§ 1

Aningaasarsianit akileraarutit pillugit Inatsisartut inatsisaanni nr. 5, 19. maj 1979-imeersumi, Inatsisartut inatsisaatigut nr. 2, 21. maj 2004-meersukkut kingullermik allanngortinneqartumi makku allannguutigitinneqarput.

1. § 19-imi imm. 1-pkingorna immikkoortutut nutaatut ilanngunneqassaaq:
"Imm. 2. Taamaattorli iluanaarutit § 70 a naapertorlugu iluanaarutisianit akileraarutinik unerartitsiffigineqarsimasut aningaasarsiat akileraaruteqaataasussat naatsorsorneqarneranni ilanngaatigineqarsinnaanngillat.". Imm. 2-5 matuma kingorna tassaalerput imm. 3-6.

2. § 19-imi, imm. 3-mi aamma imm. 4-mi allassimasut, imm. 4 aamma 5-inngortuni, "imm. 1 aamma 2-miittut" allanngortinneqassapput ima: "imm. 1 aamma 3-miittut", aammalu § 19, imm. 5-imi allassimasoq, imm. 6-inngortumi, "Imm. 3" allanngortinneqassaaq ima: "Imm. 4".

3. § 21, imm. 4-mi oqaaseqatigiit aappaattut nutaatut ilanngunneqassaaq:
"Kinaluunniit, selskabip amigartoorutaasa ukiunut tullernut nuunneqarsinnaanerannik ilisimasariaqartutut isigineqarsinnaasoq taamaaliorsinnaaneq pillugu siumut akuersissummik allanngortinneqarsinnaanngitsumik Skatterådimut qinnuteqarsinnaavoq.".

4. § 24, litra 11, ima oqaasertaqassaaq:
"11) pisortanit ikiuutisiat:
a) pisuni ataasiakkaani naliliineq tunngavigalugu pisortanit pensionisianut tapiliussatut, matumani aamma meeqqanut tapiliussatut tunniunneqartut,
b) ataasiartumik ikiorsiissutitut, nuunnermi ikiuutisiatut, ilisinermi ikiuutisiatut, angerlarsimaffimmi ikiorteqarnermut aamma angerlarluni angalanermut ikiuutisiatut tunniunneqartut,
c) ineqarnermut tapiissutitut tunniunneqartut,
d) meeqqanut inuusuttunullu ikiorsiissutitut tunniunneqartut,
e) inunnut annertuumik innarluuteqartunut ikiorsiissutitut tunniunneqartut,
f) piginnaanngorsaqqinneqarnermut atatillugu ataasiartumik ikiorsiissutitut immikkut ittumik tapiissutitut tunniunneqartut.".

5. § 34 b-p kingornanut ilanngunneqassaaq:
"§ 34 c. Inuk § 1 naapertorlugu akileraartussaatitaasoq pisariaqavissuinnarnut ikiorsiissutinik § 24, litra 11 malillugu akileraaruteqaataasussaanngitsutut isigineqanngitsunik pissarsisimappat, akileraarutissat tamarmiusut aningaasarsiat taakku akileraarutitaannut naapertuuttumik annertussusilinnik appartinneqassapput.".

6. § 41, imm. 1-imi, allanngortinneqassapput ima "40 pct." "45 pct.-inngorlugu"aamma " 20 pct."
"23 pct.-inngorlugu".

7. § 47, imm. 2-mi ima oqaasertaqassaaq:
"Imm. 2. Siumoortumik nalunaarsuineq akileraaruseriffimmit isumagineqassaaq.".

8. § 48, imm. 1-imi, 2-imi, 3-imi, 4-milu allassimasoq "kommissionip akileraarusiisartup" allanngortinneqassaaq ima: "akileraaruseriffiup".

