Piniarneq aallaaniarnerlu pillugit Inatsisartut inatsisaanni nr. 12, 29. oktober 1999-imeersu­mi, Inatsisartut inatsisaat nr. 1, 16. maj 2008-meersukkut allanngortinneqartumi, § 6, § 12, § 13, imm. 1 aamma § 17, imm. 2 naapertorlu­git aalajangersarneqarput:

Atuuffia

 

§ 1.  Nalunaarut una Kalaallit Nunaata nunataani aalisarnikkullu oqartussaaffigisaani sunngiffimmi piniarnermut aallaaniarnermullu atuuppoq.
Imm. 2.  Nalunaarummi uumasut miluumasut timmissallu tamarmik pineqarput.

Akiliuteqartitsinerup aalajangersaavigineqarnera

 

§ 2.  Piniarnermut allagartanut akiliuteqartitsinermi akigititassap annertussusaa qaammatisiutit ukiuat naallugu Piniarnermut Naalakkersuisumit aalajangersarneqartassaaq, ukiup siuliani allaffissornikkut ingerlatsinermilu aningaasartuutit tunngavigalugit.
Imm. 2.  Sunngiffimmi aallaaniarniarsinnaanermut allagartap tunniunneqarneranut akiliutissaq annertussuseqarpoq 250 kr.-nik.

Sunngiffimmi piniarsinnaanermut aallaaniarsinnaanermullu akuersissuteqartarneq

 

§ 3.  Sunngiffimmi piniarnissamut aamma sunngiffimmi aallaaniarnissamut akuersissut innuttaasunut Kalaallit Nunaanni inuit nalunaarsorsimaffiannut nalunaarsorneqarsimasunut tunniunneqarsinnaavoq.
Imm. 2.  Kalaallit Nunaanni pinerluttulerineq pillugu inatsit naapertorlugu, sakkut ulorianartut inunnut 12-it inorlugit ukiulinnut tunniuteqqusaanngillat, tamanna naapertorlugu taamatut ukiutigut killigitaq ataallugu ukiullit piniarsinnaanermik allagartamik tunineqarsinnaanngillat.

 

§ 4.  Sunngiffimmi aallaaniarsinnaanermut allagartaq killissarititat inatsisini allani aalajangersarneqartut iluanni piniarnissamut aallaaniarnissamullu pisinnaatitsivoq.

Sunngiffimmi aallaaniarsinnaanermut allagartartaarniarluni qinnuteqaat

 

§ 5.  Sunngiffimmi aallaaniarsinnaanermut allagartamik qinnuteqarneq pisinnaavoq qinnuteqarnermi immersuiffissaq Piniarnermut Naalakkersuisoqarfimmit ilusilersugaq atorlugu kommunimut najugarisamut nassiunneqarneratigut imaluunniit Internet-imik aallaavilik atorlugu nassiunneqarneratigut.  
Imm. 2.  Piniarnermut allagartamik qinnuteqartumut itigartitsisoqartillugu, najugarisami kommunerisamit tamatuminnga qinnuteqartoq ilisimatinneqassaaq, Piniarnermut aallaaniarnermullu Inatsisartut inatsisaanni piumasarineqartut qinnuteqartumit naammassineqannginneri peqqutigalugu. Allakkatigut nalunaarutigineqarnerata assilinera Piniarnermut Naalakkersuisoqarfimmut nassiunneqassaaq.

Sunngiffimmi aallaaniarsinnaanermut allagartap atorsinnaassusia

 

§ 6.  Sunngiffimmi aallaaniarsinnaanermut allagartaq tassaavoq Piniarnermut Naalakkersuisoqarfiup giro atorlugu immikkut akiliiffissiaata akiliisimanermut uppernarsaatitaa.
Imm. 2.  Sunngiffimmi aallaaniarsinnaanermut allagartap tunniunneqarnerani akiliuteqartitsisoqassaaq, § 2 naapertorlugu.
Imm. 3.  Sunngiffimmi aallaaniarsinnaanermut allagartaq taamaallaat atuuppoq akiliisimaneq uppernarsarsimagaangat atuuttarlunilu qaammatisiutit ukiuat allagartap atuuffissaa naallugu. Akiliisimanermut uppernarsaat tassaavoq giro atorlugu akiliiffissami aningaaseriviup allakkeriviulluunniit naqitsisaa, webbank atorlugu akiliisimanermut uppernarsaat imaluunniit allatut iliorluni erseqqissumik qularnaatsumillu nalunaarsuineq, akiliiffissami akileqquneqartup akilersimaneranut uppernarsaataasoq.

