Eqqumiitsuliornermik ingerlatsineq pillugu Inatsisartut inatsisaanni nr. 11, 6. juni 2016-imeersumi §§ 8, imm. 3, 18, imm. 2 aamma § 19, imm. 2 naapertorlugit aalajangersarneqarpoq:

Kapitali 1

Atuuffia tapiiffigineqarsinnaatitaasullu

  § 1.  Nalunaarut tapiissutit Naalakkersuisunit siunnersuisoqatigiinnilluunniit, ataatsimiititaliamit, aningaasaateqarfinnit assigisaannilluunniit tunniunneqartut, Naalakkersullu Naalakkersuisut eqqumiitsuliornermik ingerlatalinnut tamatuminngalu ingerlatsisut aqunneqarnissaannut tunngatillugu suliassat isumaginissaannut tamakkiisumik ilaannakuusumilluunniit tunniussimasaasa aqunneqarnissaannut atorneqassaaq.

  § 2.  Tapiissutit sammisassanut tamanut Eqqumiitsuliornermik ingerlatsineq pillugu Inatsisartut Inatsisaanni § 8, imm. 1-imi aalajangersarneqartunut tunniunneqarsinnaapput.

  § 3.  Tapiissutit makkununnga tunniunneqarsinnaapput: 
1) Eqqumiitsuliornermik ingerlatsinermut tamatuminngalu ingerlatitseqqittarnermut eqqumiitsuliortup suliaqarneranut, ineriartortitsineranut tunisassiorneranullu, aamma
2) Kalaallit Nunaanni eqqumiitsuliornermik ingerlatsinernut nunanilu allani kalaallit eqqumiitsuliaannik allanik saqqummersitsinermut ingerlatitseqqiisarnermullu atatillugu suliffinnut, suliffeqarfinnut, suleqatigiiffinnut assigisaannullu.

  § 4.  Eqqumiitsuliornermik ingerlatsinerup tamatumalu ingerlateqqittarnissaanut eqqumiitsuliortumut tapiissutit, tak. § 3, imm. 1, eqqumiitsuliortunut qinnuteqarnerup nalaani Kalaallit Nunaanni aalajangersimasumik najugaqartumut tunniunneqassapput.

  § 5.  Kalaallit Nunaanni eqqumiitsuliornermik ingerlatat nunanilu allani kalaallit eqqumiitsuliaannik saqqummersitsinissamut ingerlatitseqqinnissamullu tapiissutit, tak. § 3, imm. 2, suliffinnut, suliffeqarfinnut, suleqatigiiffinnut assigisaannullu Kalaallit Nunaanni najugalinnut tunniunneqassapput. 
  Imm. 2.  Ingerlatsinermut tapiissutit pineqarsimanngippata tapiissutit taamaallaat ingerlatitseqqittoqarnissaanut suliniutinut tigussaasunut atatillugu tapiissutit tunniunneqassapput.

Kapitali 2

Tapeeriaatsit

  § 6.  Qinnuteqartoqareerneratigut qinnuteqartunut tapiissutit makku aqqutigalugit tunniunneqassapput: 
1)  Suliniutinut tapiissutit, tak. § 7. 
2)  Sulinissamut tapiinerit, tak. § 8.
3)  Tapiissuteqarnissamut qularnaveeqqusiinerit, tak. § 9. 
4)  Utertitsinerit, tak. § 10.
5)  Ingerlatsinermut tapiissutit, tak. § 11.

  § 7.  Suliniutinut tapiissuteqarnermi paasineqassapput sammisassanut piffissami killilimmi ingerlanneqartunut aammalu tigussaasumik anguniagaqarfiusunut imaluunniit inaarutaasumik angusaqarnermut tapiissutit.
  Imm. 2.  Suliniutinut tapiissutit suliniutinut qinnuteqarfiup nalaani ukiut 5-it iluanni naammassineqartunut tunniunneqarsinnaapput.

  § 8.  Sulinermut tapiisoqarnerani tapiissutit sulinerup ingerlanneranut imaluunniit eqqumiitsuliornerup ingerlanneranut tapiissutit pineqarput. 
  Imm. 2.  Sulinermut tapiissutit qaammammut aalajangersimasumik aningaasartalerlugit piffissamilu killeqartumi tunniunneqassapput. Kultureqarnermut Naalakkersuisoqarfik aningaasat qaammammut tunniunneqartartut amerlanerpaaffissaannut piffissaliunneqartumullu killeqartumut aalajangersaasinnaavoq. 
  Imm. 3.  Sulinermut tapiissutit eqqumiitsuliortunut tapiissuteqarnerup nalaani tamakkiisumik suliffeqarnikkut akissarsiatigut peqatigitillugu aningaasarsialinnut imaluunniit pisortanit aningaasanik tigusisartunut inuuniarnikkut aningaasartuutit matussusernissaannik tamakkiisumik siunertalinnut tunniunneqarsinnaanngillat.

