Kapitali 1

Atuuffia

  § 1.  Inatsisartut inatsisaanni uani pineqarput inuit suliffissaaleqisut sulilernissaminnut piareersimasut.
  Imm. 2.  Suliffissaaleqisutut sulileriaannaasutut isigineqassaaq inuk suliffeqalernissaminut piareersimasoq, siumoortumillu immikkut suliniuteqarfigineqaqqaarani sapaatip akunneranut minnerpaamik akunnerni 20-ini suliffeqalersinnaasoq. 
  Imm. 3.  Suliffissarsiortunut ikiorsiissutit aningaasarsiatigut nammineq pisuussutiginngisamik isertitaqannginnermut taartisiatut akilerneqartarput, tamatumani aamma angerlartitaagallarnermi, napparsimanermi aammalu pinngortitami ajunaarnersuaqarnerani.
  Imm. 4.  Naalakkersuisut ersarinnerusunik tulluarsaqatigiinnut immikkoortitserisarnerit pillugit malittarisassiorsinnaapput.

  § 2.  Inatsisartut inatsisaanni matumani pineqanngillat inuit namminersortutut inuussutissarsiuteqartut. 
  Imm. 2.  Inatsisartut inatsisaanni matumani pineqanngillat inuit pinerluttaalisitsinermut atatillugu imaluunniit isumaginnittoqarfimmit  inissiisarfinnut inissinneqarsimasut.

  § 3.  Suliffissarsiortunut ikiorsiissutisinissamut pisinnaatitaaneq atorunnaassaaq aningaasarsiatigut isertitaqannginneq pisortani inatsisinik imaluunniit namminersortunut inatsisinik tunngaveqartumik, tamatumani aamma isumaqatigiissutisigut,  sillimmasiinernik imaluunniit sulitilluni ajoqusersinnaanermut sillimmasersimanermik tunngaveqartunik isertitaqannginneq matussuserneqartarpat.

Kapitali 2

Angerlartitsineq

  § 4.  Angerlartitsinertut paasineqassaaq:
1)  Sulisitsisup sulianik unititsigallarnera ullut 14-it angullugit sivisussuseqarsinnaasumik, nioqqutissiorneq nioqqutissiassaarunnikkut unitsinneqarpat, maskiinat ajoqusernerisigut, silamik allamilluunniit siumut naatsorsuutigineq ajornartumik peqquteqartumik. 
2)  Sulisitsisup sulianik unititsigallarnera toqqaannartumik pisortaniit ilitsersorneqarnermik imalunniit peqquneqarnermik tunngaveqarpat.
  Imm. 2.  Sulisitsisoq ingerlaannartumik kommunalbestyrelsimut nalunaarusiussaaq sulisut angerlartinneqarpata, soorluttaaq angerlartitsinermut pissutaasut uppernarsaaserneqassasut. 
  Imm. 3.  Naalakkersuisut malittarisassiorsinnaapput sulisitsisup kommunalbestyrelsimut nalunaarusiortarnissaanut, aamma uppernarsaasiisarnissaanut angerlartitsinermut atatillugu imm. 2 naapertorlugu.

Kapitali 3

Piumasaqaatit nalinginnaasut

  § 5.  Suliffissarsiortunut ikiorsiissutinik pisartagaqarsinnaaneq tunngaveqassaaq pineqartup 18-inik ukioqalereersimaneranik, aalajangersimasumik najugaqartuuneranik aammalu Kalaallit Nunaanni inuit allattorsimaffiannut nalunaarsimaneranik. 
  Imm. 2.  Inuit Kalaallit Nunaanni aalajangersimasumik najugaqaratik najuuttut, Kalaallit Nunaannilu inuit allattorsimaffiannut nalunaarsimasut aalajangersimasumik najugaqarfeqaratik, suliffissarsiortunut ikiorsiissutinik pisartagaqarsinnaatitaapput, kalaallinut inuiaqatigiinnut aalajangersimasumik atasuugunik.

Kapitali 4

Sulileriaannaaneq, suliffissarsiorneq aamma nuttarsinnaaneq

  § 6.  Suliffissarsiortunut ikiorsiissutinik pisartagaqartoq sukkulluunniit suliartoqquneqarnissamut piareersimasussaavoq, pisussaaffeqarlunilu suliffissamik innersuunneqartumik tigusinissamik, suliffeqalernissamut sungiusaasarnernut neqeroorutigineqartartunut peqataasartussaalluni, allamik ilinniagaqartinneqarsinnaalluni, imaluunniit innersuunneqartumik pikkorissaqqinnermik tigusisussaalluni, kiisalu suliassamik sulisinnaanermut sungiusartinneqarnermut atatillugu tunniunneqartumik tigusisussaalluni.
  Imm. 2.  Suliffissarsiortunut ikiorsiissutinik pisartagaqartut Majoriami suliffissarsiortutut nalunaarsorsimassapput, eqeersimaartumillu peqataasassallutik kommunalbestyrelsimiit neqeroorutigineqartunut sulisinnaanngorsaanernut, pikkorissaqqinnernut, allamik ilinniagaqarnermut aamma tamatumunnga atatillugu sungiusaammik sulisarnermut, kiisalu Majoriamut ataatsimiigiaqquneqartarnerni eqeersimaarlutik peqataasassallutik.

