§ 1

Aningaasarsianit akileraarutit pillugit Inatsisartut inatsisaanni nr. 5, 19. maj 1979-imeersumi, ilaatigut Inatsisartut inatsisaatigut nr. 15, 30. oktober 1998-imeersukkut, kingullerpaamillu Inatsisartut inatsisaatigut nr. 9, 12. november 2001-imeersukkut allanngortinneqartumi makku allannguutigitinneqarput:

 

1. § 1, imm. 1-imi nr. 10-p kingornanut normutut nutaatut ilanngunneqassaaq:
"10a) peqatigiiffiit, suleqatigiiffiit, iluaqutissiuiffiit, aningaasaatit aalajangersimasunut atugassanngortitat aamma suliffeqarfiit imminnut pigisut Kalaallit Nunaanni angerlarsimaffeqartut, aammalu akunnittarfeqarnermik imaluunniit neriniartarfeqarnermik ingerlataqartut. Akileraartussaatitaanermi taamaallaat pineqarput taamatut ingerlataqarnikkut aningaasarsiat kiisalu pigisanik nalilinnik, inuussutissarsiutitut ingerlatami tassani atorneqartunik atorneqarsimasunilluunniit tunisaqarnermi, tunniussinermi imaluunniit piginnikkunnaarnermi iluanaarutit annaasalluunniit,"

2. § 3, imm. 1-imi nr. 7-ip kingornanut normutut nutaatut ilanngunneqassaaq:
"8) Peqatigiiffiit, suleqatigiiffiit, iluaqutissiuiffiit, aningaasaatit aalajangersimasunut atugassanngortitat aamma suliffeqarfiit imminnut pigisut Kalaallit Nunaanni angerlarsimaffeqartut, aammalu timersortarfinni neriniartarfeqarnermik ingerlataqartut."

 

3. § 14, imm. 3, litra a-mi oqaaseqatigiit aappaata kingornanut ilanngunneqassaaq:
"Aktianilli tunisaqarnermi annaasat taamaallaat ilanngaatigineqarsinnaapput, annaasat aktiat pineqartut iluanaarutitaannit, § 24, nr. 11a naapertorlugu akileraaruserneqartussaasimanngitsunit, aammalu iluanaarutisiarititanut ilanngaatigineqarsinnaasunut, tak. § 19, imm. 3, milliliissutaasimanngitsunit annertuneruppata."

4. § 19-imi imm. 2 - 5-itut ilanngunneqassapput:
"Imm. 2. Iluanaarutisiat ukiumi aningaasarsiorfiusumi kingullermi siusinnerusumiluunniit sinneqartoorutit ilaannit agguagarsiatut aktiaatilinnut, anpartiutilinnut, piginneqataassutilinnut ilaasortanulluunniit tunniunneqartut ukiup aningaasarsiorfiup siuliani aningaasarsianit akileraaruteqaataasussanit ilanngaatigineqarsinnaanerat Skatterådip akuersissutigisinnaavaa, matumani aamma piumasaqaatinik aalajangersaaffigisinnaavaa. Skatterådimut qinnuteqaat, nammineerluni nalunaarsuiffiup tunniunneqarneranut ilutigitillugu tunniunneqassaaq.
Imm. 3. Selskabit il.il. imm. 1-imi taaneqartut iluanaarutisianik § 24, nr. 11a naapertorlugu akileraarusigassaasimanngitsunik pissarsisimappata, iluanaarutisiarititat il.il. imm. 1 aamma 2-miittut ilanngaatigineqarsinnaasut iluanaarutisiatut akileraaruteqaataanngitsumik pissarsiarineqarsimasunik millilerneqassapput. Milliliineq ukiumi aningaasarsiorfiusumi iluanaarutisiat agguaanneqarfianni pissaaq. Milliliineq ukiumi aningaasarsiorfiusumi tassani tamakkiisumik pisinnaanngippat, ukiumilu siusinnerusumi iluanaarutisiatut agguaassanit ilanngaatigineqarsinnaanngippat ukiumut aningaasarsiorfiusumut kingusinnerusumut nuunneqassaaq.
Imm. 4. Selskabit il.il. imm. 1-imi taaneqartut iluanaarutisianik § 24, nr. 11a naapertorlugu akileraarusigassaasimanngitsunik pissarsisimasut, iluanaarutisiat annertussusiat kiisalu iluanaarutisiat taakku ilaat qanoq annertutigisut iluanaarutisiarititanut il.il. imm. 1 aamma 2-miittunut ilanngaatigineqarsinnaasunut milliliissutitut atorneqarsimaneri, imaluunniit aktianik tunisaqarnermi annaasanut, § 14, imm. 3, litra a, ikilisaatitut atorneqarsimaneri pillugit naatsorsuiffimmik nammineerluni nalunaarsuiffimmut ilanngussissapput.
Imm. 5. Imm. 3 aamma § 14, imm. 3, litra a naapertorlugit milliliineq tamakkiisumik pisimanngippat selskabimit pigisamit iluanaarutisiat sippuutaat ukiumi aningaasarsiorfiusumi, selskabip piginnittuusup atorunnaarsivinneqarfiani, imaluunniit kingusinnerpaamik piffissami selskabip piginnittuusup § 1 naapertorlugu akileraartussaatitaanerata kipinerani, imaluunniit § 3, imm. 1 naapertorlugu akileraartussanngorfiani, imaluunniit § 3, imm. 2 imaluunniit imm. 3 naapertorlugit akileraartussaajunnaarfiani selskabip piginnittuusup aningaasarsiaanut akileraaruteqaataasussanut ilanngunneqassapput."

