Meeqqat tapersersorneqarnissaannut Inatsisartut inatsisaanni nr. 20, 26. juni 2017-imeersumi § 37, imm. 7, § 39, imm. 6, aamma § 42, imm. 7, malillugit uku aalajangersarneqarput:

Kapitali 1
Ilaqutariit paarsisartut

  § 1.  Qanigisaasutut ilaqutariit paarsisartut tassaapput ilaqutariit namminneq angerlarsimaffimminni meeqqamut aalajangersimasumut qanigisaanertik pissutigalugu paarsisartut, meeqqamik isumassuisuullutillu paarsisuusut, imaluunniit Meeqqat tapersersorneqarnissaannut Inatsisartut inatsisaat malillugu imaluunniit Inuit innarluutillit tapersersorneqarnissaannut Inatsisartut inatsisaat malillugu oqilisaassivimmiittussamik isumassuisuullutillu paarsisuusut.
  Imm. 2.  Qanigisaasutut ilaqutariit paarsisartut angajoqqaatut oqartussaassuseqartumik ilaqutariillu inoqutaannik allanik ulloq unnuarlu najugaqartitsisinnaapput.
  Imm. 3.  Imm. 1 malillugu qanigisaasutut ilaqutariit paarsisartut inuusuttumik suliniuteqareernermi malitseqartitsilluni suliniuteqarfigineqartumik, imm. 1 malillugu ilisimariikkaminnik, najugaqartitsisinnaapput.

  § 2.  Kommunip aaqqissuussaanik ilaqutariit paarsisartut tassaapput ilaqutariit meeqqamik ilaqutariinnut inissinneqarsimasumik, imaluunniit Meeqqat tapersersorneqarnissaannut Inatsisartut inatsisaat malillugu imaluunniit Inuit innarluutillit tapersersorneqarnissaannut Inatsisartut inatsisaat malillugu oqilisaassivimmiittussamik isumassuisuullutillu paarsisuusut.
  Imm. 2.  Ilaqutariit paarsisartut angajoqqaatut oqartussaassuseqartumik ilaqutariillu inoqutaannik allanik ulloq unnuarlu najugaqartitsisinnaapput.
  Imm. 3.  Ilaqutariit paarsisartut inuusuttumik suliniuteqareernermi malitseqartitsilluni suliniuteqarfigineqartumik najugaqartitsisinnaapput.

  § 3.  Kommunip aaqqissuussaanik inuussutissarsiutigalugu ilaqutariit paarsisartut tassaapput ilaqutariit paarsisartut arlaat pinngitsoorani isumaginninnermik ilinniarsimasuusoq allatulluunniit isumaginninnermut sanilliunneqarsinnaasumik misilittagaqartuusoq.
  Imm. 2.  Angajoqqaarsiat arlaat isumaginninnikkut assigisaanilluunniit ilinniarsimasuusoq,  piffissami meeqqap paarineqartup meeqqalluunniit paarineqartut ulluunerani paaqqinnittarfimmiinneranni atuarneranniluunniit, taamaallaat allamik inuussutissarsiutigalugu suliffeqarsinnaasoq. 

Kapitali 2 
Ilaqutariinnut paarsisartunut akuersissut

  § 4.  Ilaqutariit paarsisartut ilaqutariittut paarsisartutut akuersissummik peqarunik aatsaat meeqqamik tigusisinnaallutillu paarsaqarsinnaapput.
  Imm. 2.  Ilaqutariittut paarsisartutut akuersissut kommunimi ilaqutariit paarsisartut najugarisaanni kommunalbestyrelsimit tunniunneqassaaq.
  Imm. 3.  Ilaqutariittut paarsisartutut akuersissut allakkatigut tunngavilersorlugu nalunaarutigineqassaaq. Ilaqutariit paarsisartut meeqqanik inuusuttunillu qassinik tigusisinnaanerat ilaqutariittut paarsisartutut akuersissummi allaqqassaaq.