  § 7.  Suliffissarsiortunut ikiorsiissutinik pisartagaqartoq pisussaavoq eqeersimaartutut suliffissarsiortutut nalunaarsorsimanissamut www.suli.gl -imi, naammassillugulu suliaasumik atuuttumillu CV-mik peqassalluni.
  Imm. 2.  Suliffissarsiortunut ikiorsiissutinik pisartagaqartoq  minnerpaamik sapaatip akunneranut ataasiarluni nalunaarsortittassaaq suliffissarsiortutut www.suli.gl -imi tamanut atuuttumik nammineq digitaliusumik ilisarnaatini atorlugu, imaluunniit Qitiusumik ingerlatsivimmi Majoriami nalunaarsortinnermigut.

  § 8.  Suliffissarsiortunut ikiorsiissutinik pisartagaqartoq suliffissanut inuttaqanngitsunut suliffigissallugu periarfissaqarfigisaminnut qinnuteqartarnissamik pisussaaffeqarpoq.
  Imm. 2.  Suliffissarsiortunut ikiorsiissutinik pisartagaqartoq pisussaavoq suliffissami innersuunneqartumi sulilernissamut, ullormik ataatsimik siumut nalunaarfigineqarnermigut. Oqaaseqatigiit siulliit aamma atuupput  suliffissarsiortunut ikiorsiissutinik pisartagaqartumut sulisitsisumiit suliffissamik inuttaqanngitsumik neqeroorfigineqartumut.

  § 9.  Kommunalbestyrelse qinnuteqartoq peqatigalugu tamakkiisumik isiginnittumik nalilersuisassaaq qanoq annertutigisumik qinnuteqartoq sulisinnaanersoq pillugu, minnerpaamik sapaatip akunneranut akunnerni 20-ini, imaluunniit ilinniakkamik aallartitsilluni, tamatumani aamma siumoortumik suliniuteqartoqarsimanissaa pisariaqartinneqarnersoq.

  § 10.  Kommunalbestyrelsip suliffissarsiortunut ikiorsiissutinik pisartagaqartoq suleqatigalugu sapaatip akunnerisa 4-at ingerlaneranni suliarissavaa inummut pineqartumut iliuusissanut pilersaarusiaq. Qinnuteqartumik suleqateqarnermi isiginiarneqassapput qinnuteqartup pisariaqartitsineri aamma sunniuteqaqataanissaa akisussaaqataanissaalu, iliuusissamut pilersaarummik suliaqarnermut atatillugu.
  Imm. 2.  Iliuusissanut pilersaarummi piviusorsiortunik anguniakkanik iliuusissanillu nalunaarsuisoqassaaq, siunertaqartunik suliffissarsiortunut ikiorsiissutinik pisartagaqartup ilinniagaqarnissamut periarfissaqarnissaanik, imaluunniit suliassatigut - fagitigut piginnaanngorsaqqinnernik ingerlatsinissaanik, pitsanngorsaasunik ikiorsiissutinik pisartagaqartup ataavartumik suliffeqalernissaanut periarfissanik, kiisalu pisartagaqartup suliffeqarnermut attaveqarneranik nukittorsaasumik.
  Imm. 3.  Iliuusissanut pilersaarummi ilaassapput suliffissarsiortunut ikiorsiissutinik pisartagaqartup inissisimanera tamakkiisoq, tamatumani aamma ilaqutariinni pissutsit, ineqarneq, nappaatit aamma pissutsit allat qinnuteqartup suliffeqalernissamut periarfissaanut sunniuteqarsinnaasut.
  Imm. 4.  Kommunalbestyrelse  inuusuttunut 18-29-inik ukiulinnut iliuusissanut pilersaarummik suliaqarnerni pingaartitsisassaaq anguniagassanik aamma iliuusissanik, annertunerpaatigut peqataasinnaasunik qinnuteqartup ilinniagaqarsinnaaneranut, imaluunniit ilinniagaqalernissamut periarfissaanut.