5. § 24-mi nr. 11-p kingornanut normutut nutaatut ilanngunneqassaaq:
"11a) Selskabini nunani allani, matumani aamma Danmarkimi Savalimmiunilu, angerlarsimaffeqartuni aktiaatinit anpartiutinilluunniit iluanaarutisiat, selskabinit il.il. § 1, imm. 1, nr. 3, 4, 6, 7 aamma 9-mi taaneqartunit pissarsiarineqartut. Tamannali taamaallaat atuuppoq selskabip iluanaarutisianik pissarsisup, selskabip piginnittuusup, selskabimi iluanaarutisianik tunniussaqartumi, selskabimi pigineqartumi, aktiatigut anpartitigulluunniit aningaasaatit minnerpaamik 25 pct.-ii piffissami ataannartumi sivikinnerpaamik ukiumi ataatsimi, piffissallu taassuma iluani iluanaarutisianik agguaassiffiusimasussami pigisimappagit."

6. § 25 c-mi imm. 3-tut ilanngunneqassaaq:
"Imm. 3. Raajartassanik imaluunniit aalisariummik tunniussinermi kapitalimi uani kingoraarsisinnaanermik maleruagassat atorneqarsinnaanerat Skatterådip akuersissutigisinnaavaa, tunniussaqartoq aammalu aktie- imaluunniit anpartsselskabi tunniussiffigineqartoq § 1, imm. 1, nr. 1 aamma 3 naapertorlugit tamakkiisumik akileraartussaatitaappata. Taamaattorli raajartassanut aalisariummullu akiliutit tamarmiusut selskabimi tunniussiffigineqartumi aktiatut anpartitulluunniit akilerneqassapput."

 

§ 2

Inatsisartut inatsisaat ullormi 22. april 2003-mi atuutilerpoq.
Imm. 2. § 1, nr. 1 aamma 2 ukioq aningaasarsiorfiusoq 2004 aallarnerfigalugu atortuulissapput.
Imm. 3. § 1, nr. 3-miit nr. 5-imut ukioq aningaasarsiorfiusoq 2003 aallarnerfigalugu atortuulerput.
Imm. 4. § 1, nr. 6 ukioq aningaasarsiorfiusoq 2002 aallarnerfigalugu atortuulerpoq.

 

§ 3

Peqatigiiffinnut il.il. § 1, nr. 1 naapertorlugu akileraartussanngortunut imm. 2-6-imut aalajangersakkat ikaarsaarutaasut atorneqassapput.
Imm.2. Maskiinat, pequtit ingerlatsinermullu atortut assigisaasa, peqatigiiffiup il.il. akileraartussaatitaalernini sioqqullugu pigisaasa § 13 a naapertorlugu pissarsiarineqarneranni nalingattut nalikillilerneqarsinnaasutut atorneqartussat tassaapput ullormi 1. januar 2004-mi nalinginnaasumik niuernermi nalingat.
Imm. 3. Umiarsuit timmisartullu § 13 a naapertorlugu nalikillilerneqarsinnaasut, akileraartussaatitaalernerlu sioqqullugu pissarsiarineqarsimasut, ullormi 1. januar 2004-mi nalinginnaasumik niuernermi nalingat tunngavigalugu nalikillilerneqassapput.
Imm. 4. Illuutit atortullu ikkussorneqarsimasut § 13 a naapertorlugu nalikillilerneqarsinnaasut, akileraartussaatitaalernerlu sioqqullugu pissarsiarineqarsimasut imaluunniit inaarneqarsimasut, ullormi 1. januar 2004-mi nalinginnaasumik niuernermi nalingat tunngavigalugu nalikillilerneqassapput.
Imm. 5. Pigisanit imm. 2, 3 aamma 4-mi pineqartunit iluanaarutit annaasalluunniit naatsorsorneqarneranni pissarsiarineranni akit imm. 2, 3 aamma 4-mi aalajangersarneqarsimasut atorneqassapput.
Imm. 6. Aktiatigut, pisassarisatigut aamma akiitsutigut iluanaarutit annaasalluunniit naatsorsorneqarneranni pissarsiarineqarneranni akiviannut taarsiullugu ullormi 1. januar 2004-mi nalingat atorneqassaaq.

Namminersornerullutik Oqartussat, ulloq 10. april 2003

Hans Enoksen

/

Augusta Salling