Ilageeqarneq pillugu Inatsisartut peqqussutaanni nr. 15-imi, 28. oktober 1993-imeersumi § 33, imm. 1 naapertorlugu aalajangersarneqarput:

Kapitali 1
Kuissut tunngavigalugu ilinniartitsineq

§ 1. Kuissut tunngavigalugu ilinniartitsinermiIlagiinnit neqeroorutaasumi siunertaavoq meeqqat kristumiut meeqqanut ajoqersuutaannik ilagiillu naalagiartarnerannik ilisimasaqarlualernissaannut periarfissiinissaq tassuunakkut apersortinnissamut nalinginnaasumik piareersarnermut tunngaviit nukittorsarumallugit.
Imm. 2. Meeqqat kuissut tunngavigalugu ilinniartitsinermut meeqqat peqataanngitsut, apersortinnissamut piareersarnermi meeqqat allat assigalugit peqataassapput.

§ 2. Kuissut tunngavigalugu ilinniartitsineq pilersinneqassaaq palasip ilagiillu sinniisaasa tamanna pillugu isumaqatigiinnerisigut.

§ 3. Kuissut tunngavigalugu ilinniartitsinermutpalasi akisussaavoq, ilinniarnerlu aaqqissuunneqassaaq angajoqqaatut oqartussaassuseqartut siunersioreernerisigut.
Imm. 2. Kuissut tunngavigalugu ilinniartitsineq palasimit ingerlanneqassaaq. Palaseqanngippat, pissutsilluunniit immikkut ittut peqqutaappata, piareersarneq ajoqimit ingerlanneqarsinnaavoq.

§ 4. Kuissut tunngavigalugu ilinniartitsineq aaqqissuunneqassaaq, meeqqat ataatsimiisillugit, naalagiarnermut biibilimi oqaluttuanik, tussiutinik, tussiutaasanik, qinunermik upperisallu nassuerutigineranik ilaqartumut ataqatigiissakkamik.
Imm. 2. Kuissut tunngavigalugu ilinniartitsineq ingerlanneqassaaq meeqqat atuarfianni ilinniutit upperisalerinermut tunngasut pillugit atuartitsinermut pilersaarutit sianigalugit, taamaalilluni atuartitsinerup ilaa atuarfimmit oqaluffimmut nuunneqaqqunagu.

§ 5. Kuissut tunngavigalugu ilinniartitsineq meeqqat atuarfianni klassini sorlerniluunniit 8. klassi angullugu ingerlanneqarsinnaavoq imaluunniit apersortinnissamut piareersarnerup ingerlanneqarnissaata tungaanut, tak. § 12, imm. 2, ukiullu atuartitsiviusup ataatsip iluani naammassineqarsimassalluni. Ilinniartitsineq ingerlanneqassaaq meeqqat atuarfiata atuartitsinerata avataani, sapinngisamillu inini apersortinnissamut piareersarfiusartuniissalluni.

Kapitali 2
Apersortinneq

§ 6. Kinaluunniit kristumiut kuissutaannik kuisissimasoq, apersortinnissamut piareersartinneqarsimasoq, kiisalu kristumiut meeqqanut ajoqersuutigisagaannik ilagiillu naalagiartarnerannik ilisimasaqarluartoq apersortissinnaavoq.
Imm. 2. Palasi pisussaavoq piumasaqaatit imm. 1-imi taaneqartut naammassineqarsimanersut nakkutigissallugit.
Imm. 3. Immikkut ittumik pisoqartillugu ulloq apersortiffissaq sioqqullugu apersortitsinissamut biskoppi akuersisinnaavoq, tak. § 9.

§ 7. Apersortinneq oqaluffimmi naalagiarnermi pissaaq, ritualilu tassunga atugassatut akuerisaq malillugu ingerlanneqassalluni.
Imm. 2. Pisuni immikkut ittuni naalisakkamik naalagiartoqarnissaa, kiisalu ritualip akuerisaanngitsup atorneqarnissaa biskoppimit akuerineqarsinnaavoq.

§ 8. Apersortinneq piareersarnerup naanerata kinguninngua upernaakkut sapaammi nalliuttorsuarmiluunniit allami pissaaq, taamaattorli tallimanngorneq tannaartumi, poorskip ulluani imaluunniit piinsip ulluani pinnani. Ukiakkut aamma apersortittoqarnissaa ilagiit sinniisaasa aalajangersinnaavaat.
Imm. 2. Apersortittussat namminneq pisuussutiginagu ullormi apersortiffissatut aalajangikkami apersortissinnaanngitsut kingusinnerusukkut apersortissinnaapput.

§ 9. Ulloq apersortiffissaq ilagiit sinniisaasa palaseqarfimmi pisortap tamanna pillugu innersuussutaa malillugu aalajangissavaat.
Imm. 2. Palaseqarfimmi pisortap imm. 1 malillugu innersuussuteqannginnermini ulluliussat pillugit provstilu ataqatigiissareersimassavaat. Ataqatigiissaarineq kingusinnerpaamik 1. oktober naammassineqareersimassaaq.
Imm. 3. Ilagiit sinniisaasa kingusinnerpaamik 15. oktober imm. 1 malillugu aalajangiissapput. Tamatuma kinguninngua aalajangiineq provstimut nalunaarutigineqassaaq.
Imm. 4. Provsteqarfimmi ullut apersortitsivissat kingusinnerpaamik 1. novembar provstip nalunaarutigissavai.