  § 11.  Kommunalbestyrelsip iliuusissanut pilersaarummi suliffeerunnermi ikiorsiissutinik pisartagaqartoq pisussaaffilissavaa eqeersimaartumik peqataanissaanik, tamatumani aamma oqaloqatigiittarnerni, suliniutini pilersinneqartuni, sulisinnaanermik sungiusartitsinerni, inuttut ineriartortitsiviusunik pikkorissartitsinerni, suliassatigut, fagitigut pikkorissartitsinerni aamma suliffissamik innersuunneqartumik tigusisussaaneranik.
  Imm. 2.  Pisartagaqartup iliuusissanut pilersaarusiaq isumaqatiginngippagu, imaluunniit iliuusissanut pilersaarusiami pisussaaffiliunneqartoq iliuusissaq aalajangersimasoq isumaqatiginngippagu, iliuusissaq pineqartoq taanna Pisortat ingerlatsineranni suliassat suliarineqartarnerat pillugu Inatsisartut inatsisaat naapertorlugu aalajangiinertut isigineqassaaq. 
  Imm. 3.  Suliami peqataasup tusarniarneqartussaaneranik piumasaqaat taamaattoq atortinneqartussaassanngilaq pisartagaqartup ulluinnarmik sivisunerusumilluunniit ingerlatassanik pisussaaffilerneqartarneraniit isigalugu. Oqaaseqatigiilli siulliit taamaattoq atortinneqassanngillat aalajangiineq § 13, imm. 1 aamma imm. 2 naapertorlugit suliaappat.

  § 12.  Suliffissarsiortunut ikiorsiissutinik pisartagaqartoq pisussaavoq iliuusissanut pilersaarut naapertorlugu naammassillugulu iliuuseqarnissamut. Iliuusissanut pilersaarut nalilersoqqinneqartassaaq iluarsiivigineqartassallunilu pisariaqartitsineq naapertorlugu, minnerpaamik qaammatit pingasukkaartumik.
  Imm. 2.  Iliuusissanut pilersaarummik suliaqartoqartanngilaq inunnut suliffissarsiornermut ikiorsiissutinik pisartagaqartunut suliffimmiit angerlartinneqarallarnermi, takuuk § 4.
  Imm. 3.  Naalakkersuisut malittarisassiorsinnaapput iliuusissanut pilersaarusiortarnermut, tamatumani aamma suliffissarsiortunut piumasaqaatinik, suliffissanut innersuunneqartunut, sulisinnaanngorsaalluni suliniutinik neqeroorutinut, allamik ilinniagaqartarnernut imaluunniit allatigut pikkorissaqqittarnernut, kiisalu napparsimanermut atatillugu katsorsartinnernut il.il.

  § 13.  Inuit 18-29-inik ukiullit suliffissarsiortutut nalunaarsorsimasut qaammatini 12-ini, pisussaapput qinnuteqassallutik tigusissallutillu piffissaq tamaat suliffissamik sumiiffiup angerlarsimaffigisap avataani. Kommunalbestyrelse assigisaanik najukkap angerlarsimaffigisap avataani piffissaq tamaat suliffissamik innersuussisinnaavoq. 
  Imm. 2. Assigisaanik imm. 1 atortinneqassaaq inunnut 30-inik sinnerlugillu ukiulinnut, suliffissarsiortutut nalunaarsorsimareersimasunut qaammatini 24-ini. 
  Imm. 3.  Kommunalbestyrelsillu aamma inuk pineqartoq pisussaaffilersinnaava, tak. imm. 1 aamma 2, allamik ilinniagaqarnermi peqataasussanngorlugu, sulilernissamut sungiusartitsisarnernut neqeroorutini peqataasussanngorlugu, imaluunniit pikkorissaqqinnissamik allamik innersuussinnaallugu angerlarsimaffigisap avataani, kiisalu pisussaaffilersinnaallugu angerlarsimaffigisap avataani suliassamik tigusinissaanik, sungiusaammik sulisitsinertut innersuunneqartumi, allamik ilinniagaqartitsiviusumi imaluunniit pikkorissaqqinnermik neqerooruteqarfiusumi. 
  Imm. 4.  Imm. 1 atortinneqassanngilaq periarfissaqanngippat inissamik naleqquttumik suliffissarsiortutut pisartagaqartumut, taassuma aappaanut aamma meeraanut angerlarsimasunut 18-it inorlugit ukiulinnut pissarsiniarneq sumiiffimmi pineqartumi. Imm. 3 atortinneqassanngilaq inissiamik naleqquttumik imaluunniit ineqarfissamik naleqquttumik innersuussisoqarsinnaanngippat, suliffissarsiornermut ikiorsiissutinik pisartagaqartumut.

