Aalisarneq pillugu Inatsisartut inatsisaanni nr. 18-imi, 31. oktober 1996-imeersumi, ilaatigut Inatsisartut inaatsisaatigut nr. 5, 21. maj 2002-mi allanngortinneqartumi, kingullermillu Inatsisartut inatsisaatigut nr. 17, 3. december 2009-imeersukkut allanngortinneqartumi, § 10a, § 23, imm. 1, § 33, imm. 2 aamma imm. 3 aamma imm. 4, aamma § 34 naapertorlugit aalajangersarneqarpoq: 

§ 1.  Nalunaarut imartamut Kalaallit Nunaata aalisarnikkut oqartussaaffigisaanut atuuppoq.

Nassuiaatit

§ 2.  Nalunaarummi matumani "tunngaviusumik killeqarfiit" Kalaallit Nunaata imartaasa killeqarnissaannik peqqussummi, kunngip peqqussutaatigut normu 1004-kkut, 15. oktober 2004-meersukkut allannguuteqartitaanerannik aalajangersakkat naapertorlugit tunngaviusu- mik killeqarfittut paasineqassapput.

§ 3.  ”Kitaa” paasineqassaaq NAFO-p imartaata ilaa 1, Kalaallit Nunaata aalisarnikkut oqartusaaffigisaaniittoq. ”Tunu” paasineqassaaq ICES-ip imartaasa ilai II, V, XII aamma XIV, Kalaallit Nunaata aalisarnikkut oqartussaaffigisaaniittut.

§ 4.  Nalunaarummi sumiiffiit pineqartut WGS84 naapertorlugu nalunaarneqarsimapput, imartat assinginut Kalaallit Nunaannut atuuttunut iluarsiissutinut naapertuullugit.

§ 5.  Nalunaarummi matumani angallatip usitussutsimut killigititamik qaangiisimanermut ataassisimaneranulluunniit aalajangiisuussaaq usitussutsip angallatip uuttuutaanut uppernarsaammi (målebrev) allassimanera, uuttueriaatsit pillugit maleruagassat sorliit angissusaanut uuttuummik atulersitsinermut tunngaviliisuusimanersut apeqqutaatinnagit.

Nigartaqqortussutsit uuttuutaasa minnerpaaffissaat

§ 6.  Nalunaarummi matumani nigartaqqortussuseq najoqqutarineqartoq tassaavoq nigartap tamakkerluni iluatungimigut nerutussusiata uuttuutaa, taamaattorli saattuanut pullatit nigartat angissusiat uuttorneqassaaq nigartat affaannut uuttorlugit. Qalorsuarni nigartaqqortussuseq qalorsuit ilaannut tamanut atuuppoq. Nigartat sanerai sisamat tamarmik takeqqatigiilluinnartut sananeqaammik assigiimmik qilernernik sisamanik aalajangikkat kisimik atorneqarsinnaapput. Uanili pineqanngilaq ammassanniarneq tamatumani atorneqarsinnaammata, nigartat arfinilinnik takeqqatigiinnik sanerallit assigiimmik sananeqaatillit.

