§ 1

Piginnaanngorsaaqqinnissamut ikiorsiisarneq pillugu Inatsisartut peqqussutaat nr. 4, 31. maj 2001-imeersumi, Inatsisartut peqqussutaat nr. 3, 1. juni 2006-ikkut allanngortinneqartumi imaattunik allannguisoqassaaq:

1.  § 4 sioqqullugu qulequtaq ima oqaasertalerneqassaaq:

”Qulaajaanermik ingerlatsineq aamma piginnaanngorsaaqqinneq”

2.  § 4 ima oqaasertalerneqassaaq:
”  § 4.  Piginnaanngorsaaqqinnissamik ingerlassaq aallartinneqartinnagu qinnuteqartoq qulaajaanermik ingerlassaqassaaq, tassani qinnuteqartup sulisinnaassusia qulaajarneqassalluni. 
  Imm. 2.  Qulaajaaniarluni ingerlassaq tassaavoq atuagarsornermik assassornermillu immikkoortortalik, qinnuteqartup tarnikkut timikkullu sulisinnaassusia qulaajarneqarluni.
  Imm. 3.  Qulaajaaniarluni ingerlassap nalaani qinnuteqartoq pisortanit manna tikillugu pilersugarisatut tunngavigisaminik pisinnaatitaavoq.
  Imm. 4.  Qulaajaaniarluni ingerlassat pillugit Naalakkersuisut malittarisassanik erseqqinnerusunik aalajangersaasinnaapput.”

 3.  § 15 ima oqaasertalerneqassaaq:
”  § 15.  Atugassarititani nalinginnaasuni qulaajaaniarluni ingerlassap nalaani, imaluunniit piginnaanngorsaanermik suliaqarnerup kingornatigut pineqartoq suliffimmik pissarsinissamik imaluunniit attassinissamik angusaqarsinnaanngitsoq paasineqarpat inuk eqaannerusumik suliffeqalersillugu atorfinitsinneqarsinnaavoq.
  Imm. 2.  Atugassarititani pissusissamisoortuni suliffeqareersimalluni inuup sulisinnaassutsimi ilaanik tassanngaannartumik annaasaqartoq sulisitsisoq peqatigalugu sioqqutsisumik piginnaanngorsaaqqinneq ingerlateqqaarnagu sulisitsisumi tassani eqaannerusumik suliffeqarnissamut qinnuteqarsinnaavoq.
  Imm. 3.  Inuit eqaannerusumik suliffeqartuusut minnerpaamik ukiut pingasukkaarlugit sulisinnaassusertik nalilerseqqittassavaat, taamaattorli takuuk imm. 4.
  Imm. 4.  Inuit 40-t sinnerlugit ukiullit, imaluunniit inuit nakorsamit nalunaarutikkut sulisinnaassusiat inaarutaasumik aalajangiiffiusimasut sulisinnaassusertik nalilerseqqissanngilaat.”

4.  § 16, imm. 3, ima oqaasertalerneqassaaq:
”  Imm. 3.  Aningaasarsianut tapiissutit ukiut tallimat tikillugit tapiissutigineqartarput.”

5.  § 16-imi imm. 3-p kingornatigut nutaatut ilanngunneqassaaq:
”  Imm. 4.  Inunnut 40-t sinnerlugit ukiulinnut atajuartumik sulisinnaassusiat annikillimasunut, takuuk § 15, imm. 4, aningaasarsianut tapiissutit atajuartunngortinneqarsinnaapput.”

§ 2

Inatsisartut inatsisaat 1. juli 2017-imi atuutilerpoq.

Namminersorlutik Oqartussat, ulloq 1. juni 2017

Kim Kielsen