Kapitali 5

Sulinngiffeqarneq

  § 14.  Inuk qaammatini imminnut atasuni 6-ini suliffissarsiornermut ikiorsiissutinik pisartagaqarsimasoq, pisinnaatitaavoq isumaqatigiissuteqarnikkut sapaatip akunnerini 2-ini sulinngiffeqarsinnaanermut, pineqartup suliffissarsiornermut ikiorsiissutinik pisartagaqarfigisinnaasaanik. Sulinngiffeqarneq Majoriamut isumaqatigiissutigineqassaaq, sulinngiffeqalernissaq sapaatip akunnerinik 4-nik sioqqullugu. Sulinngiffeqarneq ingerlanneqassaaq qaammatit tulliuttut 6-it ingerlaneranni. Inuup sulinngiffeqarnermini naammassisimassavai piumasaqaatit suliffissarsiortutut ikiorsiissutinik pisartaqartussaanermut, kapitalimi 4-mi sulilernissamut piareersimasussaatitaaneq taamaallaat pinnagu.
  Imm. 2.  Inuup pineqartup sulinngiffeqarnissani sulinngiffeqarnersiuteqarfiusussaq pisinnaatitaaffigisimaguniuk, sulinngiffeqarneq taanna siulliullugu ingerlatissavaa. Sulinngiffeqarneq tamarmiusoq sulinngiffeqarnersiuteqarfiusoq aamma suliffissarsiornermut ikiorsiissutinik pisartagaqarfiusoq annerpaamik sapaatip akunnerinik 2-nik sivisussuseqarsinnaavoq.
  Imm. 3.  Inuk suliffissarsiortutut sulinngiffeqartutut nalunaarsortissaaq www.suli.gl -imi imaluunniit qitiusumik ingerlatsivimmi Majoriami. Inuk pineqartoq suliffissarsiortutut sulinngiffeqartutut nalunaarsorsimanngikkuni sulilernissamut piareersimasutut isigineqassanngilaq.

Kapitali 6

Napparsimaneq

  § 15.  Inuk suliffissarsiortunut ikiorsiissutinik pisartagaqarsinnaavoq napparsimanermini, kinguneqarallartumik maannamutut sulileriaannaannginnermik. Napparsimanerup nalaani suliffissarsiornermut ikiorsiissutinik katersisoqarsinnaavoq napparsimanerit ulluisa pingajuanniit, taamaattoq tak. imm. 3. Sulisinnaanerup periarfissaanngikkallarnerani nappaammik peqquteqartumik ilassusikkanik suliffissarsiornermut ikiorsiissuteqartitsisoqassaaq. 
  Imm. 2.  Inuit imm. 1-imi pineqartunut ilaasut, kapitali 4 naapertorlugu piareersimasussaatitaanermiit pisussaaffeqanngikkallartarput. Ilassusikkanik suliffissarsiornermi tapiissutinik pisartagaqarsimagunik, piareersimasussaatitaanerat taamaattoq aalajangiusimaneqarsinnaavoq.
Imm. 3.  Napparsimaneq sap, ak. 2-nik sivisunerusumilluunniit sivisussuseqarpat suliffissarsiornermut ikiorsiissutinik katersineq napparsimanerit ulluisa siullianniit aallartissaaq. 
  Imm. 4.  Suliffissarsiornermi ikiorsiissutinik napparsimanerup nalaani pisartagaqarsinnaatitaaneq atorunnaartarpoq imminut ataannartunik piffissami qaammatinik 6-inik sinnerlugilluunniit sivisussusilimmi napparsimareernermi. Suliffissarsiortunut ikiorsiissutinik napparsimanerup nalaani pisartagaqarsinnaatitaanerli pigiinnarneqartarpoq suliffissarsiornermut ikiorsiissutinik pisartagaqartinneqartoq piffissap qaammatinik 3-nik sivisussuseqartup iluani naatsorsuutigisinnaappagu peqqissisutut oqaatigineqarsinnaalernissi, maannamutullu suliffeqaleqqissinnaalluni.

  § 16.  Napparsimaneq kommunalbestyrelsimut nalunaarutigineqassaaq  kinguarsaanertaqanngitsumik. Kommunalbestyrelse naliliippat nakorsamiit allagartaq pisariaqartoq, piumasaqartoqarsinnaavoq nakorsamiit uppernarsaammik. Nakorsamiit allagartami nalunaarneqarsimassaaq napparsimaneq piffissami tamakkiisumi imaluunniit piffissap ilaannaani pisuunersoq, aamma qaqugu pineqartup nalinginnaasumik suliffissamik tamakkiisumik isumaginnissinnaalernissaa naatsorsuutigineqarnersoq. Nakorsamit allagartamut aningaasartuutit kommunalbestyrelsimiit akilerneqassapput.