  § 9.  Tapiissutinut qularnaveeqqusiinermi paasineqassaaq tapiissutit tunniunneqassasut tapiissutit tunniunneqarneranni piumasaqaatit naammassineqarsimappata.

  § 10.  Utertitsinermi paasineqassaaq aningaasartuutaasimasunut kinguneratigut ajunngitsorsiassarsineq, tassanilu aqutsisumit toqqaannartumik ajunngitsorsiassanik pisinnaasutut akuerineqarsimasunut.

  § 11.  Ingerlatsinermut tapiissutit paasineqassapput sammisarisamik ingerlatsinermut ingerlaavartumik aningaasartuutit matussusernissaannut tapiissutit, tamatumunnga ilanngullugit sulisorisanut, ininut allaffissornermullu aningaasartuutit.

  § 12.  Aqutsisoq eqqumiitsuliornermut suliassaqarfinnut ataasiakkaanut tunngatillugu tapeeriaatsit sorliit atorneqarsinnaanerannut najoqqutassanik sukumiinerusunik aalajangersaasinnaavoq. Najoqqutassat Kultureqarnermut Naalakkersuisoqarfimmit akuerineqassapput, kinguneratigullu tamanut saqqummiunneqarlutik.

Kapitali 3

Tapiissuteqarnissami piumasaqaatit

  § 13.  Tapiissutit Naalakkersuisut eqqumiitsuliornermik ingerlatsinermut tapiissuteqartarnerannut tunngavigineqartut Eqqumiitsuliornermik ingerlatsineq pillugu Inatsisartut Inatsisaanni aalajangersarneqartut tunngavigalugit tunniunneqartarput. 
  Imm. 2.  Aqutsisoq Eqqumiitsuliornermik ingerlatsineq pillugu Inatsisartut Inatsisaanni tunngavigineqartut ataqqillugit qinnuteqaatit pingaarnersiorneqarnissaannut najoqqutassanik sukumiinerusunik aalajangersaassaaq. Najoqqutassat Kultureqarnermut Naalakkersuisoqarfimmit akuerineqassapput, kinguneratigullu tamanut saqqummiunneqarlutik.

  § 14.  Makkununnga tapiissuteqartoqarsinnaanngilaq:
1)  Sammisanut qinnuteqartup nalinginnaasumik missingersuutaasa iluanni akilerneqarsinnaasutut naatsorsuutigineqartunut.
2)  Sammisanut qinnuteqarsinnaanermut piffissaliussap nalaani aallartinneqareersimasunut, matumani utertitsisoqarnissaa pineqarsimanngippat. 
3)  Nittartakkanik pilersitsinermut ingerlatsinermullu.
4)  Ilinniarnernut pikkorissarnernullu. 
5)  Sakkunik, atortunik, nipilersuutinik, pequtinik qarasaasianik softwarenillu pisinermut, taamaattoq tak. imm. 2. 
6)  Saqqummersitseqqinnernut, atuakkat cd-llu ilanngullugit.
  Imm. 2  Sakkunik atortunillu pisinermut tapiisoqarsinnaavoq, tamanna suliaqarnermut imaluunniit suliap suliarineqarneranut aalajangiisuulluni pingaaruteqarpat.

Kapitali 4

Qinnuteqariaaseq tapiissutillu tunniunnerisa tamanut saqqummiuttarnerat

  § 15.  Tapiissutit pillugit qinnuteqaat qinnuteqarfissat ilaat aqutsisumit suliarineqartoq tunniunneqartorlu aqqutigalugu elektroniskinngorlugu tunniunneqassaaq.

  § 16.  Tapiissutit pillugit qinnuteqaat suliassap tapiiffigineqartussatut qinnutigineqartup nassuiarneranik, tapiissutillu qanoq ittut qinnutigineqarnersut pillugit nassuiarneranik imaqassaaq.

  § 17.  Tapiissutinut ukiumut arlaleriarluni qinnuteqartoqarsinnaavoq. 
  Imm. 2.  Qinnuteqarnissamut piffissaliussat aqutsisup aalajangersaaffigalugillu tamanut saqqummiutissavai.

  § 18.  Aqutsisoq ukiumoortumik tapiissutit agguaannissaannut ukiumoortumik nassuiaasiussaaq tamanullu saqqummiussilluni, taakkulu ukununnga agguataarneqarput: 
1)  eqqumiitsuliornermut suliassaqarfiit ataasiakkaat tapiissutillu eqqumiitsuliornermi suliassaqarfiit akimorlugit ingerlanneqartut,
2)  tapeeriaatsit ataasiakkaat,
3)  tigusisussap najugaqarfia, kommunekkaarlugu naatsorsorlugu, 
4)  tigusisussap suiaassusaa,
5)  tigusisussap ukiui, ukiut akuttussusaat naleqquttut naatsorsorlugit, aamma
6)  ukiuni siuliini tigusisartut nutaat pisoqqallu.