9. § 51 ima oqaasertaqassaaq:
"§ 51. Kommunimi akileraartarnermut oqartussaasut (pisortat akileraarusiisartut) akileraarusiinermik suliaqarnissaannut pilersaarut Skatterådip ukiut tamaasa suliarisassavaa. Pilersaarutip malinneqarnissaa kommunalbestyrelsip akisussaaffigaa.
Imm. 2. Kommunalbestyrelsip inuk kommunimi atorfeqartoq, kommunip akileraaruseriffiani akileraarusiinermik sulinermi akisussaasuusussaq toqqassavaa. Kommunalbestyrelsi kommunip akileraaruseriffiata aalajangiinerinut imaluunniit akileraaruseriffiup aalajangiinerinut naammagittaalliuutaasunik suliaqarnissamut akuliussinnaanngilaq.
Imm. 3. Aammattaaq Akileraartarnermut Pisortaqarfiup § 33, imm. 2-mi taaneqartunik akileraarusiinissaanut pilersaarut Skatterådip ukiut tamaasa suliarisassavaa.
Imm. 4. Akileraartarnermut Pisortaqarfiup inuk pisortaqarfimmi atorfeqartoq, pisortaqarfimmi akileraarusiinermik sulinermi akisussaasuusussaq toqqassavaa.".

10. § 51-ipkingornanut ilanngunneqassaaq:
"§ 51 a. Kommunalbestyrelsit marluk amerlanerusulluunniit Naalakkersuisut akuersissuteqareernerisigut inuk kommunit arlaanni atorfeqartoq, kommunini pineqartuni akileraartussaatitaasunut tamanut ilaannulluunniit tunngatillugu akileraarusiinermik kommunip akileraartarnikkut oqartussaasuisa suliaqarneranni qullersaalluni akisussaasuusussaq toqqarsinnaavaat, tak. § 51, imm. 2. Kommunit akileraartarnermut allaffeqarfimmik ataatsimoorussamik peqarsinnaanerannik Naalakkersuisut akuersissutertik naleqquttumik piffissaliillutik atorunnaarsissinnaavaat, akuersissuteqarnermut piumasaqaatit naammassineqarsimanngitsutut Naalakkersuisunit nalilerneqarpata.
Imm. 2. Kommunalbestyrelsit akileraarusiinermi suleqatigiissut, pilersaarutip malinneqarnissaa § 51, imm. 1-imi taaneqartoq akisussaaffigissavaat.".

11. § 51 a-p kingornanut ilanngunneqassaaq:
"§ 51 b. Kommunalbestyrelsip ataatsip arlaqartulluunniit ataatsimoorlutik Naalakkersuisut akuersissuteqareernerisigut Akileraartarnermut Pisortaqarfimmik isumaqateqarlutik kommunimi akileraartarnermut oqartussaasut kommunimi pineqartumi kommuniniluunniit pineqartuni akileraartussaatitaasunut tamanut ilaannulluunniit tunngatillugu akileraarusiinermik suliassat tamaasa ilaalluunniit akiliuteqarnermikkut Akileraartarnermut Pisortaqarfimmut nuussinnaavaat. Pilersaarutip malinneqarnissaa § 51, imm. 1-imi taaneqartoq Akileraartarnermut Pisortaqarfiup akisussaaffigissavaa.
Imm. 2. Akileraartarnermut Pisortaqarfiup, kommunimi akileraaruseriffiup kommunimilu ingerlatsiveqarfiit allat akornanni paasissutissanik kommunimi paarlaasseqatigiissinnaanerisuulli kommunimi kommuniniluunniit attuumassuteqartuni ingerlatsiveqarfiit allat paasissutissanik paarlaasseqatigisinnaavai.".