Kapitali 7

Killilersuiffigisaalerneq

  § 17.  Suliffissarsiortunut ikiorsiissutinik pisartagaqartoq sulilernissamut piareersimanngitsoq, tak. §§ 6-13, atorfimminniit soraarniuteqartoq imaluunniit suliffimminniit qimagutitaasut, ikiorsiissutisisinnaanerminniit killilersuiffigisaalertarpoq sapaatip akunnerini 4-ani.
Imm. 2.  Soraarniuteqarneq tunngavilersorneqarpat sulisitsisup peqqarniitsumik pissusilersorluni atorfeqarnermut atugassarititaasunik unioqqutitsineranik, imm. 1 atuutissanngilaq. Imm. 1 aamma atuutissanngilaq inuup pineqartup eqqartuussinikkut, akerleriissutaasut suliarineqartarfianni aalajangiinikkut, allatigut iliuuseqarnikkut imaluunniit pituttuisuusumik isumaqatigiissuteqarnikkut aalajangiunneqarpat suliffimmiit qimagutitaaneq tunngavissaqanngitsoq. Suliffissarsiortunut ikiorsiissutit utimoortumik tunniunneqassapput, tak. taamaattoq § 3. 
  Imm. 3.  Suliffissarsiortunut ikiorsiissutit piffissami killilersuiffigisaasumi ikiorsiissutinit pisinnaatitaaffittut maannamut tunniunneqartartuniit 50 % -iusarput. Suliffissarsiortumut ikiorsiissutinik annikillisitsineq kinguneqartanngilaq pisartagaqartup pisussaaffiinik Inatsisartut inatsisaat manna naapertorlugu allannguinernik.

  § 18. Suliffissarsiortunut ikiorsiissutinik inuk pisartagaqartoq killilersuiffigisaalersimaguni sisamariarluni, qaammatit 12-it imminnut atasut iluanni, taava pineqartoq sulilernissamut piareersimasutut isigineqarunnaassaaq, suliffissarsiortunullu ikiorsiissutinik tamakkiisunik pisartagaqarsinnaajunnaassalluni. Inuk pineqartoq suliffissarsiortunut ikiorsiissutinik annikillisanik ikiorsiissutisissaaq, tak. § 17, imm. 3, qaammatini 3-ni pisartagaqarsinnaajunnaarnerup qaangiunneranniit, § 17, imm. 1 naapertorlugu.

Kapitali 8

Suliffissarsiortunut ikiorsiissutisisinnaanermik katersisarneq

  § 19.  Inuit suliffissarsiortunut ikiorsiissutisiassaminnik katersilersarput ullormiit saaffiginniffimminniit, tak. taamaattoq imm. 2 aamma 3.
  Imm. 2.  Inuup ulloq saaffiginniffigisani sap. ak. sioqqullugu aningaasarsiaqarnini annaasimappagu ulloq taanna tunngavigineqassaaq, ulloq saaffiginniffiusoq pinnagu.  
 Imm. 3.  Inuit akissarsiaqarfigisaminnik suliffeqareersimanngitsut suliffissarsiortunut ikiorsiissutinik pisartagaqalersinnaanerminnut katersisarput sapaatip akunnerini 2-ni, kommunalbestyrelsimut suliffissarsiortutut nalunaarnerminniit (ulloq saaffiginniffik)

Kapitali 9

Suliffissarsiortunut ikiorsiissutit aningaasartaat

  § 20.  Suliffissarsiortunut ikiorsiissutit procentiat naatsorsorneqartarpoq sulinermik inuussutissarsiuteqartunut suliamik ilinniagaqarsimanngitsunut isumaqatigiissummi minnerpaamik akunnermusiat aamma sulinermik inuussutissarsiuteqartunut suliamik ilinniagaqarsimasunut akunnermusiat, SIK-ip aamma Naalakkersuisut akornanni isumaqatigiissut naapertorlugu. 
  Imm. 2.  Akiliutissap procentia sapaatip akunnerini 26-ini siullerni minnerpaamik akunnermut akissarsiat 90 % -iannik annertussuseqarpoq. Tamatuma kingorna akunnermusianiit procentiat 80 % -imut apparneqassaaq.
  Imm. 3.  Inunnut 18-29-inik ukiulinnut suliffissarsiornermut ikiorsiissutinik pisartagaqartinneqareersimasunut qaammatini 12-ini, akissarsiat minnerpaaffissaannit procentia 65 % -itut annertussuseqalertarpoq.
  Imm. 4.  Inunnut 30-inik ukiulinnut ukioqqortunerusunullu katillugit qaammatini 24-ini suliffissarsiornermut ikiorsiissutinik pisartagaqareersimasunut procentia akunnermusiat 65 %-ianut annertussuseqarpoq.

