§ 1

Utoqqalinersiaqarneq pillugu Inatsisartut inatsisaanni nr. 20, 23. november 2015-imeersumi, Inatsisartut Inatsisaatigut nr. 24, 7. december 2015-imeersukkut aamma Inatsisartut inatsisaatigut nr. 6, 2. juni 2017-imeersukkut allanngortinneqartumi imatut allanngortitsisoqassaaq:

1.  § 5, imm. 2, imatut allassimassaaq:
“  Imm. 2.  Utoqqalinersiaqartut inummik utoqqalinersiaqarsinnaatitaanngitsumik aappaqarlutik inuusut, utoqqalinersianut tapisiaqartinneqassapput utoqqalinersialimmut kisimiittumut tunniunneqartut annertoqataannik, utoqqalinersiaqartoq aapparisaalu ukiumut katillugit 300.000 koruunit ataallugit, Inunnut Isumaginninnikkut isumannaallisaaneq pillugu Nunat Avannarliit isumaqatigiissutaat malillugu utoqqalinersiat pensionisiallu pinnagit, isertitaqartarpata. Utoqqalinersianut tapit utoqqalinersiallip aapparisaatalu isertitaanit toqqammaviusumik aningaasartaat 51 pct.-imik, kr. 183.000-nik ilanngaaserlugit, annikillisinneqassapput.”

2.  § 9, imm 2, imatut oqaasertalerneqassaaq:
“  Imm. 2.  Toqqammaviusumik aningaasartat ilanngaateqassapput, utoqqalinersiaqartup ukiumut isertitai maanna atuuttut, utoqqalinersiat aamma Inunnut Isumaginninnikkut isumannaallisaaneq pillugu Nunat Avannarliit isumaqatigiissutaat malillugu utoqqalinersiat ilanngunnagit, kr. 368.286 qaangerneqarsimappata.”

3.  § 9, imm. 3, imatut oqaasertalerneqassaaq:
“  Imm. 3.  Isertitanit toqqammavigineqartunit utoqqalinersiat toqqammaviusumik aningaasartaat 40 pct.-imik annikillisinneqassapput, tak. imm. 2, kr. 368.286-inik ilanngaaserlugit.”

4.  § 10, imm. 2, nr. 1, imatut oqaasertalerneqassaaq:
“1)  Utoqqalinersiaqartumut kisimiittumut kr. 156.000."

5.  § 10, imm. 2, nr. 2, imatut oqaasertalerneqassaaq:
“2)  Utoqqalinersiaqartumut aappaqartumut kr. 183.000, tak. § 5.”

6.  § 10, imm. 3, imatut oqaasertalerneqassaaq:
”  Imm. 3.  Utoqqalinermi pensionisianut tapeq ilanngaateqassaaq isertitat tunngavigineqartut 35 pct.-iannik, tak. imm. 2, kisimiittumut ilanngaatigalugit kr. 156.000 aamma isertitat tunngavigineqartut 22 pct.-iannik utoqqalinersialimmut aappaqartumut ilanngaatigalugit kr. 183.000, tak. § 5.”

7.  § 15, imm. 1, nr. 1, imatut oqaasertalerneqassaaq:
”1)  Meeqqanik inuusuttunillu ikiorsiisarneq pillugu inatsisartut peqqussutaat malillugu imaluunniit Meeqqat tapersersorneqarnissaannut Inatsisartut inatsisaat malillugu meeraq angerlarsimaffiup avataanut inissinneqarsimappat imaluunniit pisortanit 100 pct.-imik pilersorneqarpat,”

§ 2

Inatsisartut inatsisaat inatsisip tamanut saqqummiunneqarnerata aqaguani atuutilissaaq, taannalu 1. januar 2020 allarnerfigalugu utoqqalinersiat tunniunneqartarnissaannut atuutsinneqassaaq.

Namminersorlutik Oqartussat, ulloq 28. november 2019

Kim Kielsen