Kapitali 1
Pingaarnerusutigut aalajangersakkat

Siunertaq

§ 1.  Inatsisartut inatsisaata matuma meeraq qitiutillugu, meeqqamullu angajoqqaatut oqartussaasut imaluunniit meeqqamik pilersuisuiusut suleqatigalugit, meeqqanut ataasiakkaanut suli atualinngitsunut pitsaanerpaamik ikorfartuinissaq qularnaassavaa, tassuunakkut meeqqap peqqissumik imaqarluartumillu inerikkiartornissaa qularnaarumallugu.

§ 2.  Inatsisartut inatsisaat manna naapertorlugu meeqqanut ulluunerani neqeroorutit siunertaraat:
1) meeqqap inuttut, piginnaasatigut aamma tarnikkut timikkullu pisinnaasaanut naleqqiullugu periarfissaasa tamakkiisumik inerikkiartortinnissaat,
2) meeqqap inuttut pisinnaatitaaffinnik aamma tunngaviusumik kiffaanngissuseqarnissamut pisinnaatitaaffinnik tunngavinnillu, Naalagaaffiit Peqatigiit Isumaqatigiissutaanni allassimasunik, ataqqinninneranik inerisaanissaq,
3) meeqqap angajoqqaaminut ataqqinninneranik, nammineq kulturikkut kinaassusianik, oqaasiinik pingaartitaanillu aamma nunami meeqqap najugaqarfiani nunamilu meeqqap kingoqqiffiani inuiattut pingaartitanut kulturinullu meeqqap nammineq kulturianit allaanerusunut ataqqinninnermik inerisaanissaq,
4) meeraq inuiaqatigiinni kiffaanngissuseqartuni akisussaalluni inooqataanissamut piareersassallugu, paaseqatigiinneq, eqqissineq, akaareqatigiinneq, suiaassutsikkut naligiissuseqarneq - inuiaat, ammit qalipaataasa, naalagaaffiit upperisallu akornanni naligiissuseq anersaaralugit, aamma
5) meeraq periarfississallugu misigisaqarnissamut sammisaqarnissamullu - meeqqap takorluuisinnaassusianik, pilersitsisinnaassusianik inerikkiartorneranillu kaammattueqataasunik aamma pinngortitamik ataqqinnilersissallugu.
Imm. 2.  Meeqqat suli atualinngitsut akornanni perorsaanikkut suliat, Inatsisartut inatsisaat manna naapertorlugu ingerlanneqartut tamarmik, angajoqqaatut oqartussaassuseqartut imaluunniit meeqqamik pilersuisuiusut meeqqamullu attaveqaataasut suleqatigalugit pissapput. Suliaq ingerlanneqassaaq atuarfimmut ikaarsaariarluarnissaq siunertaralugu piginnaasat tunngaviusut ilikkariartornissamullu kajumissutsip inerisarlugillu tapersersornerisigut, aamma meeqqap inooqatigiissutsikkut nalinginnaasumillu pisinnaasanik pigiliussiniarnerani kaammattuillunilu inerisaanikkut.

Nassuiaatit atuuffiillu

§ 3.  Perorsaanikkut ineriartuutaasumik ulluunerani meeqqanut neqeroorutit tassaapput neqeroorutit sammisaqartitsiviusut, meeqqanut perorsaanikkut anguniagalimmik ingerlatsiviusut, assersuutigalugu meeqqerivinni, angerlarsimaffimmi paarsisarfinni aamma angerlarsimaffimmi paarsisarfinni ataatsimoortitani ingerlanneqartut. Apeqqutaanngilaq ulloq naallugu imaluunniit ullup ilaa neqeroorutaanersoq.
Imm. 2.  Meeqqat suli atualinngitsut tassaapput meeqqat 0-miit 6-inut ukiullit, imaluunniit atuarfik pillugu inatsisiliorneq naapertorlugu atuartitaasussaatitaanerup aallartinnera tikillugu.
Imm. 3.  Meeqqat suli atualinngitsut immikkut ittunik pisariaqartitsisut Inatsisartut inatsisaannut matumunnga ilaapput.

