Qitiusumik ingerlatsiviit suliassaat

§ 1.  Kommunit tamarmik illoqarfinni tamani kommunimiittuni suliffissanut, ilitsersuisarnernut pikkorissaqqinnernullu qitiusumik ingerlatsivinnik pilersitsissapput. 

  § 2.  Suliffissanut, ilitsersuisarnernut pikkorissaqqinnernullu qitiusumik ingerlatsiviit suliassaraat:
  1) Nuna tamakkerlugu akeqanngitsumik sullississallutik suliffeqarnerup ineriartortinneqarnissaanut, tamatumani aamma nukittorsassallugu sulisut piginnaasatigut ineriartornissaat aamma nunap iluani sumiiffinnut assigiinngitsunut nikilertortarnikkut nuttarsinnaanissaat.
  2) Sumiiffinni pineqartuni inuussutissarsiortunik suliffeqarnermi suliniutit pillugit suleqateqassallutik, aamma nunap immikkoortuini nunalu ataatsimut isigalugu. Aamma suliassaraat suliffissarsiortut sulisitsisullu akornanni attavilersuisuunissaq, atorfinititsisoqar-tarnissaanik siunertaqartumik.
  3) Suliffissarsiortunut suliffissanik innersuussisassallutik aamma sulisitsisunut inuussutissarsiutini assigiinngiiaartuni tamani sulisussanik innersuussisassallutik aamma suliffissanut atorfinnullu assigiinngiiaartunut tamanut. 
  4) Ilinniartitaanernut qinnuteqartunut siunnersuisassallutik qinnuteqartunillu allaffissornikkut aqutsinermik suliaqarlutik.  
  5) Meeqqat atuarfiat suleqatigalugu klassit annerit siunnersorneqartarnerannik ingerlatsisuussallutik.
  6) Suliffissaqarnikkut siunnersuinermik suliffissarsiortunut neqerooruteqartassallutik, inunnullu ataasiakkaanut iliuusissatut pilersaarusiortassallutik, suliffissaaleqisut pineqartut suleqatigalugit, suliffeqalivinnissamik siunertaqartumik.
  7) Suliffissaaleqisut pikkorissarneqarnerannut atatillugu inuussutissarsiutinut pikkorissartitsinernik innersuussisassallutik. Suliffissanut, ilitsersuisarnernut pikkorissartitsinernullu qitiusumik ingerlatsiviit ilinniagaqalernissamut imaluunniit suliffeqalernissamut piareersaataasunik pikkorissartitsinernik ingerlatsisinnaapput.
  8) Innuttaasunik suliffeqanngitsunik tulluarsaqatigiiaanut immikkoortitserisassallutik.
 9) Suliffissaaleqisut suliffissarsiuussisarnermi nittartakkamut paasissutissanillu nalunaarsuiffinnut allanut naleqquttunut nalunaarsortassallugit.

§ 3.  Suliffissanut, ilitsersuisarnernut pikkorissaqqinnernullu qitiusumik ingerlatsiviit suliffeerunnermi ikiorsiissutit aamma piginnaanngorsaaqqiinissamut tapiissutit aqutaraat, piginnaanngorsaqqittunut inunnullu suliffeerunnermi ikiorsiissutinik pisartagaqartunut tunniunneqartartut.
  Imm. 2.  Suliffissanut, ilitsersuisarnernut pikkorissaqqinnernullu qitiusumik ingerlatsiviit innuttaasut piginnaanngorsaaqqinnermi peqataasinnaasut suleqatigalugit piginnaanngor-saaqqinnissamut pilersaarummik suliaqartassapput.
  Imm. 3.  Suliffissanut, ilitsersuisarnernut pikkorissaqqinnernullu qitiusumik ingerlatsiviit nikilertortarnikkut nuunnissamut aningaasaliissutinik tapiiffigineqarnissamik qinnuteqaatit suliarisassavaat.
  Imm. 4.  Suliffissanut, ilitsersuisarnernut pikkorissaqqinnernullu qitiusumik ingerlatsiviit sulisitsisut sulisussanik avataaneersunik sulisoqarnissamut qinnuteqaataat suliarisassavaat.

Kommunalbestyrelsip suliassai

§ 4.  Kommunalbestyrelsip isumagissavaa suliffissanut, ilitsersuisarnernut pikkorissaqqinnernullu qitiusumik ingerlatsiviit sullinneqassasut siunnersortinit sulianillu ingerlatsisunit pisariaqartunik piginnaanilinnit, takuuk imm. 2, aammalu sullissineq ingerlanneqassasoq naleqquttunik avatangiisilimmik.
  Imm. 2. Siunnersuisarneq aamma sulianik ingerlatsineq suliarineqassapput ilinniartitaanernut aamma inuussutissarsiutinut siunnersuinermik ilinniagalinnit, Naalakkersuisunit akuerisaasunit, imaluunniit inunnit pineqartut assinginik piginnaaneqarnermik uppernarsaasinnaasunit. Kommunalbestyrelsimiit qinnuteqartoqarneratigut Naalakkersuisut akuerisinnaavaat Siunnersuisarneq sulianillu ingerlatsineq utaqqiisaasumik ingerlanneqarsinnaasoq inummit allatigut ilinniagaqartumit, siunnersorti pineqartoq aallartissimappat imaluunniit pilersaaruteqarpat ilinniartitaanernut siunnersortitullu Naalakkersuisunit akuerisaasumik ilinniagaqar-niarlugu.

