§ 1

Ilinniagaqarnersiutit pillugit Inatsisartut inatsisaanni nr. 12, 22. november 2011-imeersumi imatut allannguisoqarpoq:

1.  Kapitali 4 atorunnaarsinneqarpoq.

2.  Kapitali 5-imut qulequtaq ima oqaasertalerneqarpoq:

”Ilinniarnermi taarsigassarsianik ernialersuineq akilersuinerlu”

3.  § 20 -p kingorna ikkunneqassaaq:
”§ 20 a.  Ilinniagaqarnersiutit attartukkat ernialersorneqarnerat aallartissaaq piffissamit ilinniagaqarnersiutinik akiliuteqarfiusumiit. 
  Imm. 2.  Ernialersuineq piffissami pineqartumi ilinniagaqarnersiutinit attartukkanit akiligassaalersimasut ernialernerattut pisassaaq. 
  Imm. 3.  Ernialersuineq tunngaveqassaaq erniamik atuuttumik pisortatigoortumik diskonto annertussusianik ilassuserlugu 1 procentimik, taamaattoq annertunerpaamik 5 procentimut, ilinniagaqartunut ilinniarnerminnik ingerlatsisunut.
  Imm. 4.  Ernialiineq pisassaaq ukiut tamaasa ulloq 31. december, imaluunniit piffissami akiitsut akilerneqarfianni.”

4.  § 25, imm. 2-mi kisitsisit  ”16-22” imatut allanngortinneqarput ”20-22”.

5.  § 29, imm. 1, imatut oqaasertalerneqassaaq:
”Namminersorlutik Oqartussanit ilinniagaqarnersiutinik pissarsisarneq ilutigalugu ilinniarnermi taarsigassarsinermi taarsigassarsiat akilersorneqarnissaannut, tamatuminnga qinnuteqarneq tunuliaqutaralugu, Namminersorlutik Oqartussat tapiissapput taarsigassarsisup § 30-mi piumasaqaatit naammassisimappagit. Ilinniagaqarnersiutinilli pisussaanani pissarsisimanerup ki-nguneranik ilinniarnermi taarsigassarsiat akilersorneqarnissaannut tapiissuteqartoqarsinnaanngilaq. tak. § 25.”

6.  § 31 imatut oqaasertalerneqarpoq:
”§ 31.  Tapiissutit 50 procentiussapput qinnuteqartup ukiumi akiliiffiusussami akilersimasaanit, apeqqutaassananilu akiliutigineqartut akiitsunut akilersuinerunersut imaluunniit erniaanersut.
  Imm. 2.  Imm. 1-imi akiliutip pineqartup saniatigut ilassutitut 50 procentinik tapiissuteqartoqaqqissinnaavoq, ilinniagaqartup ilinniarnini kingusinnerpaamik naammassiffissaa ukiumik ataatsimik qaangerlugu naammassisimappagu.
  Imm. 3.  Namminersorlutik Oqartussanut ilinniagaqarnersiutisianit akiitsut ilanngartsernissaannut tapiissutit pisassapput akiitsut tapiissutigineqartunik annikillinerisigut.
  Imm. 4.  Danskit naalagaaffiannut ilinniagaqarnersiutinut attartukkanut akiliutissatut tapiissutit danskit naalagaaffiannut tapiissutaasunik akiliinikkut pisassaaq.
  Imm. 5.  Naalakkersuisut qinnuteqartoqarnera tunngavigalugu imm. 2-mi aalajangersakkap saneqqunneqarnissaanut akuersissuteqarsinnaapput, ilassutitullu tapiissutinik 50 procentinik tunniussaqarsinnaallutik, ilinniagaqartup uppernarsarpagu kinguaattoorneq pissutissaqartoq, tamatumani aamma napparsimarulunneq, ilinniagaqartumut nammineq akisussaaffigitinneqarsinnaanngitsoq pineqarpat.”
  Imm. 6.  Naalakkersuisut malittarisassiorsinnaapput allanik 50 procentinik ilassutitut tapiissuteqaqqissinnaanermut piumasaqaataasussanik, imm. 2-mi aalajangersakkamik naammassinninngitsunut atuuttussanik.”

§ 2.

Inatsisartut inatsisaat ulloq 1. august 2016 atuutilersinneqarpoq, atuutissaarlu ilinniagaqartunut atuutsitsilernerup kingorna ilinniakkaminnik aallartitsisunut.
  Imm. 2.  Ilinniarnermi taarsigassarsiat Nunatta Karsianit aningaasalersorneqartut 1. august 2016 sioqqullugu taarsigassarsiaritinneqartut, taakku pillugit malittarisassat atuuttut naapertorlugit ernialersorneqassapput.
  Imm. 3.  Ilinniagaqartut 1. august 2016 nallertinnagu ilinniakkaminnik aallartitsisut ilinniarnermi taarsigassarsiaasa akilersorneqarnissaannut malittarisassat atuuttut naapertorlugit tapiissuteqartoqassaaq.

Namminersorlutik Oqartussat, ulloq 6. juni 2016

Kim Kielsen