Aalisarneq pillugu Inatsisartut inatsisaanni nr. 18, 31. oktober 1996-imeersumi, kingullermik Inatsisartut inatsisaatigut nr. 28, 28. november 2016-imeersukkut allanngortinneqartumi, § 8, imm. 2, § 9, imm. 1, § 10, § 10a, § 10b, imm. 1, § 11, imm. 1-2, § 13, imm. 2-3, § 14, imm. 5, § 21, imm. 2, § 24, § 33, imm. 2, § 34, imm. 3 aamma § 38, imm. 3 malillugit aalajangersarneqarpoq:

Atuuffia

  § 1. Nalunaarut
1)  angallatit Kalaallit Nunaanni nalunaarsorsimasut,
2)  angallatit nunanit allaneersut imartani Kalaallit Nunaata aalisarnikkut oqartussaaffigisaani, imaluunniit
3)  angallatit nunanit allaneersut imartani Kalaallit Nunaata aalisarnikkut oqartussaaffigisaasa avataanni Kalaallit Nunaata pisassaanik aalisartut, atorlugit inuussutissarsiutigalugu aalisarnermut atuuppoq.
  Imm. 2.  Tamatuma saniatigut nalunaarut atuuppoq inuussutissarsiutiginagu aalisarsinnaanermut akuersissuteqarnissamik piumasaqaatitaqarfiusumut.
  Imm. 3.  Nalunaarut naapertorlugu aalisarsinnaanermut akuersissummik tunineqarsinnaanissamut piumasaqaataavoq, qinnuteqartup inuussutissarsiutigalugu aalisarnermik imaluunniit aalisarsinnaanermut akuersissuteqarfigineqarsimanissamik piumasaqaatitaqarfiusumik ingerlataqarnissaa.
  Imm. 4. Angallatit usitussutsimut uuttuutaat malillugu 75 BRT imaluunniit 120 BT-mit mikinerusut taamaallaat imartami sinerissap tunngaviusumillu titarnerup aalisarnikkut oqartussaaffiup killingata 3 sømilit avataanniittup akornanni aalisarsinnaapput, taamaattorli imm. 6 aamma 7 takukkit.
  Imm. 5. Angallatit usitussutsimut uuttuutaat malillugu 75 BRT imaluunniit 120 BT-tut angitigisut anginerusullu taamaallaat titarnerup aalisarnikkut oqartussaaffiup tunngaviusumik killingata 3 sømilit avataanni aalisarsinnaapput, taamaattorli imm. 7 takujuk.
  Imm. 6. Imm. 4 saattuarniarnermi atuutinngilaq.
  Imm. 7.  Raajarniarsinnaatitaaneq Imartani Kalaallit Nunaata aalisarnikkut oqartussaaffigisaani raajarniarneq pillugu Namminersornerullutik Oqartussat nalunaarutaanni nr. 23-mi, 29. august 2002-meersumi malittarisassaqartinneqarpoq.
  Imm. 8. Imm. 4 aamma 5 uiluinniarnermi atuutinngillat.

Nassuiaatit

  § 2.  Nalunaarummi matumani “usitussutsimut killigititaq” paasineqassaaq usitussutsitut angallatip uuttuutaanut uppernarsaammi allassimasutut, uuttueriaatsit pillugit malittarisassat sorliit tunngavigalugit usitussutsimut uuttuutit suliarineqarsimanerat apeqqutaatinnagu.
  Imm. 2.  “Qaammatisiutit ukiuat qaangiuttoq” paasineqassaaq qaammatisiutit ukiuattut aalisarsinnaanermut akuersissummut qinnutigineqartumut qaammatisiutit ukiuata piffissap akuersissuteqarfiusup aallartiffiata siuninnguaniittutut.
  Imm. 3.  “Taamaaqataanik aalisarsinnaanermut akuersissut” paasineqassaaq nunap immikkoortuanut tassunga aalisariutip aalisarsinnaanermullu akuersissutip suussusianut tassunga akuersissutitut.
  Imm. 4.  “Umiatsiaaraq” paasineqassaaq angallatitut suugaluartutulluunniit 6 meteritut taannaluunniit ataallugu tamakkiisumik takissusilittut.
  Imm. 5.  “Aalisarneq aalisarsinnaanermut akuersissuteqarnissamik piumasaqaatitaqarfiusoq” paasineqassaaq aalisarnertut inuussutissarsiutigalugu aalisarnerunngitsutut, aalisarsinnaanermut akuersissuteqarnissamut piumasaqaatitaqarfiusutut.