12. § 51 b-p kingornanut ilanngunneqassaaq:
"§ 51 c. Akileraartarnermut pisortat nammineerluni nalunaarsuiffissat akileraartussaatitaasunut tamanut, akileraartartunit ukiumi akileraarusiiffimmi januarip aallaqqaataata kinguninnguatigut piaarnerpaamik tiguneqartussanngorlugit nassiussussavaat. Naalakkersuisut nammineerluni nalunaarsuiffissat qanoq ilusilersorneqarnissaannut nassiussorneqarnissaannullu maleruagassiat aalajangersassavaat, taamatullu aamma immersugassat akuersissutigisimasamik akileraartussaatitanit qanoq atorneqarnissaannut maleruagassianik aalajangiissallutik.
Imm. 2. Akileraartartup nammineerluni nalunaarsuiffissanik nassinneqanngitsoornera nammineerluni nalunaarsuinissamut pisussaajunnaarsitsinngilaq.
Imm. 3. Nammineerluni nalunaarsuut ukiumi akileraarusiiffimmi kingusinnerpaamik ulloq 1. marts nassiunneqassaaq. Nammineerluni nalunaarsuut pisortanut akileraarusiinermik suliaqartussanut nassiunneqassaaq, tak. § 51, imm. 1.
Imm. 4. Pisortat akileraarusiisartut nammineerluni nalunaarsuummik nassitsinissap kinguartinneqarnissaa immikkut pissutissaqartillugu akuersissutigisinnaavaat, tamanna akileraarusiilluni sulinerup aaqqissuunneqarneranut piffissarlu eqqorlugu inerneqarnissaanut akornutaanngippat.".

13. § 54-ip kingornanut ilanngunneqassaaq:
"§ 54 a. Pisortat ingerlatsiviannit pisortallu ingerlatsiviannut saaffiginninnerni attaveqaatit digitaliusut atorneqarsinnaanerat pillugu Naalakkersuisut aningaasarsianit akileraarutit pillugit akileraartarnerup tungaatigut maleruagassiorsinnaapput, matumani aamma attaveqaatit digitaliusut atorneqarsinnaannginneri pillugit inatsisini piumasaasut saneqqussinnaallugit.
Imm. 2. Allakkiat atsiorneqanngitsut, atsiornermilluunniit maskiinakkoortumik allatulluunniit atsiornillit sananeqarsinnaanerat pillugu maleruagassat Naalakkersuisut akileraartarnerup tungaatigut aalajangersarsinnaavaat, taamaalilluni allakkiaq allakkiamut inuup nammineq atsiorsimasaanut inatsisit tungaasigut sanilliunneqarsinnaanngorlugu.".