  § 5.  Ilaqutariinni qinnuteqartuni pissutsit ataatsimoortillugit misissuineq tunuliaqutaralugu, kommunalbestyrelsip ilaqutariittut paarsisartutut akuersissummik tunniussinissaq aalajangiiffigissavaa. Ilaqutariit pineqartut meeqqamik inuusuttumilluunniit ataatsimik arlalinnilluunniit paarsassanik tigusinissamut qanoq naleqqutsiginersut Kommunalbestyrelsip misissuinermini nalilissavaa.
  Imm. 2.  Imm. 1 malillugu kommunalbestyrelsip misissuinermini pissutsit ilaatigut makkua ilaqutariit qanoq naleqqutsiginerannik naliliinermi ilanngutissavai:  
1)  Ilaqutariinni ilaqutariittut pissutsit.
2)  Ilaqutariinni ilinniagaqarneq pillugu pissutsit.
3)  Ilaqutariinni suliffeqarneq pillugu pissutsit.
4)  Angajoqqaat inooqatigiinnerat.
5)  Angajoqqaat ukiui.
6)  Angajoqqaat meeraqarsimappata meeraat, matumani qassiuneri ukiuilu ilanngullugit.
7)  Ilaqutariit attaveqarfii.
8)  Ilaqutariit ineqarneranni pissutsit, matumani angerlarsimaffik peqqinnissaq eqqarsaatigalugu isumannaatsuunersoq ilanngullugu.
9)  Ilaqutariit angerlarsimaffiata avatangiisii, matumani sunngiffimmi periarfissat, atuarfik il.il.
10)  Ilaqutariinni peqqissutsimut pissutsit.
11)  Pinerluutillit suliarineqarnerat pillugu pissutsit.
12)  Ilaqutariit aanngajaarniutinik atuinerat pillugu pissutsit.
13)  Ilaqutariit aningaasaqarnerat pillugu pissutsit.
14)  Angajoqqaat perorsaaneq pillugu isumaat.
15)  Ilaqutariit paarsisinnaanermik akuersissummik qinnuteqarnerat sumik tunngaveqarlunilu pissuteqarnersoq.
  Imm. 3.  Ilaqutariit inuussutissarsiutigalugu paarsisartuunissamik qinnuteqarsimappata, angajoqqaat arlaat pinngitsoorani isumaginninnermik ilinniarsimasuunersoq allatulluunniit isumaginninnermut sanilliunneqarsinnaasumik misilittagaqartuunersoq kommunalbestyrelsip aammattaaq nalilissavaa.
  Imm. 4.  Imm. 2, nr. 10 malillugu ilaqutariinni, tamanna naliliinermut atatillugu pisariaqarsorineqarpat, inoqutaasut ilaat 1 arlaqartulluunniit peqqissutsimut uppernarsaammik kommunalbestyrelsip qinnuigisinnaavai. Peqqissutsimut uppernarsaat qaammatinit 3-nit pisoqaanerussanngilaq. 
  Imm. 5.  Imm. 2, nr. 11 malillugu naliliinermut atatillugu Pinerluuteqarsimasunik Nalunaarsuiffimmit uppernarsaammik kiisalu ilaqutariinni inoqutaasunut 15-inik taakkualuunniit sinnerlugit ukiulinnut tamanut tunngatillugu meeqqanik pinerliisimannginnermut uppernarsaammik kommunalbestyrelse piniassaaq.
  Imm. 6.  Imm. 2, nr. 12 malillugu naliliinermut atatillugu aanngajaarniutinik atuisuunermik misissuineq kommunalbestyrelsip aallartissavaa. Kommunalbestyrelse, massuma aallartinnginnerani inummut aanngajaarniutinik atuisuunermik misissorneqartussamut, allakkatigut akuersissummik piniassaaq. Aanngajaarniutinik atuisuunermik misissuinissamik nalunaaruteqarneq tamatigut peqqinnissaqarfimmi najoqqutassat nalinginnaasut malillugit pissaaq.
  Imm. 7.  Imm. 2, nr. 13 malillugu kommunalbestyrelsip ilaqutariit aningaasaqarnerat meeqqat inuusuttullu ilaqutariinnit paarineqartussatut inissinneqartut aalajaatsumik atugaqarnissaannik tunngavissiinersoq naliliinermut atatillugu qulakkiissavaa.