§ 7.  Aalisakkanik imm. 2-miit 11-mut taaneqanngitsunik aalisarnermi  nigartaqqortussutsimut 140 mm-it minnerpaaffissatut atuupput.
Imm. 2.  Kinguppanniarnermi qaluni nigartaqqortussutsimut 40 mm-it minnerpaaffissatut atuupput.
Imm. 3.  Eqalukkanik, putooruttunik, ammassannik, qaleruaqanngitsunillu aalisarnermi qassutini nigartaqqortussutsimut 16 mm-it minnerpaaffissatut atuupput.
Imm. 4.  Ammassassuarnik makrelinillu aalisarnermi qassutini nigartaqqortussutsimut 32 mm-it minnerpaaffissatut atuupput.
Imm. 5. Saarullernanik aalisarnermi qassutini nigartaqqortussutsimut 35 mm-it minnerpaaffissatut atuupput. 
Imm. 6.  Pullasersorluni saattuarniarnermi nigartaqqortussutsimut 70 mm-it nigartat affaannut uuttorlugit minnerpaaffissatut atuupput. 
Imm. 7.  Qassusersorluni arnarlunniarnermi qassutini nigartaqqortussutsimut 260 mm-it minnerpaaffissatut atuupput.
Imm. 8.  Qalorsuarnik ikerinnarsiutinik suluppaagarniarnermi qaluni nigartaqqortussutsimut 100 mm-it minnerpaaffissatut atuupput. Taammaattoq takuuk § 9, imm. 9.
Imm. 9.  Qassusersorluni eqalunniarnermi qassutini nigartaqqortussutsimut 100 mm-it minnerpaaffissatut atuupput.   
Imm. 10.  Qassusersorluni qaleralinniarnermi qassutini nigartaqqortussutsimut 220 mm-it minnerpaaffissatut atuupput.
Imm. 11.  Qalorsuarsuit atorlugit qaleralinniarnermi qalorsuit taliisa ataatungai 100 mm-inik nigartaqqortussuseqassapput. Qalorsuit sinneri 140 mm-inik nigartaqqortussuseqassapput.
Imm. 12.  Aalisarnermi atortut imm. 2-miit 11-mut naapertorlugit atorneqartunit nigartakinnerusut angallammiitinneqassanngillat qajannaarlugit aalajangerneqarsimanngikkunik imatullu ittujaarneqarsimanngikkunik ajornanngitsumik tigullugit atorneqarsinnaajunnaarlugit.

Nigartaqqortussutsit uuttorneqartarnerat

§ 8.  Qassutini nigartaqqortussutsit nalunaarummut matumunnga ilanngussani allassimasutut aalajangersarneqassapput.