Qullersaasutut akisussaaffik

§ 4.  Meeqqanut suli atualinngitsunut perorsaanikkut inerikkiartuutaasumik ulluunerani neqeroorutit Naalakkersuisut qullersaasutut nakkutigissavaat.
Imm. 2.  Naalakkersuisut makku isumagissavaat:
1) Suli atualinnginnermut tunngasut iluanni perorsaanikkut-tarnip pissusaasigut ilisimatusarneq.
2) Meeqqanut ulluunerani neqeroorutit nutaamik ilusillit inerisarnissaat, taakkununnga ilaallutik nunaqarfinni pissutsinut naleqqussagaasumik allaanerusumik meeqqanut ulluunerani neqerooruteqartarneq.
3) Perorsaasunik ilinniartitsinerit, taakkununnga ilaallutik najugaq qimannagu perorsaasunik ilinniartitsinerit.
4) Perorsaanermik ilinniagallit ilinniarteqqittarnerat ingerlaqqiffiusumillu ilinniartitaanerat.
5) Suliamik ilinniagaqanngitsunik allagartartaarutaasinnaasunik ilinniartitsinerit.
6) Kisitsisitigut paasissutissanik katersinissamut sakkussanik inerisaaneq.
7) Meeqqat peqqissusaasa, inerikkiartornerisa atualernissamullu piareersimassusiisa misissornissaannut sakkussanik inerisaaneq.
8) Meeqqerivinni perorsaanikkut sulinermut tunaartarisassanik inerisaaneq.
Imm. 3.  Inatsisartut inatsisaat manna naapertorlugu suliassamik isumaginissaannut pisariaqartutut isigineqartunik, Naalakkersuisut kommunalbestyrelsi paasissutisseeqqusinnaavaat, tamatumunnga ilanngullugit suliassat § 5, imm. 1-3-mi aamma § 14-imi taaneqartut. Paasissutissat assersuutigalugu tassaasinnaapput meeraaqqeriviit, meeqqeriviit angerlarsimaffimmilu paarsisartut amerlassusaat, ulluunerani neqeroorutini assigiinngitsuni tamani meeqqat aalajangersimasumik ukiullit amerlassusii, meeqqamut ataatsimut kvadratmeterit annertussusaat, inersimasumut ataatsimut meeqqat amerlassusaat, sulisut ilinniagaqassusiat, misiliinerit ingerlanneqarsimasut, soorlu atualeriaannaassutsimut tunngasut, misissuinerit pillugit paasissutissat, akuerisaanermut uppernarsaatit il.il. Tamatuma saniatigut paasissutissanut ilaassinaapput atuisut ataatsimoorfiisa ataatsimiinnerinit imaqarniliat, atuisut ataatsimoorfiisa aalajangiussaannik malitseqartitsinerit, sammisaqartitsinissamik neqeroorutit allat suussusii, meeqqat sammisaqartinneqartut amerlassusii, tamatumunnga ilanngullugit qanoq qaqugukkullu aamma kommunip aaqqissugaanera aamma meeqqanut inuusuttunullu politikkia.

§ 5.  Kommunalbestyrelsip pisussaaffigaa qularnaassallugu meeqqanut suli atualinngitsunut tamanut pisariaqartunik amerlassusilinnik ulluunerani neqerooruteqarnissaq.
Imm. 2.  Kommunalbestyrelsip meeqqanut ulluunerani neqeroorutit tamaasa nalinginnaasumik perorsaanermullu tunngatillugu nakkutigissavai, pisortat suliamut tamatumunnga naapertuuttut suleqatigalugit. Kommunimi angerlarsimaffimmi paarsisarfiit minnerpaamik ukiumut sisamariarluni nakkutilliilluni orninneqartassapput, taakkunanngalu minnerpaamik ukiumut ataasiarluni siumoortumik nalunaaqqaarani nakkutilliisoqartassalluni.
Imm. 3.  Aammattaaq kommunalbestyrelsip makku qullersaaffigalugit akisussaaffigai:
1) Kommunimi meeqqanut inuusuttunullu politikkiliornissaq.
2) Ulluunerani neqeroorutit ataasiakkaat perorsaanikkut ukiumoortumik pilersaarusiornissaat, taakkualu nalilernissaat, tak. § 16, imm. 2.
3) Nunaqarfinni meeqqanut ulluunerani neqeroorutit illoqarfimmilu ulluunerani neqeroorutit akornanni aalajangersimasumik attaveqartarnissaq, perorsaanikkut isumassarsioqatigiittarnissaq siunertaralugu.
4) Perorsaanikkut-tarnip pissusiisigut siunnersuineq isumagissallugu.
5) Meeqqanut tamanut mappimik pilersitsillunilu imaanik nutarteriuarneq, meeqqap malinnaaviginissaa siunertaralugu immikkullu pisariaqartitsilerluni iliuuseqarfigineqartariaqalissappat pilertortumik suliniuteqarnissaq tunngavissikkumallugu, soorlu meeqqap ilikkariartorneranut, inerikkiartorneranut imaluunniit inooqatigiissutsikkut ajornartorsiuteqarneranut tunngatillugu. Meeqqap mappia kingusinnerusukkut atualerluni atuarfittaavanut nuunneqassaaq, ulluuneranilu neqeroorutinit tamakkiisumik peerneqassalluni.
6) Meeqqap 3-nik ukioqalernerani peqqissusianik inerikkiartorneranillu 5-inillu ukioqalernerani atualernissamut piareersimassusianik pinngitsoorani misissuinissaq. Misissuineq ingerlanneqassaaq uuttuutit aamma malinnaanermut naliliinermullu sakkut Naalakkersuisunit inerisarneqartut tunngavigalugit.
Imm. 4.  Naalakkersuisut kommunalbestyrelsip kommunimi ulluunerani neqeroorutinik tamanik nalinginnaasumik perorsaanikkullu nakkutilliinera aamma pissutsit imm. 3, nr. 2-6-imi taaneqartut pillugit malittarisassanik aalajangersaasinnaapput.
Imm. 5.  Naalakkersuisut Nunatsinni Nakorsaaneq isumasioqatigalugu nappaatit tunillaassortut pinaveersaarnissaat pillugit malittarisassanik aalajangersaassapput.