  § 6.  Kommunalbestyrelse ilaqutariinnut paarsisartunut akuersissuteqarnissamini piumasaqaatinik aalajangersaasinnaavoq. Makkua pillugit piumasaqaatit aalajangersarneqarsinnaapput:
1) Ilaqutariinni paarsisartuni pissutsit.
2) Meeqqat inuusuttullu ilaqutariit paarsassamissut tigusinnaasaasa amerlassusissaat.
3) Meeqqat inuusuttullu ilaqutariit paarsassamissut tigusinnaasaasa qanoq pisariaqartitsitiginissaat.
  Imm. 2.  Imm. 1 malillugu piumasaqaatit siunertaasumit nanertuutaanerussanngillat.

  § 7.  § 4, imm. 2 malillugu kommunalbestyrelsimut ilaqutariittut paarsisartuunissamut akuersissuteqartumut §§ 1-3 malillugit ilaqutariit paarsisartut ilaqutariinni pissutsit pillugit allannguuteqartoqartillugu kommunalbestyrelsimut piaartumik nalunaaruteqarnissamut pisussaaffeqarput.

Ilaqutariittut paarsisartutut akuersissummik utertitsineq

  § 8.  § 4 malillugu ilaqutariit paarsisartut, kommunalbestyrelsip ilaqutariit najugaqarfigisaaniittup, akuersissummi piumasaqaatit atuukkunnaarsimappata, akuersissut utertinneqassanersoq aalajangiiffigissavaa.
  Imm 2.  Ilaqutariittut paarsisartutut akuersissutip utertinneqarnissaa kommunalbestyrelsip ilaqutariinnik paarsisartunik nakkutilliineranut atatillugu, imaluunniit kommunalbestyrelsip ilaqutariittut paarsisartutut akuersissummi piumasaqaatit atuukkunnaarsimanerat allatigut paasippagu, atorunnaarsinneqarsinnaavoq.
  Imm 3.  Kommunalbestyrelsip, ilaqutariittut paarsisartutut akuersissutip utertinneqarnissaanik aalajangiisup, kommunalbestyrelse kommunalbestyrelsilluunniit, meeqqamik inuusuttumilluunniit ilaqutariinnut inissiinissamik aalajangiisimasut, sapinngisamik piaarnerpaamik ilisimatissavai.
  Imm 4.  Kommunalbestyrelsip ilaqutariittut paarsisartutut akuersissummik utertitsinissamik aalajangiinermini, meeqqap, inuusuttup, meeqqat inuusuttulluunniit ilaqutariinnit paarsarineqartut nuutsinneqarnissaannut piffissaliussaq naammaginartumik sivisussusilik aalajangissavaa. Meeqqap inuusuttulluunniit ukiuminut naleqquttumik sutigut tamatigut alliartorneranut, peqqissusaanut ineriartorneranullu naleqquttumik, nutaanik inissiivissanik tulluartunik nassaarnissaq kiisalu pissutsit ilaqutariittut paarsisartutut akuersissummik utertinneqarnissaanut pissutaasut eqqarsaatigalugit, piffissaliussaq aalajangerneqassaaq.

  § 9.  Ilaqutariit paarsisartut pikkorissarnerni ilinniaqqinnernilu §§-ini 16-imi 17-imilu pineqartuni peqataasarnissamik piumasaqaatinik eqquutsitsinngippata, ilaqutariittut paarsisartutut akuersissutip utertitsinneqarnissaa kommunalbestyrelsip aalajangissavaa. 
  Imm. 2.  Imm. 1 malillugu utertitsinissamik aalajangiisoqannginnerani ilaqutariit paarsisartut, pikkorissarnerni ilinniaqqinnernilu §§-ini 16-imi 17-imilu pineqartuni peqataasarnissamik piumasaqaatit qanoq eqquutsinneqarsinnaanerat pillugu kommunalbestyrelsip oqaloqatigeqqaassavai.
  Imm. 3.  Imm. 1 malillugu ilaqutariittut paarsisartutut akuersissutip utertitsinissaanik aalajangiinermi § 8, imm. 4 atuutissaaq.

  § 10.  Ilaqutariit paarsisartut piffissami ukiunik pingasunik sivisunerusumi meeqqanik inuusuttunilluunniit paarsaqarsimanngippata, ilaqutariittut paarsisartutut akuersissutip utertitsinissaa kommunalbestyrelsip aalajangissavaa.

