Kapitali 1

Avatangiisinut aningaasaateqarfiup siunertaa suliassaalu

  § 1. Avatangiisinut Aningaasaateqarfimmik, missingersuusiornikkut naatsorsuutitigullu teknikikkut aningaasaateqarfiusussamik, aningaasanullu inatsimmi immikkoortumik kontoqartussamik, pilersitsisoqassaaq.

  Imm. 2. Avatangiisinut Aningaasaateqarfiup siunertaraa, inuiaqatigiit iluanni piujuartitsisumik ineriartorneq nukittorsarneqassasoq, inuup inuunerani atugassarititaasut ataqqillugit, uumasut naasoqarnerlu atajuarsinnaaqqullugit, suliassaqarfiit § 2-mi eqqartorneqartut eqqarsaatigalugit.

Imm. 3.  Avatangiisinut aningaasaateqarfimmi aningaasaatissat makkuninnga pissarsiarineqassapput:

1) Avatangiisinut akitsuutinit il.il., nioqqutissat sulianilluunniit avatangiisinut immikkut nanertuutaasinnaasutut nalilerneqarsimasut akitsuusersorneqarnerinit isertitat.

2) Avatangiisinut akitsuutit aalajangersimasumik pissusilersortalernissamut siuarsaanissamik siunertaqartut.

3) Nunap Karsianit aningaasaliissutit.

  § 2. Avatangiisinut aningaasaateqarfiup isertitai avatangiisinut pitsanngorsaatissatut suliniutinut aningaasaateqarfiullu siunertaata iluani ingerlatanut atorneqassapput. Tapiisoqarsinnaavoq imatut ilusilimmik:

1) Suliassaqarfiup imalt. ingerlatassap avatangiisit pillugit akitsuuserneqarsimasup iluani nalinginnaasumik avatangiisinut pitsanngorsaanissaq siunertaralugu suliniutinut.

2) Avatangiisini nanertuinnginnerunissaq qulakkeerniarlugu atuisut akornanni akitsuuserneqarsimasut aalajangersimasumik pissusilersortarnissaat anguniarlugu.
  Imm. 2. Avatangiisinut aningaasaateqarfiup aningaasaatai ingerlatassanut, suliassanut makkununnga tunngassuteqartunut atorneqarsinnaapput:

1) Ikuallaaviit eqqagassanillu isumaginnittarnerit pilersinneqarnissaannut imaluunniit nutarternissaannut. 

2) Anartarfilerisarfinnik pilersitsineq imaluunniit nutarterineq.

3) Eqqakkanik inissiisarfinnik nakkutigisaasunik pilersitsineq.

4) Qamutinik motoorilinnik atorsinnaajunnaartunik passussineq, ilanngullugu isaterineq imaluunniit atoqqiineq.

5) Suliffeqarfiit, sullissiviit, inissiat imalt. asimi eqqakkanik passussineq.

6) Angallatinik qimatanik passussineq.

7) Aalisakkanut qassutinik igitanik allanillu imaani eqqakkanik passussineq.

8) Aalisartarfinnik piniariartarfinnillu eqqiluitsuutitsineq.

9)  Suliassat, innuttaasut aamma suliffeqarfiit isumalluutinik eqqumaffiginninnissaannut ajornarunnarsitsisussat imaluunniit ajornannginnerulersitsisussat.

  Imm. 3. Inuussutissarsiorlutik suliffeqarfinnut avatangiisitigut imalt. inuussutissarsiornikkut ingerlatanut unammilleqatigiinnermik equtitsisuusinnaasunut tapiissuteqartoqarsinnaanngilaq.

  § 3. Avatangiisinut aningaasaateqarfiup suliaqarnera, ingerlatanut aatsitassat pillugit ingerlatallu tamatumunnga pingaarutillit pillugit inatsisartut inatsisaanni pineqartunut ilaasunut, atuutinngilaq.

  § 4. Avatangiisinut akitsuutinut inatsisinit isertitat, takuuk § 1, imm. 3, nr. 1 aamma 2, akitsuummut inatsimmi allassimappat, taanna avatangiisinut akitsuutinut inatsisaasussatut siunertaqartoq, aammalu isertitat Nunap karsianut tutsinneqassasut akitsuummut inatsimmi pineqartumi tassani aalajangersimasumik aalajangersarneqarsimanngippat, siunertanut § 2-imi allassimasunut matussutissatut Avatangiisinut aningaasaateqarfimmut tutsinneqassapput.

Kapitali 2

Avatangiisinut aningaasaateqarfiup aqunneqarnera aamma allaffissornikkut aqutsineq

  § 5. Avatangiisinut aningaasaateqarfiup allaffissornikkut aqunneqarnera, Naalakkersuisut Siulittaasuanit isumagineqarpoq.

  Imm. 2. Naalakkersuisut Avatangiisinut aningaasaateqarfiup suliaqarnera pillugu nalunaarummik tamanut ukiut tamaasa saqqummiisassapput. Aningaasaateqarfiup naatsorsuutai Nunap Karsiata naatsorsuutaasa kukkunersiorneqarnerannut ilaatillugu kukkunersiorneqartassapput.

  Imm. 3. Naalakkersuisut Avatangiisinut aningaasaateqarfimmi tapersiissutinik tunniussisarneq aammalu aningaasaateqarfiup allaffissornikkut aqunneqarnera pillugit maleruagassanik erseqqinnerusunik aalajangersaasinnaapput.

Kapitali 3

Aalajangersakkat inaarutaasut

  § 6. Inatsisartut inatsisaat manna ulloq 1. januar 2019 atuutilerpoq.

Namminersorlutik Oqartussat, ulloq 27. november 2018