Atortut qassutinut/qalorsuarnut aalajangikkat

§ 9.  Raajarniarnermi immikkoortiterissutit atorneqassapput annerpaamillu paakkarutai 22 mm-inik akuttussusillit. Immikkoortiterissutit aalajangersimasumik iluseqassapput sananeqaataallu allanngujaatsuussalluni, aamma ima ikkunneqassallutik aalisakkanik saniatigut pisanik sapinngisamik pitsaanerpaamik immikkoortiterisoqarsinnaanngorlugit. Immikkoortiterissutini paakkarutit akuttussusissaat nalunaarummut matumunnga ilanngussami taaneqartutut aalajangersarneqarput.
Imm. 2.  Nigartaqqortussutsit pillugit § 7-imi aalajangersakkat apeqqutaatinnagit atortulersuutit imm. 5-miit 7-mut taaneqartut qalorsuit qulaatungaannut taamatuttaaq ataatungaannut ikkunneqarsinnaapput nungullarsaaneq annikillilerniarlugu aamma/imaluunniit qalorsuit ninngunerulersinniarlugit.
Imm. 3.  Raajanut qalorsuit assakaasorsuinik nikittartunik minnerpaamik 72 cm-inik kalunnernik nivingatalinnik ikkussiffigineqarsimassapput. Assakaasorsuit aalajangikkat 1. april 2012 tikillugu akuerisaapput aamma ullup taassuma kingornatigut assakaasorsuarnik kaavittunnik taarserneqassapput. 
Imm. 4.  Raajanut qalorsuarnut atatillugu bobbins-inik atuineq inerteqqutigineqarpoq. Taamaattoq ajornartitaanngilaq qalorsuit ammanerisa saneraanni assakaasorsuarnik nikerarsinnaasunik sisannillu ujarattalinnik (stålbobbin) atuinermik aallartitsinissaq unitsitsinissarlu, soorluttaaq ajornartitaanngitsoq assakaarsorsuit akornini takissutsini tamani ujarattamik sisammik (stålbobbin) ataatsimik ikkussisarnissaq. Ujarattat ulamertut sisaat ikuttat qitermikkut sanimut napillugut silissutsimikkut uuttuutaat assakaasorsuit ikkutat uuttueqatigissavaat. 
Imm. 5.  Atortup affaani kingullermi qalussianik qajannaallisaatinik ataasiinnavinnik ikkussisoqarsinnaavoq. Qalussiat qajannaallisaatit nigartaat minnerpaamik aqajaruata ilorliup nigartaannit marloriaammik annertussuseqassapput. Qalussiat qajannaallisaatit kaajallallugit nigartussusiat aqajaruata ilorliup kaajallallugu nigartussusianit annerussaaq.
Imm. 6.  Atortut suugaluartulluunniit (tingerlaatissiaq, allungiartorfissiat, qalussiat) qalorsuit ataannut affaannut kingullermut ikkunneqassapput. Nungullarnaveeqqutit sukkulluunniit qalorsuit kaajallallugit 50%-iat sinnerlugu qallersimassanngilaat.
Imm. 7.  Qalorsuarnik immap natersiutinik aalisarnermi nungullarnaveeqqutit manngertut qajannaatsumik sananeqaatillit, soorlu nersussuup amianik, qalorsuit aqajaruanni kivitsissutip ataani allinngorlugit ilorlinngorlugit ikkunneqassapput. Ujaqqanut nungullarnaveeqqutit annerpaamik 4m² –nik angissuseqassapput, qalorsuit aqajaruat ataaseq atorneqarpat aamma  2m² –nik qalorsuit aqajarui marluk atorneqarpata.
Imm. 8.  Rundstroppit qajannaallisaatitut qalorsuit ilaannut atorneqarpata taakkua qalorsuit kaajallallugit annerpaamik 60%-ianit naannerussanngillat. (Uuttuut: nigartat amerlassusii nigartussutsimik amerlisarlugu). Rundstroppit taamaattut akornanni akuttussuseq minnerpaamik 1 meteriussaaq. Rundstroppit taamatullu qalussiat qajannaallisaatit (aqajarua qalleq) ataatsikkut atorneqarpata rundstroppit aqajaruanut ilorlermut taamaallaat ikkunneqarsinnaapput.
Imm. 9.  Qalorsuarnik ikerinnarsiutinik suluppaagarniarnermi rundstroppit qajannaallisaatitut qalorsuit ilaannut atorneqarpata taakkua qalorsuit kaajallallugit annerpaamik 40%-ianit  naannerunngitsut atorneqarsinnaapput (uuttuut: nigartat amerlassusii nigartussutsimik amerlisarlugu). Rundstroppit taamaattut akornanni akuttussuseq minnerpaamik 1 meteriussaaq.  Rundstroppit taamatullu qalussiat qajannaallisaatit (aqajarua qalleq) ataatsikkut atorneqarpata rundstroppit aqajaruanut ilorlermut taamaallaat ikkunneqasarsinnaapput. Rundstroppit qajannaallisaatitut qalorsuit ilaannut atorneqartut qalorsuit kaajallallugit 60 %-ianit naannerit atorneqartillugit nigartaqqortussutsimut 140 mm-it minnerpaaffissatut atuupput.
Imm. 10.  Atortussat imm. 5-miit 9-mut taaneqanngitsut atorneqaqqusaanngillat.

3 sømilit iluanni aalisarnissamut inerteqqutit

§ 10.  Imartami sinerissap aamma tunngaviusumik titarnerit avataanni 3 sømilinik avasinnerusup akornanniittuni inerteqqutit makku atuupput:
1) Uiluinniarluni aalisarneq eqqaassanngikkaanni angallatinut angallatip uuttuutaanut uppernarsaat naapertorlugu 75 BRT/BT 120-mik taannaluunniit akimorlugu angissusilinnut aalisarneq inerteqqutaavoq.
2)Taamaattoq nr. 1-imi kujataani Kap Farvelip avannaanilu Kap Møstingip akornanni imartami (63^o37'N) tamaani tunngaviusumik titarneq tikillugu aalisartoqarsinnaalluni. Imartami 61^o49,6'N-p aamma 62 ^o 51,9'N-p akornanni (Timmiarmiut eqqaanni kangerliumanermi) aammattaaq tunngaviusumik titarnerup iluani aalisartoqarsinnaavoq.
3) Ungusiniutit qalorsuilluunniit atorlugit saarullinniarneq, suluppaagarniarneq, nataarnarniarneq, qaleralinniarneq qeerarniarnerlu angallatinut tamanut inerteqqutaavoq.
Imm. 2.  Aalisarnermut Piniarnermut Nunalerinermullu Naalakkersuisoq imm. 1, nr. 1-imi aalajangersakkat saneqqunneqarnissaannut akuersissuteqarsinnaavoq sinerissami imartanut angallatinik mikinerusunik aalisarfiunngitsunut aamma anginerusunik angallateqarluni aalisarneq tamaani sinerissamut qanittumi aalisarnerup ineriartortinneqarneranut ajoqutaasinnaassanngippat.  