Piffissaa killilerlugu aalisarsinnaanermut akuersissut pisassat annertunerpaaffilerlugit

  § 3. Piffissaa killilerlugu aalisarsinnaanermut akuersissut, tassunga pisassat annertunerpaaffilerneqarsimatillugit, inuussutissarsiutigalugu aalisarsinnaanissamut piumasaqaataavoq:
1)  angallatit 75 BRT/120 BT-tut angitigisut anginerusullu aamma angallatit 6 meteritut tamakkiisumik takissusillit atorlugit raajarniarneq sinerissamullu qanittumi qaleralinniartut ilanngunnagit,
2) uiluinniarnermi, angallatit angissusaat apeqqutaatinnagit aamma
3)  aalisarneq pillugu oqartussaaffinni nunat allat imaluunniit nunarsuup immikkoortuini aalisarneq pillugu suleqatigiiffiit aalisarnermik killilersuisinnaanermut pisinnaatitaaffigisaanni angallatit Kalaallit Nunaanni nalunaarsorneqarsimasut atorlugit aalisarnermi.
  Imm. 2. Piffissaa killilerlugu aalisarsinnaanermut akuersissut, tassunga pisassat annertunerpaaffilerneqarsimatillugit, taamatuttaaq nunat tamalaat imartaanni malittarisassaqartitsiviunngitsuni inuussutissarsiutigalugu aalisarnissamut piumasaqaataavoq.
  Imm. 3. Aalisarsinnaanermut akuersissummik tunniussinermi aalisagaqatigiinnut pisassiissutinik aalajangersaanermi pineqartunik naliliinermik, qinnuteqartut tamarmiusut amerlassusiinik § 12-ilu naapertorlugu Naalakkersuisut agguaassinermi piumasaqaataanik tunngaveqassaaq.
  Imm. 4.  Aalisarnerni aalisagaqatigiinnik arlalinnik ataatsikkut pisaqanngitsoorfiusinnaanngitsuni aalisagaqatigiit ataasiakkaat iluaqutiginiarneqarsinnaanerat isiginiarlugu tamanna akuerineqarsinnaappat aalisagaqatigiinnut taakkununnga tamanut pisassiissutinik aalisariut tunineqassaaq.
  Imm. 5. Aalisarsinnaanermut akuersissut ukiut pisassiiviusut ataasiakkaarlugit tunniunneqartarput. Uumassusilerisut siunnersuinerat ukiunut pisassiiviusunut arlalinnut atuuppat aalisarsinnaanermut akuersissummik ukiunut pisassiiviusunut arlalinnut atuuttumik tunniussisoqarsinnaavoq.

Piffissamut killilikkamut aalisarsinnaanermut akuersissut pisarineqarsinnaasut annertunerpaaffilernagit

  § 4. Piffissaa killilerlugu pisassat annertunerpaaffilernagit aalisarsinnaanermut akuersissuteqarnissaq ukuninnga inuussutissarsiutigalugu aalisarnermi piumasaqaataavoq:
1) aalisagaqatigiinnik, angallatinit Kalaallit Nunaanni nalunaarsorneqarsimasunit ataatsimoorullugu aalisarneqarsinnaasunik pisassiisoqartillugu aalisarnermi,
2)  immikkut pisoqarnerani uumassusilerisut siunnersuinerat pisassiissutinik aalajangiinissamik kinguneqartussaatinnagu angallatit Kalaallit Nunaanni nalunaarsorneqarsimasut atorlugit aalisarnermi, aamma 
3)  angallatit nunanit allaneersut atorlugit Kalaallit Nunaata aalisarnikkut oqartussaaffigisaani aalisarnermi, aalisakkanik pisassiissutit nunap erfalasoqarfiusup pineqartup angallataanit ataatsimoorullugit aalisarneqarsinnaatillugit.
  Imm. 2. § 4, imm. 1, nr. 1 aamma 2 malillugit aalisarsinnaanermut akuersissummik tunniussineq piumasaqaatit § 8-mi aalajangersarneqarsimasut tunngavigalugit pisassaaq.
  Imm. 3. § 4, imm. 1, nr. 3 naapertorlugu aalisarsinnaanermut akuersissummik tunniussineq nunat tamalaat isumaqatigiissutaat tunngavigalugit pisassaaq.
  Imm. 4. Aalisarsinnaanermut akuersissut ukiut ataasiakkaarlugit tunniunneqartarput. Uumassusilerisut siunnersuinerat ukiunut arlalinnut atuuppat aalisarsinnaanermut akuersissummik ukiunut arlalinnut atuuttumik tunniussisoqarsinnaavoq.