  § 21.  Naalakkersuisut quppersakkaminni tamanut takusassiarisassavaat § 20, imm. 1-4 naapertorlugit akiliutit annertussusissaat.

  § 22.  Suliffissarsiortunut ikiorsiissutinik tunniussisoqartassaaq qinnuteqartup akunnermusiaanik tunngavilimmik. Akunnermusiaq naatsorsorneqartassaaq qinnuteqartup agguaqatigiissillugit akunnerit sapaatip akunnerini kingullerni 13-ini suliffissarsiortunut ikiorsiissutinik qinnuteqannginnermini suliffigisimasai tunngavigalugit, taamaattoq sapaatip akunneranut minnerpaamik akunnerit 22-it. Annerpaamik suliffissarsiortunut ikiorsiissutinik akiliisoqarsinnaavoq sapaatip akunneranut akunnermusiaq akunnernut 40-nut naatsorsugaasoq tunngavigalugu.
  Imm. 2.  Nalunaaquttap akunnerinut aningaasarsiaqarfiusunut ilaatinneqassapput piffissat pineqartup angerlartitaaffigisimasai, tak. § 4, aamma piffissat qinnuteqartup suliffigisimanngisai kisiannili akissarsiaqarfigisimasai imaluunniit allatigut pissarsiffigisimasai, tamatumani aamma sulinngiffeqarneq akilerneqartoq, ullut napparsimaffiusut akilerneqartut aamma meeqqap napparsimaffia, pikkorissarnernut peqataaneq, nal. ak. akissarsissutissanik afspadseeriineq assigisaaluunniit. 
  Imm. 3.  Inuit sioqqullugu akissarsiorfigisaminnik suliffeqarsimanngitsut suliffissarsiornermut ikiorsiissutinik sapaatip akunneranut akunnernut 22-inut naatsorsugaasunik akilerneqartassapput.

  § 23.  Siumoortumik qinnuteqarnikkut ilassutitut suliffissarsiornermi ikiorsiissutinik tunniussisoqarsinnaavoq, piffissap ilaannaani suliffeqarnermi annerpaamik sapaatip akunnerinik sisamanik sivisussuseqartuni, piffissap qaammatinik tulleriinnik arfinilinnik sivisussuseqartup iluani.
  Imm. 2.  Ilassutitut suliffissarsiornermi ikiorsiissutit piumasaqaatitaqarput ikiorsiissutinik tigusisussap sulilernissaminut piareersimanissaanik, tak. kapitali 4.
  Imm. 3.  Piffissaq suliffissarsiornermi ilassutitut ikiorsiissutinik pisartagaqarfiusoq tigusisussap iliuusissanut pilersaarutaani ilaariissaaq, siunertaqassallunilu pineqartup aalajangersimasumik suliffeqalernissaanik.

  § 24.  Suliffissarsiortunut ikiorsiissutinik pisartagaqartartoq ulluni ataasiakkaani akissarsiortarsimappat, suliffissarsiornermut ikiorsiissutit annikillineqartassapput nalunaaquttap akunnerinik aningaasarsiorfiusunik.

  § 25.  Suliffissarsiortunut ikiorsiissutit kingumoortumik tamatigut ullut 14-ikkaartumik akilerneqartassapput. Suliffissarsiornermut ikiorsiissutit kommunalbestyrelsimit kommunimi sulinermik inuussutissarsiuteqartup inuit allattorsimaffianni nalunaarsugaavigisaani akilerneqartassapput.
  Imm. 2.  Kommunit agguarnerisa avataaniittunut inunnut naalakkersuisoqarfik sulisoqarnermut akisussaasuusoq suliffissarsiornermut ikiorsiissutinut aningaasartuutit ingerlatissavai, tak. § 30, imm. 2.

Kapitali 10

Qanoq sivisutigisumik suliffissarsiortutut inissisimaneq

  § 26.  Suliffissarsiortutut qanoq sivisutigisumik inissisimaneq naatsorsorneqartassaaq siullermeersumik suliffissarsiornermi ikiorsiissutinik akiliisoqarneraniit, piffissamut suliffissaaleqisup suliffissarsiornermi ikiorsiissutinik pisartagaqarunnaarfigisaanut, suliffeqalernermik pissuteqartumik. Nutaamik suliffissarsiortunut kommunalbestyrelsimi nalunaarsorsimaleqqinnermi, suliffissarsiortoq nutaamik nalunaartutut nalunaarsorsimalissaaq, tak. taamaattoq imm. 3.
  Imm. 2.  Imm. 1 naapertorlugu qanoq sivisutigisumik suliffissarsiortuusimanerup naatsorsorneqarnerani ilanngunneqassaaq piffissaq ilassutitut suliffissarsiortumut ikiorsiissutinik akiliuteqarfiusartoq.
  Imm. 3.  Suliffissarsiortutut ikiorsiissutinik pisartagaqartoq nalunaarsimappat suliffissarsiortuujunnaarluni, taavali suli sapaatip akunneri 12-it qaangiutinngitsut nutaamik suliffissarsiortutut kommunalbestyrelsimut nalunaarluni, pineqartoq nutaamik nalunaartutut isigineqassanngilaq. Suliffissarsiortorli suli suliffissarsiortutut allannguuteqanngitsumik sivisussusilittut nalunaarsorsimaannassalluni imm. 1 malillugu.