Meeqqat ataasiakkaat pillugit suleqatigiinneq

§ 6.  Meeqqat ataasiakkaat pillugit attaveqatigiit ataqatigiissakkamik suleqatigiinnissaat qularnaarumallugu, kommunalbestyrelsit pisariaqartitsineq naapertorlugu suleqatigiinnik pilersitsissapput, ingerlatsiveqarfiit ataasiakkaat akimorlugit meeqqat ataasiakkaat pillugit toqqaannartumik suliaqartunik inuttalikkanik.
Imm. 2.  Suleqatigiit susassaqarfiit akimorlugit imm. 1 naapertorlugu suleqatigiinnerminnut atatillugu attaveqaatigiittut naapeqatigiittassapput, tamatumanilu meeqqap angajoqqaatut oqartussaasui imaluunniit pilersuisuiusut peqataatillugit, meeqqanut ataasiakkaanut siusissukkut iliuuseqarnissaq siunertaralugu.
Imm. 3.  Suleqatigiit pillugit Naalakkersuisut malittarisassanik aalajangersaasinnaapput.

Kapitali 2
Inissamik innersuussineq

§ 7.  Kommunalbestyrelsi kommunimi meeqqerivinnut angerlarsimaffimmilu paarsisarfinnut inissamik innersuussisarpoq.
Imm. 2.  Nalornisoqalersillugu kommunalbestyrelsip suliamik immikkut ilisimasallit pisariaqartitsineq naapertorlugu peqataatissinnaavai.

§ 8.  Kommunalbestyrelsip suliassaraa meeqqat 0-miit 2-nik ukiullit meeraaqqerivinnut kommunimilu angerlarsimafimmi paarsisartunut innersuunnissaat, meeqqallu 3-niik 6-inut ukiullit meeqqerivinnut kommunimilu angerlarsimaffimmi paarsisartunut innersuunnissaat.
Imm. 2.  Pissutsit allakkut ajornartitsinngippata kommunalbestyrelsip meeqqat 2-nik ukiullit meeqqerivinnut innersuussinnaavai.
Imm. 3.  Qinnuteqartut tamarmik inissaqanngippata kommunalbestyrelsip utaqqisut allassimaffiat pilersissavaa.

Tulleriiaarineq

§ 9.  Kommunimi meeqqeriviit imaluunniit angerlarsimafimmi paarsisarfiit inissaqalersillugit, kommunalbestyrelsi meeqqat utaqqisut akornanni toqqartuissaaq, kommunimi meeqqerivinnut imaluunniit angerlarsimaffimmi paarsisarfinnut naapertuuttumik ukiullit akornanni, ataani tulleriiaarinissamik innersuussutit malillugit.
1) Ataatsimoortut a: Meeqqat - isumaginninnermut ataatsimiititaliamit innersuunneqartut - immikkut perorsaanikkut pisariaqartitsinertik pissutsilluunniit allat meeqqap inerikkiartorneranik ulorianartorsiortitsisinnaasut pissutigalugit.
2) Ataatsimoortut b: Meeqqat meeraaqqerivinniit kommunimiluunniit angerlarsimaffimmi paarsisarfinniit meeqqerivinnut ukiutik pissutigalugit nuuttussat.
3) Ataatsimoortut c: Meeqqat suliffeqartunik imaluunniit ilinniartunik kisermaajusunik pilersuisueqartut.
4) Ataatsimoortut d: Meeqqat pilersuisuisuii tamarmik suliffeqartut imaluunniit tamarmik ilinniagaqartut.
5) Ataatsimoortut e: Meeqqat pilersuisuiusup aappaa suliffeqartoq imaluunniit angajoqqaap aappaa ilinniagaqartoq.
6) Ataatsimoortut f: Meeqqat pilersuisuii allallu, tassunga ilanngullugit kisimiittut, tamarmik suliffeqanngitsut imaluunniit ilinniagaqartuunngitsut.
Imm. 2.  Aappariit katinnikuunngikkaluarlutik aalajangersimasumik najugaqatigiittut, imaappoq aappariit minnerpaamik ukioq ataaseq najugaqatigiissimasut, meeraat angajoqqaatut oqartussaasut imaluunniit meeqqamik pilersuisuiusut katissimasut meeraattut isigineqassapput.
Imm. 3.  Kommunalbestyrelsip utaqqisut allassimaffianniit toqqartuinermini ilutigisaanik qularnaassavaa, meeqqeriviit ataasiakkaat meerartaasa - perorsaanikkut anguniagassat pissutigalugit - ukiumikkut naammaginartumik siammaassimanissaat, nviarsiaqqat nukappiaqqallu sapinngisamik amerlaqatigiinnissaat, aamma meeqqat immikkut ittumik pisariaqartitsisut imaluunniit tapersersorteqartut naammaginartumik siammaassimanissaat.
Imm. 4.  Illoqarfigisap nunaqarfigisalluunniit iluani meeqqerivimmut allamut aatsaat nuuttoqarsinnaavoq, tamanna meeqqap atugarissaarnissaanik peqqissusaanillu imaluunniit angallassinikkut pissutsit ajornakusoornerannik pissuteqarpat.