Kapitali 3
Paarsisinnaanermut akuersissut aamma ilaqutariittut paarsisartuni inissiinermut isumaqatigiissut

Paarsisinnaanermut akuersissut

  § 11.  Kommunip aaqqissuussaanik ilaqutariit paarsisartut, meeqqamut inuusuttumulluunniit pineqartumut paarsisinnaanermut akuersissummik peqarunik aatsaat, meeqqamik ataatsimik tigusisinnaallutillu paarsisinnaapput. 
  Imm. 2.  Paarsisinnaanermut akuersissut allakkatigut tunngavilersorlugu nalunaarutigineqassaaq.

  § 12.  Kommunalbestyrelsip paarsisinnaanermut akuersissummik tunniussaqarnissamik aalajangiinermini, ilaqutariit pineqartut meeqqap inuusuttulluunniit aalajangersimasup tapersersorneqarnissamik, isumassorneqarnissamik paarineqarnissamillu pisariaqartitaanik naammassinninnissamut qanoq naleqqutsiginerat nalilissavaa. Kommunalbestyrelsip naliliinermini ilaatigut makku ilanngutissavai:
1)  § 4, imm. 3 malillugu ilaqutariit meeqqat inuusuttullu paarsarisinnaasaasa amerlassusiat, ilaqutariittut paarsisartutut akuersissummi allassimasoq.
2)  Meeqqat inuusuttullu ilaqutariinni paarsisartuni inissinneqareersimasut amerlassusaat.
3)  Meeqqap inuusuttulluunniit tapersersorneqarnissamik, isumassorneqarnissamik paarineqarnissamillu pisariaqartitai.
4)  Ilaqutariit meeqqap inuusuttulluunniit tapersersorneqarnissamik, isumassorneqarnissamik paarineqarnissamillu pisariaqartitaanik naammassinninnissaannut piginnaasaat.
5)  Meeqqap inuusuttulluunniit inatsisit allat naapertorlugit tapersersorneqarnissamik pisariaqartitsinera, meeqqap inuusuttulluunniit ilaqutariinni paarsisartuni taamatut tapersersorneqarnissaminut periarfissai.

  § 13.  § 12 malillugu ilaqutariit paarsisartut ilaqutariinni pissutsinik allannguuteqartoqartillugu, kommunalbestyrelsimut imaluunniit kommunalbestyrelsinut meeqqamut inuusuttumulluunniit aalajangersimasumut ilaqutariittut paarsisartuunissamut akuersissummik tunniussisumut tunniussisunulluunniit, piaartumik nalunaaruteqarnissamut pisussaaffeqarput.