  § 5. Umiatsiaaqqat 6 meteritut tamakkiisumik takissusillit mikinerusulluunniit atorlugit inuussutissarsiutigalugu aalisarnermi piffissaa killilerlugu pisassat annertunerpaaffilernagit aalisarsinnaanermut akuersissummik peqarnissaq piumasaqaataavoq.
  Imm. 2. § 8 aamma § 10 tunngavigalugit aalisarsinnaanermut akuersissutinik tunniussisoqartarpoq.

Piffissamut killiligaanngitsumut aalisarsinnaanermut akuersissut pisarineqarsinnaasut annertunerpaaffilerlugit

  § 6.  Angallatit 6 meter sinnerlugu tamakkiisumik takissusillit atorlugit raajarniarnermi sinerissamullu qanittumi qaleralinniarnermi piffissamut killiligaanngitsumut pisarineqarsinnaasut annertunerpaaffilerlugit akuersissummik peqarnissaq piumasaqaataavoq.
  Imm. 2. Piginnittup pisassiissutinit pigisai aalisarsinnaanermut akuersissummi allassimassapput. Pisassiissutinit pigisat tassaapput pisassiissutit tamarmiusut imartami pisassiiffiusumi aalisagaqatigiinnik pineqartunik Naalakkersuisut aalajangersarsimasaasa procentinngorlugit ilaat.
  Imm. 3. Piffissamut killiligaanngitsumut aalisarsinnaanermut akuersissummut atatillugu ukiut tamaasa ukioq pisassiiffiusoq aallartitsinnagu ukiumoortumik pisassiissutit pillugit nalunaarut tunniunneqassaaq, ukiumi pineqartumi annertussutsit tunisassiornissamullu akuersissutaajunnartut nalunaarlugit.

Pisassiissutinik nuussineq

  § 7. Raajarniarnermi qaleralinniarnermilu aalisariutaatileqatigiiffik ukiumoortumik pisassiissutinik tamakkerlugit aalisarsimasoq qinnuteqartoqarneratigut ukiumi pineqartumi novembarip ulluisa 15-iata kingornatigut aalisarnermik ingerlatitseqqinnissaminut akuerineqarsinnaavoq. Ukiumoortumik pisassiissutit saniatigut pisarineqartut annertussusii ukiup tulliani aalisariutaatileqatigiiffimmut ukiumoortumik pisassiissutigineqartunit ilanngaatigineqassapput.
  Imm. 2. Raajarniarnermi qaleralinniarnermilu aalisariutaatileqatigiiffiup ukiumoortumik pisassiissutinik tamakkerlugit aalisarsimanngitsup qinnuteqartoqarneratigut ukiup siuliani pisarineqanngitsut amerlaqataannik ukiup tulliani ukiumoortumik pisassiissutit amerlineqarnissaannik akuerineqarsinnaavoq. Pisassiissutit nuunneqartut eqqarsaatigalugit raajat kingusinnerpaamik apriilip ulluisa 30-anni pisarineqarsimassapput qalerallillu kingusinnerpaamik juulip aallaqqaataani pisarineqarsimassallutik.
  Imm. 3.  Imm. 1 malillugit qinnuteqaat Aalisarnermut, Piniarnermut Nunalerinermullu Naalakkersuisoqarfimmut nassiunneqassaaq. Qinnuteqaat imm. 1-2 naapertorlugit aalisarnerup nangeqqikkusunneqarnera kingusinnerpaamik sapaatit akunnerinik marlunnik sioqqullugu Naalakkersuisoqarfimmit tiguneqareersimassaaq.
  Imm. 4. Imm. 1-2 malillugit ukiumut pisassissutit nuunneqartut aalisarneqassapput aalisartitsiveqatigiiffimmiit aalisartumilluunniit, nuussisitsisimasunit ukimut pisassiissutinik.
  Imm. 5.  Qalerallit ukiumut pisassiissutit nuunneqarnikut tamakkerlugit aalisarneqanngippata 1. juli kingorna, takuuk stk. 2, Naalakkersuisut agguaqqissinnaapput ukimut pisassiissutit sinerissamut qanittumi angallatit umiatsiaaqqallu akornanni, pisassiivimmi 47-mi.