Kapitali 3
Meeqqeriviit

Meeqqerivinnut tamanut tunngasut

§ 10.  Meeqqeriviit tassaapput suliffeqarfiit, sulisut perorsaanikkut ilinniagallit perorsaanikkut anguniagaqartumik meeqqanik ataatsimoortunik sullissiffigisaat, avatangiiserisat meeqqat sulisullu pisariaqartitaannut naleqqussagaassallutik oqartussaasunillu naapertuuttunit akuerisaassallutik.
Imm. 2.  Meeqqeriviit kommunimit ingerlataasinnaapput imaluunniit tassaasinnaallutik suliffeqarfiit imminnut pigisut arfinilinnik amerlanernilluunniit meerartallit, kommunalbestyrelsimit ingerlatsineq pillugu isumaqatigiissuteqarfigineqarsinnaasut.

§ 11.  Meeqqeriviit pilersinneqassapput 0-imiit 2-nik ukiulinnut meeraaqqerivittut, 3-miillu 6-inut ukiulinnut meeqqerivittut, 0-imiit 6-inut ukiulinnut meeqqat ukiui naapertorlugit agguaassiviusumik meeqqerivittut.
Imm. 2.  Meeqqeriviit meeqqanut ataatsimoortunut agguaanneqassapput, meeqqerivinni meeqqat ataatsimoortut amerlanerpaamik 20-nik meerartaqarsinnaallutik, meeraaqqerivinnilu amerlanerpaamik 12-inik.
Imm. 3.  Meeqqat immikkut ittunik pisariaqartitsisut inissanik §§ 1-ip 2-llu anguneqarnissaannut pisariaqartunik, kommunalbestyrelsimit imaluunniit meeqqeriviup imminut pigisup siulersuisuinit aalajangiunneqartunik tunineqassapput – meeqqeriviup inassuteqareerneratigut. Meeqqat ataasiakkaat pillugit suleqatigiinnik, tak. § 6, pilersitsisoqarsimappat suleqatigiit aalajangiinermi peqataatinneqarsinnaapput.

Meeqqeriviit illutaannut piumasaqaatit

§ 12.  Meeqqeriviit tamarmik kommunalbestyrelsimit akuerisaassapput, taakku meeqqerivik nakkutigissavaat, akuersissutikkut pisariaqartut tamarmik pigineqarnissaat qularnaassallugu, meeqqeriviup nutaap, allanngortitap allineqartulluunniit atulinnginnerani.
Imm. 2.  Kommunalbestyrelsip nakkutigissavaa meeqqeriviup qaqugukkulluunniit inatsisit atuuttut naapertorlugit aaqqissugaanissaa.
Imm. 3.  Naalakkersuisut meeqqeriviit pilersinneri pisatsersornerilu pillugit malittarisassanik aalajangersaasinnaapput.

Meeqqeriviit akuerisaanerannut uppernarsaat

§ 13.  Meeqqeriviit tamarmik kommunalbestyrelsip pilersitaanik akuerisaanerminnut uppernarsaateqassapput, meeqqeriviup pisortaanit ersittumut nivinngarneqartumik.
Imm. 2.  Akuerisaanermut uppernarsaatip makku pillugit paasissutissat imarissavai:
1) Meeqqeriviup aqqa, najugaqarfia sumiiffialu.
2) Meeqqeriviup anguniagai meeqqanillu isiginneriaasia.
3) Meeqqeriviup pisortaa.
4) Kommunimi ataatsimiititaliaq attavigisaq imaluunniit meeqqeriviup imminut pigisup siulersuisui.
5) Inissat amerlassusaat.
6) Sulisut amerlassusaat.
7) Piffissat ammasarfiit.
8) Pisortanit naapertuuttunit akuersissutit, taakkununnga ilaallutik qatserisartutut oqartussaasunit, sanaartornermut oqartussaasunit kommunalbestyrelsimillu akuersissutit taakkualu ullui.
9) Meeqqeriviup ukiumoortumik pilersaarutaata sumi pissarsiarineqarsinnaanera taassumalu inatsisitigut tunngavigisai naapertuuttut pillugit paasissutissat.

Naliliineq uppernarsaasersuinerlu

§ 14.  Meeqqeriviup meeqqat ataasiakkaat inerikkiartornerat pillugu ataatsimoortumik naliliinikkut naliliinerit uppernarsaasersuinerillu ingerlaavartumik isumagissavai, meeqqallu inerikkiartornera minnerpaamik ukiumut marloriarluni allaaserisassallugu.
Imm. 2.  Meeqqap inerikkiartornera pillugu allaaserisat meeqqap pilersuisuii inuillu suliamik ingerlatallit naapertuuttut suleqatigalugit malitseqartinneqartassapput.
Imm. 3.  Meeqqeriviit pisussaaffigalugu minnerpaamik ukiumut marloriarlutik meeqqap pilersuisuiinik oqaloqateqartassapput meeqqap inerikkiartoqqinnerani suleqatigiinnissaq siunertaralugu.

§ 15.  Meeqqap suliffeqarfimmiit suliffeqarfimmut allamut nuunnerani meeqqerivimmi meeqqap qimataani sulisut meeraq pillugu paasissutissanik naapertuuttunik suliffeqarfimmut nuuffiusumut ingerlatitseqqittassapput meeqqap pisariaqartitai isumagineqaqqullugit.
Imm. 2.  Naalakkersuisut imm. 1 naapertorlugu paasissutissanik naapertuuttunik ingerlatsitseqqinneq pillugu malittarisassanik aalajangersaasinnaapput.