Paarsisinnaanermut akuersissutip utertinneqarnissaa

  § 14.  § 12 malillugu paarsisinnaanermut akuersissummi piumasaqaatit atuukkunnaarsimappata, matumani pingaartumik aamma meeqqap inuusuttulluunniit najugaqarnini iluaqutiginngippagu, akuersissutip utertitsinneqarnissaa kommunalbestyrelsip inissiisup aalajangiiffigissavaa.
  Imm. 2.  Meeqqat tapersersorneqarnissaannut Inatsisartut inatsisaanni § 8, imm. 2 malillugu, meeqqap inuusuttulluunniit ilaqutariinni najugaqarnerani kommunalbestyrelsip nakkutilliineranut atatillugu, imaluunniit paarsisinnaanermut akuersissummi piumasaqaatit atuukkunnaarsimanerat allatigut paasippagu, akuersissutip utertitsinneqarnissaa kommunalbestyrelsip aalajangiiffigisinnaavaa.
  Imm. 3.  Kommunalbestyrelsip paarsisinnaanermut akuersissutip utertitsinneqarnissaanik aalajangiisup, kommunalbestyrelse ilaqutariinnut paarsisartunut akuersissummik ilaqutariinnut tunniussisimasoq tuaviornerpaamik ilisimatissavaa. 
  Imm. 4.  Kommunalbestyrelsip paarsisinnaanermik akuersissummik utertitsinissamik aalajangiinermini, meeqqap inuusuttulluunniit ilaqutariinnit paarsarineqartup nuutsinneqarnissaanut piffissaliussaq naammaginartumik sivisussusilik aalajangiiffigissavaa. Meeqqap inuusuttulluunniit pisariaqartitaanut naapertuuttumik piffissaliussaq inissinneqassaaq, meeqqamik inuusuttumilluunniit inissiivissatut naleqquttumik nassaarsinnaaneq, kiisalu pissutsit paarsisinnaanermut akuersissummik utertitsinermut pissutaasut eqqarsaatigalugit aalajangerneqassaaq.
  Imm. 5.  Meeqqap inuusuttulluunniit atugarissaarneranut, peqqissusaanut imaluunniit ineriartorneranut ajoqutaasumik, tunngavilersukkamik pasitsaassineq tunngavigalugu, kommunalbestyrelsip meeraq inuusuttorluunniit erngerluni ilaqutariinnit paarsisartunit peersissavaa:
1)  Meeraq inuusuttorluunniit naammanngitsumik isumassorneqarpat imaluunniit pineqarpat,
2)  timikkut tarnikkulluunniit persuttarneqarpat, paarinerlunneqarpat imaluunniit kinguaassiuutitigut innarlerneqarpat,
3)  atornerluinermik ajornartorsiuteqartoqarpat, meeqqami inuusuttumiluunniit imaluunniit taakku qanittumik avatangiisigisaanni pinerluttoqartarpat imaluunniit inooqutigiinni annertuunik allanik ajornartorsiuteqartoqarpat, imaluunniit
4)  meeqqap inuusuttulluunniit imaluunniit taakku qanittumi avatangiisaanni pissusilersornikkut- imaluunniit naleqqussarniarnerminni ajornartorsiuteqarpata.

Ilaqutariittut paarsisartunut isumaqatigiissut

  § 15.  Meeqqap inuusuttulluunniit suliniuteqareernermi malitseqartitsilluni suliniuteqarfigineqartup, kommunalbestyrelse pisussaavoq ilaqutariittut paarsisartuni inissiinermut isumaqatigiissutip suliarineqarnissaa atsiortinnissaalu isumagissallugu.
  Imm. 2.  Ilaqutariittut paarsisartuni inissiinermut isumaqatigiissut aalajangersakkanik minnerpaamik makkuninnga imaqassaaq:
1)  §§ 20-21 malillugit paaqqinninnersiutisiassat, 
2)  aningaasartuutaasinnaasut immikkut ittut allat,
3)  taamaatitsinermut malittarisassat,
4)  sillimmasiinermut tunngasut,
5)  meeqqap inuusuttulluunniit suleqatigineqarnissaa,
6)  suliatigut tapersersuineq,  
7)  nakkutilliineq, siunersiueqatigiittarneq ilinniartitaaneq, aamma
8)  sulinngiffeqartarneq.

Kapitali 4
Ilinniartitaaneq siunersiueqatigiinnerlu

Tunngaviusumik pikkorissarneq

  § 16.  §§ 1-3 malillugit ilaqutariit paarsisartut isumaginninnermut aqutsisoqarfiup aaqqissuussaanik akuerisaanilluunniit ilaqutariittut paarsisartuunissamut tunngaviusumik pikkorissartinneqassapput. Paarsisartutut angajoqqaajusussat tamarmik pikkorissarneq naammassisimassavaat.
  Imm. 2.  Ilaqutariit paarsisartut § 4 malillugu ilaqutariittut paarsisartutut akuersissummik siullerpaamik tunineqarnissamut atatillugu tunngaviusumik pikkorissartinneqassapput. Imaappoq ilaqutariit paarsisartut piffissap akuersissummik peqanngiffimmik kingorna ilaqutariittut paarsisartutut akuersissummik nutaamik qinnuteqarunik tunngaviusumik pikkorissaqqissanngillat. Pissutsilli immikkut ittut atuutsillugit taamaaliornissaq kommunalbestyrelsip piumasarisinnaavaa.
  Imm. 3.  Pissutsit immikkut ittut atuutinngippata ilaqutariit meeqqanik inuusuttunilluunniit paarsassaannik tigusitinnagit tunngaviusumik pikkorissarneq naammassineqarsimassaaq. Ilaqutariit paarsisartut pikkorissarnerminnik suli naammassinngitsut meeqqamik inuusuttumilluunniit najugaqartitsilerpata kommunalbestyrelse ilaqutariinnut paarsisartunut utaqqiisaagallartumik akuersissummik tunniussissaaq, matumalu kingorna pikkorissarneq piaarnerpaamik naammassineqassaaq.
  Imm. 4.  Tunngaviusumik pikkorissarnerup sivisussusaa minnerpaamik ullut pikkorissarfiusut ilivitsut sisamat naleqatigissavai.
  Imm. 5.  Tunngaviusumik pikkorissarnermut aningaasartuutit, matumani angalanermut akunninnernullu aningaasartuutit ilanngullugit, kommunalbestyrelsimit ilaqutariit paarsisartut najugaqarfigisaannit akilerneqassapput.
  Imm. 6.  § 9 malillugu tunngaviusumik pikkorissarnermik naammassinnissimannginneq ilaqutariittut paarsisartunut akuersissutip utertitsinneqarnissaanik aalajangernissamut tunngaviusinnaavoq.