Sinerissamut qanittumi aalisarnermi aalisarsinnaanermut akuersissutinik tunniussisarneq

  § 8. § 4, imm. 1, nr. 1-2 aamma § 5 tunngavigalugit aalisarsinnaanermut akuersissutit, qinnuteqartunut ukiup siuliani assinganik aalisarsinnaanermut akuersissuteqarsimasunut tunniunneqartarput, taamaattorli § 10 takujuk.

  § 9.  Umiatsiaaqqamik sinerissamut qanittumi aalisarsinnaanermut akuersissummik qinnuteqaat kommunimi qinnuteqartup najugaqarfigisaani kommunalbestyrelsimut tunniunneqassaaq. Qinnuteqartut qinnuteqarnermi immersuivissaq www.sullissivik.gl-imi nassaarineqarsinnaasoq atussavaat.
  Imm. 2.  Angallatit 6 meter sinnerlugu tamakkiisumik takissusillit atorlugit sinerissamut qanittumi aalisarsinnaanermut akuersissummik qinnuteqaat Aalisarnermut, Piniarnermut Nunalerinermullu Naalakkersuisoqarfimmut tunniunneqassaaq. Qinnuteqartut qinnuteqarnermi immersuivissaq www.sullissivik.gl-imi nassaarineqarsinnaasoq atussavaat.

  § 10.  Qinnuteqartoqarneratigut Aalisarnermut, Piniarnermut Nunalerinermullu Naalakkersuisoqarfik qinnuteqartunut makkununnga § 8-mi piumasaqaatip sanioqqunneqarnissaanut akuersissuteqarsinnaavoq:
1)  Qinnuteqartunut 18-it 29-illu akornanni ukiulinnut imarsiornermi aalisarnermik ilinniagaqarsimasunut, imaluunniit allatigut taamaaqataanik piginnaasaqalersimasunut.
a)  Inuussutissarsiutigalugu piniartoq taamaaqataanik aamma piginnaasaqalersinnaavoq imm. 1-ilu naapertorlugu qinnuteqarsinnaalluni.
2)  Qinnuteqartup allatigut taamaaqataanik piginnaasaqalersimanera innersuussutigalugu qinnuteqartoqarpat, tamanna ukunannga uppernarsarneqarsimassaaq:
a)  Kommune angerlarsimaffigisaq.
b)  Kattuffik attuumassutilik.
c)  Inuk pineqartup aalisaqatigisimasaa.
  Imm. 2.  Pineqartup inuussutissarsiutigalugu umiatsiaaraqarnissaa pisariaqartunillu aalisarnermut atortoqarnissaa immikkut akuerineqarsinnaanissamut piumasaqaataavoq. Tamatuminnga qinnuteqaat Aalisarnermut, Piniarnermut Nunalerinermullu Naalakkersuisoqarfimmut nassiunneqassaaq. Imarsiornermik ilinniagaqarsimanermut uppernarsaat allatigulluunniit uppernarsaatit ilanngussatut nassiunneqassapput.
  Imm. 3.  Immikkut akuersissuteqarnermi sumiiffimmut pineqartup najugaqarfigisaanut aalisarsinnaanermut akuersissummik tunniussisoqassaaq.
  Imm. 4.  Aalisarnermut, Piniarnermut Nunalerinermullu Naalakkersuisoqarfik taamatuttaaq sumiiffinni Qaanaami, Tunumi, Kujataanilu, suliffeqarnissamut allanik periarfissaqanngitsoq nalilerneqarpat, qinnuteqartunut immikkut akuersissuteqarsinnaavoq. Immikkut akuerineqarnissamik qinnuteqaat Aalisarnermut, Piniarnermut Nunalerinermullu Naalakkersuisoqarfimmut nassiunneqassaaq.
  Imm. 5.  Aalisarnermut, Piniarnermut Nunalerinermullu Naalakkersuisoqarfik qinnuteqartunit akuerineqarluni § 10, imm. 1-2 aamma 4-mi naliliinernut atugassanik kommunimit qinnuteqartup angerlarsimaffigisaanit najukkamilu aalisartut piniartullu peqatigiiffiannit qinnuteqartoq pillugu paasissutissanik pisariaqartunik pissarsiniarsinnaavoq.

Avataasiorluni aalisarnermi aalisarsinnaanermut akuersissutinik tunniussisarneq

  § 11.  Avataasiorluni aalisarnermut aalisarsinnaanermut akuersissummik qinnuteqaat Aalisarnermut, Piniarnermut Nunalerinermullu Naalakkersuisoqarfimmut tunniunneqassaaq. Qinnuteqartut qinnuteqarnermi immersuivissaq www.sullissivik.gl-imi nassaarineqarsinnaasoq atussavaat.