14. § 55 imatut oqaasertaqassaaq:
"§ 55. Akileraarutinik angissusiliineq ukiup aningaasarsiorfiusup angissusiliiffigisap tulliani qaammatisiutit malillugit ukiumi kingusinnerpaamik 1. september naammassineqareersimassaaq (piffissaq akileraarusiiffimmut killiliussaq). Kommunemi akileraartarnermut oqartussaasut akileraarutinik angissusiliinernik piffissap akileraarusiiffiup ingerlanerani allanngortitsisinnaapput.
Imm. 2. Siusinnerusukkut angissusiliineq nakkutilliinermi paasissutissat, uppernarsaatissat taakkununngaluunniit aaqqiissutissat kingusinnerusukkut tiguneqarnerat pissutigalugu, ilanngaat aalajangersimasoq aningaasarsialluunniit B-t akileraaruteqaataasussaanngitsut kukkusumik ilanngaatigineqarsimanera pissutigalugu imaluunniit akileraartussaatitaanerup allannguuteqarnera pissutigalugu allanngortinneqassappat, kommunimi akileraartarnermut oqartussaasut angissusiliineq ukiup aningaasarsiorfiusup pineqartup naanerata kingorna qaammatisiutit malillugit ukiup akileraarusiiffiup tulliani ulloq 1. september tikillugu suliareqqissinnaavaat.
Imm. 3. Skatterådip kommunimi akileraartarnermut oqartussaasut, piffissap akileraarusiiffiusup qaangiutereerneratigut akileraarutinik angissusiliinissamut imaluunniit allannguinissamut piginnaatissinnaavai.
Imm. 4. Skatterådi akileraarutinik angissusiliinermik isummerfiginnissimatillugu kommunimi akileraartarnermut oqartussaasut angissusiliisinnaanngillat allanngortitsisinnaanatilluunniit. Aamma akileraarutinik angissusiliineq Skatterådimit suliarineqartillugu kommunimi akileraartarnermut oqartussaasut angissusiliisinnaanngillat allanngortitsisinnaanatilluunniit. Oqaaseqatigiit aappaanni taaneqartutut ittunik pisoqartillugu kommunimi akileraartarnermut oqartussaasut allanngortinniagartik pillugu Skatterådi ilisimatissavaat.
Imm. 5. Kommunimi akileraartarnermut oqartussaasut nammineerluni nalunaarutigineqartunit allaanerusumik tunngaveqarlutik akileraarutinik angissusiliiniarpata, matumani aamma nammineerluni nalunaarsuiffik pissusissamisoortoq pigineqanngippat, imaluuunniit kommunimi akileraartarnermut oqartussaasut nammineerluni nalunaarsugassat akileraarutinik angissusiliinermi tunngaviusussat ilaannik allannguiniarpata akileraartussaatitaasoq tamatuminnga allakkatigut ilisimatinneqassaaq. Akileraartussaatitaasoq tassunga ilutigitillugu aamma ilisimatinneqassaaq, akileraartussaatitaasoq akileraarutinik angissusiliinermut akerliulluni piffissaliussap allakkat ullulerneqarneranniit sapaatip akunnerinik 4-inik sivikinnerunngitsup ingerlanerani allakkatigut oqaasiinnakkulluunniit tunngavilersuilluni akileraartarnermut oqartussaasunut saqqummiussaqanngippat akileraarutinik angissusiliineq siunniunneqartutuut angissusilerneqassasoq. Akileraartussaatitaasoq piffissaliussaq naatinnagu oqaaseqaateqarsimanngippat, akileraartarnermut oqartussaasut ilisimatitseqqeqqaaratik akileraarutinik angissusiliinissaq siunnersuutigineqartutuut iluseqartillugu angissusilersinnaavaat. Akileraartussaatitaasoq piffissaliussap qaangiutinnginnerani oqaaseqaateqarpat akileraarutinik angissusiliineq (nalunaarutiginninneq) allakkatigut ilisimatitsissutigineqassaaq.
Imm. 6. Imm. 5-imi oqaaseqatigiit siullersaanni aappaannilu taaneqartutuut ilisimatitsisoqartariaqanngilaq akileraarutinik angissusiliineq akileraartussaatitaasup qinnuteqarneratigut pippat, aammalu qinnuteqarneq aalajangiinermi tamakkiisumik malinneqarpat. Taamaanngippat akileraarutinik angissusiliineq (nalunaarutiginninneq) allakkatigut ilisimatitsissutigineqassaaq.".

