Suliffissarsiuussisarnermut inunnillu isumaginninnermut Kalaallit Nunaanni inatsimmi nr. 580-imi, ulloq 29. november 1978-imeersumi § 2-p kingunerisaanik, tak. Suliassaqarfiit Kalaallit-nunaanni hjemmestyreqarnermut nuunneqarnissaannik inatsisit ilaasa atortuulersinneqarnerannik Kalaallit-nunaannut ministeqarfiup nalunaarutaa nr. 417, 27. september 1979-imeersoq, aalajangersarneqarput:

§ 1. Suliffeqarnermi innersuussisarneq paasineqassaaq suliffeqarnermi ineriartorneq siuarsarniarlugu nuna tamakkerlugu, illuinnaasiunngitsumik akeqanngitsumillu sullissinertut, taamatuttaaq sulisartut suliamut tunngatillugu nukittorsarneqarnissaat nunamilu nuttarsinnaanerat ilanngullugit.
Imm. 2. Suliffissamik innersuussisarneq paasineqassaaq suliffissarsiortup sulisitsisullu akornanni suliffeqarnermi pissutsit aalajangersimasut pilersinneqarnissaat siunertaralugu attaveqaqatigiissitsinertut.
Imm. 3. Suliffeqarnermi innersuussisarfiup suliassaraa inuussutissarsiutinit atorfinnillu assigiinngitsunit tamanit suliffissarsiortunut suliffissanik innersuussisarneq aamma sulisitsisinut sulisussanik innersuussisarneq. Taamatuttaaq suliffeqarnermi innersuussisarfiup ilinniagaqarnermut tunngasuni qinnuteqartunik siunnersuineq allaffissornikkullu aqutsineq suliassarai.
Imm. 4. Peqqussut sulinermut Kalaallit Nunaanni suliarineqartumut atuuppoq, tassunga ilanngullugit suliffissarsiortut Kalaallit Nunaanni suliffissarsiortut killilersimaarneqarnissaat pillugu Inatsisartut inatsisaat naapertorlugu nunatsinni sulisartutut isigineqartut.

Kommunalbestyrelsip suliassai

§ 2. Kommunalbestyrelsip suleqataalluni suliffeqarnermut tunngasutigut ingerlatsinerminnut ilanngullugu
1) Kommunimi suliffeqarnermi ineriartorneq malinnaavigissavaa,
2) Kommunimi iliuusissanik inuussutissarsiornerup ineriartortinneqarneranut suliffissaqartitsinermullu pingaarutilinnik aallartitsisarnissamut tunngavissat pilersissavai suliniutigisassallugillu, kiisalu
3) Kommunimi suliffeqarneq pillugu paasissutissat katersussavai nalilersorlugillu, paasissutissallu tamakku Naalakkersuisunut nalunaarutigisassallugit.
Imm. 2. Imm. 1, nr. 3 naapertorlugu Naalakkersuisut nalunaarutiginnittarneq pillugu erseqqinnerusunik malittarisassanik aalajangersaasinnaapput.

§ 3. Kommunalbestyrelsi pisussaavoq kommunimi suliffeqarnermi innersuussisarfissaqartitsissalluni, taamatuttaaq suliffissanik innersuussisarnermik aamma ilinniartitaanernut inuussutissarsiutinullu ilitsersuuisarnernik aaqqissuussissalluni, §§ 5 B 9 takukkit.
Imm. 2. Kommunalbestyrelsip kommunimi suliffissaqartitsineq pillugu kisitsisitigut paasissutissat Naalakkersuisunut nalunaarutigisassavai.
Imm. 3. Naalakkersuisut kommunalbestyrelsip kisitsisitigut paasissutissanik il.il. nalunaaruteqartarnera pillugu malittarisassanik aalajangersaasinnaapput.

§ 4. Kommunalbestyrelsip sulissutigissavaa kommunimi suliffeqarnermi illuatungeriit pisortallu ingerlatsiviisa akornanni tatigeqatigiiffiusumik qanittumillu suleqatigiinnermik pilersitsisoqarnissaa, taamaalilluni sulisartut ineriartortinneqarnerannut suliniuteqarnissamut tunngavissaqalissammat, siunissami qaninnermi ungasinnerusumilu inuussutissarsiortut pisariaqartitaannut kommunimilu inuussutissarsiutit ineriartortinneqarnerannut periarfissanut tulluussakkanik.
Imm. 2. Kommunalbestyrelsi kommunimi sulisartut piginnaasaasa nukittorsarneqarnissaannut suliffissaqartitsinermut tunngatillugu iliuusissanik aallartitsinissamut siunnersuusiussaaq.
Imm. 3. Kommunalbestyrelsi suliffissaqartitsinermut tunngatillugu aamma/ imaluunniit ilinniartitaanermut tunngatillugu immikkut neqeroorutinik inuusuttunut 25-t ataallugit ukiulinnut sammisitanik aallartitsissaaq.
Imm. 4. Naalakkersuisut suliffissaqartitsinermut tunngatillugu iliuusissat pillugit maleruagassannik aalajangersaasinnaapput.