Kapitali 5

Tapiissutit naatsorsuiffigineri, kukkunersiorneqarneri kiisalu atorunnaarsinneri utertitsissutiginissaallu

  § 19.  Suliniutinut tapiissutinik tigusisartut suliniutip naammassinerata kingorna kingusinnerpaamik qaammatit pingasut qaangiunnerisigut tapiissutit atorneqarnerinut naatsorsuutinik atsiukkanik aqutsisumut nassiussissapput.

  § 20.  Suliniutinut tapiissuteqarnermi tapiissutit 150.000 kr.-nit ataassimappagit kukkunersiuinissamut piumasaqaateqanngilaq. Naatsorsuutit tapiissutinik tigusisup atsiorsimasai naammapput. Tapiissutinik tigusisup atsiornermigut uppernarsassavaa, naatsorsuutit eqqortuusut, tapiissutinik tigusisoq aningaasaqarnermut tunngatillugu pisussaaffinnik mianerinnissimasoq aamma tapiissutit siunertamut atorneqarsimasut.
  Imm. 2.  Suliniutinut tapiissutit 150.000 kr.-nit ataallugit tapiissutinik tigusisoq tapiissuteqartartumit ataatsimit arlalinnilluunniit tapiissutinik tigusaqarsimappat tapiissutinik tigusisoq tamanna pillugu uppernarsaatissanik aqutsisumut nassiussissaaq. 
  Imm. 3.  Tapiissutinik ikinnerpaamik 150.000 kr.-ninik tigusisoqarsimappat naatsorsuutit kukkunersiuisumit naalagaaffimmit akuerineqartumit nalunaarsorneqartumilluunniit kukkunersiorneqarsimassapput. 

  § 21.  Ingerlatsinermut tapiissutinik tigusisut tapiissutit tunniunnerisa ukiup ataatsip qaangiunneratigut kingusinnerpaamik 1. juni ukiumoortumik naatsorsuutinik kukkunersiuisullu tapiliussaanik aqutsisumut nassiussissapput. 
  Imm. 2.  Ukiumut naatsorsuutit kukkunersiuisumit naalagaaffimmit akuerisaasumit imaluunniit kukkunersiuisutut nalunaarsukkamit kukkunersiorneqarsimassapput.

  § 22.  Kukkunersiuineq kukkunersiuinermi ileqqut pitsaasut naapertorlugit suliarineqassaaq.
  Imm. 2.  Kukkunersiuinermi ilaatigut makku misissoqqinneqassapput:
1)  Naatsorsuutit eqqortuunersut pingaarutilinnillu kukkuneqaratillu amigaateqannginnersut.
2)  Tapiissuteqarnermut piumasaqaataasut naammassineqarsimanersut.
3)  Tapiissutit siunertarineqartumut atorneqarsimanersut.
4)  Tapiissutinik tigusaqartoq aningaasaqarnermut tunngatillugu pisussaaffinnik mianerinnissimanersoq.
5) Paasissutissat tapiissutinik tigusisup suliniutigineqartoq suliarluunniit pillugit aqutsisumut nalunaarutigisimasai uppernarsarneqarsimanersut.  
  Imm. 3.  Aqutsisoq naatsorsuutit misissuiffiginissaannik suliaqassaaq.

  § 23.  Tapiissutit akuerineqartut imatut pisoqarsimappat tamakkiisumik ilaannakortumilluunniit uterteqquneqarsinnaapput:
1)  Tapiiffigineqartup tapiiffigineqarnissamut piumasaqaataasut naammassisinnaajunnaarpagit.
2)  Tapiiffigineqartup tapiissutitut akuersissutigineqartunut piumasaqaataajunnartut naammassinngippagit.
3)  Qinnuteqartoq eqqunngitsunik paasissutissiisimappat.
4)  Tapiissutinik tigusisoq paasissutissanik pingaarutilinnik nassiussinissamik itigartitsisimappat, taakkununngalu naatsorsuutit ilaapput. 

  § 24.  Aqutsisoq qaqugukkulluunniit tapiissutinik tigusisoq suliassamut tapiiffigineqartumut paasissutissanik pingaarutilinnik nassiusseqqullugu qinnuiginnissinnaavoq.

Kapitali 6

Atuutilersitsinermut ikaarsaarnermullu aalajangersakkat

  § 25.  Nalunaarut ullormi 1. januari 2022 atuutilissaaq.

Namminersorlutik Oqartussat, ulloq 17. decemberi 2021

Peter Olsen
Ilinniartitaanermut, Kultureqarnermut, Timersornermut Ilageeqarnermullu Naalakkersuisoq

/ Karsten Peter Jensen