Sumiiffinni aalajangersimasuni aalisaqqusaannginneq

§ 11. Kalaallit Nunaata kitaani sumiiffiup 64° 10' N aamma 65° 15' N akornanni sinerissamiit aalisarnikkut oqartussaaffiup tunngaviusumik killingata avataani 3 sømili tikillugu qalorsuit immap naqqasiutit aalisarnermiluunniit atortut allat immap naqqanut tuttartut atorlugit aalisarneq inerteqqutaavoq.

Sumiiffinni nutaani immap naqqanut tuttartunik atortoqarluni aalisarneq

§ 12.  Kitaani sumiiffiup 74° N-p aamma 64° V-p avannaani Tunumi imartami avannarpasissutsip 71° N-p avannaani immap naqqanut tuttartunik atortoqarluni aalisarneq tamarmi sumiiffinni nutaani aalisarnertut isigineqassaaq.
Imm. 2.   Sumiiffinni nutaani aalisarnermi imm. 1 naapertorlugu, aalisarnermik nakkutilliisoq ataaseq ilaatinneqartassaaq.                                                                                                                           

Korallinik aamma pupinnik (havsvampinik) pisat

§13 .  Korallinik uumasunik 60 kg.-nit amerlanerusunik aamma/imaluunniit immap pupiinik uumasunik 800 kg.-nit amerlanerusunik pisaqartoqassagaluarpat Kalaallit Nunaanni Aalisarsinnaanermut Akuersissutinik Nakkutilliisoqarfimmut nalunaarutiginnittoqassaaq, aamma aalisarneq unitsinneqassaaq aamma kingullermik sumiissutsimit qalorsuarnik kalinnerup sammivianit minnerpaamik 2 sømilinit ungasissusilimmi aalisarneq nanginneqassaaq, korallinik aamma immap pupiinik pisaqarnissamut minnerpaamik ilimaginngisamut.  

Piffinnik immap naqqanut tuttartunik atortoqarluni aalisarfiusunik matusineq.

§ 14.  Koralinik aamma pupinnik uumasunik pisaqartarsimanermik paasisat tunngavigalugit Aalisarnermut, Piniarnermut Nunalerinermullu Naalakkersuisup nalilissavaa sumiiffik aalajangersimasoq imaani uumasoqatigiinnik mianernartunik uumaffiusutut isigineqassanersoq. Aalisarnermut, Piniarnermut Nunalerinermullu Naalakkersuisup aalajangiussinnaavaa sumiiffiit imaani uumasoqatigiinnik mianernartunik uumaffiusutut isigineqartut immap naqqatigut kilisaffigineqarnissaannut imaluunniit immap naqqanut attuuttartunik allanik atortoqarluni aalisarfigineqarnissaannut matussallugit.
Imm. 2.  Tamanna pillugu tusagassiutitigut, sumiiffimmi umiarsuarnut e-mailikkut aammalu kalaallit angallataannut angallatit pineqartut aalisariutaatileqatigiiffii aqqutigalugit e-mailikkut nalunaarutigineqartassapput. Angallatinut nunani EU-mi ilaasortaasuni nalunaarsorneqarsimasunut nalunaarut EU-kommissionimut, kalaallillu angallatiginngisaannut allanut nunat ataasiakkaat aalisarnermik oqartussaasuinut nassiunneqassaaq.