Kapitali 11

Paasissutissiinissamut pisussaaffik

  § 27.  Suliffissarsiortutut ikiorsiissutinik pisartagaqartoq pisussaavoq kommunalbestyrelse ilisimatittassallugu atugarisamini allannguutit suliffissarsiornermut ikiorsiissutinik pisartagarisaminik allannguutaasinnaasut pillugit, atorunnaarsitsisinnaasut imaluunniit utertitsilluni akiliuteqartussanngorsinnaanermut pissutaasinnaasut pillugit.

  § 28.  Kommunalbestyrelse siumoortumik qinnuteqartumiit imaluunniit ikiorneqartumiit akuersisitsereernikkut piumasaqarsinnaavoq pisortatut oqartussaasut allat pineqartoq pillugu paasissutissanik tunniussaqassasut, suliffissarsiortutut ikiorsiissutinik tunniussisinnaanermut suliap suliarineranut pisariaqarsinnaasunik.  Tamanna aamma atuuppoq ilinniartitaanernut ingerlatsivinnut, napparsimmavinnut, nakorsanut, tarnip pissusaanik immikkut ilisimasalinnut, peqqinnissamik suliaqartunut akuerisaasunut allanut, aamma inunnut pineqartunut akisussaasunut sinnerlugulu sulisunut, aningaaserivinnut, sulisitsisunut aamma namminersortunut pisortat ingerlatsiviinik sullissisuusunut. Tamannalu aamma atuuppoq paasissutissanut inummut pineqartumut taamaallaat tunngasuusunut atatillugu, aammalu paasissutissanut isortuussaasunut tunngatillugu, soorluttaaq pisortat nakorsap pineqartumut allattugaataanik, napparsimmaviup allattugaataanik imaluunniit tamakkua anillatsinneqarnerinik piniarsinnaasut. 
  Imm. 2.  Kommunalbestyrelsip pineqartumit akuerineqaqqaarani suliami ataatsimi suliamut atatillugu imaluunniit nakkutilliinermut atatillugu piumasarisinnaavai paasissutissat pisortatut oqartussaasunit allaniit, aningaasanut tunngasuni aamma sulinngiffeqartarnermut tunngasuni, pineqartumut ikiorserneqarnissamik qinnuteqartumut atatillugu. 
  Imm. 3.  Kommunalbestyrelsip innuttaasumit akuerineqaqqaarani piumasarisinnaavai paasissutissat pisariaqartut aningaasaqarnermut attuumassuteqartut aningaaserivinniit aamma sulisitsisuniit, suliffissarsiortumut ikiorsiissutinik nakkutilliinermut atatillugu. 
  Imm. 4.  Qinnuteqartoq akuersinngippat kommunalbestyrelsip paasissutissanik piniarsinnaaneranut imm. 1 naapertorlugu, suliaq paasissutissat pigineqartut tunngavigalugit suliarineqassaaq, paasissutissat pineqartut, tak. imm. 2, akuersissutitaqanngitsumik aaneqarsinnaanngippata.

Kapitali 12

Utertitsilluni akiliineq

  § 29.  Kommunalbestyrelse aalajangertussaavoq eqqunngitsunik tunngaveqartunik ikiorsiissutinik tunniussisoqarsimanerani, Inatsisartut inatsisaat manna naapertorlugu utertitsilluni akiliinissamik, imaappat, ikiorsiissutinik pisartagaqartoq:
1)  Kommunalbestyrelsimut paasissutissanik apuussinaveersaarsimappat, tak. § 27.
2)  Pissutsit nalunngikkaluarlugit Inatsisartut inatsisaat manna naapertorlugu ikiorsiissutinik tigusaqarsimappat.
3)  Kingusinnerusukkut taarsiissutissanik akiliivigineqarsimappat, ikiorsiissutinik allaniit akilerneqarsimappat assigisaanilluunniit aqqusaagaqarsimappat, piffissami suliffissarsiornermut ikiorsiissutinik pisartagaqarfiusimasuni siunertaasunut naapertuuttunik akilerneqarsimasunik.