 

§ 7.  Sunngiffimmi aallaaniarsinnaanermut allagartaq inummut piginnittumuinnaq tunngavoq allamullu tunniuteqqusaanani, tuneqqusaanani atukkiuteqqusaananiluunniit.
Imm. 2.  Sunngiffimmi aallaaniarsinnaanermut allagartaq piniarnermi aallaaniarnermilu ki­naassutsimut allagartamut atuuttumut ilanngullugu nassarneqartassaaq nakkutilliinermullu atatillugu politiit, piniarnermik aalisarnermillu nakkutilliisut, taakku ikiortaasa imaluunniit inuit tamatumunnga piginnaatitaasut piumasaqarnerisigut takutinneqartassalluni.

Pisanik nalunaaruteqartarneq

 

§ 8.  Sunngiffimmi aallaaniarsinnaanermut allagartalik kinaluunniit pisussaavoq pisat tamarmiusut nalunaarutigissallugit pissatat ilanngullugit. Pisanik nalunaarsuinissamut ukunani periarfissat marluusuni arlaat atorlugu nalunaarsuisoqassaaq:
1) Qaammatit naaneri tamaasa pisat naatsorsorneqartassapput. Ukiumut pisarisimasat kisitsisitaat imm. 2 naapertorlugu piffissap pisanik nalunaarsuiffiusussap naanerani pisanik nalunaarsuiffissamut Piniarnermut Naalakkersuisoqarfimmit suliarineqarsimasumut nuunneqassapput ukiumi pineqartumi oktobari ulluisa 15-iat tikitsinnagu utertinneqassallutik.
2) Internet-imik aallaavilik atorlugu pisat nalunaarsorneqassapput ukiumi pineqartumi oktoberip ulluisa 15-iat tikitsinnagu.
Imm. 2.  Piffissaq pisanik nalunaarsuiffiusussaq tassaavoq oktobarip ulluisa aallaqqaataanniit septembarip ulluisa 30-iannut.
Imm. 3.  Sunngiffimmi aallaaniarsinnaanermut allagartap nutaamik taarsernissaanut tunngaviussaaq pisanik nalunaarsuiffiup immersugaalluni nassiunneqarsimanissaa, imaluunniit imminut kiffartuusseriaaseq aqqutigalugu, imm. 1 naapertorlugu, Piniarnermut Naalakkersuisoqarfimmi nalunaarsorneqarsimanissaa.
Imm. 4.  Sunngiffimmi aallaaniarsinnaanermut allagartartaarnissamut qinnuteqaatit suliarineqassanngillat pisanik nalunaarsuiffik, piffissap pisanik nalunaarsuiffiusussaatitaaffimmi siuliani pisanik nalunaarsuiffimmik immersuiffissaq, imm. 2 naapertorlugu, immersorneqarluni nassiunneqarsimanngippat imaluunniit imminut kiffartuusseriaaseq aqqutigalugu nalunaarsorneqarsimanngippat.

Immikkut akuersissuteqartarneq

 

§ 9.  Piniarnermut Naalakkersuisoq nalunaarummi matumani maleruagassat immikkut saneqqunneqarnissaannut akuersissuteqarsinnaavoq tamanna ilisimatuutut misissuinerit pisariaqartilersippassuk.

Pineqaatissiissutit

 

§ 10.  Piniarneq aallaaniarnerlu pillugit Inatsisartut inatsisaanni piniarsinnaanermut aallaaniarsinnaanermullu piumasaqaatinik uanilu nalunaarummi § 7, imm. 1-imik 2-millu kiisalu § 8, imm. 1-imik unioqqutitsisut akiliisitsinikkut pineqaatissinneqarsinnaapput.
Imm. 2.  Piniarneq aallaaniarnerlu pillugit Inatsisartut inatsisaanni piniarsinnaanermut aallaaniarsinnaanermullu piumasaqaatinik aamma § 7, imm. 1-imik 2-millu unioqqutitsisoqartillugu pisat taakkuluunniit nalingat Kalaallit Nunaanni pinerluttulerinermik inatsit malillugu arsaarinnissutigineqarsinnaapput.

Atuutilerfia

 

§ 11.  Nalunaarut atuutilerpoq ulloq 1. januar 2015.
Imm. 2.  Tamatumunnga peqatigitillugu sunngiffimmi aallaaniarsinnaanermut allagartat pillugit Namminersorlutik Oqartussat nalunaarutaat nr. 17, 9. oktober 2012-imeersoq atorunnaarsinneqarpoq.

 

 

Namminersorlutik Oqartussat, ulloq 30. december 2014.

 

 

Karl-Kristian Kruse

/

Jørgen I. Olsen