Aalisariaatsit ilaasa inerteqqutaanerat

§ 15.  Qaartiterutissat, toqunartut imaluunniit ilisimajunaartitsissutaasinnaasut kiisalu aallaasit aalisarnermi atoqqusaanngillat. Qupinnguallatsitsisarluni aalisartoqaqqusaanngilaq immikkut ittumik akuersissuteqartoqartinnagu.
Imm. 2.  Qassutit kivisittakkat, qassutillu allat (hildingsgarn aamma toggergarn)-nik taagorneqartut, tunngaviusumik titarnernit killeqarfinnit 3 sømilit avataanni sumiiffinni immap itissusianit 200 meterinit itinerusuniittuni aalisarnerni atorneqassanngillat. Qassutit kivisittakkat qassutillu allat (hildingsgarn aamma toggergarn)-nik taagorneqartut annaaneqartut qassusertunit namminernit qaqinneqassapput.
Imm. 3.  Kitaani qalorsuarsorluni qaleralinniarneq inerteqqutaavoq 64°30'N-p aamma 68°N-p akornanni.

Atortut aalajangersimasut atorneqaqqusaannginnerat

§ 16.  Pisat avammut eqqarnissaat siunertaralugu angallammi atortut imaluunniit aaqqissuussinerit inerteqqutaapput.
Imm. 2.  Qalorsuarsorluni raajarniarnermut atatillugu aalisakkanik niuernermi soqutiginaateqarsinnaasunik igitsinissamut immikkut akuersissuteqartoqarsimatillugu, saniatigut pisat suuneri amerlassusiilu nalunaarsorneqassapput iginneqartinnagillu umiarsuup allattaaviinut allanneqassallutik. 

Aalisarnermut atortunik nalunaaqutsersuineq

§ 17.  Aalisarnermut atortut piginnittup aqqanik aamma najugaanik imaluunniit angallatip aqqanik aamma umiarsualiviup ilisarnaataatut naqinnernik nalunaaqutserneqarsimassapput. Nalunaaqutsiussat imermit arrortinneqarsinnaassanngillat. Qassutini kivisittakkani nalunaa- qutsiussat qimiaanut aalajangerneqassapput. Ningittakkanut nalunaaqutsiussat ningittakkanut namminernut aalajangerneqassapput. Qalorsuarnut nalunaaqutsiussat qimiarsuarmut qullermut aalajangerneqassapput. Uiluinniutini saattuarniutinilu nalunaaqutsiussat sinaakkutaannut qullernut aalajangerneqassapput. Aalisarnermut atortuni uninngasunit puttaqutit nalunaaqu- tsersuutit atorneqarsimasut taamaatuttaaq nalunaaqutsersimassapput.

Pineqaatissiissutit

§ 18.  Nalunaarummi matumani § 7-imi, § 9-imi, § 10 imm. 1-imi, § 11-imi, § 12, imm. 2-mi, § 14-imi, § 15-imi, § 16-imi aamma § 17-mi, aalajangersakkanik unioqqutitsineq akiliisitaanermik kinguneqarsinnaavoq. Angallammiit unioqqutitsisumik aalisartoqartillugu aalisarnermut atortut atorneqartut, angallatip pisai tamakkerlugit taakkualunniit nalingat arsaarinnissutigineqarsinnaapput, taamaattorli pisat, unioqqutitsinngitsumik aalisarnikkut pisarineqarsimasutut uppernarsineqartut, arsaarinnissutigineqassanngillat. Akiliisitsissutaasut nunatta karsiata pissarai.

Atuutilerfia

§ 19.  Nalunaarut atuutilerpoq ulloq 1. december 2011.
Imm. 2.  Peqatigitillugu piujuartitsinissaq siunertaralugu aalisarnerup teknikikkut iluarsartuussivigineqarnera pillugu Namminersornerullutik Oqartussat nalunaarutaat nr. 39, 6. december 2001-meersoq atorunnaarsinneqarpoq.

Namminersorlutik Oqartussat, ulloq 17. november 2011.

Ane Hansen

/

                                                                                                  Jens K. Lyberth