutigalugu saattuarniarnissaq pillugu akuersissuteqarnissaq piumasaqaataavoq, taanna qinnuteqaateqarnikkut Aalisarnermut Piniarnermullu Naalakkersuisoqarfimmit tunniunneqassaaq. 
  Imm. 2.  Angallatinut 75 BRT/120 BT-init mikinerusunut inuussutissarsiutigalugu saattuarniartartunut akuersissut taamaallaat tunniunneqarsinnaavoq.
  Imm. 3.  Angallatinut usiminnik allanut nuussisinnaanermik akuersissutaateqareersunut inuussutissarsiutigalugu saattuarniarsinnaanermut akuersissutinik tunniussisoqartassanngilaq.

  § 3.  Aalisarnermut Piniarnermullu Naalakkersuisoqarfik inuussutissarsiutigalugu saattuarniartunut akuersissummik aqutsiveqarfinni aqqaneq-marluusuni aqutsiveqarfinnut arfineq-pingasunut tunniussisinnaapput, ilanngussaq 1-mi siunnersuinermi 1-3-tut immikkoortiterneqartutut nassuiarneqartunut. Inuussutissarsiutigalugu misileraalluni saattuarniarnermi akuersissummik aqutsiveqarfinni aqqaneq-marluusuni aqutsiveqarfinnut sisimanut tunniussisinnaapput, ilanngussaq 1-mi siunnersuinermi 4-tut immikkoortiterinermi nassuiarneqartunut. Akuersissut piffissami killilimmi atuutissaaq aammalu amerlanerpaanik pisaqarsinnaanerit ilanngunneqanngillat.
  Imm. 2.  Qinnuteqaateqartoq aqutsiveqarfinni pingasut angullugit amerlassusilinni inuussutissarsiutigalugu saattuarnissanut akuersissutinik qinnuteqaateqarsinnaavoq kiisalu inuussutissarsiutigalugu aalisarsinnaanermut misileraalluni akuersissummik aqutsiveqarfinnut, ilanngussaq 1 malillugu immikkoortoq 4-tut taaneqartunut qinnuteqarsinnaalluni. 
  Imm. 3.  Angallat ataaseq qaammatisiutit ukiuanni ataatsimi inuussutissarsiutigalugu saattuarniarnermut aqutsiveqarfinni pingasut sinnerlugit amerlassusilinni inuussutissarsiutigalugu saattuarniarsinnaanngilaq.

  § 4.  Ilanngussaq 1 naapertorlugu Naalakkersuisut aqutsiveqarfinni aqqaneq-marluusuni ukiut tamaasa aqutsiveqarfinnut arfineq-pingasunut saattuartassiissutissanik aalajangersaasarput siunnersuinermi 1-3-tut immikkoortiterinermi nassuiarneqartoq naapertorlugu.

Inuussutissarsiutigalugu saattuarniarsinnaanermut inerteqqut

  § 5.  Ilanngussaq 1 naapertorlugu piffissami januaarip aallaqqaataaniit martsip 31-iat ilanngullugu Kitaani Maniitsoq-Kangaamiut aqutsiveqarfiisa avannaani inuussutissarsiutigalugu saattuarniarneq inerteqqutaavoq.

  § 6.  Pullatinik amoornermi pisat 20%-ii sinnerlugit tunineqarnissaminnut tunisassiarineqarnissaminnulluunniit naleqqutinnginnerat pissutigalugu avalatseqqinneqaannartariaqartut paasinarsippat inuussutissarsiutigalugu saattuarniarneq unitsinneqartassaaq. Taamaattoqarpat aalisarneq nuunneqassaaq aalisarnermi pisarisuukkat pillugit Namminersorlutik Oqartussat nalunaarutaat naapertorlugu.

Aalisarnermut atortut

  § 7.  Inuussutissarsiutigalugu saattuarniarnermi pullatit taamaallaat atorneqartassapput.
  Imm. 2.  Aalisarnermi piujuartitsinissaq pillugu teknikikkut iliuuserineqartussat pillugit Namminersorlutik Oqartussat nalunaarutaanni allassimasumit pullatit nigartakinnerusut angallammiissanngillat.

  § 8.  1. Januar 2023 –miit atuutilersumik ilanngussaq 2 naapertorlugu pullatit tamarmik allunaasaaqqamik arrortinneqarsinnaasumik mersuuffigineqarsimasumik qimaaffissiartaqassapput.

  § 9.  Pullatit aalisarnermi atorneqartinnagit immamiisinneqassanngillat.

Inuussutissarsiutiginagu aalisarneq

  § 10.  Inuit qallunaatut innuttaassusillit tamarmik Kalaallit Nunaanni aalajangersimasumik angerlarsimaffillit namminneq atugassaminnik saattuarniarsinnaatitaapput. Nunani allani Danmarkiunngitsumi innuttaassusillit Kalaallit Nunaanni najugaqavissut ukiullu marluk ataavartumik Kalaallit Nunaanniissimasut danskisut innuttaassuseqartutut isigineqassapput.
  Imm. 2.  Aalisarnermi pullatit amerlanerpaamik pingasut atorneqartassapput.
  Imm. 3.  Aalisarneq aamma §§ 5-9-t naapertorlugit ingerlanneqassaaq aamma teknikikkut iliuuserineqartussat pillugit Namminersorlutik Oqartussat nalunaarutaat malinneqassalluni.

Iliuuseqarnerit

  § 11.  § 2, imm. 1-ip aamma §§ 5-10-t unioqqutinneqarneranni Kalaallit Nunaanni Pinerluttulerinermut inatsimmi maleruagassat naapertorlugit akiliisussanngortitsinermik arsaarinninnermillu kinguneqarsinnaapput.
  Imm. 2.  Ingerlatseqatigiiffiit il.il. (inatsisilerinermi immikkoortut inuttut isigineqarsinnaasut) Pinerluttulerinermi inatsimmi kapitali 5 tunngavigalugu akisussaatinneqarsinnaapput.
  Imm. 3.  Akiliisitsissutit Nunatta Karsianut nakkartinneqassapput.

Atortuulersitsineq ikaarsaariarnermilu malittarisassat

  § 12.  Nalunaarut una januaarip aallaqqaataani 2022-mi atuutilissaaq. Tamanna ilutigalugu Saattuarniarneq pillugu Namminersorlutik Oqartussat nalunaarutaat nr. 9, 12. februar 2021-meersoq atorunnaarsinneqassaaq.

  § 13.  Piffissami januaarip aallaqqaataani 2021-miit decemberip 31-ia 2022 ilanngullugu inuussutissarsiutigalugu saattuarniarniartunut nutaanut akuersissutinik Aalisarnermut Piniarnermullu Naalakkersuisoqarfimmit tunniussisoqassanngilaq. Saattuarniarniartut nutaat imatut paasineqassaaq; aalisartut ukiup pisassiiviusup siuliani qinnuteqaatigineqartumut akuersissummik peqarsimanngitsut.

Namminersorlutik Oqartussat, ulloq 30. december 2021

Aqqaluaq B. Egede
Aalisarnermut Piniarnermullu Naalakkersuisoq

/ Jørgen Isak Olsen