Meeqqanut suli atualinngitsunut perorsaanikkut inerikkiartuutaasunik ulluunerani neqerooruteqartarneq pillugu Inatsisartut peqqussutaat nr. 10, 5. december 2008-meersumi § 5, imm. 1, nr. 2 naapertorlugu nunatsinni nakorsaaneq isumasioqatigalugu makkua aalajangersarneqarput:

Kapitali 1
Siunertaq  

§ 1.  Iliuusissatigut siunertat tassaapput:
1)  Nappaatit tunillaassortut akiorniarlugit iliuusissat pillugit Inatsisartut peqqussutaanni nr. 16-imi 13. september 2006-imeersumi allattuiffimmi A-mi B-milu takuneqarsinnaasut, Nappaatit tunillaassortut akiorniarlugit iliuutsit pillugit Inatsisartut peqqussutaanni nr. 20-mi 12. november 2001-imeersumi allattuiffimmi A-mi B-milu allassimasut imaluunniit Nunatsinni Nakorsaaneqarfimmit nappaatit tunillaassortut nakorsanit nalunaarutigineqarnissaat pillugu ilitsersuussutaa naapertorlugu, kiisalu
2)  Nappaatit tunillannartut siaruaatinnginnissaat killilersimaarniarlugu.   

Kapitali 2
Tunillaassuuttumik nappaalasoqalersillugu nalinginnaasumik iliuusissat

§ 2.  Meeqqat sulisullu tunillaassuuttumik nappaatillit tunillaanissaminnut ulorianaateqarsinnaasut meeqqanut suli atualinngitsunut perorsaanikkut inerikkiartuutaasumik ulluunerani neqerooruteqartarfinni tiguneqassanngillat.
Imm. 2.  Meeqqani suli atualinngitsuni perorsaanikkut inerikkiartuutaasunik ulluunerani neqerooruteqartarfinniittuni meeraq tunillaassuuttumik nappaateqarsorineqalerpat angerlartinneqarnissaa siunertaralugu angerlarsimaffia ilisimatinneqassaaq, pisariaqarpallu meeraq angerlartinneqannginnermini meeraqatiminit immikkoortinneqassalluni.
Imm. 3.  Meeqqani sulisuniluunniit taakkualuunniit inoqutaanni tunillaassuuttumik nappaalasoqalersillugu nunatsinni nakorsaanerup tassanngaluunniit piginnaatitaasup nalornisoqartillugu pineqartut qaqugu tiguneqaqqissanersut aalajangiissaaq.

§ 3.  Meeqqani perorsaanikkut inerikkiartuutaasunik ulluunerani neqerooruteqartarfinniittuni tunillaassuuttumik nappaateqartoqalernerani tamanna perorsaanikkut inerikkiartuutaasunik ulluunerani neqerooruteqartarfimmi allagarsiinikkut erniinnarluinnaq nalunaarutigineqassaaq.

§ 4.  Nunatta nakorsaanerata tassanngaluunniit piginnaatitaasup, tunillaassuuttumik nappaateqartoqalernerani meeqqanut suli atualinngitsunut perorsaanikkut inerikkiartuutaasumik ulluunerani neqerooruteqartarfiup tamakkerluni ilaannakorluniluunniit matuneqarnissaa aalajangersinnaavaa. Tunillaassuuttoqalernissaa eqqarsaatigalugu iliuusissat nunatta nakorsaaneranit tassanngaluunniit piginnaatitaasumit peqqussutigineqartut ingerlanneqassapput. Ammaaqqinnissaq nunatta nakorsaaneranit tassanngaluunniit piginnaatinneqartumit akuersissuteqarneratigut taamaallaat pisinnaavoq. 
Imm. 2.  Tunillaassuuttumik nappaateqartoqalernerani meeqqanut suli atualinngitsunut perorsaanikkut inerikkiartuutaasunik ulluunerani neqerooruteqartarfinniittussat nutaat tiguneqassanngitsut nunatta nakorsaanerata, tassanngaluunniit piginnaatitaasup aalajangersinnaavaa.  