Ilinniaqqinneq

  § 17.  § 4 malillugu kommunalbestyrelsip, ilaqutariinnut paarsisartunut akuersissummik ilaqutariinnut paarsisartunut tunniussisup, ilaqutariit paarsisartut ilinniaqqinnissaannik neqeroorfigissallugit pisussaaffigivaa. Ilaqutariit paarsisartut ilinniaqqinnermut peqataanissartik pisussaaffigaat.
  Imm. 2.  Imm. 1 malillugu ilinniaqqinneq isumaginninnermut aqutsisoqarfimmit neqeroorutigineqassaaq ingerlanneqarlunilu.
  Imm. 3.  Imm. 1 malillugu ilinniaqqinneq isumaginninnermut aqutsisoqarfimmit akuersinikkut kommunalbestyrelsimit neqeroorutigineqarsinnaavoq ingerlanneqarlunilu.
  Imm. 4.  Ilinniaqqinnermut aningaasartuutit, matumani angalanermut akunninnernullu aningaasartuutit, kommunalbestyrelsimit akilerneqassapput.

Siunersiueqatigiinneq suliamillu ilisimasalinnit tapersersorneqarneq

  § 18.  § 11 malillugu kommunalbestyrelse paarsisinnaanermik akuersissummik tunniussaqartup ilaqutariit paarsisartut paarsinermi suliassamut naapertuuttumik siunersiueqateqartarnissaannik suliamillu ilisimasalinnit tapersersorneqarnissaannut neqeroorfigissallugit pisussaaffigaa. Ilaqutariit paarsisartut siunersiueqatigiinnermi peqataanissartik pisussaaffigaat.
  Imm. 2.  Meeraq inuusuttorluunniit kommunimi allami ilaqutariinni paarsisartuni inissinneqarsimappat, kommunip inissiisup kommunalbestyrelse sinnerlugu siunersiueqateqartarnissaq tapersersorneqartarnissarlu pillugit neqeroorfigineqarnissamik ilaqutariit paarsisartut kommunimi najugaqarfigisaani kommunalbestyrelse isumaqatigiissuteqarfigisinnaavaa.
  Imm. 3.  Imm. 2 malillugu siunersiueqateqartarnissamik suliamillu ilisimasalinnit tapersersorneqarnissamik isumaqatigiissuteqartoqarsimappat, imm. 1 malillugu ilaqutariit paarsisartut, paarsinerup suliassartaata annertussusianut naapertuuttumik, siunersiueqateqartarnermik suliamullu tunngasumik tapersersorneqarnermik neqeroorfigineqartarnersut kommunip inissiisup nakkutigissallugu pisussaaffigaa.

Kapitali 5
Aningaasaqarnermi pissutsit

Nerisassarsiutissat, kaasarfimmiussat atisassarsiutissallu, allatsinnermut aki ilassutaasumillu tapiissutit.