  § 12.  § 3, imm. 3 naapertorlugu pisassiissutinik agguaassineq makkuninnga atugassaqartitsilluni pissaaq:
1)  Pisassiissutit siullermik aalisariutaatileqatigiiffinnut ukiuni siusinnerusuni taakkuninnga pisassaqarsimasunut agguaanneqassapput.
2)  Imm. 1, nr. 2 naapertorlugu agguaassereernerup kingorna pisassiissutit sinneqassagaluarpata, taakku siullermik aalisariutaatileqatigiiffinnut pioreersunut allanut amerlanerusunik pisassaqarsinnaanermik pisariaqartitsisinnaasunut agguaanneqassapput.
a)  Imm. 1, nr. 2 naapertorlugu pisassiissutit agguaanneqarneranni pisassiissutit nalingi aallaavigineqassapput, taamatullu aamma siullermik aalisariutaatileqatigiiffiit aningaasaqarniarnikkut imminnut napatissinnaanerisa qularnaarneqarnissaa, kiisalu aalisariutaatileqatigiiffiit pioreersut akornanni nalillit naligiinnerusumik agguataarneqarnissaat isiginiarneqassallutik.
3)  Aalisariutaatileqatigiiffinnut nutaavinnut pisassiisoqassanngilaq, taakku ukioq ilivitsoq aningaasaqarniarnikkut imminut napatissinnaasumik aalisarsinnaanissaat qularnaarneqarsinnaanngippat.

Inuussutissarsiutigalugu misileraalluni aalisarsinnaanermut akuersissut

  § 13. Inuussutissarsiutigalugu misileraalluni aalisarsinnaanermut akuersissummik qinnuteqaatit Naalakkersuisunit akuerineqartassapput.
  Imm. 2.  Naalakkersuisut inuussutissarsiutigalugu misileraalluni aalisarsinnaanermut akuersissutinik pilersitsillutillu agguataarisarput.
  Imm. 3.  Inuussutissarsiutigalugu misileraalluni aalisarsinnaanermut akuersissummik qinnuteqaatit Naalakkersuisunut saqqummiunneqarsinnaalertigatik Aalisarnermut, Piniarnermut Nunalerinermullu Naalakkersuisoqarfimmut nassiunneqartassapput.

  § 14.  Inuussutissarsiutigalugu misileraalluni aalisarsinnaanermut akuersissummik qinnuteqaat Aalisarnermut, Piniarnermut Nunalerinermullu Naalakkersuisoqarfimmut tunniunneqassaaq. Qinnuteqartut qinnuteqarnermi immersuivissaq www.sullissivik.gl-imi nassaarineqarsinnaasoq atussavaat.
  Imm. 2.  Qinnuteqaatit ataasiakkaat erseqqinnerusumik nalilerneqareernerisigut aalisarsinnaanermut akuersissutit tunniunneqarsinnaapput, tamatumani piumasaqaatit uku pingaartinneqassallutik:
1)  Qinnuteqartoq pisariaqartinneqartunik piginnaaneqarnersoq.
2)  Siunertarineqartoq sapinngisamik pitsaanerpaamik naammassineqarsinnaaqqullugu qinnuteqartoq inuussutissarsiutigalugu misileraalluni aalisarnissaminut naleqquttumik angallateqarnersoq aamma pisariaqartinneqartunik atortussaqarnersoq.
3)  Aalisakkanut qinnuteqaatigineqartunut atorneqartussat inuussutissarsiutigalugu misileraalluni aalisarneq naammassisinnaaneraat.
4)  Qinnuteqartup angallataa pigineqarnermigut Kalaallit Nunaanni angerlarsimaffeqarnersoq.
5)  Aalisakkat pineqartut, imartap pineqartup, atortulersuutit teknologiillu misissuiffigineqarnissaat ilumut pisariaqartinneqarnersoq.
6)  Imaani uumasoqatigiinnik Pinngortitaleriffiup naliliinera.
  Imm. 3. Inuussutissarsiutigalugu misileraalluni aalisarsinnaanermut akuersissut piffissamut killiligaavoq pisarineqarsinnaasullu annertunerpaaffissaligaanerannik ilaqarluni.
  Imm. 4. Aalisarsinnaanermut akuersissut ukiut pisassiiviusut ataasiakkaarlugit tunniunneqartarpoq.