Meeqqeriviup pisortaa

§ 16.  Meeqqeriviup pisortaata perorsaanikkut allaffissornikkullu akisussaaffigaa, meeqqeriviup illersorneqarsinnaasumik malittarisassallu atuuttut naapertorlugit ingerlanneqarnissaa. Meeqqeriviup pisortaata sulisunut tunngasut aamma atuisut ataatsimoorfianni aalajangiussat taakkua innersuussutaat naapertorlugit piviusunngortinneqarnissaat akisussaaffigaa.
Imm. 2.  Meeqqeriviup pisortaata aammattaaq akisussaaffigaa, meeqqeriviup perorsaanikkut ukiumoortumik pilersaarusiornissaa aningaasaqarnikkullu missingersersuusiornissaa.
Imm. 3.  Meeqqerivinni kommunip ingerlassaani aamma meeqqerivinni imminnut pigisuni kommunalbestyrelsimit ingerlatsinissaq pillugu isumaqatigiissuteqarfigineqartuni missingersersuutit suliarineqassapput kommunalbestyrelsip malittarisassiai naapertorlugit. Meeqqerivinni imminnut pigisuni allani missingersersuutit suliarineqassapput siulersuisut malittarisassiaat naapertorlugit.

§ 17.  Meeqqeriviup pisortaata akisussaaffigaa meeqqat mappiannik pilersitsinissaq nutarteriuarnissarlu, tak. § 5, imm. 3, nr. 5, aamma meeqqat meeqqerivimmut allatseqqasut nalunaarsorsimanissaat, meeqqat aqqi, inuttut normui, angajoqqaatut oqartussaasut aamma meeqqamik pilersuisuiusut aqqi, meeqqallu aninerani tamatumunnga pissutaasoq ilanngullugit. Aammattaaq meeqqat takkunneri nalunaarsorneqassapput.
Imm. 2.  Meeqqeriviit kommunimit ingerlanneqartut aamma meeqqeriviit kommunalbestyrelsip ingerlatsinissaq pillugu isumaqatigiissuteqarfigisimasaasa meeqqat takkunnerinut nalunaarsuiffik ukiumoortumik perorsaanikkut pilersaarummik tapertaqartillugu kommunalbestyrelsimut nassiuttassavaat, piffissaliussap kommunalbestyrelsimit aalajangerneqartup iluani.

§ 18.  Atorfinitsitsisartutut oqartussaasup meeqqeriviup pisortaa allaffissornermik suliaqanngitsoortissinnaavaat, tak. §§ 16 aamma 17, meeqqeriviup aaqqissugaanerata ilusaata aamma meeqqerivimmi suliassat agguaannissaasa aaqqissugaanerata tamanna ajornartinngippagu, atorfinitsitsisartutullu oqartussaasup uppernarsisinnaappagu perorsaanikkut, allaffissornikkut pisortaqarnikkullu suliassat naammaginartumik isumagineqartut.

§ 19.  Meeqqeriviup pisortaa perorsaasutut ilinniagaqartuussaaq. Taamaattoq atorfinitsitsisartutut oqartussaasup, atorfik perorsaasutut ilinniarsimasumik inuttalerneqarsinnaanngippat, perorsaasutut ilinniagaqarnissamik piumasaqaat sanioqqussinnaavaat, atorfimmut qinnuteqartoq, naapertuuttumik ilinniagaqarnini imaluunniit ukiuni amerlasuuni inuutissarsiummik misilittagaqarnini tunuliaqutaralugit, atorfimmut piginnaaneqartutut isigineqarpat.
Imm. 2.  Meeqqeriviup pisortaa inini sulisut amerlassusissaattut alajangiussanut ilaanngilaq.
Imm. 3.  Meeqqerivinni kommunit ingerlassaanni meeqqeriviup pisortaa kommunalbestyrelsimit atorfinitsinneqassaaq, ataatsimiititaliamit atuisut ataatsimoorfiannit pilersinneqartumit inassuteqartoqareerneratigut, tak. § 21, imm. 2, nr. 6.

Meeqqerivinni kommunit ingerlassaanni sulisut amerlassusissaat

§ 20.  Meeqqat ataatsimoortut tamarmik, tak. § 11, imm. 2, minnerpaamik sulisorissavaat perorsaasoq 1, perorsaanermik ilinniarsimasoq 1 ikiortilu 1. Sungiusarlutik sulisut tapersersortaasullu sulisut amerlassusissaannut ilaatinneqanngillat.
Imm. 2.  Meeqqeriviup ammanerata nalaani tamatigut meeqqani ataatsimoortuni tamani minnerpaamik sulisut marluussapput, tamatigullu minnerpaamik perorsaasoq 1 meeqqerivimmiittassalluni.
Imm. 3.  Meeqqerivik pisariaqartitaminik igaffimmi eqqiaasutullu sulisoqassaaq.
Imm. 4.  Imm. 1-3-mi pineqartut aallaavigalugit kommunalbestyrelsip meeqqeriviit ataasiakkaat sulisuisa pisortap saniatigut amerlassusissaat aalajangissavaa. Kommunebestyrelsi minnerpaaffissatut piumasaqaat, tak. imm. 2, piviusunngortinneqarallarsinnaatinnagu piareersimanissamut pilersaarusiussaaq.