Inuussutissarsiutinut ilinniartitaanernullu ilitsersuisarneq kiisalu suliffissanik innersuussisarneq

§ 5. Kommunalbestyrelsi suliffissarsiortunut inunnullu piginnaanngorsaanerup ingerlaneranut imaluunniit inuusuttut kiffartuussinerannut peqataasunut ataasiakkaanut iliuusissanut pilersaarusiussaaq.
Imm. 2. Inuussutissarsiutinut ilinniartitaanernullu ilitsersuinermut ilaapput inuussutissarsiummik ilinniartitaanermillu toqqaaniarnermi ikiorsiinerit.
Imm. 3. Kommunalbestyrelsi Inatsisartut peqqussutaat manna malillugu kommunalbestyrelsip suliassaasa allaffissornikkut aqunneqarnerannut ilitsersuisarfimmik suliffeqalernissamullu piareersarfimmik pilersitsisinnaavoq.
Imm. 4. Kommunalbestyrelsi inuussutissarsiutinut ilinniartitaanernullu ilitsersuinerup kiisalu suliffissanut innersuussisarnerup inernera pillugu Naalakkersuisunut nalunaaruteqarnissamut pisissaaffeqarpoq.
Imm. 5. Naalakkersuisut pissutsit imm. 2-4-mi taaneqartut piviusunngortinneqarnissaannut malittarisassanik aalajangersaasinnaapput, taamatuttaaq qitiusumik ilitsersuisarfiit suliffeqalernissamullu piareersarfiit pilersinneqarnerannut ingerlanneqarnerannullu tapiissuteqartarneq pillugu malittarisassaliorsinnaallutik.

§ 6. Suliffissamik innersuussisoqartinnagu akissarsiat aamma sulinermi atorfinitsitaanermilu atugassarititaasut allat pillugit paasissutissat pissarsiarineqassapput.

§ 7. Suliffissamik innersuussineq najukkamiit allamut nuunnermik kingunilik pissappat piumasaqaataavoq,
1) nuunneq suliffeqarnermi najukkami suliamullu tunngatillugu pisariaqartitanik naliliineq aallaavigalugu kissaatigineqartutut isigineqassasoq,
2) suliffissarsiortoq akuersisimassasoq,
3) innersuunneqartoq angallanneqarnermut pisattanillu nuussinermut aningaasartuutissinneqassanngitsoq, aamma
4) innersuunneqartoq inissaqartinneqassasoq.
Imm. 2. Naalakkersuisut aningaasartuutit imm. 1, nr. 3-mi taaneqartut matussutissaannut tapiissuteqarsinnaapput. Naalakkersuisut tamakku pillugit malittarisassanik erseqqinnerusunik aalajangersaasinnaapput.

§ 8. Sulisussanik sulisitsisumut imaluunniit suliffeqarfimmut innersuussisoqarsinnaanngilaq sulisartut kattuffiannit soqutigisaqaqatigiiffimmilluunnit allamit uppernarsaatit sukumiisut malillugit sulisartut suliumajunnaarneranni imaluunniit sulisitsisut mattussineranni eqqugaasumut, tamanna isumaqatigiissutinut akerliusutut nalilerneqarsimanngippat.

§ 9. Atorfimmut inuttaqanngitsumut sulisussamik naleqquttumik innersuussisoqarsinnaagaangat tamanna pillugu kommunalbestyrelsi sulisitsisumut nalunaaruteqartassaaq.
Imm. 2. Sulilernissaagaluaq piviusunngunngitsoorpat sulilernerluunniit aallartikkaluaannaq taamaatitinneqarpat sulisitsisoq pisussaavoq tamanna pillugu kommunalbestyrelsimut piaartumik nalunaaruteqassalluni taamatullu tamatumunnga pissutaasoq nalunaarutigissallugu.
Imm. 3. Sulisitsisoq sulisussanik innersuunneqartunik itigartitsisoq angallanneqarnermut pisattallu nuunnerinut aningaasartuutigineqarsimasunik utertitsilluni akiliisussaatitaavoq, sulisussanik allanik sulilersitsineq itigartitsinermut pissutaasimappat sulisitsisorlu kommunalbestyrelsimut piffissaagallartillugu suliffigiligassamut angalanerup pinngitsoortinneqarsinnaasimagaluarneranik ilisimatitsissuteqarsimanngippat.