  § 15. Aalisarnermut, Piniarnermut Nunalerinermullu Naalakkersuisoqarfik aqutsiveqarfinni aalisagaqatigiinnik pisassiissutigineqanngitsunik inuussutissarsiutigalugu misileraalluni aalisarsinnaanermut akuersissuteqarsinnaavoq.
  Imm. 2. Aqutsiveqarfinni atuuttuni alisagaqatigiinnut pisassiissutaareersunut inuussutissarsiutigalugu misileraalluni aalisarnissamut, Aalisarnermut, Piniarnermut Nunalerinermullu Naalakkersuisoqarfiup Pinngortitaleriffik isumasioqatigalugu tamatumunnga pisariaqartitsisoqartoq isumaqarpat, immikkut akuersissummik tunisisoqarsinnaavoq.

  § 16. Qinnuteqartut Aalisarnermut, Piniarnermut Nunalerinermullu Naalakkersuisoqarfimmit akuerineqarlutik inuussutissarsiutigalugu misileraalluni aalisarnerup ingerlanneqarnissaanut nunat allamiut angallataannik attartorsinnaapput, kalaallit angallataanni atortussat pisariaqartinneqartut imaluunniit teknologi pisariaqartinneqartoq pigineqanngippata.

Aalisarneq aalisarsinnaanermut akuersissuteqarnissamik piumasaqaatitaqarfiusoq

  § 17.  Aalisarnermut aalisarsinnaanermut akuersissuteqarnissamik piumasaqaatitaqarfiusumut aalisarsinnaanermut akuersissummik qinnuteqaat Aalisarnermut, Piniarnermut Nunalerinermullu Naalakkersuisoqarfimmut tunniunneqassaaq.
  Imm. 2.  Aalisarnermut aalisarsinnaanermut akuersissuteqarnissamik piumasaqaatitaqarfiusumut pineqartumut piumasaqaatit atugassarititaasullu qinnuteqartup aammassisimassavai.
  Imm. 3.  Aalisarneq inuussutissarsiutigalugu aalisarnerunngitsoq aalisarsinnaanermulli akuersissuteqarnissamik piumasaqaatitaqarfiusoq tassaavoq sunngiffimmi kapisilinniarneq.
  Imm. 4.  Sunngiffimmi kapisilinniarneq Namminersorlutik Oqartussat kapisilinniarneq pillugu nalunaarutaanni malittarisassaqartinneqarpoq.

  § 18.  Saarullinnik tunisaqarnissaq siunertaralugu sunngiffimmi aalisarsinnaanermut akuersissummik qinnuteqarnermi qinnuteqarnermi immersuivissaq www.sullissivik.gl-imi nassaarineqarsinnaasoq atorneqassaaq. Qinnuteqarnermi piumasaqaatit makku naammassineqarsimassapput:
1)  Qinnuteqartoq Kalaallit Nunaanni najugaqartutut inuit nalunaarsorsimaffianni nalunaarsorsimassaaq ukiunilu qaangiuttuni kingullerni marlunni Kalaallit Nunaanni najugaqartutut nalunaarsorneqarsimassalluni.
2)  Qinnuteqartoq Kalaallit Nunaanni tamakkiisumik akileraartussaatitaassaaq qaammatisiutillu ukiuni qaangiuttuni kingullerni marlunni Kalaallit Nunaanni tamakkiisumik akileraartussaatitaasimassalluni.
3)  Qinnuteqartoq inuussutissarsiutigalugu aalisartuussanngilaq.
4)  Aalisarsinnaanermut akuersissut tunniunneqarsimasoq tunitsivimmi takutinneqartassaaq.
5)  Immersugassat tamarmik erseqqissumik atuaruminartumillu immersorneqarsimassapput.
6)  Sunngiffimmi aalisartutut aalisarsinnaanermut akuersissutilittut saarullinnik tunisineq taamaallaat pisinnaavoq inuussutissarsiutigalugu aalisartut tunisisinnaanerannik unitsitsisoqarsimatinnagu.

Tamanut tunngatillugu aalajangersakkat

  § 19. Aalisarnermut, Piniarnermut Nunalerinermullu Naalakkersuisoqarfik aalisarsinnaanermut akuersissutinik tunniussinermi piumasaqaatinik atugassarititaasunillu aalajangersaasinnaavoq.
  Imm. 2.  Akuersissutinik tunniussinermi piumasaqaatinik atugassarititaasunillu unioqqutitsineq inerteqqutaavoq.

  § 20.  Aalisarsinnaanermut akuersissut taassumaluunniit assilineqarnera aalisarnerup nalaani angallammiitinneqassaaq. Taamatuttaaq ukiumoortumik pisassiissutinik nalunaarut taassumaluunniit assilineqarnera aalisarnerup nalaani angallammiitinneqassaaq.