Meeqqerivinni kommunit ingerlassaanni atuisut ataatsimoorfiat

§ 21.  Meeqqerivinni kommuninit ingerlanneqartuni tamani pisortap minnerpaamik ukiumut pingasoriarluni atuisut ataatsimoorfiat ataatsimiigiaqqusassavaa, taakku tassaapput meeqqamik pilersuisuiit tamarmik meeqqerivimmilu sulisut.
Imm. 2.  Atuisut ataatsimoorfiata suliassarai
1) meeqqerivimmi sammisassanik imaluunniit suliniutinik siunnersuillunilu aaqqissuussineq - meeqqanut anguniagalimmik suliaqarnissamut aamma meeqqamik pilersuisuiusunut naleqqiullugu,
2) perorsaanikkut ukiumoortumik pilersaarutit suliarineranni peqataaneq,
3) perorsaanikkut ukiumoortumik pilersaarutit malitseqartinnerat,
4) pisatsersuinermut avatangiiserisallu allanngortinnissaannut tunngasunik siunnersuuteqarneq,
5) pissutsit meeqqat ulluinnarisaannut ersarissumik pingaaruteqartut pillugit aalajangiinerit aamma
6) meeqqeriviup pisortaata atorfinitsinnerani kommunalbestyrelsimut inassuteqartartussamik ataatsimiititaliorneq. Ataatsimiititaliaq meeqqerivimmi sulisut akornannit ataatsimiinnerni taaseqataasinnaatitaanngitsumik ilaasortaqartinneqassaaq.
Imm. 3.  Atuisut ataatsimoorfianni nalinginnaasumik amerlanerussuteqarneq naapertorlugu aalajangiisoqartassaaq. Kommunimi atuisut ataatsimoorfiisa ulluinnarni ingerlatsinerminni malittarisassaannik tamanut atuuttussamik kommunalbestyrelsi suliaqarsinnaavoq.
Imm. 4.  Atuisut ataatsimoorfiat pisariaqartitsineq naapertorlugu ataatsimiititaliaagallartussanik, atuisut ataatsimoorfiannut nalunaartartussanik, pilersitsisinnaavoq.
Imm. 5.  Atuisut ataatsimoorfiat ataatsimiinnerit tamaasa imaqarniliortassaaq, ataatsimiinnerup kingorna kommunalbestyrelsimut imaluunniit suliffeqarfiup imminut pigisup siulersuisuinut tunniunneqartumik.

Meeqqeriviit imminnut pigisut aqunneqarnerat

§ 22.  Meeqqerivinni imminnut pigisuni siulersuisunik qullersaallutik aqutsisuusussanik pilersitsisoqassaaq.
Imm. 2.  Meeqqerivinni imminnut pigisuni meeqqeriviup pisortaa siulersuisunit atorfinitsinneqassaaq. Siulersuisut sulisut allat atorfinitsinneqarneranni tunaartarisassanik aalajangersaassapput.

Kapitali 4
Angerlarsimaffimmi paarsineq

§ 23.  Angerlarsimaffimmi paarsisarfik tassaavoq perorsaanikkut kaammattuiffiusumik paarsinissamik neqeroorut ullup-unnuallu ilaa angerlarsimaffimmi meeqqap angerlarsimaffiginngisaani, imaluunniit tamanit katersuuttarfimmi ingerlanneqartoq.
Imm. 2.  Kommunip angerlarsimaffimmi paarsisarfia tassaavoq angerlarsimaffimmi paarsineq kommunimit pilersinneqarlunilu innersuunneqartoq, angerlarsimaffimmi paarsisartoq kommunimit atorfinitsinneqarlunilu akissaateqartinneqarluni.
Imm. 3.  Angerlarsimaffimmi paarsineq namminerisamik ingerlanneqartoq tassaavoq akilerneqarluni angerlarsimaffimmi paarsisarfik namminerisamik pilersinneqarlunilu ingerlanneqartoq. Namminerisamik angerlarsimaffimmi paarsisarfiit malittarisassat kommunip angerlarsimaffimmi paarsisarfiinut atuuttut maleruassavaat.

Angerlarsimaffimmi paarsisartunik angerlarsimaffinnillu paarsiffiusunik akuersineq

§ 24.  Angerlarsimaffimmi paarsisartut angerlarsimaffiillu paarsiffiusut taamaallaat meeqqanik paarsaqalersinnaapput, angerlarsimaffinni paarsisunik angerlarsimaffinnillu paarsiffiusunik kommunalbestyrelsi allakkatigut akuersippat.
Imm. 2.  Imm. 1 malillugu akuersinissamut piumasaqaataavoq angerlarsimaffimmi paarsisartoq timikkut tarnikkullu pillorissuussaaq aamma perorsaanikkut kaammattuutaasunik sammisaqartitsinernik neqeroornissaminut piginnaasaqassalluni. Angerlarsimaffimmi paarsisartup illoqatigiunnagaasalu tamarmik peqqissutsimut uppernarsaat qaammatinik pingasunik pisoqaanerunngitsoq takutissinnaassavaat.
Imm. 3.  Angerlarsimaffik paarsiffissatut akuerineqarsinnaanngilaq, angerlarsimaffimmi paarsisartoq illoqataaluunniit ukiut kingulliit marluk ingerlaneranni ilaqutariissutsimut tunngasuni, kinguaassiuutitigut ileqqorissaarnissamut aamma inuunermut timimullu pinerluuteqarsimasutut eqqartuussaasimappata imaluunniit angerlarsimaffimmi tunillaassuuttumik nappaateqartoqarpat.
Imm. 4.  Angerlarsimaffimmi paarsineq tamanit katersuuttarfimmi pippat imm. 2-mi naggatit aappaanni aamma imm. 3-mi aalajangersakkat taamaallaat paarsisartumut atuutissapput.
Imm. 5.  Namminerisamik angerlarsimaffik imaluunniit tamanit katersuuttarfik meeqqanik paarsisarfissatut akuerineqartinnagu, kommunalbestyrelsip illutaasut nalileqqaassavai.
Imm. 6.  Kommunalbestyrelsip nalilerpagu angerlarsimaffimmi paarsisartutut angerlarsimaffiilluunniit paarsiffiusut akuerineqarsinnaanerannut tunuliaqutaasut peeruttut, akuersineq atorunnaarsinneqassaaq.