15. § 56 imatut oqaasertaqassaaq:
"§ 56. Kommunini akileraartarnermut oqartussaasut § 55 naapertorlugu aalajangiinerinut naammagittaalliuutit Skatterådimit suliarineqartarput.
Imm. 2. Naammagittaalliuut Skatterådimut nassiunneqassaaq.Naammagittaalliuut Skatterådimit tiguneqareersimassaaq naammagittaalliuutigineqartumut aalajangiinerup ullulerneqarneraniit sapaatip akunneri sisamat qaangiutsinnagit, imaluunniit aalajangiineq immikkut ilisimatitsissutigineqarsimanngippat, tak. § 55, imm. 6, inaarummik naatsorsuinerup nalunaarutigineqarneraniit. Naammagittaalliuut piffissaliussap qaangiutereerneratigut nassiunneqarpat itigartinneqassaaq. Piffissaliussap qimmorneqarnera Skatterådip immikkut ittunik pissutissaqartillugu qaangerneqarsimappat akuerisinnaavaa.
Imm. 3. Skatterådimut naammagittaalliuut allakkatigoortuussaaq. Aalajangiinerup naammagittaalliuutigineqartup naqeqqaarneqarnera assilineqarneraluunniit naammagittaalliuummut ilanngunneqassaaq. Naammagittaalliuummi allassimassapput aalajangiinerup sutigut eqqunngitsuusorineqarnera tassungalu tunngavilersuut. Allakkiat uppernarsaatitut atorumaneqartut naqeqqaarneqarneri assilineqarneriluunniit naammagittaalliuummut ilanngunneqassapput.
Imm. 4. Naammagittaalliuutip ilusiligaanera tunngavilersugaaneraluunniit pissutigalugit suliap suliareqqinneqarnissaanut tunngavissatut atorneqarsinnaanngippat, Skatterådip naammagittaalliortoq piffissalerlugu periarfississinnaavaa amigaataasumik aaqqiinissamut. Naammagittaalliortup amigaataasoq piffissaliussap naannginnerani aaqqinngippagu suliassaq itigartitsissutigineqassaaq.
Imm. 5. Skatterådi naammagittaalliuummik aalajangiiffiginnitsinnagu pisortat oqartussaasut naammagittaalliuutigineqartumik aalajangiisimasut oqaaseqaataannik piniartoqassaaq. Pissutsit aalajangiinermut naammagittaalliuutigineqartumut tunngasutillit immikkut pissutissaqartippassuk Skatterådi qinnuteqartoqarneratigut sivisunerusumik piffissaliisinnaavoq.
Imm. 6. Skatterådi naammagittaalliuummik aalajangiiffiginnitsinnagu suliap saqqummiunneqarnera suliarineqaqqaassaaq. Suliap saqqummiunneqarnerani nassuiaatigineqassapput paasissutissaviit suliamut tunngassuteqartut aalajangiinissami pingaaruteqartutut isiginiakkat. Naammagittaalliortup piumasaa rådip tamakkiisumik isumaqatigisinnaanngippagu suliap saqqummiunneqarnera naammagittaalliortumut nassiunneqassaaq, piffissaliussap erseqqinnerusumik ullulerneqarsimasup sapaatit akunnerinik sisamanik sivikinnerunngitsup ingerlanerani saqqummiussinermut oqaaseqaateqaqqullugu kajumissaarlugu.
Imm. 7. Skatterådi naammagittaalliuut qanorluunniit imaqaraluarpat pisinnaatitaavoq angissusiliineq ataatsimut tamaat aalajangiiffigisassanngorlugu tigussallugu.
Imm. 8. Naammagittaalliortoq Skatterådimik oqaloqateqarnermigut oqaaseqaateqarnissaminik periarfissinneqarumasinnaavoq.
Imm. 9. Skatterådip aalajangiinera nalunaarutiginninnikkut suliarineqassaaq.".

16. § 57 imatut oqaasertaqassaaq:
"§ 57. Skatterådip kommunini akileraartarnermut oqartussaasut angissusiliineri misissugassanngorlugit allanngugassanngorlugillu qaqeqqissinnaavai. Angissusiliinermik qaffaaneq, angissusiliineq missingersuutaannarmik tunngaveqartillugu pisinnaanngilaq ukiup aningaasarsiorfiup pineqartup naaneraniit ukiut tallimat qaangiutereersimatillugit.
Imm. 2. Skatterådi aalajangiitinnagu suliap saqqummiunneqarnera suliarineqaqqaassaaq. Suliap saqqummiunneqarnerani nassuiaatigineqassapput paasissutissaviit suliamut tunngassuteqartut aalajangiinissami pingaaruteqartutut isiginiakkat. Suliap saqqummiunneqarnera akileraartussaatitaasumut nassiunneqassaaq, piffissaliussap erseqqinnerusumik ullulerneqarsimasup sapaatip akunnerinik sisamanik sivikinnerunngitsup ingerlanerani saqqummiussinermut oqaaseqaateqaqqullugu kajumissaarlugu.
Imm. 3. Skatterådip suliassat § 56 aamma § 57, imm. 2 malillugit aalajangiiffigineqarsimasut suliareqqissinnaavai. Suliareqqiinermi imm. 2-mi aalajangersakkat atuutissapput.".