Aalajangersakkat assigiinngitsut

§ 10. Naalakkersuisut nuna tamakkerlugu suliffissanik nalunaarsuivimmik pilersitsisinnaapput, suliffissanik neqeroorutit, suliffissaaleqinermik allaffissornikkut aqutsinerup aammalu kisitsisitigut paasissutissiornissat nalilersuillunilu misissueqqissaarnissat siunertaralugit tunngaviusumik paasissutissat katersorneqarfigisinnaasaannik suliareqqinneqarfigisinnaasaannillu.
Imm. 2. Naalakkersuisut imm. 1 malillugu suliffissanik nalunaarsuiffiup pilersinneqarnissaa pillugu malittarisassanik aalajangersaasinnaapput, taamatuttaaq suliffissanik nalunaarsuiffiup atornissaanut kommunalbestyrelsip pisussaaffii pillugit malittarisassaliorsinnaallutik.

§ 11. Naalakkersuisut kommunini sulisunik suliffeqarnermi innersuussisarnermik il.il. suliaqartunik ukiumoortumik pikkorissartitsisassapput.
Imm. 2. Naalakkersuisut kommunalbestyrelsinut qinersisoqareernerani tamatigut kommunalbestyrelsimut ilaasortanut peqqussummi matumani pineqartunik suliassaqartitaasunut pikkorissartitsisassapput.
Imm. 3. Imm. 1 aamma 2 naapertorlugit pikkorissartitsinernut aningaasartuutit Nunatta Karsianit kommuninillu akilerneqartassapput.

§ 12. Naalakkersuisut suliassaqartitsinermik siuarsaaniarluni iliuutsinut aamma inuusuttut kiffartuussinerinut tapiissuteqarsinnaapput, takukkit § 4-imi imm. 2 aamma 3. Tapiissutit annertussusissaat ukiumoortumik aningaasanut inatsisini aalajangersarneqartassapput.
Imm. 2. Naalakkersuisut tapiissutit agguaanneqartarnerinut akiliutigineqartarnerinullu maleruagassanik aalajangersaasinnaapput.

§ 13. Naalakkersuisut suliffissaaleqinerup akiorneqarnissaa kiisalu suliffeqarnermi innersuussisarnerup pisariillisaavigineqarnissaa ineriartortinneqarnissaalu siunertaralugit misileraanerit pillugit malittarisassanik aalajangersaasinnaapput.

§ 14. Naalakkersuisut ukiumi qaangiuttumi suliffeqarnermi suliniutaasut aamma piffissami aggersumi anguniagaasut taamatuttaaq malitseqartitsinissat aallartinneqassanersut pillugit ukiumoortumik nalunaarusiortassapput.

Naammagittaalliuuteqartarneq

§ 15. Kommunalbestyrelsip aalajangiinerinik naammagittaalliuutit sapaatit akunneri sisamat qaangiutsinnagit Naalakkersuisunut suliassanngortinneqarsinnaapput.

§ 16. Inatsisartut peqqussutaat manna ulloq 1. januar 2004-mi atuutilissaaq. Tamatumunnga peqatigitillugu Suliffissarsiuussisarneq pillugu Inatsisartut peqqussutaat nr. 11, 16. december 1988-imeersoq atorunnaarsinneqassaaq.
Imm. 2. Kalaallit Nunaanni ilinniarnermut inuutissarsiutinillu ilitsersuineq pillugu Namminersornerullutik Oqartussat nalunaarutaat nr. 5 3. september 1982-imeersoq ingerlaannassaaq Inatsisartut peqqussutaata matuma malitsigisaanik allanngortinneqarnissami atuukkunnaarsinneqarnissamiluunniit tungaanut.
Imm. 3. Malittarisassat suliffissarsiuussisarneq pillugu Inatsisartut peqqussutaat nr. 11, 16. december 1988-imeersup malitsigisaanik aalajangersarneqartut ingerlaannassapput, Inatsisartut peqqussutaata matuma malitsigisaanik allanngortinneqarnissanik atuukkunnaarsinneqarnissamilluunniit tungaanut.

Namminersornerullutik Oqartussat, ulloq 18. december 2003

Hans Enoksen

/

Johan Lund Olsen