Angerlarsimaffimmi paarsinermik innersuussineq

§ 25.  Meeqqanik suli atualinngitsunik katillugit sisamanik angerlarsimaffimmi paarsiumalluni qinnuteqartoq kommunalbestyrelsimit akuerineqarsinnaavoq. Angerlarsimaffimmi paarsiffiusumi ataatsimi nammineq meeqqat 6 inorlugit ukiullit meeqqallu paarisat tallimat qaangissanngilaat.
Imm. 2.  Angerlarsimaffimmi paarsisoq amerlanernik paarisaqarsinnaavoq imaluunniit angerlarsimaffimmi paarsisartumut allamut taartaasinnaavoq piffissami killilimmi, isumaqatigiissut naapertuuttoq naapertorlugu.

Angerlarsimaffinni paarsisartuni kommuninit ingerlassani atuisut ataatsimoorfiat

§ 26.  Angerlarsimaffimmi paarsisarfinni tamani angerlarsimaffimmi paarsisartoq minnerpaamik ukiumut pingasoriarluni atuisut ataatsimoorfiannik ataatsimiigiaqqusisassaaq. Atuisut ataatsimoorfiannut ilaapput meeqqamik pilersuisuiit tamarmik aamma angerlarsimaffimmi paarsisartoq. Illoqarfimmi nunaqarfimmiluunniit ataatsimi angerlarsimaffimmi paarsisartut arlaqarpata, angerlarsimaffimmi paarsisarfiit tamarmik ataatsimoorlutik atuisut ataatsimoorfiannik pilersitsisinnaapput.
Imm. 2.  Atuisut ataatsimoorfiata suliassarai
1) angerlarsimaffimmi paarsiffimmi sammisassanik imaluunniit suliniutinik siunnersuillunilu aaqqissuussineq - meeqqanut anguniagalimmik suliaqarnissamut aamma angajoqqaatut oqartussaasunut imaluunniit meeqqamik pilersuisuiusunut naleqqiullugu,
2) angerlarsimaffimmi paarsiffimmi pissutsit meeqqat ulluinnarisaannut ersarissumik pingaaruteqartut pillugit aalajangiinerit.
Imm. 3.  Atuisut ataatsimoorfianni nalinginnaasumik amerlanerussuteqarneq naapertorlugu aalajangiisoqartassaaq. Kommunimi atuisut ataatsimoorfiisa ulluinnarni ingerlatsinerminni malittarisassaannik tamanut atuuttussamik kommunalbestyrelsi suliaqarsinnaavoq.
Imm. 4.  Atuisut ataatsimoorfiat pisariaqartitsineq naapertorlugu ataatsimiititaliaagallartussanik pilersitsisinnaavoq, atuisut ataatsimoorfiannut nalunaartartussamik.

Kapitali 5
Sammisaqartitsinissamik neqeroorutit allat

§ 27.  Kommunalbestyrelsi meeqqanut suli atualinngitsunut sammisaqartitsinissanik allanik neqerooruteqassaaq, sumiiffinni ataasiakkaani kissaatigisat pisariaqartitsinerillu tunuliaqutaralugit. Sammisaqartitsinissamik neqeroorutinut allanut peqataanermut akileeqqusisoqassanngilaq.
Imm. 2.  Sammisaqartitsinissamik neqeroorutit allat tassaapput piffissap ilaa neqeroorutit, meeqqanut suli atualinngitsunut inersimasumik ilaqartunut saaffiginnittut, meeqqap inerikkiartorfissaasa ataatsip arlallilluunniit iluanni anguniagaqartumik sammisaqartitsinermik imaqartut.
Imm. 3.  Sammisaqartitsinissamik neqeroorutit allat pilersinnissaat aallartinnissaallu siunertaralugu ataqatigiissaarisussamik toqqaanissaq kommunalbestyrelsip pisussaaffigaa. Ataqatigiissaarisup sumiiffinni ataasiakkaani peqatigiiffiit, inuit isumalluutigineqarsinnaasut suliamillu ilisimasallit naapertuuttut allat suleqatigissavai.