Kapitali 3
§ 1, nr. 1-imi pineqartuni nappaateqartoqartillugu nalunaarutigineqarnissaat ilisimatitsissutigineqarnissaallu  

§ 5.  Nappaatinik § 1, nr. 1-imi pineqartunik tunillaassuuttoqarnerani pasitsaassaqartoqarneraniluunniit nalunaaruteqarnissamik ilisimatitsinissarlu pillugit kapitalimi uani aalajangersakkatut allassimasut atuupput.

§ 6.  Meeqqani sulisunilu nappaatinik taamaattunik napparsimasoqalernerit tamaasa nakorsap suliaqartup nunatsinni nakorsaaneq sapinngisamik piaarnerpaamik ilisimatissavaa. Nappaatit tunillaassortut akiorniarlugit iliuutsit pillugit Inatsisartut peqqussutaannut nr. 20-mut, 12. november 2006-imeersumut ilanngussap 1-ip allanngortinneqarnissaa pillugu naluunaarut nr. 16, 13. september 2006-imeersumi nappaatinik allattuiffimmi A-mi pineqartunik, inoqutigiinni ilaqutaasut napparsimalersillugit ilisimatitsineq aammattaaq pissaaq.
Imm. 2.  Nalunaaruteqarneq malittarisassat nunatta nakorsaaneqarfianit nappaatit tunillaassuuttut nalunaarutigineqartarnerat pillugu nakorsat tunillaassuuttunik nappaatinik nalunaaruteqartarnissaannik ilitsersuutaa malillugu aamma pissaaq.

§ 7. Nunatta nakorsaanerata, taassumaluunniit piginnaatitaata meeqqanut suli atualinngitsunut perorsaanikkut inerikkiartuutaasumik ulluunerani neqeroorutiniittuni eqqugaasut pisortaat § 6, imm. 1-imi meeqqat sulisulluunniit napparsimanerannik nalunaaruteqarnissaq naapertorlugu sapinngisamik piaarnerpaamik ilisimatissavaa.   
Imm. 2. Nunatta nakorsaanera, taassumaluunniit piginnaatitaa inuit kikkut paasissutissinneqarnissaannik kiisalu paasissutissiinerup qanoq imaqarnissaanik aalajangiissaaq. Paasissutissiinerup isumannaatsumik pinissaa nunatta nakorsaanerata qulakkiissavaa.
Imm. 3. Nunatta nakorsaanerata, taassumaluunniit piginnaatitaata akulikinnerusumik nappaalasoqalersillugu ilisimatitsinissamut paasissutissiinissamullu nalinginnaasumik najoqqutassiisinnaavoq.

§ 8. Paaqqinnittarfiup pisortaata § 7, imm. 2-mi meeqqanut sulisunullu paasissutissiinissaq pineqartoq ingerlateqqissavaa.
Imm. 2. Meeqqat ukiui agguataarlugit paaqqinnittarfinni paaqqinnittarfimmi tassani pisortap, nappaatit ilanngussami taaneqartut pilerfiani, aammattaaq meeqqat ukiui agguataarlugit paaqqinnittarfiit pisortai allat ilisimatissavai.

§ 9. Paaqqinnittarfimmi pisortaq peqanngippat suliassaq taanna peqqussut manna naapertorlugu pisortap tullersortaata isumagissavaa.

Kapitali 4
Aalajangersakkat assigiinngitsut  

§ 10.  Nunatta nakorsaaneqarfiata meeqqanut suli atualinngitsunut perorsaanikkut inerikkiartuutaasunik ulluunerani neqeroorutiniittuni tunillaassuuttumik nappaatit akiornissaannut iliuusissanut najoqqutassiat erseqqinnerusut aalajangersassavai.

§ 11.  Nalunaarut manna 1. maj 2010-mi atuutilissaaq.
Imm. 2.  Meeqqanut suli atualinngitsunut perorsaanikkut inerikkiartuutaasunik neqerooruteqartarnermiittunut atuuttumik Ulluunerani paaqqinnittarfinni kiisalu meeqqanut ulloq unnuarlu paaqqinnittarfinni nappaatit tunillaassortut pillugit kaajallaasitaq nr. 188, 21. marts 1988-imeersoq atorunnaarsinneqarpoq.

Namminersorlutik Oqartussat, ulloq 13. april 2010

Mimi Karlsen

/

Lise Lennert Olsen