Kapitali 3
Apersortinnissamut piareersarneq

§ 10. Apersortinnissamut piareersarneq kuisinnermik tunngaveqarpoq siunertaralugu apersortittussap kristumiut meeqqanut ajoqersuutigisartagaannik ilagiillu naalagiartarnerannik paasisimanninnerata nukittorsarneqarnissaa.

§ 11. Palasi apersortinnissamut piareersarnissap aaqqissuunnissaanut isumaginissaanullu akisussaavoq, tamatumanilu nalinginnaasumik naatsorsuutaavoq tunngaviulluni meeqqap meeqqat atuarfianni allamiluunniit upperisalerinermik atuartinneqareersimanissaa.
Imm. 2. Apersortinnissamut piareersarneq palasimit ingerlanneqassaaq. Palaseqartinnagu, imaluunniit pissutsit immikkut illuinnartut atuunneranni piareersarneq ajoqimit imaluunniit allamit taamatut suliaqarnissamut pisinnaasumit ingerlanneqassaaq .
Imm. 3. Tamanna pisariaqartinneqarpat apersortinnissamut piareersarnermi ikiorteqartitsisoqarsinnaavoq. Piareersarneq ingerlanneqassaaq palasip ilitsersuutai malillugit. Taamaattoq palasip ikinnerpaamik nalunaaquttap-akunneri atuartitsiviusut arfineq-pingasut ingerlatissavai.
Imm. 4. Piareersarnerup nalaani palasip allalluunniit piareersarnermik ingerlatsisup angerlarsimaffiillu akornanni suleqatigiittoqarnissaa anguniarneqartassaaq.
Imm. 5. Piareersarnerup pisariaqartumik pitsaassuseqarnissaa palasip akisussaaffigaa, aamma imm. 2-mi imm. 3-milu taaneqartut ataanni.

§ 12. Apersortinnissamut piareersarneq meeqqat atuarfianni klassit arfineq-pingajuanni pissaaq.
Imm. 2. Ilageeqarnermut Naalakkersuisoqarfiup pissutsit immikkut ittut atuutsillugit apersortinnissamut piareersarnerup klassimi qulliunerusumi pinissaa akuersissutigisinnaavaa.

§ 13. Nalinginnaasumik pisarnertut meeraq najukkami atuarfigisaani apersortinnissaanut piareersarneqassaaq. Taamaaliornissaq ajornarpat ajornakusoorpalluunniit piareersarneq sumiiffimmi allami naleqquttumili ingerlanneqarsinnaavoq.

§ 14. Apersortinnissamut piareersarnissap sumiinnissaa qaqugulu pinissaa apersortittussap atuarfiata najukkamilu palasip akornanni isumaqatigiinniarnikkut aalajangiivigineqassapput. Illuatungeriit isumaqatigiissinnaanngippata kommunalbestyrelsi provstimut isumaqatiginninniareerluni aalajangiissaaq.

§ 15. Apersortinnissamut piareersarnermi nalunaaquttap akunneri atuartitsiviusussat 45 minutsikkaartut ikinnerpaamik 40-uussapput.
Imm. 2. Meeqqat apersortinnissamut piareersartussat holdikkuutaassapput. Amerlanerpaamik meeqqat holdimi ataatsimi 24-it sinnersimassanngilaat.

§ 16. Palasi meeqqap apersortinnissamut piareersarnissaanut aaqqissuussillunilu ingerlatsisimasoq meeqqamik apersortitsinissamut pisinnaatitaallunilu pisussaatitaavoq.
Imm. 2. Apersortittussaq piareersarnermi peqquteqanngitsumik peqataanngitsoortarpat imaluunniit palasip allalluunniit piareersarnermik ingerlatsisup peqqusinerinik sumiginnaasarpat, palasip pineqartoq piareersarnermi apersortinnissamilu peqataajunnaarsillugulu peqataanngitsoortissinnaavaa. Taamaalilluni meeraq piareersarfiup ingerlasup nalaani palasimit allamit piareersarneqarlunilu apersortissinnaanngilaq. Palasip peqataajunnnaarsitsinera sapaatip akunneri marluk qaangiutsinnagit biskoppimut naammagittaalliutigineqarsinnaavoq. Biskoppip aalajangiinera inaarutaavoq.
Imm. 3. Meeqqap illoqarfimmut nunaqarfimmulluunniit allamut nuunneratigut imaluunniit angajoqqaatut oqartussaassuseqartunit isumaqatigiissuteqarneq malillugu allamik peqquteqartumik piareersarneq unitsinneqarpat, piareersarneq palasimit akuersisumit nanginneqarsinnaavoq. Taamatut pisoqartillugu uppernarsaasiisoqassaaq, tassani palasimit piareersarnermut peqataajunnaarsitsisumit nalunaarsimassalluni apersortittussaq qanoq sivisutigisumik apersortinnissamut piareersarnermi peqataasimanersoq.

Kapitali 4
Atortuulersitsineq

§ 17. Nalunaarut 1. september 2009-mi atuutilissaaq.

Namminersorlutik Oqartussat, ulloq 24. august 2009

Mimi Karlsen

/

Lise Lennert Olsen