  § 19.  Kommunalbestyrelse inissiisoq, nerisassarsiutissanik, kaasarfimmiussanik atisassarsiutissanillu ilaqutariittut paarsisartunut, meeqqap inuusuttulluunniit pilersorneqarneranut atugassanik, akiliuteqartassaaq.
  Imm. 2.  Nerisassarsiutissat, kaasarfimmiussat atisassarsiutissallu qaammatikkaartumik siumoortumik akilerneqartassapput.
  Imm. 3.  Meeqqap inuusuttulluunniit ilaqutariittut paarsisartunut inissinneqarnerani allatsinneranut aki kommunalbestyrelsip akilissavaa.
  Imm. 4.  Kommunalbestyrelse ilaqutariit paarsisartut paarsinerannut atatillugu aningaasartuutinut ilassutaasunut tapiissuteqarsinnaavoq.
  Imm. 5.  Naalakkersuisoqarfiup isumaginninnermut akisussaasuusup nerisassarsiutissat, kaasarfimmiussat atisassarsiutissallu allatsinnermullu aki ukiumut ataasiarluni aalajangersartassavai tamanullu nalunaarutigalugit.

Ilaqutariit paarsisartut aningaasarsiaat

  § 20.  Kommunalbestyrelsip inissiisup ilaqutariit paarsisartut paaqqinninnersiutisiassaat akilissavai, taamaattoq imm. 3 takuuk. Paaqqinninnersiutit tassaapput ilaqutariit paarsisartut akissarsiassaat taamaammallu meeqqap inuusuttulluunniit pilersornissaanut atugassiaanngitsut.
  Imm. 2.  Ilaqutariit paarsisartut inuusuttumik suliniuteqareernermi malitseqartitsilluni suliniuteqarfigineqartumik najugaqartitsisut paaqqinninnersiutisiaqartarput.
  Imm. 3.  Imm. 1 aamma 2 ilaqutariinnut inuussutissarsiutigalugu paarsisartunut atuutinngilaq.
  Imm 4.  Kommunalbestyrelsip inissiisimasup aalajangersimappagu meeraq inuusuttorluunniit efterskolissasoq allatulluunniit atuarfimmiissasoq, meeqqap inuusuttulluunniit ilaqutariit paarsisui meeqqap inuusuttulluunniit atuarfimmiinnerata naammassivinnissaata tungaanut appartitanik akissarsiaqartinneqassapput, meeqqap inuusuttulluunniit atuarnerani piareersimasutut inissisimasussaammata.
  Imm. 5.  Meeqqap napparsimanerani ullormi siullermi sulinikkut aningaasarsiassaagaluit annaasat tamakkerlugit akissarsititsissutigineqassapput.

  § 21.  § 20 malillugu paaqqinninnersiutisiat, qaammammut kingumoortumik tunniunneqartassapput.
  Imm. 2.  Naalakkersuisoqarfiup isumaginninnermut akisussaasuusup § 20 malillugu paaqqinninnersiutisiat amerlassusissaat ukiumut ataasiarluni aalajangersartassavai.
  Imm. 3  Imm. 2 malillugu meeqqamik inuusuttumilluunniit ilaqutariinnut paarsisartunut inissiineq, perorsaaneq isumassuinerlu eqqarsaatigalugit ilaqutariinnut paarsisartunut immikkut perorsaanikkut isumassuinikkullu suliniarnartuuppat paaqqinninnersiutit naalakkersuisoqarfimmit annertussusilerneqartut 700 pct-it tikillugit qaffanneqarnissaat kommunalbestyrelsip aalajangersinnaavaa.
  Imm. 4.  Nukinginnartumik sivikitsumik ullut 30-t tikillugit inissiisoqartillugu kommunalbestyrelse paaqqinninnersiutisianik annertusisanik tunniussisassaaq.

  § 22.  Kommunalbestyrelsip ilaqutariit inuussutissarsiutigalugu paarsisartut isumaqatigiissutit atuuttut naapertorlugit akissarsiaqartissavai.

Kapitali 6
Atuutilerfia

  § 23.  Nalunaarut 1. januar 2020 atuutilissaaq.
  Imm. 2.  Tassunga peqatigitillugu pillugit Ilaqutariit paarsisartut pillugit Namminersornerullutik Oqartussat nalunaarutaat nr. 17, 8. november 2017-imeersoq atorunnaarsinneqarpoq.

Namminersorlutik Oqartussat, ulloq 10. oktober 2019

Martha Abelsen

/

Julie Præst Wilche