Kapitali 13

Aningaasalersuineq aamma allaffissorneq

  § 30.  Kommunalbestyrelsip Inatsisartut inatsisaat una tunngavigalugu suliassanik allaffissornikkut ingerlatsineq isumagisaraa.
  Imm. 2.  Inatsisartut inatsisaat una naapertorlugu ikiorsiissutinik pisartagaqarnissamut qinnuteqaat kommunimi aalajangersimasumik ineqarfigisami, imaluunniit aalajangersimasumik najukkami, tunniunneqassaaq. Inuit kommunit aggorneqarsimanerisa avataani aalajangersimasumik najugaqartut qinnuteqaammik Naalakkersuisunut tunniussisussaapput.
  Imm. 3.  Inunnut nunap kommuninut aggorsimanerisa avataaniittunut Naalakkersuisut piginnaatitsisinnaapput pisortatut oqartussaasunik allanik Inatsisartut inatsisaata matuma atortinneqarneranut atatillugu.

  § 31.  Inatsisartut inatsisaat manna naapertorlugu aningaasartuutit kommunalbestyrelsimit akilerneqassapput. Aningaasartuutit inunnut § 30, imm. 2, oqaaseqatigiit aappaat naapertorlugu pineqartunut Naalakkersuisunit akilerneqassapput.
  Imm. 2.  Suliffissarsiornermut ikiorsiissutinik pisartagaqartoq kommunimiit nuuppat iliuusissanut pilersaarummik suliaqartoqareernerani, kommunip nuuffiusup iliuusissanut pilersaarusiaq kommunimut qimatamut piniassavaa, naleqqussassallugulu taanna pisariaqassusia naapertorlugu, suliffissarsiornermut ikiorsiissutinik pisartagaqartoq kommunimi nuuffigisamini saaffiginnippat. Kommuni qimanneqartoq iliuusissamut pilersaarummik kommunimut nuuffiusumut nassiussaqassaaq, tamanna piumasarineqarniariarpat.

Kapitali 14
Ataatsimoorussanik IT-mi aaqqissuussinerit

  § 32.  Kommunit aamma Naalakkersuisut ataatsimoorussaminnik IT-mut atatillugu atortorissaaruteqassapput, Inatsisartut inatsisaat manna tunngavigalugu allaffissornerminni atugassaminnik.

Kapitali 15

Naammagittaalliutit

  § 33.  Kommunalbestyrelsip Inatsisartut inatsisaat una naapertorlugu aalajangiineri suliassanngortinneqarsinnaapput Isumaginninnikkut Maalaaruteqartarfimmut,  Isumaginnittoqarfiup aqunneqarnera aaqqissuussaaneralu pillugit Inatsisartut peqqussutaanni aalajangersakkat naapertorlugit.
  Imm. 2.  Kommuninut nunatta aggorneqarnerisa avataanni inunnut aalajangersimasumik najugaqartunut imaluunniit najugaqarallartunut tunngatillugu aalajangernerit Naalakkersuisunit imaluunniit Naalakkersuisunit piginnaatinneqartunit suliarineqartut  Isumaginninnermut Maalaaruteqartarfimmut suliassanngortinneqarsinnaapput.

Kapitali 16
Atortuulernera aamma ikaarsaariarnermi aalajangersakkat

  § 34.  Inatsisartut inatsisaat una atortuulerpoq ulloq 1. januar 2023.
  Imm. 2.  Ilutigisaanik atorunnaarsinneqarpoq Suliffeerunnermi ikiorsiissutit pillugit Inatsisartut inatsisaat nr. 2, 15. maj 2014-imeersoq.

  § 35.  Inuit Inatsisartut inatsisaata matuma atortuulernerani suliffeerunnermut ikiorsiissutinik pisartagaqartut ingerlaannartumik suliffissarsiornermut ikiorsiissutinut nuutsinneqassapput, Inatsisartut inatsisaanni uani aalajangersakkat naapertorlugit.
  Imm. 2.  Iliuusissanut pilersaarutit atuuttuusut Suliffeerunnermut ikiorsiissutit Inatsisartut inatsisaat nr. 2, ulloq 15. maj 2014-imeersoq naapertorlugu, allannguuteqaratik Inatsisartut inatsisaat una naapertorlugu atortinneqassapput. Kommunalbestyrelse Inatsisartut inatsisaata matuma atortuulerneraniit ukioq ataaseq qaangiutsinnagu iliuusissanut pilersaarutinik nutarteraluni malinnaatitsisassaaq, inunnut suliffeerunnernut ikiorsiissutinik pisartagaqarsimasunut suliffissarsiornermilu ikiorsiissutinik pisartagaqalersunut.

Namminersorlutik Oqartussat, ulloq 20. juuni 2022

Múte Bourup Egede
Naalakkersuisut Siulittaasuat