17. § 58 atorunnaarsinneqassaaq.

18. § 59 ima oqaasertaqassaaq:
"§ 59. Skatterådip § 21, imm. 4, § 56, § 57 kiisalu § 66, imm. 2, malillugit aalajangiineri akileraartussaatitamit Kalaallit Nunaata Eqqartuussivianut suliarinnittussamut siulliusumut suliassiissutigineqarsinnaapput, aalajangiinerup kingorna qaammatit arfinillit qaangiutsinnagit. Pissutsinik immikkorluinnaq ittunik tunngavissaqartillugu, landsdommerip piffissaliunneqartoq qimmorneqaraluarpalluunniit suliassiissutigineqartoq akuersaarsinnaavaa. Suliassiissutigineqartut tassaapput Kalaallit Nunaanni Naalakkersuisut.
Imm. 2. Suliap Skatterådimut suliassiissutigineqarneraniit qaammatit aqqaneq-marluk qaangiussimappata, Skatterådi aalajangiisimanngikkaluarpalluunniit suliaq Kalaallit Nunaata Eqqartuussivianut suliarinnittussamut siulliusumut suliassiissutigineqarsinnaavoq.
Imm. 3. Naalakkersuisut imm. 1-imi aalajangersakkatigut piumasaasut malillugit Skatterådip § 56, § 57 kiisalu § 66, imm. 2 malillugit aalajangiineri Kalaallit Nunaata Eqqartuussivianut suliarinnittussamut siullermut suliassiissutigisinnaavaat. Suliassiissutigineqartoq tassaassaaq akileraartussaatitaq.".

19. § 70, imm. 2-mi oqaaseqatigiit aappaattut nutaatut ilanngunneqassaaq:
"Aktianilli amerlanernik piginnittuusup selskabi selskabimut allamut, pineqartup aktianik amerlanernik piginnittuuffigisaanut pigisanik nalilinnik tunisaqarsimasoq atorunnaarsippagu, pigisat aningaasanngortitaaneranni iluanaarutit iluanaarutisiatut naatsorsorneqarneranni § 14, imm. 3-imi maleruagassatut naatsorsuullugit isigineqassapput.".

Oqaaseqatigiit aappaat matuma kingorna tassaalerpoq oqaaseqatigiit pingajuat.

20. § 70-imi imm. 2-p kingorna immikkoortutut nutaatut ilanngunneqassaaq:
"Imm. 3. Aktiaatilik aktianik amerlanernik piginnittuusutut isigineqassaaq, tak. imm. 2, pineqartup nammineerluni imaluunniit katissimallugu aapparisani, angajoqqaani, aatakkuni aanakkunilu aamma qitornat, ernuttat taakkualu katissimallugu aapparisaat peqatigalugit ukiut kingulliit tallimat ingerlaneranni aktiatigut aningaasaatit 25 pct.-ii amerlanerusulluunniit piffissami sumiluunniit pigisimappagit, imaluunniit piffissami tassani taasisinnaanerup nalingata 50 pct.-ii sinnerlugit taasisinnaasimappat. Qitornassaqarneq qitornavissiaqarnerlu kinguaariivinnermut sanilliunneqarput.".

Imm. 3 aamma 4 matuma kingorna tassaalerput imm. 4 aamma 5.