  § 21.  Aalisarsinnaanermut akuersissut piginnittumut aalajangersimasumut ataatsimut tunniunneqartarpoq, akuersissummilu angallat angallatilluunniit aalisarnermut atorneqartussat nalunaarneqarsimassallutik. § 6, imm. 1 naapertorlugu piffissamut killiligaanngitsumut aalisarsinnaanermut akuersissummut atatillugu ukiumoortumik pisassiissutinik nalunaarummi angallatit nalunaarsimassapput.
  Imm. 2.  Angallatit akuersissummi nalunaarneqarsimasut kisiisa atorlugit aalisarneq ingerlateqqusaavoq. § 6, imm. 1 naapertorlugu piffissamut killilerneqanngitsumut aalisarsinnaanermut akuersissummut atatillugu, angallatit akuersissummi ukiumulluunniit pisassanik nalunaarummi nalunaarneqarsimasut kisiisa atorlugit aalisarneq ingerlateqqusaavoq.
  Imm. 3.  Taamaattorli ATV-t, qimussit qamuteralaallu imm. 2-mi malittarisassanut ilaatinneqanngillat inuussutissarsiutigalugulu aalisarnermi atorneqarsinnaallutik.
  Imm. 4.  Angallatit 6 meter sinnerlugu tamakkiisumik takissusillit atorlugit inuussutissarsiutigalugu aalisarsinnaanermut akuersissut atorlugu aalisarnermi umiatsiaaqqat atorneqaqqusaanngillat. Oqaaseqatigiinni siullerni inerteqqut bundgarnersornermi imaluunniit inuussutissarsiutigalugu nipisanniarnermi atuutinngilaq.
  Imm. 5.  Umiatsiaaqqamik inuussutissarsiutigalugu aalisarsinnaanermut akuersissut atorlugu aalisarnermi angallatit 6 meter sinnerlugu tamakkiisumik takissusillit atorneqaqqusaanngillat.
  Imm. 6.  Akuersissummi allannguutit, tassunga ilanngullugit piginnittuunermi pissutsit allanngorneri, Aalisarnermut, Piniarnermut Nunalerinermullu Naalaakkersuisoqarfimmit akuerineqartassapput.
  Imm. 7.  Angallatip takissusia nalornissutigineqarpat Aalisarsinnaanermut Akuersissutinik Nakkutilliisoqarfik nutaamik uuttortaasoqarneratigut tamanna pillugu aalajangiissaaq.”

  § 22. Inuk ingerlatseqatigiiffilluunniit peqatigitillugu angallammut 6 meter taannaluunniit inorlugu tamakkiisumik takissusilimmut aamma angallammut 6 meter sinnerlugu tamakkiisumik takissusilimmut aalisarsinnaanermut akuersissutinik pigisaqarsinnaanngilaq.
  Imm. 2. Angallat 6 meter sinnerlugu tamakkiisumik takissusilik motooriarsimanerup, amutsivimmiinnerup sikuunerataluunniit kinguneranik ingerlanngippat, angallammut tassunga aalisarsinnaanermut akuersissummik piginnittoq, piffissami angallatip motooriarsimanerani, amutsivimmiinnerani sikuuneraniluunniit, angallammik 6 meter taannaluunniit inorlugu tamakkiisumik takissusilimmik atuisinnaavoq. Tunisinermi pisat annertussusiat ukiumut pisassiissutinit ilanngaatigineqartassaaq.