§ 5.  Kommunalbestyrelsip qitiusumik suliffissanut, ilitsersuisarnernut pikkorissaqqinnernullu ingerlatsiviit kommunip suliassaanut allanut allaffissorneranullu attuumassuteqanngitsumik aningaasaqarnikkullu kiffaanngissuseqartumik Naalakkkersuisunut naammassisassanut isumaqatigiissuteqarneq tunngavigalugu ingerlatarissavai.
  Imm. 2.  Kommunalbestyrelse suliffissanut, ilitsersuisarnernut pikkorissaqqinnernullu qitiusumik ingerlatsiviit ingerlanneqarnerannut ilanngullugu ataatsimiititalianik siunnersuisussanik pilersitsisinnaavoq, inuussutissarsiortunit aamma suliffeqarnermi illuatungeriinnit peqataaffigineqartumik.
  Imm. 3.  Kommunalbestyrelsip isumagissavaa suliffissanut, ilitsersuisarnernut pikkorissaqqinnernullu ingerlatsivinnut tamanut suleqatigiinnermut aaqqissuussinermik ataatsimik pilersitsisoqartassasoq, suliffissanut, ilitsersuisarnernut pikkorissaqqinnernullu qitiusumik ingerlatsivimmiit, isumaginnittoqarfimmiit kiisalu meeqqat atuarfianniit peqataaffigineqartumik.

§ 6.  Kommunalbestyrelsip isumannaassavaa paasissutissat naleqquttut tamarmik suliffissanut, siunnersuisarnernut pikkorissaqqinnernullu qitiusumik ingerlatsiviit suliaminnik ingerlatsisinnaajumallutik pisariaqartitaat pissarsiarineqarsinnaassasut.

Nakkutilliineq

  § 7.  Naalakkersuisut suliffissanut, siunnersuisarnernut pikkorissaqqinnernullu qitiusumik ingerlatsivinnut nakkutilliisuupput.

  § 8.  Kommunalbestyrelsip Naalakkersuisunut nalunaarusiortassavai kisitsisit paasissutissat suliffissanut, siunnersuisarnernut pikkorissaqqinnernullu qitiusumik ingerlatsivinnut tunngasut. Kommunalbestyrelsip programmit Naalakkersuisut nalunaarusiortarnernut atugassanngortitaat atortassavai.
  Imm. 2.  Naalakkersuisut nalunaarusiortarneq pillugu ersarinnerusunik aalajangersagaliorsinnaapput.

Naammassisassanut isumaqatigiissut ingerlatsinermullu aningaasaliissutit

  § 9.  Naalakkersuisut kommunalbestyrelsimut naammassisassanut isumaqatigiissuteqassaaq, suliffissanut, siunnersuisarnernut pikkorissaqqinnernullu qitiusumik ingerlatsivinnut atatillugu. Naammassisassanut isumaqatigiissut aalajangersaassaaq suliffissanut, siunnersuisarnernut pikkorissaqqinnernullu qitiusumik ingerlatsivinni ersarinnerusunik anguniagassat pillugit.
  Imm.  2.  Naalakkersuisut kommunini ataasiakkaani suliffissanut, siunnersuisarnernut pikkorissaqqinnernullu qitiusumik ingerlatsivinnut aningaasaliissutaasunik kiffartuussinermi isumaqatigiissutsikkut annikillisitsisinnaapput, kommunalbestyrelsip kiffartuussinermut isumaqatigiissummi piumasaqaataasut naammassinngippagit.

 
Atuutilerfia

  § 10.  Inatsisartut inatsisaat atortuulissaaq ulloq 1. januar 2016.
  Imm. 2.  Ilutigisaanik atorunnaassapput § 5, imm. 1, imm. 3 aamma imm.5, kiisalu § 12 Suliffeqarnermi innersuussisarneq il.il. pillugit Inatsisartut inatsisaanni nr. 5, 8. juni 2014-imeersumi.
  Imm. 3. Malittarisassat Suliffeqarnermi innersuussisarneq il. il. pillugit Inatsisartut inatsisaat nr. 5, 8. juni 2014-imeersumi aalajangersagaasut atuutiinnarallassapput allanik taarserneqarnissami imaluunniit uani inatsimmi aalajagersakkanik tunngavilimmik imaluunniit Inatsisartut inatsisaat alla naapertorlugu atorunnaarsinneqarnissami tungaannut. 

Namminersorlutik Oqartussat, ulloq 9. december 2015

Kim Kielsen