21. § 70-ip kingornanut ilanngunneqassaaq:
"§ 70 a. Selskabi sulisorisat aktiaataannik utertitsilluni sulisunut allanut tuneqqitassanik pisisoq iluanaarutisianit akileraarutit selskabip akileraarfittut kommuniani, tak. § 33, qaammatisiutit malillugit ukiumi pineqartumi procentit akileraarusiissutit tamarmiusut, tak. §§-it 27-miit 29-mut, aamma procentip selskabip akileraarutaata § 26 a-mi aalajangersarneqartup assigiinngissutaattut annertutigisut unerartissavai.
Imm. 2. Selskabip aningaasanik niuerfimmi nalunaarsorneqarsimasup nammineq aktiaatini utertillugit pisiarigunigit iluanaarutisianit akileraarutinik imm. 1-imi taaneqartutuulli unerartitsissaaq.
Imm. 3. Selskabimi, aktianik amerlanernik piginnittuusup pigisaasa aningaasanngortitaanerat iluanaarutitut isigineqarpat tak. § 70, imm. 2, oqaaseqatigiit aappaannisuulli iluanaarutisianit akileraarutinik imm. 1-imi taaneqartutulli unerartinneqassapput.
Imm. 4. Selskabi kinguaariit nikinnerannut atatillugu aningaasanik agguaassippat iluanaarutisianik akileraarummik imm. 1-imi taaneqartutuulli unerartitsissaaq, matumani aamma kinguaariit ingerlaavartumik nikittarneranni atsiornikkut isumaqatigiissuteqartoqarsimatillugu. Isumaqatigiissutit malillugit kinguaariit nikinngitsoorpata iluanaarutisianik akileraarutinik § 70, imm. 1 naapertorlugu, isumaqatigiissutip atorunnaarneraniit qaammat ataaseq qaangiutsinnagu selskabi akileraareersimassaaq, iluanaarutisianik akileraarut imm. 1 naapertorlugu siusinnerusukkut akilerneqarsimasoq ilanngaatigereerlugu.".

22. § 71-imi oqaaseqatigiit aappaattut nutaatut ilanngunneqassaaq:
"Aningaasaatinik agguaassineruppat iluanaarutisianik akileraarutit unerartitat killiliussamiit qaammat ataaseq qaangiutsinnagu akilerneqareersimassaaq."

Oqaaseqatigiit aappaannit taallimaannut matuma kingorna oqaaseqatigiit pingajuanniit arfernganunngortinneqassapput.

23. § 73 ima oqaasertaqassaaq:
"§ 73. Kinaluunniit § 3 naapertorlugu akileraartussaatitaanngitsoq iluanaarutinik, § 70 imaluunniit § 70 a malillugu iluanaarutisiat akileraarutitaannik unerartitsiffigineqarsimasunik pissarsisimappat akileraarutitaat kommunalbestyrelsip attuumassuteqartup qinnuteqartoqarneratigut utertissavai. Peqatigiiffiilli suleqatigiillunilu iluanaarniaqatigiiffiit § 1, imm. 1, nr. 12-imi taaneqartut § 3, imm. 2 naapertorlugu akileraarusiiffigineqartussaanngikkaluarlutik iluanaarutisianit akileraarutit unerartinneqarsimasut utertissinnaanngilaat.".