  § 23. Angallatit 5 BRT-mit anginerusut inuussutissarsiutigalugu aalisarnermut atorneqartussat Aalisarnermut, Piniarnermut Nunalerinermullu Naalakkersuisoqarfimmit akuerineqartassapput.
  Imm. 2. Aalisarnermut, Piniarnermut Nunalerinermullu Naalakkersuisoqarfiup angallatit taamaallaat akuerisinnaavai:
1)  piginnittuunermut pissutsit tamanna pillugu aalisarnermut inatsimmi aalajangersakkanut naapertuuppata, aamma
2)  angallatip aalisarsinnaassusia aalisarnissamik periarfissanut atuuttunut naleqqussagaasutut nalilerneqarpat.
  Imm. 3. Akuerineqarnissamik qinnuteqaat allaganngorlugu Aalisarnermut, Piniarnermut Nunalerinermullu Naalakkersuisoqarfimmut nassiunneqassaaq.
  Imm. 4. Naalagaaffimmi sumi angerlarsimaffeqarnermut uppernarsaatip aammalu usitussutsimut uuttuutip assilinerat qinnuteqaammut ilanngullugit nassiunneqassapput. Angallat nutaamik uuttortarneqarpat, motooria pingaarneq taarserneqarpat imaluunniit annertuumik allanngortinneqarpat usitussutsimut uuttuut nutaaq Aalisarnermut, Piniarnermut Nunalerinermullu Pisortaqarfimmut nassiunneqassaaq.
  Imm. 5.  Angallatip piginnittua, aqqa GR-normualuunniit taarserpat naalagaaffimmi sumi angerlarsimaffeqarnermut uppernarsaammik nutaamik Aalisarnermut, Piniarnermut Nunalerinermullu Pisortaqarfimmut nassiussisoqassaaq.
1)  Angallatip piginnittua, aqqa GR-normualuunniit taarserpat pisinermut isumaqatigiissut pisisumit tunisisumillu atsiorneqarsimasoq naalagaaffimmi sumi angerlarsimaffeqarnermut uppernarsaatip pigineqalernissaata tungaanut uppernarsaataagallartutut akuerineqarsinnaavoq.

  § 24.  Kinaluunniit § 3, imm. 1, nr. 4 naapertorlugu Kalaallit Nunaata aalisarnikkut oqartussaaffiata avataani inuussutissarsiutigalugu aalisarsinnaanermut akuersissummik pigisaqartoq, nunat tamalaat akornanni aalisarneq pillugu isumaqatigiissutinik aalajangersakkanillu malinninnissamut pisussaaffeqarpoq.
  Imm. 2. Isumaqatigiissuteqarfiusuni aalisarnermi angallat nunat tamalaat isumaqatigiissutaat imaluunniit isumaqatigiissut naapertorlugit misissuiffigineqartussaavoq pineqaatissinneqarlunilu.

Pineqaatissiissutaasinnaasut

  § 25. § 1, imm. 4 aamma 5-imik, § 3, imm. 1 aamma 2-mik, § 4, imm. 1-imik, § 5, imm. 1-imik, § 6, imm. 1-imik, § 7, imm. 4-imik, § 19, imm. 1-imik, § 20-mik, § 21, imm. 2, 4 aamma 5-imik, § 23, imm. 1, 4, oqaaseqatigiit aappaannik, 5-imillu, kiisalu § 24, imm. 1-imik unioqqutitsinerit pinerluttulerinermi inatsimmi malittarisassat naapertorlugit akiliisitsissummik arsaarinnissummillu pineqaatissinneqarsinnaapput.
  Imm. 2.  Aalisarsinnaanermut akuersissummi piumasaqaatinik unioqqutitsineq akuersissutip atorneqarsinnaanerata killiliiffigineqarneranik, kiisalu annertuumik arlaleriarluniluunniit unioqqutitsisoqarnerani arsaarinnissutigineqarneranik kinguneqarsinnaavoq. Aalisarneq pillugu inatsimmi § 21, imm. 4 naapertorlugu tamanna Naalakkersuisunit aalajangerneqassaaq, nalunaarutigineqarneraniillu ullut 15-it qaangiutsinnagit Kalaallit Nunaata Eqqartuussisuuneqarfianut ingerlateqqinneqarsinnaalluni.
  Imm. 3. Inatsisilerinermi immikkoortut inuttut isigineqarsinnaasut pinerluttulerinermi inatsimmi malittarisassat malillugit imm. 1 malillugu akiliisussanngortinneqarsinnaapput.
  Imm. 4.  Angallatit 75 BRT/-mit imaluunniit 120 BT-mit anginerusut eqqarsaatigalugit imm. 1 aamma 3 malillugit suliassat Kalaallit Nunaanni Eqqartuussivimmut suliarinniffiusussatut siullertut suliassanngortinneqartassapput.
  Imm. 5.  Akiliisitsissutit imm. 1 aamma 3 malillugit aalajangersarneqartut Nunatta Karsianut nakkartarput.

Atuutilerfia

  § 26. Nalunaarut 2021-mi januaarip ulluisa aallaqqaataanni atuutilerpoq.
  Imm. 2. Peqatigitillugu Aalisarsinnaanermut akuersissutit pisassiissutillu pillugit Namminersorlutik Oqartussat nalunaarutaat nr. 8, 8. april 2016-imeersoq atuukkunnaarsinneqarpoq.

Namminersorlutik Oqartussat, ulloq 18. december 2020

Jens Immanuelsen

/

Jørgen Isak Olsen