Kapitali 6
Aalajangersakkat tamanut atuuttut

Aningaasalersuineq

§ 28.  Meeqqerivinnut, angerlarsimaffinni paarsisarfinnut aamma sammisaqartitsinissamik neqeroorutinut allanut Inatsisartut inatsisaat manna naapertorlugu ingerlanneqartunut aningaasartuutit kommuninit akilerneqassapput, taamaattoq tak. § 29.
Imm. 2.  Namminersorlutik Oqartussat meeqqeriviit pilersinnerinut tapiissuteqarsinnaapput.

§ 29.  Kommunalbestyrelsi kommunimi meeqqat suli atualinngitsut ulluunerani neqeroorutiniinnerinut akileeqqusisinnaavoq malittarisassat Naalakkersuisunit aalajangersarneqartut naapertorlugit, tak. imm. 3. Akiliutissaq aalajangerneqassaaq, kommunimi meeqqanut suli atualinngitsunut ulluunerani neqeroorutinut kommunip aningaasartuutai akiliisussaatitaasullu aningaasaqarnikkut atugarisai imaluunniit atugarisaat tunngavigalugit.
Imm. 2.  Meeqqanut suli atualinngitsunut kommunini ulluunerani neqeroorutinik atuinermut akiliisussaatitaaneq meeqqat pilersorneqarneranik isumaginnittumiippoq. Meeraq angajoqqaami arlaanni najugaqarpat, taannalu katissimappat, nalunaarsukkamik aappaqartuuppat imaluunniit minnerpaamik ukiumik ataatsimik sivisussusilimmik katissimanermut assingusumik aalajangersimasumik inooqateqarpat, angajoqqaajusoq taassumalu aalajangersimasumik inooqataa akiliisussaatitaasutut isigineqassapput.
Imm. 3.  Naalakkersuisut, tak. imm. 1 aamma 2, meeqqat meeqqanut suli atualinngitsunut kommunip ulluunerani neqeroorutaaniinnerinut akiliutissat pillugit malittarisassanik aalajangersaassapput, tamatumunnga ilanngullugit isertitanut naleqqussaanerit, akiliutissanik kinguaattoortoqartillugu meeqqamik anisitsisinnaaneq, aamma kommunimi meeqqanut ulluunerani neqeroorutinik atorunnaarsitsineq nalunaaruteqartarnerlu pillugit aalajangersakkat.

Misileraalluni aaqqissuussinerit

§ 30.  Kommunalbestyrelsip inassuteqareerneratigut, Naalakkersuisut kommunini meeqqanut suli atualinngitsunut ulluunerani neqeroorutinik misileraalluni aaqqissuussinerit akuerisinnaavaat.
Imm. 2.  Kommunimi misileraalluni aaqqissuussineq sivisunerpaamik ukiuni pingasuni atuussinnaavoq.
Imm. 3.  Kommunimi misileraalluni aaqqissuussinermut atatillugu, tak. imm. 1, ukiut tamaasa nalunaarusiortoqartassaaq Naalakkersuisunut tunniunneqartussamik.

Maalaaruteqarsinnaaneq

§ 31.  § 9 aamma § 24 naapertorlugit kommunalbestyrelsip aalajangiineri Inunnik Isumaginninnermi Maalaaruteqartarfimmut maalaarutigineqarsinnaapput, Inunnik isumaginninnerup aqunneqarnera aaqqissugaaneralu pillugu Inatsisartut peqqussutaanni aalajangersakkat naapertorlugit.
Imm. 2.  Inatsisartut inatsisaanni matumani aalajangersakkat allat naapertorlugit kommunalbestyrelsip aalajangiineri ingerlatsinikkut oqartussanut allanut maalaarutigineqarsinnaanngillat.
Imm. 3.  Inatsisartut inatsisaat manna naapertorlugu malittarisassaliat naapertorlugit kommunalbestyrelsip aalajangiineri ingerlatsinikkut oqartussanut allanut maalaarutigineqarsinnaanngillat.

Atuutilersitsineq

§ 32.  Inatsisartut inatsisaat manna atuutilissaaq 1. januar 2013.
Imm. 2.  Ilutigisaanik atorunnaarsinneqarpoq Meeqqanut suli atualinngitsunut perorsaanikkut inerikkiartuutaasunik ulluunerani neqerooruteqartarneq pillugu Inatsisartut peqqussutaat nr. 10, 5. december 2008-meersoq.
Imm. 3.  Sunngiffimmi sammisaqartitsinerup aaqqissugaanera pillugu Inatsisartut inatsimmik atuuttuulersitsinissaasa tungaannut kommunalbestyrelsip suli pisussaaffigivaa meeqqat 7-iniik 15-inut ukiullit fritidshjemminut innersuuttarnissaat, tak. § 8, imm. 1. Kommunalbestyrelsi utaqqisunut allassimaffiliussappat meeqqat taakku ataatsimoortunut b-nut ilanngunneqassapput, tak. § 9, imm. 1, nr. 2.
Imm. 4.  Inatsisartut peqqussutaat imm. 2-mi taaneqartoq naapertorlugu aalajangersakkat atuuttuulersinneqarsimasut imaluunniit suli atuutsinneqartut imaluunniit Inatsisartut inatsisaat alla tunngavigalugu taarserneqarnissamik atorunnaarsinneqarnissamilluunniit tungaanut atuutissapput.

Namminersorlutik Oqartussat, 3. december 2012.

Kuupik Kleist