24. § 86 ima oqaasertaqassaaq:
"§ 86. Inuussutissarsiummik ingerlassaqartoq naatsorsuusiortartoq kinaluunniit, inatsisit malillugit naatsorsuusiortussaatitaaguni taamaanngikkuniluunniit akileraartarnermut oqartussaasunit qinnuigineqaruni pisussaavoq naatsorsuutinik bilaginillu ukiunut naatsorsuusiorfinnut siusinnerusunut ukiumullu naatsorsuusiorfimmut ingerlasumut tunngasunik nassiussissalluni. Pisussaaffik aammattaaq atuuppoq allakkianut allanik akileraarusiinermut, matumani aamma nunamut maanga akileraartussaatitaanerup aalajangiiffigineqarnissaanut pingaaruteqarsinnaasunik nassiussissalluni. Nassiussisussaatitaanermi aamma ilaapput akileraartussaatitaasup nunami allami, Danmarkimi Savalimmiuniluunniit suliffeqarfiutaanut tunngatillugu naatsorsuutinut il.il. tunngasut.
Imm. 2. Aamma taamaaliornissamut imm. 1 malillugu pisussaapput kikkulluunniit inatsisit tungaasigut inuttut isigineqarsinnaasut, inuussutissarsiuteqartuugunik taamaattuunngikkunilluunniit.
Imm. 3. Naatsorsuutit il.il. inummi pingajuusumiippata taassuma taakkuninnga tunniussinngikkallarsinnaatitaagaluaruniluunniit akileraartarnermut oqartussaasunit qinnuigineqaruni tunniutissavai, taakkulu atortussat atoreerunikkit inummut pingajuusumut tassunga utertinneqarnissaat isumagissavaat.
Imm. 4. Akileraartarnermut oqartussaasut eqqartuussisunit akuersissummik peqaqqaanngikkaluarlutik kinaassutsiminnik uppernarsaateqarlutik sukkulluunniit pisariaqartutut isigineqarpat imm. 1-imi 2-milu inuit taaneqartut sumiiffianniillutik misissuinissamut piginnaatitaapput. Misissuisinnaatitaanermut piginnaatitaanerup ilaatigut ilaqartinneqarpoq taakku naatsorsuutaannik bilaginillu aammalu allakkianik allanik akileraarusiinermut pingaaruteqarsinnaasunik misissuinissamut aammalu karsimiittuutinik assigisaannillu naatsorsuinissamut piginnaatitaaneq. Maleruagassat taakku malillugit akileraartarnermut oqartussaasut aamma inuussutissarsiuteqartut sumiiffianniillutik quersuarmiittuutinik (lagerimiittuutinik), nersutaatinik, pequtinik, maskiinanik ingerlatsinermilu atortunik allanik naatsorsuisinnaatitaallutillu naliliisinnaatitaapput. Piginnittup taassumalu sulisuisa akileraartarnermut oqartussaasut misissuineranni pisariaqartitsineq naapertorlugu ilitsersuillutillu ikiuutissapput.
Imm. 5. Paasissutissat naatsorsuutinut il.il. tunngasut qarasaasiani nalunaarsorneqarsimappata akileraartarnermut oqartussaasut paasissutissanik taakkuninnga takunnissinnaatitaanerat qarasaasianut aamma atuutissaaq.
Imm. 6. Akileraartarnermut oqartussaasut imm. 4 naapertorlugu misissuinissaanni politiit ikiuutissapput, maleruagassat Naalakkersuisut inatsisinillu atortitsinermi ministeriaqarfiup isumaqatigiinniarnerisigut aalajangersarneqartut naapertorlugit.".

25. § 87 atorunnaarsinneqassaaq.

26. § 114 atorunnaarsinneqassaaq.

27. § 115-imi, imm. 2-imi oqaaseqatigiit aappaat atorunnaarsinneqarpoq.".

28. § 115-imi, imm. 5-mi allassimasoq "kommunini kommissioninik akileraarusiisartunik" allanngortinneqassaaq ima "kommunini akileraaruseriffiit".

29. § 115-imi, imm. 9-imi allassimasoq: "kommissionip akileraarusiisartup siunnersuuteqarneratigut". Peerneqassaaq. 

30. Kapitali 11-imi qulequtsiunneqartoq: "Kommissioni akileraarusiisartoq", atorunnaarsinneqarpoq.

 

§ 2.

Inatsisartut inatsisaat ulloq 1. januar 2005 aallarnerfigalugu atuuttuulissaaq.

Namminersornerullutik Oqartussat, ulloq 11. november 2004

Hans Enoksen

/

Josef Motzfeldt